Tomong Betom Yɛsu 14
14
BeBulus e Ikonyum
1E repomô Ikonyum, Bulus na Barnabas yɛn a wɔ̀ yel e duk re fongôl BeYuda, sede remo de ba tɔ́k ɛn mɛ̀. Há de yɛn a ha mo ha vɔk reto tyɔng wɛt, ha pere wɔ̀ tɛ̀ BeYuda na bemât yére dyuk pyak ba tɛ́ ɛn bemat-raa. 2Ko bwang BeYuda de ba kyɛ́ ɛn nà sey tsak o mo ba tɔgɔs bemât yére dyuk, ko ba sow a yɛn sɔng e jim, yaga na yɛn a ra repugu na bemat-raà Yɛsu. 3Bulus na Barnabas yɛn a ros e hwomo; yɛn a ha a bemat na yey ting e ra Darwey, yɛ de e dura a bemat nerat mɛ. Ko Darwey o a dura a bemat wɔgɔ, há de BeBulus o ba sé shara ha sé tsak o. A dura ano yi na pyɛ̂ langat na pyɛ̂ bes de yɛn a ra yi na reto de a ga nɔng ɛn. 4Bemât repomo mo ba gas ɛn zang ba: Behak ba raa BeYuda, ko behak ba raa betom Yɛsu.
5A vane ano, bemât yére dyuk, na BeYuda, mwa na bemât nuyel mɛn yɛn a man nu na yɛn a tak a BeBulus o reyɔm, na be tó ɛn na beta na be mɔbɔs hɛn. 6Jeng de betom Yɛsu mo ba wok hywɛ́ mo, yɛn a tele vɔk e bapomô Listira na Dɛrbɛ e sevwêl Likawonya, ko yɛn a kyě kyè e nebapomo de na gwɔrɔ vɛ. 7Yɛn a re nuyel na sharâ Yɛgɛt Yat e hwomo.
BeBulus e Listira na Dɛrbɛ
8E repomô Listira, mwat hwak á sɛ̀ de á sè nà bol; yimo e tɔ́ mɛ a ga sang mara kwɛngɛl wɛt. 9Yɛ mwat o a wok pyɛ de Bulus a sé ha. Sede Bulus a bɛrɛng hɛ gbir, a di, mwat o a ga sey tsak o, bê tɔk tɛ̀ ɛ tyang. 10Yaga ano, a ye ngyat, a yang ɛ, “Sogo e tumal!” Mwat o a gyili e tumal, ko a hwo kyě kyè. 11Sede bagyɛng bemat de ba sé e hwomo ba di pyɛ de Bulus a ra mo, yɛn a gbɔ na relêm BeLikawonya, ba ye, “Bedagwi ba ga gyirik vey na wot e ji babêk bemasi!” 12Yɛn a yila Barnabas, à Zeyus, ko yɛn a yila Bulus, à Hɛrmɛs, yaga e yɛ wɛ de a sé mwât nuyêl há mo.#14:12 Hɛrmɛs na Zeyus: Ba sé bazâ bedagwî BeGirik. Hɛrmɛs á sè tom bemɛn ko Zeyus á dal bwang o na nerey. 13Duk sekwît Zeyus wa sé bagat e mâ repomo mo. Ko gwɔ̀m sekwit o a vey na bemus tanga yerê bèlɛlɛ de ba yong na bejamuk e ruhûp repomo, ko a ye, yɛ na mwa bemat o yɛn e simo be nára vɛ sede nenɔrɔ̂ yas vɔk na BeBulus o.
14Jeng de Barnabas na Bulus yɛn a wok ano, yɛn a hama berugu mɛn, yɛn a tele vɔk e tê regyɛng bemat o, yɛn a gbɔ, ba tē, 15“À besa, yaga sɛ́ de yin a sé ra ano arɛt? Wot a sé bemasi zɔng tyɛng sede yin arɔng! Wot a vey shara a yin Yɛgɛt Yat, yaga na yin a doyo neyey min yi e de ragâs sekwit de sa vɔk nerat nehak wɛt, na yin a raa Dagwi de a vɔk neken. A sé e yɛ wɛ de à kana yong lagwi, na jey, na gworep, tanga mwa pyɛ́ de ya sé e ji yɛ̄. 16A raane, à simo a mwa yére bemât jey ye raa begwong de ba jam a yɛ̄. 17Ko kayɛ jeng, nerat de e ragas ne dúsa a bemat, yɛ wɛ a sé Dagwi. A sé e yɛ de e tɛ̀sɛ rwak wo rop, ko e nɔngɔs hin pyɛ̂ hwiri e jeng yɛ̄ detidetu; e nɔngɔs hin pyɛ̂ re, ko e tɛ̀sɛ neyey min ne pɛngɛ arɔng.” 18Mwa ano de betom Yɛsu mo ba ha a yɛn neha nemo, a sé a yɛn gbang tyɔng wɛt na yɛn a dul regyɛng bemat o nà nára a yɛn nenɔrɔ̂ yas de be yɛt.
19Ko BeYuda behak ba yi e Antyokya wo Pisidya na Ikonyum. Yɛn a hwo hwɔtɔ nehywɛ bemat o na be raa há mɛn, ko yɛn a tó Bulus na beta. Ko ba hwɔlɔ hɛ vɔk e bamâ repomo, yaga yɛn a bare, a ga ku. 20Ko jeng de bemat-raa ba wɔ́ e dem de Bulus o á sè ɛ̀, yɛn a gwɔrɔ hɛ, ko a hwo sogo, a to kyè wɔ̀ yel e ji repomo mo. Tuk het, yɛ tanga Barnabas yɛn a hàla repomo mo vɔk e Dɛrbɛ.
BeBulus ba to ɛn vɔk e Antyokya wo Sirya
21Bulus na Barnabas yɛn a shara Yɛgɛt Yat e repomô Dɛrbɛ, ko yɛn a tɛ̀ bemat pyak be tɛ́ ɛn bemat-raà Yɛsu. E bama mo, yɛn a to ɛn e Listira, na Ikonyum, na Antyokya wo Pisidya. 22E kahɛ kwɔn de yɛn a wɔ́, yɛn a gwɛsɛ a bemat-raa gap, ko yɛn a shonong e ra yɛn na yɛn a re nuyel na yey ting e gwông raa. Yɛn a yang ɛn, “A sé gbing-gbing na wot a sɔ reyɔm detidetu gyam na wot a de yel e Segwɔm Dagwi.” 23E kawɛ ekilisiya, yɛn a kasa a yɛn bemakuk. E bama de yɛn a ra won, na be tik rê pyɛ́ arɔng, yɛn a tik ɛn e vwɔ̂ Darwey, de bemat o ba tɛ̀ gap mɛn e ra yɛ.
24Yɛn a sogo, ko yɛn a kwey e sevwêl Pisidya wɔ e sevwêl Pamfilya. 25Ko jeng de yɛn a ha a bemat rehâ Dagwi e repomô Pɛrgɛ, yɛn a gyirik vɔk e repomô Ataliya. 26Yi e hwomo, yɛn a yel e dwa-nshi, ko yɛn a to ɛn vɔk e Antyokya wo Sirya. Á sè kwɔn a hane de bá kana tik ɛn e vwɔ̂ Dagwi na a dura a yɛn nerat mɛ e de ragâs fwom de yɛn a mɛsɛ̂ng yɛnɛ gwɛ.
27Jeng de yɛn a wul e hwomo, yɛn a yila bemât ekilisiya na be wɔ̀ tula hɛn. Yɛn a ha a yɛn e ra pyɛ̂ mwa de Dagwi a ga ra yi na yɛn. Ko yɛn a ha a yɛn, Dagwi a ga wunta a bemât yére dyuk gwong na be tɔk sey tsak o na yɛ arɔng. 28Yɛn a ros e hwomo na bemat-raa mo.
Iliyochaguliwa sasa
Tomong Betom Yɛsu 14: bomBI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
