Tomong Betom Yɛsu 15
15
Tulâ betom Yɛsu na bemakuk e Yɛrusalɛm
1E jeng yane mo, bemat behak ba vey yi e Yudiya vɔk e repomô Antyokya. Yɛn a hwo basa a begwa mɛn bemat-raa wɔgɔ, “Ka sede ba tānga wɔ́ a yin e cwɛl wɛt tyɛng na negwɔn de Mose à kana basa, ko Dagwi ê tɔk sey neken min wɛt.” 2Há hemo ha vey na há pep tyɔng wɛt, ko Bulus na Barnabas yɛn a tó cuna na bemat vane mo e ra hɛ ding-ding. Yaga ano, bemat-raa ba kasa Bulus na Barnabas o tanga behak e ji bemat-raa mo, ko ba tomo hɛn vɔk e Yɛrusalɛm, yaga na be wɔ̀ di betom Yɛsu tanga bemakûk ekilisiya e ra há mo.
3Ano kwong, bemât ekilisiya mo ba tɛ̀ ɛn e gwong. E ji kwɛngɛl mɛn o, yɛn a kwey e bavwêl Finikya na Samariya, ko yɛn a ha a bemat e bavwel o wɔgɔ, bemat de ba sé BeYuda wɛt, yɛn arɔng ba ga tɛ́ ɛn bemat-raà Yɛsu. Há hemo ha tɛ̀ mwa begwa mɛn bemat-raa ba vɔk yey pyɛng sizɔng. 4Jeng de yɛn a wul Yɛrusalɛm, bemât ekilisiya, mwa na betom Yɛsu, tanga bemakuk ba sey ɛn na yey pyɛng. Ko BeBulus o kwong yɛn a ha a yɛn kayɛ pyɛ de Dagwi a ga ra yi na yɛn. 5Ko bemat-raa behak de ba sé vê BeFarisi yɛn a sogo, ba ye, “A sé gbing-gbing na be wɔ́ a bemat-raa vê yére dyuk e cwɛl, na be tɛ̀ ɛn be gyenges Badu Mose arɔng.”
6Betom Yɛsu na bemakûk ekilisiya ba man na be tɔrɔng e ra há mo. 7E bama de yɛn a ga tɔrɔng ding-ding e ra hɛ, Bitrus a sogo na a ha na yɛn, a ye, “À begwa, yin a tɔk, e jeng de yá kwey, Dagwi á kana kasa me e tē min, na me shara a bemât yére dyuk Yɛgɛt Yat, yaga na be wok yɛ̄, na be sey tsak o na Yɛsu arɔng. 8Dagwi, yɛ de a tɔk neyey bemât mwa, á nɔng ɛn Gabik Jɛrɛ mɛ, tyɛng sede remo de á kana nɔng ot. Nɔrɔ hane há dura, yɛ á sey ɛn sede bemɛ. 9Yaga yɛn á sey tsak o na yɛ, á tɛ̀ neyey mɛn ne sè jɛrɛ. Ano, á dura kasa hak e tē mot de wot a sé BeYuda na yɛn de ba sé vê yére dyuk wɛt. 10Ko di, yaga sɛ́ de yin e simo na yin a mara Dagwi arɛt? Yaga sɛ́ de yin e simo yin a tɛ̀ a bemat-raa swesêk vɔk berɔndɔng yerê yemo de wot kɛ bedabeda mot wot á tɔk jut yɛ wɛt arɛt? 11Yin ra ano wɛt! Wot BeYuda, wot a sey tsak o, Dagwi a sey neken mot yi na nerat de Darwey Yɛsu a dura a wot, ko a sey neken mɛn e gwong gwining o arɔng.”
12Mwa bemat de ba sé e de tula mo ba sǎ yuu, ko yɛn a sé wokos neha Barnabas na Bulus jeng de ba sé ha há e ra gwong de Dagwi a ga ra fwom yi na yɛn. A ga tɛ̀ ɛn, be ra pyɛ̂ langat na pyɛ̂ bes e tê bemât yére dyuk. 13Sede yɛn a yɛnɛ há mo, Yakɔp a hanat, a ye, “À begwa, wok in há hom! 14Simɔn Bitrus a sé mɛsɛ̂ng misang a wot gwong de Dagwi a dura a bemât yére dyuk tɛ̂ yey mɛ. A dura ano yi na kasâ bemat e tē mɛn na be sè bemɛ. 15Ko jeng de bezarap Dagwi yɛn à kana ha neha mɛn, ko neha mɛn o nà sè e ra pyɛ́ yemo mo arɔng, sede remo de bà jɛk wɔgɔ,
16“ ‘E bamâ pyɛ́ yemo, ma rɔda toyo,
ko mê to lɔk lɔ̂ Davit de hà kana gaba.
Ma rɔda to lɔk barîn lɔ mo na he to sè lɔ rat.
17Mê ra ano, yaga na bwang bemasi be bin jāma me,
yɛn vɛ à mwa yére bemât jey de ma kana kasa na be sè benang.
18A sé ano de Darwey Dagwi a sé ha,
womo de à kana dura a wot pyɛ́ yemo yimo gyam.’ ”
19Yakɔp o a re nuyel na ha, a ye, “E di hom, ê sè naka na wot a tɛ̀ a bemât yére dyuk de ba tɛ́ ɛn bemat-raa pyɛ negbang wɛt. 20Tik na wot a jɛk a yɛn bwok-rwang, na wot a dura a yɛn pyɛ́ de bê raa. Pyɛ́ ma yet ngan: Be re pyɛ́ de ba yɛrɛ yaga sekwit wɛt; be ra nejwang wɛt; be re namâ pyɛ de ba tik nà shushu nemî yɛ wɛt; be re nemi arɔng wɛt. 21Yaga yimo gyam vey e remo, ba shara a bemat neha Mose e karɛ repomo, ko kahɛ Tuk Shábat ba sé basa nɛ e ji beduk re fongol.”
Bwok-rwang vɔk na bemat-raa vê yére dyuk
22Ano kwong, betom Yɛsu, na bemakuk, tanga mwa bemât ekilisiya mo yɛn a yong ɛ̀ na yɛn a kasa bemat behak yi e tē mɛn, na be tomo hɛn tanga Bulus na Barnabas wɔ e Antyokya. Bemat de ba kasa mo yɛn vɛ, à Yuda de ba to tang ɛ, à Barsabas, na Silas; yɛn á sè bemat de mwa bemat-raa ba nɔngɔs hɛn nerey. 23Bwok-rwang de ba tomo hɛn mɛ̀ mo ba jɛk gwɛ ngan:
Bwok-rwang gwomo yi e vɔ betom Yɛsu tanga bemakûk ekilisiya de wot a sé begwa min,
Vɔk na yin bemat-raa de yin a sé vê yére dyuk e repomô Antyokya tanga e bavwêl Sirya na Kilikya:
Show in pyak.
24Wot a wok, bemat behak de ba nusu yi e ji mot ba ga wɔ̀ bɔrɔk hin, ba ga to shɔk a yin yey na pyɛ de yɛn a ha a yin. Ko a sé e wot de wot a tomo hɛn na be ra ano wɛt. 25Yaga ano, wot a man mwa hot, ko wot a yong ɛ̀, wot ê kasa bemat behak na wot a tomo hɛn vey na yin. Yɛn ê vey tanga besâ yey mot Barnabas na Bulus, 26vemo de bá kana ye waa a neken mɛn, yaga yɛn á ra a Darwey mot Yɛsu Kristi fwom. 27Ano kwong, wot a sé tomo a yin na Yuda tanga Silas; yɛn vemo mo ba rɔda ha a yin há de ha sé hining na pyɛ de wot a jɛk e bwok-rwang gwomo. 28Pyɛ de ya jam a Gabik Jɛrɛ, de ya to jam a wot arɔng yɛ à yet ngan: Wot e simo na wot a to tɛ̀ a yin pyɛ nedirik cak wɛt sɛ̌ badu de a sé gbing-gbing na yin a raa vɛ. Badu ma vemo ngan: 29Yin re pyɛ́ de ba yɛrɛ yaga sekwit wɛt; yin re nemi wɛt kɛ namâ pyɛ de ba tik nà shushu nemî yɛ; yin ra nejwang arɔng wɛt. Ka sede yin a gyeng bato min yi e pyɛ́ yemo, ko yin ê ra naka.
Tala ma hane.
30Ba tɛ̀ bemat de ba tomo hɛn o e gwong, ko yɛn a kyè vɔk e Antyokya. Jeng de yɛn a wul hwomo, yɛn a tula mwa bemât ekilisiya, ko yɛn a nɔng ɛn bwok-rwang o. 31Sede bemat-raa mo ba basa gwɛ, yɛn a vɔk yey pyɛng, yaga há mo ha gwɛ̌ a yɛn gap. 32Yuda na Silas, yɛn de ba sé bezarap Dagwi, yɛn a ha na bemat-raa mo na neha pyak, na be gwɛ̌ a yɛn gap, na be to tɛ̀ ɛn be tumal gak. 33Yɛn a sangal e hwomo yaga jeng. E bama mo, bemat-raa mo ba tɛ̀ ɛn e gwong, ba yang ɛn kala, yaga na be to ɛn vɔk e Yɛrusalɛm e kwɔ̂n vemo de bá kana tomo hɛn. [ 34Ko Silas a yong ɛ̀ na a nàra e hwomo.]
35Bulus na Barnabas, yɛn a ka nàra e Antyokya yaga jeng. Yɛn na bemat o behak pyak yɛn a basa a bemat rehâ Darwey, ko yɛn a to shara rɛ arɔng.
Bulus na Barnabas yɛn a gas ɛn
36E bamâ jeng, Bulus a yâng Barnabas, “Tik na wot a toyo, na wot a wɔ̀ di begwa mot bemat-raa e karɛ repomo de wot á kana basa a yɛn rehâ Darwey, yaga na wot a di gwong de yɛn a sé re nuyel.” 37Barnabas a simo a vɔk ɛ̀ Yohana de ba to tang ɛ, à Markus wɔ e hwomo. 38Ko Bulus a bare, a jam na be vɔk ɛ wɛt, yaga e jeng de yɛn á kana sè e Pamfilya, á tik kwɛngɛl na yɛn, ko á hàla fwom o gyam na be yɛnɛ gwɛ. 39Yɛn a hwo tow nu e ra há mo sizɔng, ko e yɛnɛ mo, yɛn a gas kwɛngɛl mɛn o. Barnabas a jut Markus, ko yɛn a yel e dwa-nshi, yɛn a kyè vɔk e rezîk Kipirus. 40Ko Bulus a kasa Silas na a raa hɛ. Bemat-raa ba tɛ̀ ɛn e vwɔ̂ Darwey na a dura a yɛn nerat mɛ. 41A hwo kwɛngɛl mɛ, ko a kwey e bavwêl Sirya na Kilikya. E kahɛ kwɔn, a tɛ̀ bemât be-ekilisiya mo be tumal gak e ji gwông raa.
Iliyochaguliwa sasa
Tomong Betom Yɛsu 15: bomBI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
