ᐁᑭᓴᑕᔅ 21
21
ᑫᑑᑕᐎᑣᐸᓐ ᐅᐸᒦᑖᑫᒃ
1ᒦᑕᔥ ᐅᓄᐌᓂᐗᓐ ᐅᓇᔓᐌᐎᓇᓐ ᑫᐅᓇᑕᒪᐗᑣ ᐃᔅᕒᐃᔭᓬᐊᒃ; 2#Lev 25.39-46. ᑮᔥᐱᓐ ᐊᑖᐌᔦᒃ ᐄᐸᕒᐆ ᐅᐸᒦᑖᑫ, ᓂᑯᑣᓱ ᐱᐴᓐ ᐃᓴ ᑭᑲ ᐸᒦᑖᒃ᙮ ᓃᔣᓱ 7 ᐱᐴᓐ ᑕᔥ ᐃᔑᓭᓂᒃ ᒦ ᐃ ᒋᐸᑭᑎᓇᒡ ᒋᒫᒑᒡ ᒋᑎᐯᓂᑎᓱᒡ, ᑳᐐᓐ ᑫᑰᓐ ᒪᒪᔦᒡ ᒋᑎᐸᐊᒪᐎᒃ᙮ 3ᑮᔥᐱᓐ ᐐᐎᓯᒃ ᐊᐲ ᑳᑮ ᐅᑎᓯᑭᐸᓐ, ᐊᐲ ᑕᔥ ᐅᒋᒋᓭᓂᒃ ᐱᓵᓐ ᒋᒫᒑᒡ ᒋᑎᐯᓂᑎᓱᒡ, ᒦ ᓴ ᐃ ᑫᔑ ᒥᒋ ᐯᔑᑯᒡ᙮ ᑮᔥᐱᓐ ᐃᑕᔥ ᐐᓐ ᑳᐐᐎᐸᓐ, ᒦ ᓴ ᐃ ᑫᔑ ᒫᒌᓈᒡ ᐐᐗᓐ ᐊᐲ ᐅᒋᒋᓭᓂᒃ ᐱᓵᓐ ᒋᒫᒑᒡ ᒋᑎᐯᓂᑎᓱᒡ᙮ 4ᑮᔥᐱᓐ ᐃᑕᔥ ᐅᑑᑭᒫᒪᓐ ᒦᓂᑯᒡ ᐃᑴᐗᓐ ᒋᐐᐎᒡ, ᐅᑎᓈᒡ ᐃᐃᒫ ᐃᑴᕽ ᐅᑯᓯᓴᐞ, ᐅᑖᓂᓴᐞ ᑲᔦ, ᐅᑑᑭᒫᒪᓐ ᐃᓴ ᐅᑲ ᑎᐯᓂᒫᓂ ᐃᓂ ᐐᐗᓐ, ᐅᓃᒑᓂᓴᐞ ᑲᔦ᙮ ᐐᓐ ᐃᓴ ᐁᑕ ᐊᐊ ᐃᓂᓂ ᑕᒫᒑ ᒋᑎᐯᓂᑎᓱᒡ᙮ 5ᑮᔥᐱᓐ ᐃᑕᔥ ᐊᐊ ᐅᐸᒦᑖᑫ ᐃᑭᑐᒡ, ᓂᓵᑭᐋ ᓂᑑᑭᒫᒻ, ᓂᐐᐤ, ᐃᑭ ᑲᔦ ᓂᓃᒑᓂᓴᒃ, ᑳᐐᓐ ᓂᐐ ᒫᒑᓰ᙮ 6ᐅᑑᑭᒫᒪᓐ ᐃᓴ ᑕᔥ ᐅᑲ ᐃᔑᐎᓂᑰᓐ ᐁᔑᐊᔮᓂᒡ ᐅᑎᐹᑯᓂᐌᓐ᙮ ᒦᔥ ᒌᔑᐎᓂᓐᒡ ᐃᔥᒀᑌᕽ ᐁᔑ ᐸᑕᑭᓱᓂᒡ ᐃᔥᒀᑌᒫᑎᑰᓐ ᐃᐃᒫ ᐊᔑᒡ ᒋᔑ ᐸᑯᓀᑕᐗᑫᐅᓐᒡ ᒥᑰᔅ ᒋᐋᐸᑕᓂᓂᒃ᙮ ᒥᓂᒃ ᐃᑕᔥ ᐃᑯ ᑫᐱᒫᑎᓯᒡ ᐅᑲ ᐸᒦᑕᐙᓐ ᐅᑑᑭᒫᒪᓐ᙮
7ᑮᔥᐱᓐ ᐃᓴ ᐃᓂᓂ ᐊᑖᐙᑫᒡ ᐅᑖᓂᓴᓐ ᒋᐸᒦᑖᑫᓂᒡ, ᐊᐊ ᓴ ᐃᑴ ᑳᐐᓐ ᐸᑭᑎᓈᓰ ᒋᒫᒑᒡ ᒋᑎᐯᓂᑎᓱᒡ ᑖᐱᔥᑰ ᑳᑑᑕᐎᒥᓐᒡ ᐃᓂᓃᐎ ᐸᒦᑖᑫᐞ᙮ 8ᑮᔥᐱᓐ ᐃᑕᔥ ᐊᐊ ᐃᑴ ᒥᓍᐸᒥᑯᓯᒃ ᑳᑮ ᐊᑖᐙᓂᑯᒡ ᑳᑮ ᐅᑖᐱᓂᑯᐸᓐ, ᒦᔥ ᐱᓵᓐ ᒋᐸᑭᑎᓂᓐᒡ ᒋᑮᐌ ᐊᑖᐙᓂᑯᒡ ᐅᑌᑌᓐ᙮ ᐃᓂ ᓴ ᑳᑮ ᐊᑖᐙᓂᑯᐸᓐ ᑳᐐᓐ ᑕᐃᔑᓈᑾᓯᓂᓂ ᒋᐊᓂᑫ ᐊᑖᐙᑳᓂᑯᒡ ᐃᐃ ᑳᒪᔭᑭᓯᓂᒡ ᒋᑎᐯᓂᒥᑯᒡ ᐅᓵᒻ ᐄᑐᒃ ᑳᐐᓐ ᐌᐌᓂ ᐅᑮ ᑑᑖᑯᓰᓐ᙮ 9ᑮᔥᐱᓐ ᐃᓴ ᐃᓂᓂ ᐊᑖᐌᒡ ᐃᑴᐎ ᐅᐸᒦᑖᑫᓐ ᐁᐐ ᒦᓈᒡ ᐅᑯᓯᓴᓐ ᒋᐐᐎᓂᒡ, ᒦ ᓴ ᐃ ᑫᑑᑕᐙᒡ ᑖᐱᔥᑰ ᐅᑖᓂᓴᓐ ᑳᑑᑕᐙᒡ᙮ 10ᑮᔥᐱᓐ ᐃᑕᔥ ᐃᓂᓂ ᐐᑎᑫᒫᒡ ᑯᑕᒃ ᐃᑴᐗᓐ, ᒦ ᓴ ᑯ ᐃ ᐯᔑᑾᓐ ᑫᑑᑕᐙᒡ ᐃᓂ ᓂᑕᒻ ᑳᑮ ᐐᐎᒡ ᒋᐊᔕᒫᒡ ᒦᒋᒻ, ᑲᔦ ᒋᒦᓈᒡ ᑫᑭᑭᔥᑲᒥᓂᒡ᙮ ᐯᔑᑾᓐ ᐃᑯ ᒋᔑ ᐅᐸᐹᒥᓯᐎᓂᓂᒡ ᐃᓂ ᓂᑕᒻ ᐐᐗᓐ᙮ 11ᑮᔥᐱᓐ ᐃᑕᔥ ᐅᓄ ᓂᓯᓐ ᑫᑰᓇᓐ ᐃᔑ ᑌᐸᒥᐋᓯᒃ, ᒦ ᓴ ᐃ ᐱᓵᓐ ᒋᐸᑭᑎᓈᒡ ᒋᒫᒑᓂᒡ ᒋᑎᐯᓂᑎᓱᓂᒡ ᑳᐐᓐ ᑫᑰᓐ ᒪᒪᔦᒡ ᒋᑎᐸᐊᒪᐎᓐᒡ᙮
ᐁᐅᓇᔓᐙᑌᑭᓐ ᐲᑾᑲᒥᑭᓯᐎᓇᓐ
12 # Lev 24.17. ᐊᐌᓀᓐ ᐃᓴ ᐱᑯ ᓃᐗᓇᐙᒡ ᐯᒫᑎᓯᓂᒡ, ᑫᐐᓐ ᐃᓴ ᑰᒋᑕ ᑯ ᑕᓂᒋᑲᓂᐎ᙮ 13#Num 35.10-34; Deu 19.1-13; Jos 20.1-9. ᑮᔥᐱᓐ ᐃᑕᔥ ᐐᓐ ᐅᒋᑕ ᑳᑑᑕᐙᓯᒃ ᑳᑮ ᓂᓵᒡ, ᑭᔐᒪᓂᑑᓐ ᑳᐸᑭᑎᓇᒥᓂᒡ ᐃᐃ ᒋᐃᔑᓭᓂᒃ ᐌᑎ ᓴ ᑕᐊᐸᐃᐌ ᑳᐐ ᐅᔑᑖᐗᒃ ᐊᔮᐎᓐ ᐊᐎᔭᓐ ᑫᔑ ᐸᐹᒣᓂᒥᑯᓯᒃ ᑫᑰᓐ ᒋᑑᑕᐙᑲᓂᐎᓯᒃ᙮ 14ᑮᔥᐱᓐ ᐃᑕᔥ ᐐᓐ ᐊᐎᔭ ᐅᒋᑕ ᐃᓀᑕᕽ ᒋᓂᓵᒡ ᐐᒋᐱᒫᑎᓰᓐ ᐃᔑᒋᑫᒡ ᐃᑕᔥ, ᑫᐐᓐ ᐃᓴ ᑕᓂᓵᑲᓂᐎ᙮ ᒥᓴᐙ ᑯ ᐊᐸᐃᐌᒡ ᑳᔑ ᐸᑭᑎᓈᓱᐎᓐᒡ ᑫᔑ ᐸᐹᒣᓂᒫᓯᐎᑎᐸᓐ᙮
15ᐊᐌᓀᓐ ᐃᓴ ᑯᑫᐸᑭᑌᐙᒡ ᐅᑌᑌᓐ ᑯᒫ ᑲᔦ ᐅᒫᒫᓐ, ᑫᒋᓈᒡ ᑕᓂᓵᑲᓂᐎ᙮
16 # Deu 24.7. ᐊᐌᓀᓐ ᐃᓴ ᑯᑲᔦ ᑮᒨᒋ ᒫᒌᓈᒡ ᐊᐎᔭᓐ, ᐊᑖᐙᑫᒡ ᐃᑕᔥ, ᑯᒫ ᑲᔦ ᒥᑭᑲᓂᐎᒡ ᑫᔮᐱ ᐁᑭᒋᐎᓈᒡ, ᐊᐲ ᓴ ᑳᒋᑎᓂᓐᒡ ᑕᓂᓵᑲᓂᐎ᙮
17 # Lev 20.9; Mat 15.4; Mrk 7.10. ᐊᐌᓀᓐ ᐃᓴ ᐱᑯ ᑫᒪᒋᐃᓈᒡ ᐅᑌᑌᓐ ᑯᒫ ᑲᔦ ᐅᒫᒫᓐ ᑕᓂᓵᑲᓂᐎ᙮
18ᑮᔥᐱᓐ ᐃᑕᔥ ᐃᓂᓂᐗᒃ ᒦᑳᑎᐙᒡ, ᐯᔑᒃ ᐃᑕᔥ ᐱᒶᓯᓇᐋᒡ ᐃᓂ ᑯᑕᒃ ᐃᓂᓂᐗᓐ, ᑯᒫ ᑲᔦ ᐱᒀᑯᓂᒌᑕᐙᒡ ᐃᔑ ᓂᓵᓯᒃ ᐃᑕᔥ, ᑳᐐᓐ ᑕᓇᓇᐊᒋᑲᓂᐎᓰ᙮ ᑮᔥᐱᓐ ᐃᑕᔥ ᐃᓂ ᐃᓂᓂᐗᓐ ᑳᑮ ᐸᑭᑌᐙᒡ ᓂᐯᐎᓂᕽ ᐅᒋ ᐱᒥᔑᓂᓂᒡ ᑳᐃᓇᑲᓈᒫᒡ 19ᓈᓈᑫ ᑕᔥ ᐃᔑ ᐗᓂᔥᑳᓂᒡ, ᐊᑾᒌᕽ ᐸᐹ ᓴᑲᐅᓂᒡ ᐁᐸᐹᒧᓭᓂᒡ, ᒦᑕᔥ ᐁᔑᓈᑾᓂᓂᒃ ᒋᑎᐸᐊᒪᐙᒡ ᐁᔑ ᐗᓂᒋᑫᓂᒡ ᑎᐸᐃᑲᓐ ᐅᒋ᙮ ᒦᔥ ᑲᔦ ᒋᐐᒋᐋᒡ ᐲᓂᔥ ᒋᒥᓄᐊᔮᓂᒡ᙮ 20ᑮᔥᐱᓐ ᐃᑕᔥ ᐃᓂᓂ ᒥᑎᑯᓂ ᐋᐸᒋᑑᒡ ᐸᐸᑭᑌᐙᒡ ᑳᐸᒦᑖᑯᒡ ᑳᐃᓂᓃᐎᓂᒡ, ᑯᒫ ᑲᔦ ᐁᑴᐎᓂᒡ ᐅᒋ ᓂᐳᓂᒡ ᑳᐃᓇᑲᓈᒫᒡ, ᒦ ᓴ ᐃ ᐁᔑᓈᑾᓂᓂᒃ ᒋᐅᒋ ᐅᓇᑯᓈᑲᓂᐎᒡ᙮ 21ᑳᐐᓐ ᐃᑕᔥ ᐐᓐ ᑫᑰᓐ ᑕᔑ ᓇᓇᐊᓵᓰ ᑮᔥᐱᓐ ᓃᔓᑮᔑᒃ, ᑯᒫ ᑲᔦ ᓂᓱᑮᔑᒃ ᑫᔮᐱ ᐊᓂ ᐱᒫᑎᓯᓂᒡ ᐋᓃᔥ ᐐᓐ ᐅᑎᐯᓂᒫᐞ ᐃᐃ ᐯᒦᑖᑯᒡ᙮ 22ᑮᔥᐱᓐ ᐃᓴ ᐃᓂᓂᐗᒃ ᒦᑳᑎᐙᒡ ᐱᑕᑲᓈᒫᐙᒡ ᐃᑕᔥ ᐃᑴᐗᓐ ᑫᑭᔥᑲᐙᐗᓱᓂᒡ ᐅᒋ ᐗᓂᐋᐗᓱᓂᒡ ᐃᑕᔥ ᐃᐃᒫ ᐅᒋ, ᐃᓂ ᑕᔥ ᐃᑴᐗᓐ ᐃᐃᒫ ᐅᒋ ᒫᑭᓯᓯᓂᒃ, ᐊᐊ ᓴ ᐃᓂᓂ ᑳᑮ ᐱᑕᑲᓈᒫᒡ ᐃᓂ ᐃᑴᐗᓐ ᑕᑎᐸᐃᑫᐋ ᒥᓂᒃ ᐃᑯ ᐅᓈᐯᒥᓂ ᑫᔑ ᐊᑕᐌᑕᒥᓂᒡ, ᑯᒫ ᑲᔦ ᐅᑎᓈᑯᓂᐌᓐ ᑫᐃᑭᑐᓂᒡ᙮ 23ᑮᔥᐱᓐ ᐃᑕᔥ ᐊᐊ ᐃᑴ ᐃᐃᒫ ᐅᒋ ᒫᑭᓯᒡ, ᒦᔥ ᐃᐃᒫ ᐱᒫᑎᓯᐎᓐ ᒋᐋᐸᑕᒃ ᒋᑎᐸᐃᑳᑌᒃ ᐱᒫᑎᓯᐎᓐ᙮ 24#Lev 24.19,20; Deu 19.21; Mat 5.38. ᐊᐎᔭ ᓴ ᑭᒑᐸᑲᓈᒫᒡ ᐊᐎᔭᓐ, ᑫᐐᓐ ᓴ ᑕᑭᒑᐸᑲᓈᓱ, ᐊᐎᔭ ᑲᔦ ᒪᓈᐱᑌ ᐌᐸᑲᓈᒫᒡ ᐊᐎᔭᓐ, ᑫᐐᓐ ᓴ ᑕᒪᓈᐱᑌ ᐌᐸᑲᓈᓱ᙮ ᐊᐎᔭ ᑲᔦ ᑮᔥᑭᓂᒌᔣᒡ ᐊᐎᔭᓐ, ᑫᐐᓐ ᐃᓴ ᒦᐞ ᑕᑮᔥᑭᓂᒌᔣ᙮ ᐊᐎᔭ ᑲᔦ ᑮᔥᑭᓯᑌᔣᒡ ᐊᐎᔭᓐ, ᑫᐐᓐ ᐃᓴ ᑕᑮᔥᑭᓯᑌᔣ᙮ 25ᐊᐎᔭ ᑲᔦ ᒑᑭᔂᒡ ᐊᐎᔭᓐ, ᑫᐐᓐ ᐃᓴ ᑕᒑᑭᔂ᙮ ᐊᐎᔭ ᑲᔦ ᒫᑭᐋᒡ ᐊᐎᔭᓐ, ᑫᐐᓐ ᐃᓴ ᑕᒫᑭᐋ᙮ ᐊᐎᔭ ᑲᔦ ᓇᒣᔮᐱᓇᓈᒡ ᐊᐎᔭᓐ ᑫᐐᓐ ᑕᓇᒣᔮᐱᓈᓱ᙮
26ᑮᔥᐱᓐ ᐃᓴ ᐃᓂᓂ ᐸᑭᑌᐙᒡ ᐅᔥᑮᔑᑯᓃᕽ ᐁᓂᓃᐎᓂᒡ, ᑯᒫ ᐁᑴᐎᓂᒡ ᑳᐸᒦᑖᑯᒡ ᐃᔑ ᑭᒑᐸᑲᓈᒫᒡ ᐃᑕᔥ, ᒦ ᓴ ᐃ ᒋᐸᑭᑎᓈᒡ ᒋᑎᐯᓂᑎᓱᓂᒡ᙮ ᒦ ᐃᐌ ᑫᔑ ᑎᐸᐃᑫᓭᓂᒃ᙮ 27ᑮᔥᐱᓐ ᐃᑕᔥ ᐐᓐ ᒪᓈᐱᑌ ᐌᐸᑲᓈᒫᒡ ᐁᓂᓃᐎᓂᒡ, ᑯᒫ ᑲᔦ ᐁᑴᐎᓂᒡ ᑳᐸᒦᑖᑯᒡ, ᒦ ᓴ ᐃ ᑫᔑ ᐸᑭᑎᓈᒡ ᒋᑎᐯᓂᑎᓱᓂᒡ, ᒦ ᐃᐌ ᑫᔑ ᑎᐸᐃᑫᓭᓂᒃ᙮
ᑫᔑᒋᑫᐙᐸᓐ ᑫᑰᓇᓐ ᑳᑎᐯᑕᒧᐙᒡ
28ᑮᔥᐱᓐ ᐃᓴ ᐊᐎᔭ ᐅᑕᔮᐯ ᐱᔑᑮᒪᓐ ᐅᑌᔥᑲᓂᓃᕽ ᐅᒋ ᐸᔑᐸᐅᐌᓂᒡ, ᓂᓵᓂᒡ ᐃᑕᔥ ᐊᐎᔭᓐ, ᒦ ᓴ ᐃ ᒋᓂᓯᒥᓐᒡ᙮ ᐅᐐᔮᓯᓂ ᐃᑕᔥ ᑳᐐᓐ ᑕᒦᒋᓈᑳᑌᓯᓂᓂ᙮ ᐊᐊ ᑕᔥ ᐐᓐ ᑳᑎᐯᓂᒫᒡ ᐃᓂ ᐱᔑᑭᐗᓐ ᑳᐐᓐ ᑫᑰᓐ ᑕᔑ ᓇᓇᐊᓵᓰ᙮ 29ᑮᔥᐱᓐ ᐃᑕᔥ ᐐᓐ ᑳᓂᑖ ᒨᑮᑖᑫᓂᑴᓐ ᐯᒫᑎᓯᓂᒡ, ᑳᐃᓈᐎᑎᐸᓐ ᐃᑕᔥ ᐊᐊ ᐃᓂᓂ ᒋᑭᐸᐙᒡ ᐅᐱᔑᑮᒪᓐ, ᑮᔥᐱᓐ ᑳᐃᔑᒋᑫᓯᒃ, ᑮᔥᐱᓐ ᐃᑕᔥ ᐃᔑ ᐸᔑᐸᐅᐌᓂᒡ ᐅᑕᔮᐯ ᐱᔑᑮᒪᓐ ᓂᔑᐌᓂᒡ, ᒦ ᓴ ᐃ ᒋᓂᓯᒥᓐᒡ ᒋᐸᐲᒶᓯᓇᐃᒥᓐᒡ, ᑫᐐᓐ ᐃᓴ ᑕᑕᑯ ᓂᓵᑲᓂᐎ᙮ 30ᑮᔥᐱᓐ ᐃᑕᔥ ᐐᓐ ᐸᑭᑎᓈᑲᓂᐎᒡ ᒋᑎᐸᐃᑫᒡ ᒋᐱᒫᒋᐃᑎᓱᒡ, ᒥᓂᒃ ᐃᓴ ᑯ ᐁᒋᑲᓂᐎᒡ ᑕᒑᑭ ᑎᐸᐃᑫ᙮ 31ᑮᔥᐱᓐ ᐃᑕᔥ ᐋᐯ ᐱᔑᑭ ᓂᓵᒡ ᑸᐎᓭᓴᓐ ᑯᒫ ᑲᔦ ᐃᑴᓭᓴᓐ ᒦ ᓴ ᐯᔑᑾᓐ ᐃᓈᑯᓂᑫᐎᓐ ᑫᐋᐸᑕᒃ᙮ 32ᑮᔥᐱᓐ ᐃᑕᔥ ᑲᔦ ᐊᐎᔭ ᐅᑕᔮᐯ ᐱᔑᑮᒪᓐ ᓂᓵᓂᒡ ᐁᓂᓃᐎᓂᒡ, ᑯᒫ ᑲᔦ ᐁᑴᐎᓂᒡ ᑳᐸᒦᑕᒫᑫᓂᒡ, ᒦ ᓴ ᐃ ᒋᑎᐸᐊᒪᐙᒡ ᐃᓂ ᐃᓂᓂᐗᓐ ᑳᑮ ᑎᐯᓂᒫᓂᐸᓐ ᐅᐸᒦᑕᒫᑫᐞ ᓂᓯᒥᑕᓇ 30 ᐙᐹᐱᑯ ᔔᓂᔮᐞ ᒥᓂᒃ᙮ ᐃᓂ ᑕᔥ ᐐᓐ ᐅᐱᔑᑮᒪᓐ ᑕᓂᓵᐗᓐ᙮
33ᑮᔥᐱᓐ ᐃᓴ ᐃᓂᓂ ᑭᐸᐊᓯᒃ ᐙᓂᑳᓐ, ᑯᒫ ᑲᔦ ᐙᓂᑫᒡ ᐃᔑ ᑭᐸᐊᓯᒃ ᐃᑕᔥ, ᐲᒋᓭᓂᒡ ᐃᑕᔥ ᐱᔑᑭᐗᓐ ᑯᒫ ᑲᔦ ᒫᔑᒥᑕᑎᒨᓐ, 34ᒦ ᓴ ᐃ ᒋᑎᐸᐃᑫᒡ᙮ ᐅᑲ ᑎᐸᐊᒪᐙᓐ ᐃᓂ ᑌᐯᓂᒫᓂᒡ ᐊᔭᐋᐎᔕᓐ, ᐐᓐ ᐃᑕᔥ ᒋᑎᐯᓂᒫᒡ ᑳᓂᐳᓂᒡ ᐊᔭᐋᐎᔕᓐ᙮ 35ᑮᔥᐱᓐ ᐃᓴ ᐃᓂᓂ ᐅᑖᐯᐱᔑᑮᒪᓐ ᓂᓵᓂᒡ ᑯᑕᒃ ᐃᓂᓂᐗᓐ ᐅᐱᔑᑮᒥᓂ, ᐃᑭ ᓴ ᒥᒋᓃᔥ ᐃᓂᓂᐗᒃ ᐅᑲ ᐊᑖᐙᑫᓈᐙᓐ ᐃᓂ ᑳᐱᒫᑎᓯᓂᒡ ᐱᔑᑭᐗᓐ ᒋᓀᓈᐎᓇᒫᑎᐙᒡ ᔔᓂᔮᓐ᙮ ᐃᓂ ᑕᔥ ᑲᔦ ᐱᔑᑭᐗᓐ ᑳᑮ ᓂᓯᒥᓐᒡ, ᒦ ᐃᒫ ᑫᐅᒋ ᓀᓈᐎᓇᒫᑎᐙᒡ ᐐᔮᔅ᙮ 36ᑮᔥᐱᓐ ᐃᑕᔥ ᑮᑭᑫᑖᑾᓂᓂᑭᐸᓐ ᐅᐱᔑᑮᒪᓐ ᐁᓂᑖ ᒦᑳᓱᓂᒡ, ᑲᔦ ᑕᔥ ᑮᑭᐸᐙᓯᒃ ᐅᐱᔑᑮᒪᓐ, ᒦᔥ ᐁᔑᓈᑾᓂᓂᒃ ᒋᑎᐸᐊᒪᐙᒡ ᐃᓂ ᑯᑕᒃ ᐃᓂᓂᐗᓐ᙮ ᐅᑲ ᒦᓈᓐ ᐃᓴ ᐃᓂ ᐃᓂᓂᐗᓐ ᐯᒫᑎᓯᓂᒡ ᐅᐱᔑᑮᒪᓐ᙮ ᐃᓂᐌᓂᐗᓐ ᐃᑕᔥ ᐐᓐ ᑳᓂᐳᓂᒡ ᐱᔑᑭᐗᓐ ᐅᑲ ᐊᔮᐙᓐ᙮
Iliyochaguliwa sasa
ᐁᑭᓴᑕᔅ 21: OJBS
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Ojibwe Shorter Bible (Syllabic Script) © 2008 Canadian Bible Society