ᐁᑭᓴᑕᔅ 18
18
ᒉᑕᕒᐆ ᑮᐊᑕᐙᐸᒫᒡ ᒨᓯᓲᓐ
1ᒨᓯᔅ ᐅᔑᔐᔕᓐ ᒉᑕᕒᐆ Jethro ᐁᔑᓂᑳᓱᓂᒡ ᑮᐊᓇᒥᐁᐎᑭᒫᐎᐗᓐ ᒦᑎᔭᓐ Midian ᐊᑮᕽ᙮ ᑮᓅᑕᒨᓐ ᐄᓴᓐ ᐋᓃᓐ ᑭᔐᒪᓂᑑᓐ ᑳᐃᔑ ᐐᒋᐃᑯᒡ ᒨᓯᔅ Moses, ᐋᓃᓐ ᑲᔦ ᑳᑎᐯᒋᑫᓂᒡ ᑳᐃᔑ ᐐᒋᐃᑯᐙᒡ ᐃᔅᕒᐃᔭᓬᐊᒃ ᑮᓇᑲᑕᒧᐙᒡ ᐄᒋᐸᑭ᙮ 2#Exo 2.21,22. ᒨᓯᔅ ᐃᑕᔥ ᐄᓴᓐ ᑮᑳᓅᓈᑯᐸᓐ ᒋᑮᐌᓂᒡ ᐐᐗᓐ ᓯᐴᕒᐊ Zipporah ᐁᔑᓂᑳᓱᓂᒡ᙮ ᒦᓇᐙᔥ ᐅᔑᔐᔕᓐ ᐅᑮ ᐲᑕᒫᑯᑯᐸᓐ ᐐᐗᓐ ᐁᔑᐊᔮᒡ᙮ 3#Act 7.29. ᓃᔑᓐ ᐃᓴ ᑲᔦ ᐅᑯᓯᓴᐞ ᑮᑕᑯ ᐲᓂᒫᐗᐞ᙮ ᐯᔑᒃ ᐃᓴ ᐃᓂ ᐅᑯᓯᓴᓐ ᑫᕒᔕᒻ Gershom ᑮᐃᔑᓂᑳᓱᐗᓐ᙮ ᒨᓯᔅ ᐄᑐᒃ ᑮᐃᑭᑐᑯᐸᓐ, ᐲᐎᑌᕽ ᓂᑎᓀᑖᑯᔅ ᐸᑳᓐ ᐊᑮᕽ᙮ ᒦᔥ ᐃᐃ ᑳᑮ ᐅᒋ ᐃᔑᓂᑳᓈᑯᐸᓐ ᐃᓂ ᐅᑯᓯᓴᓐ᙮ 4ᐅᐅ ᑕᔥ ᑲᔦ ᑮᐃᑭᑐᑯᐸᓐ, ᓂᑌᑌ ᐅᑭᔐᒪᓂᑑᒪᓐ ᐃᓴ ᓂᑮ ᓈᑕᒫᒃ, ᐁᑮ ᐱᒫᒋᐃᒡ ᒋᓂᔑᓯᒃ ᐊᐊ ᐄᒋᑉ ᑭᒋᐅᑭᒫ᙮ ᒦᔥ ᑳᑮ ᐅᒋ ᐃᔑᓂᑳᓈᑯᐸᓐ ᐃᓂ ᑯᑕᒃ ᐅᑯᓯᓴᓐ ᐁᓬᐃᐄᓴᕒ Eliezer᙮ 5ᒦᑕᔥ ᒨᓯᔅ ᐅᔑᔐᔕᓐ ᒉᑕᕒᐆᐗᓐ ᑳᑮ ᐲᑕᒫᑯᒡ ᐐᐗᓐ, ᐃᐃ ᑲᔦ ᓃᔑᓐ ᐅᑯᓯᓴᐞ ᐁᔑᐊᔮᒡ ᐱᑾᑕᑲᒥᒃ ᐁᑮ ᐃᔑ ᑲᐯᔑᒡ ᒌᑲᔭᐄ ᐃᐃᒫ ᑭᒋ ᐗᒌᕽ ᐁᑕᓀᑖᑯᓯᓂᒡ ᑭᔐᒪᓂᑑᓐ᙮ 6ᓃᔮᒃ ᐄᑐᒃ ᐅᑮ ᐱ ᐐᑕᒫᑰᓐ ᐃᓂ ᐅᔑᔐᔕᓐ ᐁᐐ ᐱᑕᑯᔑᓂᓂᒡ, ᐁᐐ ᐲᓈᓂᒡ ᐐᐗᓐ ᐃᓂ ᑲᔦ ᓃᔑᓐ ᐅᑯᓯᓴᐞ᙮ 7ᒨᓯᔅ ᐃᑕᔥ ᐅᑮ ᐊᑕ ᓇᑭᔥᑲᐙᓐ ᐅᔑᔐᔕᓐ ᐁᑮ ᐊᓂᒥᑯᑖᒡ, ᑲᔦ ᐁᑮ ᐅᒌᒫᒡ᙮ ᑳᐊᔨᔥᒀ ᐴᔔᐃᑎᐙᒡ ᐃᑕᔥ, ᑮᐲᑎᑫᐗᒃ ᐸᒀᓀᑲᒥᑯᕽ᙮ 8ᒦᑕᔥ ᒨᓯᔅ ᑳᑮ ᐐᑕᒪᐙᒡ ᒉᑕᕒᐆᓐ ᑲᑭᓇ ᑫᑰᓐ ᐋᓃᓐ ᑳᑎᐯᒋᑫᓂᒡ ᑳᑑᑕᐙᓂᒡ ᐄᒋᑉ Egypt ᑭᒋᐅᑭᒫᓐ, ᐃᐃ ᑲᔦ ᐯᒫᑎᓯᓂᒡ ᐌᒌᓂᒡ ᐄᒋᐸᑮᕽ᙮ ᐅᑮ ᐐᑕᒪᐙᓐ ᑲᔦ ᐋᓃᓐ ᑳᐱ ᐃᔑ ᓴᓇᑭᓭᐙᒡ, ᑳᑎᐯᒋᑫᓂᒡ ᐃᑕᔥ ᐁᑮ ᐐᒋᐃᑯᐙᒡ᙮ 9ᐊᐲ ᑕᔥ ᑳᓅᑕᒥᓂᒡ ᐅᓄ ᑲᑭᓇ, ᐐᑫ ᓴ ᑮᒥᓄᑕᒨᓐ ᐋᓃᓐ ᑳᑮ ᐃᔑ ᐐᒋᐃᑯᐙᒡ ᑳᑎᐯᒋᑫᓂᒡ᙮ 10ᒦᔥ ᑳᐃᑭᑐᓂᒡ, ᒦᑴᒡ ᓴ ᑕᐃᓈᑲᓂᐎ ᑳᑎᐯᒋᑫᒡ, ᑳᑮ ᐱᒫᒋᐃᓀᒃ ᒣᒀ ᐁᑲᒀᑕᑭᐃᓀᑭᐸᓐ ᐄᒋᑉ ᑭᒋᐅᑭᒫ, ᑲᔦ ᒦᑴᒡ ᑕᐃᒋᑲᓂᐎ ᐁᑮ ᐱᒫᒋᐃᓀᒃ ᑳᑮ ᐃᔑ ᑰᐹᒋᐃᓀᒀᐸᓐ ᐯᒫᑎᓯᐙᒡ ᐄᒋᐸᑮᕽ ᐁᔮᐙᒡ᙮ 11ᒦᑕᔥ ᓅᑯᒻ ᐁᑭᑫᑕᒫᓐ ᑳᑎᐯᒋᑫᒡ ᓇᐗᒡ ᐁᑭᒋ ᐃᓀᑖᑯᓯᒡ ᐊᐲᒡ ᐐᓐ ᐃᐃ ᑯᑕᒃ ᒪᓂᑑᐞ, ᐋᓃᔥ ᒦ ᐃ ᑳᑑᑕᐙᒡ ᐃᓂᐌᓂᐗᐞ ᐄᒋᐸᑮᕽ ᐌᒌᓂᒡ ᐌᐌᓂ ᑳᑮ ᑑᑕᐙᓯᓂᒃ ᐃᔅᕒᐃᔭᓬᐊᐞ Israel, ᑮᐃᑭᑐᐗᓐ᙮ 12ᒦᑕᔥ ᒉᑕᕒᐆ ᑳᑮ ᐲᑑᒡ ᑫᐸᑭᑎᓈᔂᑕᕽ ᑭᑭ ᒥᓯᐌ ᐱᑯ ᑫᐊᒀᑭᓯᑳᑌᓂᒃ᙮ ᑯᑕᒃ ᑲᔦ ᐸᑭᑎᓈᓱᐎᓇᓐ ᐅᑮ ᐲᑑᓇᓐ ᒋᐸᑭᑎᓇᒪᐎᒥᓐᒡ ᑭᔐᒪᓂᑑᓐ᙮ ᐊᐊ ᓴ ᑲᔦ ᐁᕒᐊᓐ Aaron ᑮᐲᔖ ᐁᑮ ᐱ ᐐᒌᐙᒡ ᑲᑭᓇ ᑳᓃᑳᓂᓯᓂᒡ ᐃᐃᒫ ᐃᔅᕒᐃᔭᓬᐃᑳᕽ᙮ ᒦᔥ ᑳᐃᔑ ᐐᒋ ᐐᓯᓃᒫᐙᒡ ᒉᑕᕒᐆᓐ ᐁᓈᓴᒦᓂᒡ ᑭᔐᒪᓂᑑᓐ᙮
ᑮᐅᓈᐸᒥᑣ ᐅᓈᑯᓂᑫᒃ
13ᐁᐊᓂ ᐙᐸᓂᓂᒃ ᐃᑕᔥ ᒨᓯᔅ Moses ᐅᑮ ᓇᓇᐊᑑᓇᓐ ᐯᒫᑎᓯᓂᒡ ᐁᔑ ᑭᒋ ᑲᑲᓅᓂᑎᓂᒡ ᐅᒋ ᑫᑰᓇᓐ, ᐐᑫ ᐁᑮ ᐅᒑᓂᒦᒡ᙮ ᐁᑭᔐᐹᐗᑲᓂᓂᒃ ᐁᑮ ᐅᒋ ᐙᑳ ᑳᐸᐎᓂᒡ ᐁᔑ ᐊᐱᒡ ᐲᓂᔥ ᐁᑮ ᐊᓂ ᐅᓈᑯᔑᓂᓂᒃ᙮ 14ᐅᔑᔐᔕᓐ ᐃᑕᔥ ᐁᐙᐸᑕᒥᓂᒡ ᑲᑭᓇ ᒨᓯᔅ ᐁᔑᒋᑫᒡ ᒦ ᐃ ᑳᐃᑯᒡ, ᐋᓃᓐ ᐃᑕᔥ ᐃᓈ ᐅᐅᐌᓂ ᐌᒋ ᐃᔑᒋᑫᑕᒪᐗᑣ ᐅᑯ ᐯᒫᑎᓯᐙᒡ? ᐌᑯᓀᓐ ᐌᒋ ᒥᒋ ᐯᔑᑯᔭᓐ ᐁᐅᓈᑯᓂᐌᔭᓐ ᐯᒫᑎᓯᐙᒡ ᐁᐙᑳ ᑳᐸᐎᓄᑕᐎᒀ ᐁᑭᔐᐹᐗᑲᓂᓂᒃ ᐲᓂᔥ ᐃᑕᔥ ᐁᐊᓂ ᐅᓈᑯᔑᓂᓂᒃ?
15ᒦᑕᔥ ᒨᓯᔅ ᑳᐃᑭᑐᒡ, ᐅᒋᑕ ᑯ ᐃᔑᓈᑾᓐ ᐅᐅ ᒋᐃᔑᒋᑫᔮᓐ᙮ ᐯᒫᑎᓯᐙᒡ ᐅᔕ ᓂᐱ ᓈᓯᑳᑰᒃ ᐁᐐ ᑭᑫᑕᒧᐙᒡ ᑭᔐᒪᓂᑑᓐ ᐁᓀᑕᒥᓂᒡ᙮ 16ᐃᓇᔥᑫ ᓃᔑᓐ ᐊᐎᔭᒃ ᑮᑭᒋ ᑲᑲᓅᓂᑎᐙᒡ, ᓃᓐ ᓂᐱ ᓈᓯᑳᑰᒃ᙮ ᓃᓐ ᐃᑕᔥ ᓂᑑᓀᑖᓐ ᐊᐌᓀᓐ ᐊᐊ ᑾᔭᒃ ᐁᑭᑐᒡ ᑳᔑ ᓃᔑᐙᒡ, ᒦᔥ ᐁᔑ ᐐᑕᒪᐗᒀ ᐋᓃᓐ ᑭᔐᒪᓂᑑᓐ ᐁᑭᑐᓂᒡ, ᐋᓃᓐ ᑲᔦ ᐁᔑ ᐅᓇᔓᐌᓂᒡ᙮
17ᒦᔥ ᑳᐃᑯᒡ ᐅᔑᔐᔕᓐ, ᑳᐐᓐ ᐅᓂᔑᔑᓯᓅᓐ ᐃᐃ ᑳᐃᔑᒋᑫᔭᓐ᙮ 18ᑮᓐ ᐃᓴ ᑯ, ᐃᑭ ᑲᔦ ᑳᓈᓯᑲᐎᒀ ᑭᑲ ᒑᑮᒻ᙮ ᐅᓵᒻ ᑭᑭᒋ ᐊᓄᑮ, ᑳᐐᓐ ᑭᑖ ᑲᔥᑭᑑᓰᓐ ᒋᒥᒋ ᐯᔑᑰᑲᒪᓐ᙮ 19ᐃᓇᔥᑫ ᐱᓯᑕᐎᔑᓐ ᐁᐐ ᐐᑕᒪᐎᓈᓐ ᐋᓃᓐ ᑫᐃᔑᒋᑫᔭᐸᓐ ᒋᐐᒌᐎᒃ ᑭᔐᒪᓂᑑ᙮ ᒦ ᓴ ᐃ ᑾᔭᒃ ᐁᑑᑕᒪᓐ ᐁᑎᓄᐐᑕᒪᐗᑣ ᐯᒫᑎᓯᐙᒡ ᐁᓈᓴᒦᓂᒡ ᑭᔐᒪᓂᑑᓐ, ᑲᔦ ᑕᔥ ᐁᐲᑕᒪᐎᒪᒡ ᐌᒋ ᑭᒋ ᑲᑲᓅᓂᑎᐙᒡ᙮ 20ᑭᑭᓄᐊᒪᐤ ᐁᑭᑐᓂᒡ ᑭᔐᒪᓂᑑᓐ, ᐋᓃᓐ ᑲᔦ ᐁᓇᔓᐌᓂᒡ ᒋᐐᑕᒪᐗᑣ ᐋᓃᓐ ᑫᔑ ᐱᒫᑎᓯᐙᒡ, ᐋᓃᓐ ᑲᔦ ᒪᔮ ᑫᐃᔑᒋᑫᐙᒡ᙮ 21ᐅᓈᐸᒻ ᐃᑕᔥ ᑳᑲᔥᑭᑑᐙᒡ ᑫᑰᓐ, ᑳᓇᑲᒌᐙᒡ ᐃᓂᓂᐗᒃ ᒥᓯᐌ ᒋᐅᑎᓇᑣ᙮ ᐅᓈᐸᒻ ᑴᑖᓀᓂᒫᐙᒡ ᑭᔐᒪᓂᑑᓐ, ᑳᑌᐺᔦᑖᑯᓯᐙᒡ ᑳᔒᑫᑕᒧᐙᒡ ᑲᑲᔦᓂᓯᐎᓐ᙮ ᒦᐗᒃ ᐃᑕᔥ ᐃᑭ ᑫᐅᓈᑯᓈᐙᒡ ᒋᑕᑕᔑᓂᒡ, ᒣᒥᑖᔂᒃ 1,000, ᓀᓂᑯᑣᒃ 100, ᓀᓈᓂᒥᑕᓇ 50, ᒣᒥᑖᓱ 10 ᑲᔦ᙮ 22ᒦᐗᒃ ᐃᑕᔥ ᐃᑭ ᑫᐅᓈᑯᓈᐙᒡ ᒨᔕᒃ ᐃᑯ ᐯᒫᑎᓯᓂᒡ᙮ ᑲᑭᓇ ᑫᑰᓇᓐ ᓭᓇᑲᑭᓐ ᐃᓴ ᑮᓐ ᑭᑲ ᐲᑕᒫᑰ᙮ ᐃᓂ ᑕᔥ ᐐᓐ ᑳᐌᑕᓂᓂᑭᓐ ᐐᓇᐙ ᐅᑲ ᐅᓀᑖᓈᐙᓐ᙮ ᒦᑕᔥ ᒋᐌᑕᒃ ᐁᓇᓄᑮᔭᓐ ᐋᓃᔥ ᑯᑕᒃ ᑭᑲ ᐐᑑᑳᑰᒃ᙮ 23ᑮᔥᐱᓐ ᐃᑕᔥ ᐅᐅ ᐃᔑᒋᑫᔭᓐ ᑳᔑ ᐊᓅᓂᒃ ᑭᔐᒪᓂᑑ, ᑳᐐᓐ ᑭᑲ ᓅᑌ ᒑᑮᓰ᙮ ᒦᑕᔥ ᑲᑭᓇ ᐯᒫᑎᓯᐙᒡ ᒋᑮᐌᐙᒡ ᒋᓇᐁᑕᒧᐙᒡ, ᐅᑮᐃᑰᓐ ᐅᔑᔐᔕᓐ᙮
24ᒦᔥ ᐃᑯ ᐃ ᒨᓯᔅ ᑳᐃᔑᒋᑫᒡ ᑲᑭᓇ ᑳᑮᐃᑯᒡ ᐅᔑᔐᔕᓐ᙮ 25ᐅᑮ ᐅᓈᐸᒫᐞ ᓀᑲᒋᑑᒋᓂᒡ ᑫᑰᓇᓐ ᒥᓯᐌ ᐁᑮ ᐅᑎᓈᒡ ᐃᔅᕒᐃᔭᓬᐃᑳᕽ ᑫᐅᓈᑯᓈᓂᒡ ᐯᒫᑎᓯᓂᒡ ᒋᑕᑕᔑᓂᒡ, ᒣᒥᑖᔂᒃ, ᓀᓂᑯᑣᒃ, ᓀᓈᓂᒥᑕᓇ, ᒣᒥᑖᓱ ᑲᔦ᙮ 26ᒦᐗᐞ ᐃᑕᔥ ᐅᐅ ᑳᑮ ᐅᓈᑯᓈᓂᒡ ᒨᔕᒃ ᐃᑯ ᐯᒫᑎᓯᓂᒡ᙮ ᑲᑭᓇ ᑫᑰᓇᓐ ᓭᓇᑲᓂᓂᑭᓐ ᐃᓴ ᒨᓯᔅ ᑮᐲᑕᒪᐙ᙮ ᐃᓂ ᑕᔥ ᐐᓐ ᑳᐌᑕᓂᓂᑭᓐ ᐐᓇᐙ ᑯ ᐅᑮ ᐅᓀᑖᓈᐙ᙮
27ᒦᑕᔥ ᒨᓯᔅ ᑳᐃᔑ ᐴᔔᐋᒡ ᐅᔑᔐᔕᓐ ᐁᐊᓂ ᒫᒑᓂᒡ, ᐅᑕᑮᒥᓃᕽ ᐁᑮ ᐃᔑ ᑮᐌᓂᒡ᙮
Iliyochaguliwa sasa
ᐁᑭᓴᑕᔅ 18: OJBS
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Ojibwe Shorter Bible (Syllabic Script) © 2008 Canadian Bible Society
