ᐁᑭᓴᑕᔅ 14
14
ᐃᔅᕒᐃᔭᓬᐊᒃ ᑮᐋᔕᐎᔥᑳᐙᒡ ᒥᔅᑯᑭᒋᑲᒦᕽ
1ᒦᑕᔥ ᐅᐅ ᒨᓯᔅ Moses ᑳᐃᑯᒡ ᑳᑎᐯᒋᑫᓂᒡ, 2ᐐᑕᒪᐤ ᐃᔅᕒᐃᔭᓬᐊᒃ Israel ᒋᑮᐌᔥᑳᐙᒡ ᐃᐃᒫ ᐁᓈᓴᒥᐊᔮᓂᒃ ᐆᑌᓇ ᐹᐋᐊᐃᕒᐊᑦ Pihahiroth᙮ ᓇᓴᐗᔭᐄ ᐃᐃᒫ ᒥᒃᑕᓬ Migdol ᐃᐃᒫ ᑕᔥ ᒥᔅᑯ ᑭᒋᑲᒦᕽ ᒋᔑ ᑲᐯᔑᐙᒡ ᒌᑲᔭᐄ ᐯᔭᓬ ᓰᐸᓐ Baal Zephon ᐁᒋᑳᑌᓂᒃ᙮ 3ᑭᒋᐅᑭᒫ ᐯᕒᐆ Pharaoh ᐅᔕ ᑕᐃᓀᑕᒻ, ᐃᔅᕒᐃᔭᓬᐊᒃ Israel ᐄᓴᓐ ᐁᒥᒋ ᐗᐙᓀᑕᒧᐙᒡ ᓅᒋᑯ ᐱᑯ, ᐁᑭᐱᔥᑳᑯᐙᒡ ᐃᐃ ᐱᑾᑕᑲᒥᒃ᙮ 4ᓂᐐ ᑑᑕᐙ ᓴ ᑭᒋᐅᑭᒫ ᐯᕒᐆ ᐋᒌᑫ ᒋᔕᔒᐱᑕᕽ᙮ ᒦᑕᔥ ᑫᔑ ᐱᒥᓂᔕᐙᒡ ᐃᔅᕒᐃᔭᓬᐊᐞ᙮ ᐊᐊ ᓴ ᑭᒋᐅᑭᒫ ᐯᕒᐆ ᐃᐃ ᑲᔦ ᐅᔑᒫᑲᓂᔒᒪᐞ ᓂᐐ ᐋᐸᒋᐃᒫᐞ ᒋᓈᑯᑑᔮᓐ ᓃᓐ ᐁᑭᒋ ᐃᓀᑖᑯᓯᔮᓐ᙮ ᐄᒋᑉ Egyptians ᑳᑎᓄᐎᐙᒡ ᑕᔥ ᓂᑲ ᑭᑫᓂᒥᑰᒃ ᓃᓐ ᐁᑎᐯᒋᑫᐗᒃ, ᐅᑮᐃᑰᓐ᙮ ᒦᑕᔥ ᐃᔅᕒᐃᔭᓬᐊᒃ ᑳᐃᔑᒋᑫᐙᒡ᙮
5ᐊᐲ ᑕᔥ ᑭᒋᐅᑭᒫ ᐃᐃᒫ ᐄᒋᐸᑮᕽ ᐁᐐᑕᒪᐎᓐᒡ ᐃᔅᕒᐃᔭᓬᐊᐞ ᐁᑮ ᑕᐸᓰᓂᒡ, ᒦᑕᔥ ᑭᒋᐅᑭᒫ, ᐃᐃ ᑲᔦ ᐅᑖᓂᑫᐎᑭᒫᒪᐞ ᑳᐃᔑ ᐋᑌᓂᒫᐙᒡ ᐃᐃ ᐃᔅᕒᐃᔭᓬᐊᐞ ᐁᑮ ᐃᑭᑐᐙᒡ, ᐋᓃᓐ ᐃᓈ ᑳᐃᔑᒋᑫᔭᕽ ᐁᑮ ᐸᑭᑎᓇᒀ ᐃᔅᕒᐃᔭᓬᐊᒃ ᒋᐸᒦᑕᐎᓯᓄᐎᓇᒀ, ᑮᐃᑭᑐᐗᒃ᙮ 6ᒦᑕᔥ ᑭᒋᐅᑭᒫ ᐯᕒᐆ ᐅᑮ ᐅᔒᑖᐋᐞ ᐅᒦᑳᓱᐎ ᐅᑖᐹᓈᑾᐞ, ᐃᐃ ᑲᔦ ᐅᔑᒫᑲᓂᔒᒪᐞ᙮ 7ᓂᑯᑣᔂᒃ 600 ᒦᑳᓱᐎ ᐅᑖᐹᓈᑾᐞ ᐌᓂᔑᔑᓂᒡ ᐅᑮ ᒫᒌᓈᐞ, ᐃᐃ ᑲᔦ ᑯᑕᒃ ᑲᑭᓇ ᒦᑳᓱᐎ ᐅᑖᐹᓈᑾᐞ ᑳᑮ ᐊᔮᓂᒡ ᐃᐃᒫ ᐄᒋᐸᑮᕽ᙮ ᐅᑮ ᑕᑯ ᒫᒌᓈᐞ ᑲᔦ ᐋᓂᑫᐎᑭᒫᐞ ᑫᓈᑲᒋᒋᑫᓂᒡ᙮ 8ᒦᑕᔥ ᑳᑎᐯᒋᑫᒡ ᑳᑮ ᑑᑕᐙᒡ ᑭᒋᐅᑭᒫᓐ ᒋᔕᔒᐱᑕᒥᓂᒡ, ᒋᐱᒥᓂᔕᐙᓂᒡ ᑲᔦ ᐃᔅᕒᐃᔭᓬᐊᐞ ᑳᑮ ᓲᑭᑌᐁᓂᒡ ᐁᓇᑲᑕᒥᓂᒡ ᐅᑕᑮᒻ᙮ 9ᐄᒋᑉ ᑳᑎᓄᐎᐙᒡ ᐃᑕᔥ ᐅᑮ ᐱᒥᓂᔕᐙᐙᐞ ᐃᔅᕒᐃᔭᓬᐊᐞ᙮ ᑲᑭᓇ ᐅᑮ ᐋᐸᒋᐋᐙᐞ ᒥᑕᑎᒨᐞ, ᒦᑳᓱᐎ ᐅᑖᐹᓈᑾᐞ, ᔑᒫᑲᓂᔕᐞ ᑳᐱᒥᐗᓀᐸᐃᑯᓂᒡ, ᐌᑖᐸᐃᐌᓂᒡ ᑲᔦ᙮ ᑲᑭᓇ ᓴ ᑯ ᐯᕒᐆ ᐅᔑᒫᑲᓂᔒᒪᐞ ᑮᐱᒥᓂᔕᐅᐌᐗᐞ᙮ ᐌᑎ ᑕᔥ ᐅᑮ ᐃᔑ ᐊᑎᒫᐙᐞ ᑳᑮ ᐃᔑ ᑲᐯᔑᓂᒡ ᒥᔅᑯ ᑭᒋᑲᒦᕽ ᒌᑲᔭᐄ ᐹᐋᐊᐃᕒᐊᑦ ᐃᐃᒫ ᑲᔦ ᐯᔭᓬ ᓰᐸᓐ ᐁᒋᑳᑌᓂᒃ᙮
10ᐊᐲ ᑕᔥ ᐃᔅᕒᐃᔭᓬᐊᒃ ᐁᐙᐸᒫᐙᒡ ᐯᕒᐆᓐ, ᐄᒋᐲᐎ ᔑᒫᑲᓂᔕᐞ ᑲᔦ ᐁᐱ ᐯᔓᓈᑯᓯᓂᒡ, ᐐᑫ ᓴ ᑮᓭᑭᓯᐗᒃ᙮ ᒦᔥ ᑳᑮ ᔖᑯᐙᓈᐙᒡ ᑳᑎᐯᒋᑫᓂᒡ ᒋᓈᑕᒫᑯᐙᒡ᙮ 11ᒦᑕᔥ ᐃᔅᕒᐃᔭᓬᐊᒃ ᑳᐃᓈᐙᒡ ᒨᓯᓲᓐ Moses, ᐊᔮᐗᓐ ᐄᑐᒃ ᒋᐯᑲᒥᑰᓐ ᐌᑎ ᐄᒋᐸᑮᕽ ᑫᑮᐃᔑ ᓇᐃᓂᑯᔮᑭᐸᓐ᙮ ᑭᑮ ᐲᔑᓈᒻ ᐃᓇ ᐅᐅᒫ ᐱᑾᑕᑲᒥᒃ ᒋᑕᔑ ᓂᐳᔮᕽ? ᐌᑯᓀᓐ ᑕᔥ ᐅᐅ ᑳᐅᒋ ᑑᑕᐎᔮᕽ ᐁᑮ ᓵᑭᒋᐎᔑᔮᕽ ᐌᑎ ᐄᒋᐸᑮᕽ? 12ᑭᑖᓇᑮ ᐐᑕᒫᑰ ᐄᑐᒃ ᒋᑆ ᓇᑲᑕᒫᕽ ᐃᐃ ᐄᒋᐸᑭ ᐁᑮᐃᑰᔭᓐ ᑕᑲ ᐴᓂᐃᔑᓈᒻ ᐱᓵᓐ ᒋᐸᒦᑕᐗᑭᑣ ᐄᒋᑉ ᑳᑎᓄᐎᐙᒡ᙮ ᓇᐗᒡ ᐄᑐᒃ ᑖᑮ ᒥᓄᓭᐸᓐ ᒋᑮ ᐸᒦᑕᐗᑭᑣᐸᓐ ᐄᒋᑉ ᑳᑎᓄᐎᐙᒡ ᐊᐲᒡ ᐐᓐ ᐅᐅᒫ ᐱᑾᑕᑲᒥᒃ ᒋᑕᔑ ᓂᐳᔮᑭᐸᓐ, ᐅᑮᐃᓈᐙᓐ᙮
13ᒦᑕᔥ ᐅᐅ ᒨᓯᔅ ᑳᐃᔑ ᓇᑴᑕᕽ, ᑫᑯ ᓭᑭᓯᑫᒃ, ᒪᔥᑲᐎᑳᐸᐎᒃ᙮ ᐃᓇᔥᑫ ᑭᑲ ᐙᐸᑕᒧᐙᒻ ᑳᑎᐯᒋᑫᒡ ᑳᐐ ᐃᔑ ᐱᒫᒋᐃᓀᒃ ᓅᑯᒻ ᑳᑮᔑᑲᓂᓂᒃ᙮ ᐃᑭᐌᓂᐗᒃ ᓴ ᐄᒋᑉ ᑳᑎᓄᐎᐙᒡ ᑳᐙᐸᒣᒀ ᓅᑯᒻ ᑳᑮᔑᑲᓂᓂᒃ, ᑳᐐᓐ ᒦᓇᐙ ᐐᑳ ᑭᑲ ᐙᐸᒫᓯᐙᐙᒃ᙮ 14ᑳᑎᐯᒋᑫᒡ ᐅᔕ ᑭᑲ ᒦᑳᓲᑕᒫᑯᐙ, ᑮᓇᐙ ᑕᔥ ᐐᓐ ᒦᐁᑕᑯ ᑫᐃᔑᒋᑫᔦᒃ ᒋᑯᔥᒀᐙᒋ ᐊᔮᔦᒃ, ᐅᑮ ᐃᓈᐞ᙮
15ᒦᑕᔥ ᒨᓯᔅ ᑳᐃᑯᒡ ᑳᑎᐯᒋᑫᓂᒡ, ᐌᑯᓀᓐ ᑕᔥ ᐌᒋ ᔖᑯᐙᔑᔭᓐ ᒋᓈᑕᒪᐎᓈᓐ? ᑳᓅᔥ ᐃᔅᕒᐃᔭᓬᐊᒃ ᓃᑳᓇᔭᐄ ᐃᓇᑫ ᒋᔑ ᒫᒌᔥᑳᐙᒡ᙮ 16ᑮᓐ ᐃᑕᔥ ᐐᓐ, ᐅᐹᑯᓇᓐ ᐃᐃ ᑭᓴᑲᐅᓈᒃ, ᐌᑎ ᑭᒋᑲᒦᕽ ᐃᓇᑫ ᐃᔑ ᓃᒫᑯᓇᓐ, ᒦᑕᔥ ᐃᐃ ᑭᒋᑲᒻ ᒋᑕᐎᐲᓭᒃ ᒋᐹᑾᑲᒥᑳᒃ᙮ ᒦᑕᔥ ᐃᐃᒫ ᐃᔅᕒᐃᔭᓬᐊᒃ ᑫᔑ ᐱᒧᓭᐙᒡ ᒋᐋᔕᐎᑳᒣᔥᑳᐙᒡ᙮ 17ᒦᑕᔥ ᑫᑑᑕᐗᒀ ᐄᒋᑉ ᑳᑎᓄᐎᐙᒡ ᒋᔕᔒᐱᑕᒧᐙᒡ ᒫᓄᑯ ᒋᐱᒥᓂᔕᐙᐙᒡ ᐃᔅᕒᐃᔭᓬᐊᐞ᙮ ᒦᑕᔥ ᐃᐃᒫ ᑫᐅᑎᓇᒫᓐ ᑫᐅᒋ ᑭᑌᓂᒥᑰᔮᓐ ᑮᔖᑰᒋᐊᒃ ᐊᐊ ᑭᒋᐅᑭᒫ ᐯᕒᐆ, ᐃᐃ ᑲᔦ ᐅᔑᒫᑲᓂᔒᒪᐞ, ᐅᒦᑳᓱᐎ ᐅᑖᐹᓈᑾᐞ ᑲᔦ, ᐃᐃ ᑲᔦ ᑳᐅᑖᐸᐃᐌᓂᒡ᙮ 18ᑮᐃᔥᒀ ᔖᑰᒋᐊᒀ ᑕᔥ, ᒦ ᓴ ᐃ ᒋᑭᑫᓂᒥᐙᒡ ᐄᒋᑉ ᑳᑎᓄᐎᐙᒡ ᓃᓐ ᑳᑎᐯᒋᑫᒡ ᐁᑎᓄᐎᐗᒃ, ᐅᑮᐃᑰᓐ᙮
19ᐊᐊ ᑕᔥ ᑭᔐᒪᓂᑑ ᐅᑌᒐᓬᐃᒪᓐ ᑳᑮ ᓃᑳᓃᑕᒪᐙᓂᒡ ᐃᐃ ᑳᑮ ᐹᑏᓄᓂᒡ ᐃᔅᕒᐃᔭᓬᐊᐞ, ᑮᐋᒋᔥᑳᐗᓐ ᐅᑖᓈᕽ ᐃᓇᑫ ᐁᑮ ᐃᔖᓂᒡ᙮ ᐃᐃ ᓴ ᑲᔦ ᐗᑸᓂ ᑳᑮ ᐸᑕᑳᓇᑾᓂᓂᒃ ᑮᐋᒋᔥᑳᓂ ᐅᑖᓈᕽ ᐁᑮ ᐃᔖᒪᑲᓂᓂᒃ᙮ 20ᒪᔮ ᐱᑯ ᓇᓴᐗᔭᐄ ᑳᑮ ᐃᔑᐊᔮᓂᒡ ᐄᒋᑉ ᑳᑎᓄᐎᓂᒡ, ᐃᐃ ᑲᔦ ᐃᔅᕒᐃᔭᓬᐊᐞ ᐁᑮ ᐃᔑ ᑭᐱᔥᑳᓂᒃ᙮ ᐃᐃ ᑕᔥ ᐗᑸᓂ ᑮᑲᔥᑮᑎᐱᔥᑭᑫᒪᑲᓂᓂ ᑳᑮ ᐃᔑᐊᔮᓂᒡ ᐄᒋᑉ ᑳᑎᓄᐎᓂᒡ, ᑮᐙᓭᔥᑭᑫᒪᑲᓂᓂ ᑕᔥ ᐐᓐ ᑳᑮ ᐃᔑᐊᔮᓂᒡ ᐃᔅᕒᐃᔭᓬᐊᐞ᙮ ᑳᐐᓐ ᑕᔥ ᑮᓈᓯᑯᑖᑎᓰᐗᐞ ᑲᐯᑎᐱᒃ᙮
21ᒦᑕᔥ ᒨᓯᔅ ᑭᒋᑲᒦᕽ ᐃᓇᑫ ᑳᑮ ᐃᔑ ᓃᒥᓂᑫᓂᒡ᙮ ᑳᑎᐯᒋᑫᓂᒡ ᓴ ᑕᔥ ᐅᑮ ᐃᔑᑑᓂ ᒋᐙᐸᓂᓅᐌᓂᒃ ᐁᑮ ᑕᐎᐲᑭᓇᒥᓂᒡ ᑭᒋᑲᒻ᙮ ᑲᐯᑎᐱᒃ ᑕᔥ ᑮᑭᒋ ᓅᑎᓐ ᐁᑮ ᐃᔑᑑᓂᒡ ᑭᒋᑲᒻ ᒋᐹᑾᑲᒥᑳᓂᒃ᙮ ᐃᐃ ᑕᔥ ᓂᐱ ᑮᑖᔥᑭᑕᐎᐲᔮᓂ᙮ 22#1Co 10.1,2; Heb 11.29. ᒦᔥ ᐃᔅᕒᐃᔭᓬᐊᒃ ᑳᐃᔑ ᐱᒧᓭᐙᒡ ᐁᔑ ᐹᑾᑲᒥᑳᓂᒃ ᐁᐋᔕᐎᔥᑳᐙᒡ ᑭᒋᑲᒻ, ᐄᑕᐌᔭᐄ ᐁᑮ ᐊᔮᓴᒥᐲᔮᓂᒃ ᐁᔑ ᐱᒧᓭᐙᒡ᙮ 23ᒦᑕᔥ ᐄᒋᑉ ᑳᑎᓄᐎᐙᒡ ᑳᐃᔑ ᒫᒋᓂᔕᐃᑫᐙᒡ ᐲᓂᔥ ᐌᑎ ᑭᒋᑲᒦᕽ᙮ ᑲᑭᓇ ᐱᑯ ᑭᒋᐅᑭᒫ ᐯᕒᐆ ᐅᒥᑕᑎᒨᒪᐞ, ᐅᒦᑳᓱᐎ ᐅᑖᐹᓈᑾᐞ, ᐃᐃ ᑲᔦ ᑳᑮ ᐅᑖᐸᐃᐌᓂᒡ ᐁᐋᐸᑎᓯᓂᒡ᙮ 24ᒋᑆ ᐲᑖᐸᓂᓂᒃ ᑕᔥ ᑳᑎᐯᒋᑫᒡ ᐅᑮ ᐅᓵᐸᒫᐞ ᐄᒋᑉ ᑳᑎᓄᐎᓂᒡ ᐃᐃᒫ ᑳᐃᔥᑯᑌᐗᓂᓂᒃ ᐗᑶ ᑳᑮ ᐸᑕᑳᓇᑾᓂᓂᒃ᙮ ᒦᑕᔥ ᑳᑮ ᑑᑕᐙᒡ ᒋᐗᐙᓀᑕᒥᓂᒡ᙮ 25ᒦᑕᔥ ᑳᑑᑕᐙᒡ ᒦᑳᓱᐎ ᐅᑖᐹᓈᑾᓐ ᑳᑎᑎᐱᓭᓂᒡ ᒋᑭᒋᐎᓭᓂᒡ, ᒦᔥ ᑳᐃᔑ ᑆᐎ ᒫᒌᔥᑳᓂᒡ᙮ ᐄᒋᑉ ᑳᑎᓄᐎᐙᒡ ᓴ ᑕᔥ ᑮᐃᑭᑐᐗᒃ, ᑕᑲ ᒫᒌᐸᐃᐙᓈᑖᓂᒃ ᐃᔅᕒᐃᔭᓬᐊᒃ, ᑳᑎᐯᒋᑫᓂᒡ ᐅᔕ ᐅᒦᑳᓲᑕᒫᑯᐙᓐ ᐁᒦᑳᓂᓇᒀ, ᑮᐃᑭᑐᐗᒃ᙮
26ᒦᔥ ᒨᓯᔅ ᑳᐃᑯᒡ ᑳᑎᐯᒋᑫᓂᒡ, ᐌᑎ ᑭᒋᑲᒦᕽ ᐃᓇᑫ ᐃᔑ ᓃᒥᓂᑫᓂᓐ, ᒦᔥ ᐃᐃ ᓂᐱ ᒋᒫᒪᐎᒋᐗᕽ᙮ ᒦᔥ ᒋᓂᑭᐲᓭᐙᒡ ᐄᒋᑉ ᑳᑎᓄᐎᐙᒡ, ᐃᐃ ᑲᔦ ᐅᒦᑳᓱᐎ ᐅᑖᐹᓈᑯᐗᐞ, ᐃᐃ ᑲᔦ ᑳᐅᑖᐸᐃᐌᓂᒡ᙮ 27ᒦ ᓴ ᐃ ᒨᓯᔅ ᑭᒋᑲᒦᕽ ᐃᓇᑫ ᑳᐃᔑ ᓃᒥᓂᑫᓂᒡ᙮ ᐁᐊᓂ ᐲᑖᐸᓂᓂᒃ ᑕᔥ ᐃᐃ ᓂᐲᓂ ᑮᑮᐌ ᒫᒪᐎᓭᓂ ᐁᑮ ᐊᐲᒋᐲᓂᒃ ᑳᑮ ᓂᑖ ᐊᐲᒋᐲᓂᑭᐸᓐ᙮ ᐄᒋᑉ ᑳᑎᓄᐎᐙᒡ ᑕᔥ ᐅᑮ ᒣᑴᔥᑳᓈᐙ ᐃᐃ ᓂᐲᓂ᙮ ᒦᑕᔥ ᑳᑎᐯᒋᑫᒡ ᑳᑮ ᐃᔑ ᐌᐱᓈᒡ ᐄᒋᑉ ᑳᑎᓄᐎᓂᒡ ᐃᐃᒫ ᑭᒋᑲᒦᕽ᙮ 28ᓂᐱ ᑕᔥ ᐁᑮᐌᔮᑲᒥᓭᒃ, ᑲᑭᓇ ᐯᕒᐆ ᐅᔑᒫᑲᓂᔒᒪᐞ ᑮᓂᑭᐲᓭᐗᐞ ᒦᑳᓱᐎ ᐅᑖᐹᓈᑾᒃ, ᑳᑮ ᐅᑖᐸᐃᐌᐙᒡ ᑲᔦ, ᑲᑭᓇ ᓴ ᑯ ᐄᒋᑉ ᑳᑎᓄᐎᐙᒡ ᑳᑮ ᐱᒥᓂᔕᐙᐙᒡ ᐃᔅᕒᐃᔭᓬᐊᐞ ᐃᐃᒫ ᑭᒋᑲᒦᕽ ᑮᓂᓵᐹᐌᐗᒃ᙮ ᑳᐐᓐ ᓴ ᐊᐙᒋᑯ ᐯᔑᒃ ᑮᐃᔥᑯ ᓂᓵᐹᐌᓰ᙮ 29ᐃᑭ ᑕᔥ ᐐᓐ ᐃᔅᕒᐃᔭᓬᐊᒃ ᑮᐃᔑ ᐱᒧᓭᐗᒃ ᐁᔑ ᐹᑾᑲᒥᑳᓂᒃ ᐁᐋᔕᐎᔥᑳᐙᒡ ᐃᐃ ᑭᒋᑲᒻ, ᐊᔩᑕᐤ ᐁᑮ ᐊᔮᓴᒥᐲᔮᓂᒃ ᐁᔑ ᐱᒧᓭᐙᒡ᙮
30ᒦ ᓴ ᑕᔥ ᐃᐃ ᐊᐲ ᑳᑎᐯᒋᑫᒡ ᑳᑮ ᐱᒫᒋᐋᒡ ᐯᒫᑎᓯᓂᒡ ᐃᔅᕒᐃᔭᓬᐊᐞ ᒋᐸᐹᒣᓂᒥᑯᓯᓂᒃ ᐄᒋᑉ ᑳᑎᓄᐎᓂᒡ᙮ ᐃᔅᕒᐃᔭᓬᐊᒃ ᓴ ᑕᔥ ᐅᑮ ᐙᐸᒫᐙᐞ ᐄᒋᑉ ᑳᑎᓄᐎᓂᒡ ᒥᓯᐌ ᑳᐃᔑ ᐗᐙᓂᓂᑲᒫᓂᒃ ᐁᑮ ᐊᒀᔮᐅᑯᓂᒡ᙮ 31ᐊᐲ ᑕᔥ ᐃᔅᕒᐃᔭᓬᐊᒃ ᐁᑮ ᐙᐸᑕᒧᐙᒡ ᑭᒋ ᒪᔥᑲᐎᓰᐎᓐ ᐁᐋᐸᒋᑑᓂᒡ ᑳᑎᐯᒋᑫᓂᒡ ᑮᒦᑳᓈᓂᒡ ᐄᒋᑉ ᑳᑎᓄᐎᓂᒡ, ᒦ ᓴ ᐯᒫᑎᓯᐙᒡ ᑳᐃᔑ ᑯᓵᐙᒡ ᑳᑎᐯᒋᑫᓂᒡ᙮ ᒦᔥ ᑲᔦ ᑳᐃᔑ ᑌᐺᔦᓂᒫᐙᒡ ᑳᑎᐯᒋᑫᓂᒡ, ᐃᓂ ᑲᔦ ᐅᑕᓄᑮᐋᑲᓂᓂ ᒨᓯᓲᓐ᙮
Iliyochaguliwa sasa
ᐁᑭᓴᑕᔅ 14: OJBS
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Ojibwe Shorter Bible (Syllabic Script) © 2008 Canadian Bible Society
