JENESIS 45
45
Josepbe ne Pa Châu mei be Saliabe
1Chidadege Josepbe pe taige nguasapme leine suagene pe runne pechu getipchi ta di de lei; zai pa hap’nrung ze, “A dagene ’nteumena hela ’mbe peize zuapat kam de lau,” kacheu de lei. Chidadege pe sikiname je Josepbe ne pa châu mei be ranglia’nchigaibe luage mî de pe dage bam mak te lei. 2Zai pa hap’nchi ze hap kai di de lei, chize Ijipme seu de lei, zai Pharaobe kiduîme seu di de lei. 3Zai Josepbe ne pe sikiname je, “I ze Josepbe de lei; a peu ring larei mei?” kacheu de lei. Kane pa bambe ziegene pe sikiname â depâp ti ze pe kuâ kakkaichi ta di de lei. 4Chidadege Josepbe ne pe sikiname je, “A tailam wang’nna lau, ningnui je I kiam lei,” kacheu de lei. Zai penui wang’nna gai de lei. Zai pa ne, “I ze â ningnui kina’mpeu Ijipram ’mbe ningnui ne zuagai’ndipeu Josepbe de lei. 5Zai chunage â ningnui lung ze hereu ta lau, zai achu aige zuagai’ndibe ziegene ningnui runne ningnui peireige ningnui lumpum ze bam ta lau; keringbe ’nzuakkairabe hanggene Hera ne ningnui suage achu lang’ntua gai daseu. 6Heram lungge herakûm bamdibe kum na chang di daseu; zai hetâ ta mak, zai helu de gatmakrabe kum mengeu ling lamui rei lei. 7Zai kedeirei ge ningnui ge ’nsakkaime bam le ra zai ningnui hanggene misonggame je tew’nring gai le ra Hera ne ningnui suage achu lang’ntua gai de lei. 8Chidaze ningnui ne aige achu lang gai mak lei, kane Hera ne lei; zai Pharaobe hangge pe peu chang ze bam ra zai pe ki leine peireige pa’mpau chang zai Ijipram dei leine peireige samrampeu chang ze bam ra Hera ne achu tew gai bei de lei. 9“Kelua ze a peu tailam hang zu lau, zai pechu acheu salia be lau, ‘Ning na Josepbe ne acheu ze rang lei, Ijipram leine ge heguang chang ra Hera ne achu tew gai de lei; a tailam wangkeu zu lau, gîngtie ta lau; 10Goshenram ge nang lung gu, zai nang benai ning name zai ning chame, zai ning gu melidung, ning gu getumdung, zai ning gu kebambe leine â a taige lung gu lei; 11zai herakûm bamgairabe kum mengeu lamui rei daze nang ka’nnangbe I ne pei gu lei, chidezai nang benai ning kiduîme, zai ning gu kebambe leine dage kelaksiabe wangchang mak ra hangge zeu’ ze acheu zeu. 12“Zai chunage a mui sing gene ningnui je I ka’mpau lei be ningnui mik benai a kinapeu Benjaminbe mikngau gene ngau de lei. 13Ijipram ge I a ngeudi ze bambe leine benai ningnui ngaulube leine a peu je ningnui salia sing ra lei, kelua ze a peu je aige nguakeu zu lau,” kacheu de lei. 14Chidadege pe kinapeu Benjaminbe guang tui lu pa hap kai di de lei; zai Benjaminbe ne du pe guang tui lu hap te lei. 15Zai pe sime leine je du hap ze keputwang kam gai de lei; zai chipau châng dege â pe sikiname ne pechu ’mpau ze bam de lei.
16“Josepbe sikiname wang de lei,” kacheube rasam Pharaobe ki ge seuchang di de lei, dadege â Pharaobe benai pe guâ ka’ngguame penui suiyi-desang di de lei. 17Zai Pharaobe ne Josepbe je, “Ning sime bau dage salia lau, ‘Aize tew lau: ningnui gu hekaune ramme peireige heput tew gai lu ze Kanaanram ’mbe helatwang dai zu lau; 18zai ningnui peu benai ningnui kiduîme je ngua lu wangkeu lau, dezai Ijipram gu kedei yilangbe ningnui je I pei gu lei, zai heram ge yilangbe ramme ze ningnui teu ra ngau gu lei,’ acheu zeu. 19Penui je acheu ze du samdie gai be lau, ‘Aize tew lau: Ijipram gene timriang ramme tei lu ningnui name benai ningnui nâu ramme hangge pungtatchu lau, zai ningnui peu je ngua lu ze wang lau. 20Ningnui gu merua ramme je ’nzâ se lau, Ijipram gu yilangbe ze ningnui gu daseu,’ acheu zeu” ze kacheu de lei.
21Israelbe name ne chipau luigum ze tew de lei; zai Pharaobe ne rangbe luigum ze Josepbe ne timriang ramme penui je pei bei de lei, zai tebeî’mpuî ge ka’nnangbe ramme pei bei de lei. 22’Nteumena hangge penui puâ pakelei ramme pei bei de lei; kane Benjaminbe hangge â gepût-rangkâng haî chum zai pe puâ kelei hangge mengeu pei bei de lei. 23Pe peu hangge airamme pa lang gai de lei: Ijipram gu merua yibe ramme, hekunmerângne kereu ge heput tewgaibe, zai hekunmerângpui kereu ge chêu, tingku, zai pe peu tebeîtewmie dezai ’mpuîki ge ka’nnangbe ramme hang ’mput kai de lei. 24Dadege pe sikiname je pa langpat kai de lei, zai penui rimnagaibe luage pa ne, “’mpuîki ge hegei se lau,” kacheu de lei. 25Chidadege Ijip gene penui hang di de lei, zai Kanaanram ge penui peu Jakobbe dage penui wangchang di de lei. 26Zai penui ne pechu, “Josepbe â ring larei lei, zai pa â Ijipram dei luî ge samrampeu chang ze la lei,” ze pau gai bei de lei. Dadege Jakobbe pe lung kenuihuak kai di de lei, penui je pa ’nnumtewmakbe ziegeneu. 27Kane Josepbe ne penui je saliabe sam ramme pechu penui ne salia kam bei, zai pechu pung ra hangge timriang ramme Josepbe ne langgaibe ramme pa ne ngau lu dege, Jakobbe pe suî’nta dai di de lei; 28zai Israelbe ne sa ze, “Bui de lei; a na Josepbe ring larei lei; I chai makge tat ze pechu ngau-himchang gu lei,” kacheu de lei.
Iliyochaguliwa sasa
JENESIS 45: ZEMEBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.