JENESIS 44
44
Hepiak Gadibe
1Chidadege pe ki ge besuitewpeu je pa ne rang gai ze, “Penui ne pungduibe riâ chime gu metie ramme chêu ne kaipui gai be lau, zai pe gu metiemui mui ge pe gu gu rangkâng kai be lau, 2zai henalangpeu gu metie mui ge chêu mî hang rangkâng kaibe benai a gu hepiak, gepût piak ze kai’mpam gai be lau,” acheu bei de lei. Zai Josepbe ne pechu ranggaibe luî pa tew gai de lei. 3Hechua bapat gap dege, chime benai penui gu hekunmerângne ramme je tat ra langpat kai ’ndi de lei. 4Namdi gene mâtie tat kai mak ze, Josepbe ne pe ki ge besuitewpeu je, “Zuachu ze chi ziemmena ramme je ’nsatatchu lau; zai penui je nang ’nsachang dezai penui je, ‘Keyibe ze kesiabe ne ’ndaitew ze ningnui peiruî gai lau? ’Ndaitew ze ningnui a gu gepût piak kahega lau? 5Aipau piak gene a pau puasak, zai aigene pa hedachakbe piak mak semei? Aigum ze tewbe ziegene ningnui tewmau ’ndi de lei,’ ze acheu be lau,” ze kacheu de lei.
6Penui je pa ’nsachang dege, penui je aipau sam ramme salia bei de lei. 7Pechu penui ne, “’Ndaitew ze a pau ne aigumbe sam sa rei se lau? Aigumbe tâ tew ra hangge ning guâ ka’ngguame â ’nningzat kai du me de lei! 8Pie le lau, anui gu metie ramme mui gene rangkâng anui ngaudaube ze Kanaanram gene ning dage anui teiwang gai kadai de lei; chidaze ’ndaigum ze ning pau ki gene anui gepût mei nune gechâk mei ze hega ra rei se lau? 9Ning guâ ka’ngguame ruage mige dagene chize peudau dizai â, pa â peize chai de lau, zai anui du a pau gu kebangme chang ra de lei,” kacheu de lei. 10Pa ne, “Ningnui ne rangbe gum ze peize acheu ra de lei: mige dagene chize peudau dizai â pa â a gu kebang chang ra de lei, zai ningnui kêdame leine â hetiâkgabe chang gu lei,” ze kacheu de lei. 11Chidadege penui gu gu metie ramme kedei ge teikeu gai de lei, zai ’nteumena pe gu-gu metie latpat kai de lei. 12Zai pa ne piewang de lei, chînglangpeu gene henalangpeu riâ pa ne peu gai de lei; zai hepiak ze Benjaminbe gu metie gene laleu de lei. 13Chidadege penui paî ramme penui hit te lei, zai penui gu hekunmerângne ramme ching ge merua teichu gai dai lu, namdi ’mbe penui helatwang kadai de lei. 14Judabe benai pe sikiname Josep ki ge wangchang dege, chige pa â laleu rei de lei; zai pe suage kedei ge penui ’ngkum gai de lei. 15Josepbe ne penui je, “’Ndaikau tâ ningnui tew gai lau? I gumbe kau ziemmena â hedachakbe gene peupat dui sing de lei be ningnui chî mak mei?” kacheu de lei. 16Zai Judabe ne, “A pau sam ge anui ’ndaikau tew lei ze ranglia ra lau? ’Ndaikau anui sa ra se lau? Makchai ’ndaigum dezai anui ’nzei le ra se lau? Hera ne ning guâ ka’ngguame gu kemaube peupat lu de lei; pie le lau, anui â a pau gu kebangme de lei, anui je du zai pe ba gene hepiak peudaupeu jeu,” kacheu de lei. 17Kane pa ne, “Chigumbe tew ra I â ’nningzat tu me lei! Châu ba gene hepiak dau mei, chipaupeu runne a gu kebang chang ra de lei; kane ningnui â temichai ze ningnui peu tailam tatchu lau,” kacheu de lei.
Judabe ne Benjaminbe Deu ge Kiambe
18Chidadege Judabe ne pe tailam zuachu lu acheu sa ze, “Hei a pau gau, ning dage I kie lei, ning guâ ka’ngguapeu ne a pau kun ge sam kat sa gai ra pei lau, zai ning guâ ka’ngguapeu peireige peize ning râta gai se lau; nang â Pharaobe gumbe kau daseu. 19A pau ne pe gu tâka’ngguame je acheu samneu ze, ‘Ningnui peu mei nu ningnui kina mei ze la mei?’ kacheu de lei. 20Zai anui ne a pau je, ‘Anui peu gechipau lamui lei, zai anui kina ’mpeumi napoine pa chîng di chaine lungbe poine lamui lei; zai pe sipeu â chai di de lei, zai pe pui ne lungkeube na â pe runne ’nsak kai de lei; zai pe peu ne pechu hung de lei,’ acheu bei de lei. 21Chidadege nang ne ning guâ ka’ngguame je, ‘Pechu a tailam nguakeu lau, dezai pechu I ngau gai ra hangge zeu,’ kacheu de lei. 22Anui ne a pau je, ‘Chipaupoine â pe peu je sâudau lak lei, pe peu je pa sâu gai ra dizai â pe peu ze â chai du de lei,’ kacheu de lei. 23Chidadege nang ne ning guâ ka’ngguame je, ‘Ningnui kinapeu henalangpeu je ningnui ngua lu wangkeu lei makchai â, a ju ningnui ngau dai ra mak lei,’ kacheu de lei. 24Ning guâ ka’ngguapeu tailam anui helatwang dai dege, a pau sam ze anui ne pechu salia bei de lei. 25Zai anui peu ne, ‘Tat dai zu lau, anui hangge tak kecheîne ’nnûwang lau,’ acheu dadege, 26anui ne, ‘Anui â wangkeuchi lak lei. Anui kina henalangpeu anui dage nguatat zai â anui wangkeu gu lei; anui dage anui kinapeu bam lei makchai â chipaupeu ju ze anui ngauhedauchi lak daseu,’ acheu bei de lei. 27Chidadege ning guâ ka’ngguapeu, a peu ne anui je, ‘A nâu ne a na ’mpeumi hangna a hangge lungkeu gai de lei be ningnui chî lei; 28hangkat â achu sâu ’ndi de lei, zai pechu â hekaune ne ’nsia ’ndi de lei ze I kacheu de lei; zai chigene seu ze pechu mâdau de I ngau ta di de lei. 29Aipaupoine je du a dagene ningnui lu dai ’ndizai â zai pe pausiabe pe peireige dau dizai â, I gechîng chai gene kadesuibe gene ningnui ne achu Kechaiberam ’mbe teikeu gai gu de lei,’ kacheu de lei. 30Chidaze chunage ning guâ ka’ngguapeu dage I wang dezai, zai napoine ze anui ruage ga laleu zai â chi rehangpoine je pe lung gene reugit ze bambe ziegene, 31chipaupoine ze anui ruage ga lei be pa ngau dezai, pa chai gu de lei; zai ning guâ ka’ngguame ramme ne ning guâ ka’ngguapeu anui peu je kadesuibe gene heraw ’mbe teikeugaibe chang gu de lei. 32Ning guâ ka’ngguapeu zene napoine kelei ge a peu hangge ’nchunggaileube zat chang di daseu, ‘I ne pechu ning dage nguawang dai makchai â, a kering ting tâluî a peu masuage I ne saka’nsiabe put pung ra de lei,’ ze sagai’ndibe ziegeneu. 33Chunage chidaze I ning dage kie lei, rehangpoine kelei ge peize ning guâ ka’ngguapeu je a pau gu kebang hangge sâu gai be lau; zai peize rehangpoine je â pe sime je ngua lu helatwang dai de ra pei be lau. 34Rehangpoine je ngua makchai â, a peu tailam ’ndaigum ze I wangdaichi ra lau? A peu peireige kesiabe wangchangrabe je I â ngauhing lei,” acheu bei de lei.
Iliyochaguliwa sasa
JENESIS 44: ZEMEBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.