SEI-ATAMAI VAHTAO 15
15
Jerusalem hinou Tsüme Ve dzüyu
1Ana Judea hinou mai kamainou Antiok hi takouloua, “Moses vei zhai thaifüa neletao nou hee rode molouzü, neletao sü khailu louhoe,” tea lüloumaitao hi sü doupei tare. 2Sükuyu vanou Paul ea Barnabas sü vamosholoua puletaoye soutaosou chi veiva loure. Südonou Paul ea Barnabasye nou Antiok hi lüloumai kamaiye koa panou chi süna donou Jerusalem hi takheloua sei-atamaitao ea tsümaitaoye daoloure donou dopa peire.
3Südonou lüloumaime nou puletaoye ludu hi sapao vepeie, alia puletao nou Phoenikia ea Samaria tachopoa tayu hinou maikhemai hisü kabüa tahrüh kukhemai taonou le daloua Ramai hi velouresa touyu ko sü puletao nou paopoa laiwe; sükua puletao nou lüloumaitao hrülai lesü sousa shopeie. 4Puletao nou Jerusalem hi velou louyu kisü, puletaoye sü lüloumaime, sei-atamaitao ea tsümai taonou sasa-a sheloure, alia Ramai nou puletaoye koa souyu teitei sü puletao hi paongao peire. 5Ana Phariseemai me hrohinou lüloumai kamainou lashuloua, “Tahrüh kukhe maitao hai hee rode vuzülai ea Moses vei razhai hai panou zü vuzülai,” tea paoloure.
6Südonou sei-atamaitao ea tsümai taosü chi haina kure donou tave dzüloure. 7Alia teile phashona chi veivayu thaisü Pitar nou lashuloua puletao hi paoe, “Athaihou jürai maitao, tahrüh kukhemai taoye panou Amü hinou ko avei chouloua louche loure donou Ramai nou Eye neletao hrohinou raikinou dopa peire touyu sü neletao nou süwe. 8Alia emai hrülai le süyu Ramai puhnou Eletao hi soupeiyu kua tahrüh kukhemai taohia Rako Mashi peiwu-a puhvei ae-ao touyu zhopaoh sü peire. 9Puhnou Eletao ea puletao kole hisü halia souku peimoe; daiolouzü lü vanou puhnou puletao lesü soushee peire. 10Südonou chuo Eletao puo-pao maitao nou-a moa lah Eletao nou-a pfülou hoyu kousü rozümaitao phaohi popa khaipeia daidonou Ramaiye zhai zhuwe? 11Ana puletao büa Eletao-a Mapao Jisu Khrista zhuvea vanou khailu loulai touyu sü Ehnou louche.”
Tsümenou Chi Kukouyu
12Barnabas ea Paul nou Ramai nou kakua puhai vanou tahrüh kukhe maitao hrohinou shee tyali ea khupa vahtao sousa tea paongaoyu sü chouloua tsüme hi velouyu maikhemai hrülai sü lapaimo zheibaire. 13Puhai nou paocheyu thaisü, Jems nou chila peia paoe, “Athaihou jürai maitao, Achi keipeikhaio! 14Ramai nou lah puhye donou kakua rairaikaia tahrüh kukhe maitao hrohinou mai meliye popaloua puletao hi puhvei leshi sü pongao peie touyu sü Simon nou paongao peire. 15Alia chi haisü rachi paolamai taovei chipao zhotoubaie, süolouzü haikua rüthou khaitoue,
16‘Haina thaisü E khaivelai,
alia David vei kaotayu
Vedei nasü soushulai
Enou sünavei pe-potayu taosü soushulai,
alia süsü Enou soutsü pulou khailai.
17Süolouzü kukhe maitya hrülainou ea Avei souloure donou Enou kulouyu tahrüh kukhe maitao hrülainou Mapaoye phouloure donou tea,
18vah haitao dao raikinou souposhu maikhe maiye panou sülouyu Mapao nou paoe!’
19“Südonou Enou li-choyuwo louzü tahrüh kukhe maitao hrohinou Ramai hi dakhai velouyu sümaitaoye Eletao nou souveayu zümoe. 20Ana puletaoye panou bashara hi pothokhai touyu sheemoyu touso, khu-lou souyu vah, ssü souhawu-a thaiyu sou ea zhe touyu, haitao teitei sü thaokhai loure donou Eletao nou puletao hi seiko rüpei laikhe. 21Daiolouzü dao raikinou Moses vei razhai hai nuhdu liki hinou paodoua bure ea süsü Soteithe tsü rathobuhtao hinou phoua bure.”
Tahrüh Kukhe Lüloumai taohi Seiko Seitayu
22Sükisü sei-atamaitao, tsümaitao ea lüloumaime teiteinou puletao hrohinou mai dopaloua Paul ea Barnabasye koa puletaoye Antiok hi seivelai tea le laloure. Puletao nou lüloumaime hrohinou tsükhou shoyu mai ahai süolouzü Barsabbas tea kuyu Judas ea Sailasye doloure, 23alia teikou rükhai touyu seiko nasü puletao bah hinou seitae:
“Neletao thaihou jürai sei-atamaitao ea tsümaitao nou Antiok, Suria ea Kilikia hi buyu tahrüh kukhemai thaihou jürai maitao hrülaiye sasa-a khurüwe. 24Eletao hrohinou kamainou Eh hi noukhaimoa tave neletao lesü souchoro peia panou neletao tsü sü hobü haibüa bue touyu sü Ehnou chouloure. 25Südonou Eletao hrülainou tave dzüloua mai kamaiye dopa loure hisü ea sümaiye leshiyu Eletao sa Barnabas ea Paul, 26Eletao Mapao Jisu Khrista donou pfüzho pamoyu puhaiye koa neletao hi seivelai touyu hisü ae-ao loure. 27Südonou Ehnou nelehi Judas ea Sailasye seivewe. Puhainou Ehnou rüyu sübütoua puhai mü vuzünou ve paongao peilai. 28Daiolouzü moshilaiyu zhai haitao baimoa kukhe süpuyu kou neletao pei hi pokhai moyu nanou veihie touyu sü Rako Mashi ea Ehnou ae touwe: 29Süolouzü, bashara hi posheelakhai touyu touso, zhe touyu, ssü souhawu-a thaiyu sou ea khu-lou souyu vah haitao teitei sü thaowu-o. Haitao teitei hai neletao nou reitou louzü veiloulai. Neletao rako avei souloukhaio.”
30Südonou puletaoye seitayu thaisü, puletao nou Antiok hi takouloua sühinou lüloumaime hrülaiye kuve dzüloure ea puletao hi seiko nasü peiwure. 31Alia puletao nou seiko nasü phoulouyu kisü, le souho peiyu chipao sütao chouloua puletao lesü sayu nou phouloure.
32Alia lah puhai-a rachi paolamai soua buyu Judas ea Sailas nou thaihou jürai maitao hisü lehoyu chi taoli paopeia puletaoye soutsü peire. 33Alia buh sühinou teile phajü bulouyu thaisü thaihou jüraimai taonou puletaoye sü kaona-a seidakhaiwu-a panou puletaoye seiveyu maitao hi khaivere. 34Ana Sailas wo sühinou chao-a bure donou le laloure.
35Alia Paul ea Barnabas sü teile phajü donou Antiok hi chao-a buloua kukhemai taoliye koa puletao nou Mapao vei chipao sü doupei-a ea paodou-a bue.
Paul ea Barnabas ratayu
36Alia teile phajü thaisü Paul nou Barnabas hi paoe, “Eletao nou raichoki Mapao vei chipao paodou peiyu nuhdu liki hi buyu thaihou jürai maitao hi dakhai veloua puletao sü kakua hrüsa touyu sü zhulaikhe.” 37Sükisü Barnabas nou Johan Markye koa satanü loure, 38ana Paul nou puhye satayu hai zümoe tea choloure, daiolouzü puhnou puhaiye koa akhai koute vah soukhaimoa Pamphulia hinou puhaiye thaowu-a tare. 39Alia puhai kole hisü veiva sholoua puhaisü ratare, Barnabas nou Markye saloua dzüluki hinou Kupra hi tare, 40ana Paul nou Sailasye doloua lüloumai taonou puhaiye Mapao vei zhuvea hi thaothouwu-a puhaisü tare. 41Alia puhnou lüloumaime taoye soutsüpeia Suria ea Kilikia hilonou tachopoa tare.
Iliyochaguliwa sasa
SEI-ATAMAI VAHTAO 15: POUMBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
