SEI-ATAMAI VAHTAO 14
14
Ikonium hinou Ko Paodouyu
1Alia chuo Ikonium hinou Paul ea Barnabas nou Jihudimai rathobuh hi talouloua ko paodouyu kisü Jihudimai-a ea Greek mai-a alaosou louche loure. 2Ana louche bayu Jihudimai taonou tahrüh kukhe maitaoye süpeiwu-a panou puletaoye nou lüloumaitao pei hi motou loure. 3Alia puhai nou Mapaoye donou khuveishoa chipaoa sühinou phasho nai-a bue ea Mapao nou puhvei zhuvea kohai chekhaoe touyu sü panou lapeire donou puhai bahnou shee tyali ea khupa vah alaosou panou souloure. 4Ana nuhdu hi maikhemai sü me ahaisoua dade loure; süolouzü kamainou Jihudimai ea kamainou sei-atamai thaiko loure.
5Sükisü tahrüh kukhemai kamainou ea Jihudimai kamainou puletao peichamai taoye koa puhaiye souvea-souho peire ea chuhnou deire donou souda loure. 6Puhai nou ko süsü sülouyu kisü tutaloua Lukonia teidei hi buyu nuhdutao süolouzü Lustra, Derbe ea kukhe ngheiki hi buyu nuhtaohi vetare. 7Sühinou puletao nou ko aveisü paodoupeie.
Lustra ea Derbe hinou Ko Paodouyu
8Chuo Lustra hisü, pfüpou hinou phishoa nakouyu vuhlia takhai moyu maili chobua bue. 9Puhsü sühinou Paul nou chi pao-a buyu keia bue, alia Paul nou puh hi zhuteiloua ea puhye souvei peilou süe tea loucheyu sü puh hi bue touyu ngaoloua, 10pai kushoa paoe, “Ne phisü pfüa latalou khaio!” Alia puhnou shuhaloua taloure. 11Maikhe mainou Paul nou souyu ngaolouyu kisü shusoua shaloua, Lukonia mai la hinou, “Ramaitao nou emai khaosoua Eletao hi kou bure!” tea paoe. 12Puletao nou Barnabasye nou Zeus ea Paulye nou, puhnou chi paopouyu vanou Hermes tea zhih sapeie. 13Alia nuhdu kijü hi buyu Zeus vei rathoki sünavei napao sünanou chodetao ea poupatouh taosü romü hi pove loure, daiolouzü puhnou maikhe maiye koa sütaosü sei-atamai sühai hisü sheelayu züpae.
14Ana Barnabas ea Paul nou süsü choulouyu kisü puhai sahbatao sü paiphaloua ea maisou hrohi tupa louloua shusoua paoe, 15“Maikhe maitaore, neletao daidonou haikuyu vah hai souwe? Eh-a nele büyu maibaie, alia neleye panou hakoyu haitao teitei hinou tareiloua raki, deiphao, zaidu ea sütaohi buyu teiteiye soupeiyu hriyu Ramai hi panou veloure ko avei sü Ehnou nelehi povewe. 16Dao raiki louzü puhnou tahrüh hrülaiye panou lah puletao madonou tayu sü aetou peire. 17Sütoukhaia puhnou zhopaoh ha-a lah puhye thaowu moe, daiolouzü puhnou vah avei soupeia rakinou tei rükoupeie ea shi shiyu khou-teile peia neletao lesü panou touso ea sayu nou phoupeiloue.” 18Sübüa chi haitaosü paowu-a puhai nou maikhe maiye puhai hi posheelare hinou tateishoa nuloue.
19Ana Jihudimai kamaitao nou Pisidia hi buyu Antiok hinou ea Ikonium hinou taveloua maikhe maiye süpeiwu-a puletaoye panou Paulye chuhnou deipeire ea puhsü thaire tea choloua nuhdu vakouhi puhye süthaipa khaire. 20Ana rozümai taonou tave puhye sühao-a buyu hinou, puhnou shuloua nuhdu nahi dakhai loure. Alia thainaisho sü puhnou Barnabasye koa Derbe hi tahore.
Suria hi buyu Antiok hi Dakhai Veyu
21Alia puhai nou nuhdu sühinou ko avei paodoupeia mai taoliye panou rozümai souloure. Süthaisü puhai sü Lustra hi, Ikonium hi ea Antiok hi dakhai tare. 22Alia nuhdu sütaohi buyu rozümaitao lesü soukhou peia ea lü hinou tobai soumoa buloure donou puletaoye süpeiwu-a, “Veahoyu tyali vedao vuzüwu-a Eletao nou Ramai Vedei hi veloulai,” tea paodoupeie. 23Alia puhai nou lüloumaime liki hinou tsümaitao dopa loure ea veachi paonoupu lüh-a puletaoye sü puletao nou louche-a buyu Mapao bah hi thaothou peire.
24Süthaisü puhai nou Pisidia teidei tachopoa Pamphulia hi velou loure. 25Alia puhai nou Perga hinou ko avei sü paodou peiwu-a Attalia hi takoure, 26ea Attalia hinou puhai nou chu souveteloua buyu vah süna donou puhaiye Ramai zhuvea hi thaothou peiyu buh Antiok hisü dzüluki hinou khaivere.
27Puhainou Antiok hi velou louyu kisü, lüloumaime taoye kuve dzüloua Ramai nou puhaiye koa vah souyu teitei ea kakua puhnou tahrüh kukhemai taohi lülouyu vei kikhu sü houpeisa touyu chi teitei sü puletao hi paongao peie. 28Alia puhai nou lüloumai taoye koa sühinou teile phasho nai-a bue.
Iliyochaguliwa sasa
SEI-ATAMAI VAHTAO 14: POUMBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
