EXODUS 13
13
Fa tîr hlan thu
1 Lalpa chuan Mosia a bia a. 2“Israel-te zînga fa tîr, mipa, chhûl keu tawh phawt chu, an ran no, a pa, piang hmasa ber nên ka tân serh hrang rawh, ka ta an ni,” a ti a. #Num. 3:13; Lk. 2:23.
Chhang dawidim telh loh kût
3Mosia chuan mipuite hnênah, “Vawiin hi hre reng rawh u, Aigupta ramah bawih in ni a, in chhuak ta a nih hi. He hmun aṭangin Lalpa chuan a chakna hmangin a hruai chhuak che u a ni. Chhang dawidim telh in ei hauh tûr a ni lo. 4Abib thla, vawiin hian in chhuak a nih hi, 5Kanan mite ram, Hit mi te, Amor mi te, Hiv mi te, Jebus mite awmna, khawizu leh hnutetuia luang ram, in pate hnênah pêk che u a lo tiam tawh ram a hruai thlen hunah che u chuan, hemi thlaah hian kût hi in hmang ṭhîn tûr a ni. 6Ni sarih chhûng dawidim telh loh chhang in ei tûr a ni a; a ni sarih ni chuan Lalpa chawimawi nân ruai ṭheh tûr a ni. 7Ni sarih chhûng chu dawidim telh chhang in ei tûr a ni lo, in ramah dawidim pawh, dawidim telh chhang pawh a awm tûr a ni lo.#13:7 Tûn thlengin kalhlên kût ni, a ni hmasa ber tlaiah kût chaw an ei hmain in chhûngah dawidim awm chu an vai fai a, an paih vek ṭhîn. Ni sarih hnuah dawidim thar an siam a, chu chu kum tluanin an hmang zawm. 8In fate hnênah, ‘Aigupta ram aṭanga kan chhuah dâwn laia Lalpa thiltih avânga hêng hi ti kan ni,’ tiin hrilh ang che u.
9“In kuta chhinchhiahna leh in mit kâra hriatrengna thil hrên#13:9 ‘in kut leh in chala chhinchhiahna dah’ tia ngaih theih a ni. in hrêng ang hian Lalpa dân chu lam nachâng in hriat theih nân in hmang ṭhîn dâwn nia. Aigupta ram aṭangin a thiltihtheihna ropui tak hmangin a hruai chhuak si che u a. 10Kum tin kût chu a hun takah in hmang ziah tûr a ni.
Fa tîr
11“Kanan mite ram, in pate hnêna pêk che u a tiam chu Lalpa chuan a hruai thlen che ua, a pêk hunah che u chuan, 12in fa tîr apiang, mipa tawh phawt chu, Lalpa hnênah in hlân tûr a ni. In rante pawh an no hmasa, a pa tawh phawt chu, Lalpa hnênah in hlân tûr a ni.#Exod. 34:19,20; Lk. 2:23. 13Sabengtungno hmasa ber erawh chu a aiah berâmno hlânin in tlan tûr a ni. In tlan duh loh chuan a ring elhtliak ang che u. In fa tîr te chu in tlan ngei tûr a ni.
14“Nakin hnuah in faten, ‘Hei hi eng tihna nge?’ tia an zawh che u chuan, ‘Aigupta rama bawiha kan awm, Lalpa chuan a chakna hmangin min hruai chhuak a. 15Faraw-an kan chhuah a phal loh lai khân, Aigupta rama fa tîr, mihring pawh ran pawh, a tihlum vek a; chuvângin, chhûl keu tawh phawt chu Lalpa hnênah kan hlân zêl a ni; keimahni fate erawh chu kan tlan ṭhîn a ni,’ in la ti dâwn nia. 16Chutia in tih chuan kut emaw, chal emaw hrên angin Aigupta ram aṭangin Lalpa chuan a chakna hmangin a hruai chhuak che u a ni tih in hre reng thei ang,” a ti a.
Chhûm leh mei ding
17Faraw-an mite a chhuah khân kawng hnai zâwk, Filistia mite rama kal tlang kawngah chuan a hruai lo va, miten indona an hmuhin an inchhîr palh ang a, Aigupta ramah an kîr leh mai ang tih a hlau a ni. 18Thlalêr lam, Tuipui Sen lamah a kual zâwngin a hruai ta zâwk a. Israel fate chu Aigupta ram aṭang chuan hriamhrei nên, a pâwl pâwlin an chhuak ta a.
19“Pathianin a hre reng ang che u a, ka ruhte hi in zâwn chho dâwn nia,” tia a chah anga tih an tiam tlat angin Mosia chuan Josefa ruhte chu a keng a.#Gen. 50:25; Jos. 24:32. 20Sukot aṭang chuan an kal zêl a, thlalêr tâwp Etham-ah bûk an khuar a. 21Chhûn leh zâna an kal theih nân Lalpa chuan chhûnah chhûm dingin an hma a hruai a, zânah mei dingin an kawng a tieng a. 22Chhûna chhûm ding leh zâna mei ding chuan mite chu a kalsan ngai lo.
Iliyochaguliwa sasa
EXODUS 13: MIZCLBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.
