Mistari Maarufu ya Biblia kutoka ರೋಮಾಯೆರೆಗ್ 1

Shirikisha

ಸುವಾರ್ತೆದ ವಿಚಾರೊಡು ಯಾನ್ ನಾಚಿಗೆ ಮಲ್ಪುನಾಯೆ ಅತ್ತ್. ಅವು ನಂಬುನಾಕುಲೆಗ್ ಮಾತೆರೆಗ್ಲಾ ರಕ್ಷಣೆಗಾದ್ ದೇವೆರೆನ ಬಲ ಆದುಂಡು. ದುಂಬತ್ತ ಯೆಹೂದ್ಯೆರೆಗ್ಲಾ ಐಡ್ದ್ ಬೊಕ್ಕ ಪಿದಯಿದ ಜನೊಕುಲೆಗ್ಲಾ.

ಎಂಚಂದ್ಂಡ ದೇವೆರೆಡ್ದ್ ತಿಕ್ಕುನ ನೀತಿ ಸುವಾರ್ತೆಡ್ದ್ ತೋಜಿದ್ ಬರ್ಪುಂಡು. ಅವು ಸುರುಡ್ದು ಕಡೆ ಮುಟ್ಟಲಾ ನಂಬಿಕೆಡ್ದೇ ಆಪುಂಡು. “ನೀತಿವಂತೆ ನಂಬಿಕೆಡ್ದೇ ಬದುಕುವೆ,” ಪನ್ಪಿನ ಶಾಸ್ತ್ರದ ಪಾತೆರಲಾ ಉಂಡತ್ತಾ?

ದೇವೆರ್ ಈ ಲೋಕೊನು ಉಂಡು ಮಲ್ದಿನೆಡ್ದಿಂಚಿ ಬಾನೊನ್ಲಾ ಭೂಮಿನ್ಲಾ ತೂತೆರ್. ಆಯನ ತೋಜಂದಿ ಗುಣೊಕುಲು ಅಂದ್ಂಡ ಆಯನ ನಿತ್ಯ ಶಕ್ತಿಲಾ ದೈವತ್ವಲಾ ಮಾತೆರೆಗ್ಲಾ ಸ್ಪಷ್ಟ ಆದುಂಡು; ದೇವೆರ್ ಉಂಡು ಮಲ್ತಿನ ಸಂಗತಿಲೆಡ್ ಅವು ತೆರಿದ್ ಬರ್ಪುಂಡು. ಅಂಚಾಯಿನೆಡ್ದ್ ಆ ಜನೊಕುಲೆಗ್ ವಾ ನೆವನಲಾ ಇಜ್ಜಿ.

ದಾಯೆಗಂದ್ಂಡ ಅಕುಲು ದೇವೆರೆನ್ ತೆರಿದೆರ್ಡಲಾ; ಆಯಗ್ ಸಂದಾವೊಡಾಯಿನ ಮಾನೊನು ಅಕುಲು ಕೊರ್ಪುಜೆರ್; ಆಯ ಉಪಕಾರೊಲೆನ್ ನೆನೆತ್‌ದ್ ಸ್ತುತಿ ಮಲ್ಪುಜೆರ್. ಪಗತೆಗ್ ಅಕ್ಲೆ ಯೋಚನೆಲು ದಡ್ಡ್ ಆದಿತ್ತ್ಂಡ್ ಬೊಕ್ಕ ಅಕ್ಲೆನ ಬುದ್ಧಿದಾಂತಿನ ಉಡಲ್ ಕತ್ತಲೆಡ್ ದಿಂಜಿದುಂಡು.

ಅಕುಲು ಸತ್ಯ ದೇವೆರೆನ್ ಬುಡ್ದು ಸುಳ್ಳುನು ಪತ್ತೊಂದು ಸೃಷ್ಟಿನ್ ಉಂಡು ಮಲ್ತಿನಾಯ ಪಗತೆಗ್ ಆಯಡ್ದ್ ಉಂಡಾಯಿನ ವಸ್ತುಲೆನ್ ಆರಾಧನೆ ಮಲ್ತ್‌ದ್ ಐಕ್ಲೆನ ಸೇವೆ ಮಲ್ಪುವೆರ್. ಸೃಷ್ಟಿಕರ್ತವೆ ಒರಿಯೇ, ಏಪೊಗ್ಲಾ ಪುಗರೊನಿಯೆರೆ ತಕ್ಕದಾಯೆ. ಆಮೆನ್.

ಕಾರಣ ದಾನೆಂದ್ಂಡ ಸತ್ಯೊನು ತೆರಿಯಂದಿಲೆಕ್ಕ ತಡೆಪಿನ ನರಮಾನಿಲೆನ ಮಾತ ತರತ ಪಾಪದ ಮಿತ್ತ್‌ಲಾ ಅನ್ಯಾಯದ ಮಿತ್ತ್‌ಲಾ ದೇವೆರೆ ಕೋಪ ಪರಲೋಕೊಡ್ದು ತೋಜಿದ್ ಬರ್ಪುಂಡು.

ಅಕುಲು ಇಂಚ ಮಲ್ಪುನೆಡ್ದ್ ದೇವೆರ್ ಅಕ್ಲೆನ್ ನಾಚಿಗೆ ಪುಟ್ಟಾವು ದುರಾಶೆಲೆಗ್ ಒಚ್ಚಿದ್ ಕೊರಿಯೆ. ಅಕ್ಲೆ ಪೊಂಜೊವುಲು ತನ್ಕುಲೆ ಶರೀರದ ಸಂಬಂಧೊನು ಶರೀರೊಗು ವಿರೋಧ ಆದುಪ್ಪುನೆಕ್ಕ್ ಪಗತೆರ್. ಅಂಚೆನೇ ಅಂಜೊವುಲು ಪೊಂಜೊವುನ ಒಟ್ಟುದ ಶರೀರ ಸಮ್ಮಂಧೊಲೆನ್ ಬುಡ್ದು ಒರಿ ಒರಿಯಗ್ ಶರೀರದ ದುರಾಶೆಗ್ ಒಳಗಾಯೆರ್. ಅಂಜೊವುಲು ಅಂಜೊವುಲೆ ಒಟ್ಟುಡು ಸಮ್ಮಂಧ ಮಲ್ತೊಂದು ತನ್ಕುಲೆ ಅಕ್ರಮೊಲೆಗಾದ್ ಬರೊಡಾಯಿನ ಶಿಕ್ಷೆಗ್ ತಕ್ಕದಾಕುಲಾಯೆರ್. ಉಂದತ್ತಂದೆ ದೇವೆರೆ ಗೇನ ಅಕ್ಲೆಗ್ ಇಷ್ಟದಾಂತಿನೆಡ್ದ್ ದೇವೆರ್ ಅಕ್ಲೆನ್ ಅತ್ತಂದಿನ ನೀಚ ಬುದ್ಧಿಗ್ ಒಪ್ಪಿಸಾದ್ ಕೊರಿಯೆ. ಅಂಚಾದ್ ಅಕುಲು ಬೊಡ್ಚಾಂದಿನ ಕಾರ್ಯೊಲೆನ್ ಮಲ್ತೆರ್.

ತನ್ಕುಲು ಬುದ್ಧಿವಂತೆರ್ ಅಂದ್‌ದ್ ಪನೊಂದು ಮೂರ್ಖೆರಾಯೆರ್. ಬೊಕ್ಕ ನಾಶಾವಂದಿ ದೇವೆರೆ ಮೈಮೆನ್ ಬುಡ್ದು ಐತ ಪಗತೆಗ್ ನಾಶಾಪಿನ ನರಮಾನಿಲೆನ, ಪಕ್ಕಿಲೆನ, ಪ್ರಾಣಿಲೆನ ಅತ್ತ್‌ಡ ಸರ್ಪೊಲೆನ ಸಮ ಬೂರು ಮೂರ್ತಿಲೆನ್ ಮಲ್ಪುವೆರ್.