Kɨlag 4
4
Awɨn kɨ Pierr kɨ Jã lo gangtat lo Juipg
1Lon Pierr kɨ Jã ndɨ elɨn ta deg ɓaitɔ ye, ngéjanyamosɨkadkari, kɨ bɨra dɔ ngéngom kuj ndub Luwah, kɨ Sadukig ɗen rodt. 2Ɓan wong ngãi kɨta Pierr kɨ Jã ɗa ndoon deg ho ɗa lan mber ɓai ngékoig lo koit. Kɨtɔ elɨn anan: Jeju ɓai lo koit titbe tɔ la deg a ɓai ne lo koit ho ye.
3Hɔn Pierr kɨ Jã land dangait mbã loti, kɨta i lokɨsɔle. 4Na deg ngãibe'n oon dɔ ta lo Luwah ye, telɨn ngétaata lo Krist ad kɔrd asɨ dub mi. 5Loti got, kɨbog lo Juipg, kɨ kɨbog kɨ ngéndoo deg mberkɨnda kawɨn na Jerusalemt. 6Hanna kɨ bɨra ngejanyamosɨkadkari kɨ Kaip, kɨ Jã, kɨ Alegjandɨr kɨ tubeg'n ĩn noojg lo bɨra ngéjanyamosɨkadkari tube ĩn tit nõ. 7Ndahn ngombangkɨlag Pierr kɨ Jã dandt kamla ndɨjend ta anan: Kɨ tɔg kɨ titbãi, ke kam tɔ nõt i yootɨn ne de'n ɗan a?
8Taa ne, Pierr Ndil Kɨkunjɗang ɗoosɨ kama, eld an: Ĩn mɓaiɓe lo Juipg kɨ kɨbog kɨ Israelt: 9Ɓola i ɗa i ndɨjejɨn ta dɔ kɨlat kɨmaj'n kɨ ɗa ad de'n ɗan yootɨn. 10Ĩn tube, ĩn girrdeg kɨ Israel, maj kad i gerɨn nya 'nten maj, i kam tɔ Jeju Krist kɨ Najaret't kan i gana kagdosɨt, na luwah ada ɓai ku ngékoit nõ la kɨtakula de'n ɗan ɗan nõsɨt kɨ lapia ye. 11Jeju la i mbal'n hã ngéɗakujg mbetɨna, mbal'n non la tel bɨradɔ kuj kɨ dõ ye. Mbal'n non i Jeju. 12Kaj kam det mad kɨɗang goto, kɨta tɔ de mad kɨɗang kɨ kam dɔningt kɨtaagbe kɨ Luwah ad deg kad ngahn ne kaj goto, na kɨtakul Jeju kɨɗabe tã.
13Lon ngégangta ku juipgt oon kam kɨmisɨmisɨ lo Pierr kɨ Jã, kamla oon kad ĩn deg kɨ kari pãbe ho, deg kɨkanj nya ger ho ye, ta yad. Na got tel ɗe gerɨn kad Pierr kɨ Jã ĩn deg kɨ ndian nat kɨ Jeju. 14Na lon oon de'n yootɨn na, ɗa kad'dt nderbe ye, ngégangta ku juipgt oon ta kɨ kad elɨn al. 15Taa ne, elɨnd kad teen kam kuj gangtat kɨ tɨga, na ɔjɨn na kɨnadt. 16Elɨn anan: Ɗi j'a kɨ ɗa kɨ deg'n ɗan a? Kɨtɔ nya kɨ yan hã ɗan ye, to kɨ tɨga wakɨsɨ ad deg kɨ ɓebo kɨ Jerusalemt tube gerɨn. J'asɨ kad kɨmaj nya 'nten al bat. 17Na maj kad hoita 'nten kaha gang lo al ye, ad kɨ j'ɔgd kad elɨn ta de mad kam tɔ Jejut.
18La kunɨn Pierr kɨ Jã kamla ndand mber anan: Ot kelɨn ta mad, ke ndoo deg kam tɔ Jejut gog.
19Na Pierr kɨ Jã turɨnd anan: I gaan ta maj oon, ke i nya kɨ goɗobat nõ Luwaht, kad kɨ tel roj go tat losɨ tɔi ta lo Luwah a?
20J'asɨ ɗa nya 'nten al, kɨta nya'n kumj oo ho, mbij oo dɔ ho ye, sumba kad kɨ manaja ho.
21Kɨtɔ 'nten ngégangta ku juipgt ndand mber kɨ dɔt dɔt kad elɨn ta kam tɔ Jejut al, kamla nyand dõ kɨta oon ta mad kɨ asɨ kad gangɨn ne ta dɔdt al. 22Kɨtɔ de'n Pierr kɨ Jã yootɨn na ye, ɓala tɔi dɔsɔɔ.
Ngétaata lo Krist elɨn ta kɨ Luwah kad ad'd kam kɨmisɨmisɨ
23Lon nyan Pierr kɨ Jã dõ ye, awɨn ro madkɨladgt, ɔrrɨnd hoi nyag tube'n bɨradɔ ngéjanyamosɨkadkari kɨ kɨbog lo Juipg elɨnd. 24Lon ngétaata lo Krist oon dɔ nya 'nten ye, tube unɨn ndid kɨ kam kɨkɨɗa elɨn ne ta kɨ Luwah, elɨn anan: Ngej, ngeɗa dɔrã kɨ dɔning, kɨ bahbo kɨ nyag kɨ kamt tube. 25Kɨtakul Ndil Kɨkunjɗang la ad bɔwj Dabid kɨ ɓer loi elɨn an: Kɨtɔɗi girrdeg ndɨ ɓain ne kɨ kɨse, na deg kɨ dang dang ɔjɨn tag kɨ pãbe kamdt tɔ a? 26Kɨtɔ ngarg kɨ dɔningt ndɨ ɓain kɨ ɗɔɔ, ngékõɓeg ndɨ ndan rod nat ndoorɨn ne Bɨraɓe kɨ kɨ wur loa.
27I rota, kam ɓet'n ɗan, la Herod Antipas kɨ Põsɨ Pilat ndan rod nat kɨ girrdeg kɨ dang dang, kɨ deg kɨ Israelt, ndoorɨn ne Jeju kɨ ɓer loi kɨjaɓat'n hã i mbeda, ad i kɨ wur. 28Titbe la deg'n non ɗan nyag tube'n i ɔj kete, kɨ nyag tube'n jii ɗa kɨ tɔg. 29Tajigla Bɨraɓe, oo mban mbajɨn kɨ n'ɗan sej majal. Ad ɓerg loi tɔg kad lan mber ta loi kɨ kam kɨmisɨmisɨ. 30I la jii kad i yootɨn deg, kad ɗan nyag kɨ yaya, kɨ nya kɔjg, kam tɔ Jejut, kɨ ɓer loi kɨjaɓat.
31Lon elɨn ta kɨ Luwah woi ye, lon kawɨn na tit yee yɨkɨtyɨkɨt. Deg tube ɗoosɨn kɨ Ndil Kɨkunjɗang, kamla lan mber ta lo Luwah kɨ kam kɨmisɨmisɨ.
Ngétaata lo Krist ɗan kɨ na
32Koosɨdeg'n taan ta lo Krist ye, ndan rod nat kɨ kam kɨkɨɗa. De kɨ asɨ kel kudt kan: Nya 'nten i lom mĩ kɨɓe goto, na gan na kɨɗabe dɔ nyagt lod tube. 33Ngombangkɨlag man naj kɨ tɔg kɨ ngãi, ɔjɨn dɔ ɓai Bɨraɓe Jeju lo koit. Ad Luwah kɨ Bɔw njang dɔd ngãibe kɨ ɗob kɨ dang dang. 34De mad kɨ nal nya mad kudt goto kɨta deg tube'n awɨn kɨ ndɔɔg, ke kɨ kujg, ɗawɨn nyag'n non kɔ, na ɗen kɨ nar kɨ kand nyag'n ɗawɨn nõ lo kɨɗa. 35Ndahn nõ ngombangkɨlagt ad luɓon dekɨɗen kudt kɨgo nya geet loa.
36De mad ndɨ nõ tɔa i Jojep, i de kɨ girrkooj Lebit, oojɨna dɔning Siprɨt, ngombangkɨlag ndahn tɔa Barnabas, girr tɔa i ngon ngesɔlkam. 37De'n non aw kɨ ndɔɔ lon nõ, ɗaw ndɔɔ lon kɔ, na aw kɨ nara ad ngombangkɨlag.
Nu markerat:
Kɨlag 4: MlL
Märk
Kopiera
Jämför
Dela
Vill du ha dina höjdpunkter sparade på alla dina enheter? Registrera dig eller logga in
Mbai Bible Revision © Bible Society of Chad, 2015.
