Kɨlag 5
5
Ananias kɨ Sapira elɨn takɨbal Luwah ad oin
1De mad i nõ, tɔa i Ananias, tɔ nẽa i Sapira, ɗawɨn ndɔɔ lod mad kɔ. 2Ananias ton kam na kɨ nẽn, ad ngomɨn gaj nar kɨtatɔd, na ndega la awɨn ne ro ngombangkɨlat ye. 3Na Pierr el an: Ananias kɨtɔɗi, ad lo Sɨtan ad ɗoosɨ kami ad el takɨbal Ndil Kɨkunjɗang, na ɔrr gaj nar kam nar ndɔɔt loi a? 4Lon i ɗaw ndɔɔ loi kɔ al ɓaitɔ ye, ndɔɔ ye i loi ale? Lon i ɗaw ndɔɔ loi kɔ tɔ ye, i asɨ ngom nara kɨ loit kad i ɗan nya kɨ kami ndig ale? Kɨtɔɗi ɔjɨn ta kɨ titbe kamit, ad i ɗan nya kɨ titbe a? I deg hã eld takɨbal al, na i Luwah.
5Lon Ananias oo dɔ tag 'nten ye, so ber ɓap oi, ad ɓool kɨbobe ɗa deg tube'n oon dɔ ta 'nten. 6Basag ɓain dõ, ɗe unɨn na, dulona kɨ kub drap, teen sia kɨtɨga kɨ'n duwɨna.
7Asɨ kàd mɨta got, nẽ Ananias ɗe and kuju, ger nyan ɗa nya nõ al. 8Pierr ndɨjea an: Elɨm. Ndɔɔ losɨ'n i ɗawɨn ye, i taan ne nar kɨ asɨ bee?
Nẽ Ananias tur an: Ãã, nara i titbe.
9Taa ne, Pierr ela an: Kɨtɔɗi i ton ne kam na kɨ ngawi kad i nán Ndil Bɨraɓe a? Oo maj. Kah nja basag'n duwɨn ngawi ye, ĩn tabit't nõ, a unɨn kad aw duwɨn.
10Tajigt, nẽ Ananias so nja ngombangkɨlat woi. Basag andɨn kam kujt ngahn nĩn dekɨdẽ, unɨn ten ne kɨ tɨga, aw duwɨna kad ngawat. 11Ɓool kɨbobe ɗa ngékawna tube kɨ deg tube'n oon hoi nyag'n ɗa nya nõ.
Ngombangkɨlag ɗan nyankɔj kɨ nyag kɨ yaya
12Ngombangkɨlag ɗan nyag kɨ yaya, kɨ nyakɔjg ku degt. Ngétaata lo Krist tube ndɨn kɨ kam kɨkɨɗa kam bulot lo Salomõ. 13Na ku ndeg degt, de mad kɨ ire kamɨn na nda ron nat sed goto. Be kaa deg hitɨnd ngãibe. 14Ad kɔr deg kɨ ngétaata lo Bɨraɓe kɨdɨngãg kɨ kɨdẽg ɓain kɨ dɔt dɔt. 15Deg ton ngérotog kɨ tɨga dɔ ɗobt, land kam nya todgt kɨ kam tɨragt tɔ, kɨtakad lon Pierr a tɔi a ne, ndila a ut dɔ deg madg kudt. 16Koosɨdeg ɗen kɨ ngan ɓeg kɨ gugɨn dɔ ɓeɓo kɨ Jerusalem, kawɨn na kɨ nat, ɗen kɨ ngérotog kɨ deg'n hã ndilg kɨyerr dan kumd ndo ngãi. Deg'n non tube yootɨn.
Mbaiɓeg dan kum ngombangkɨlag ndo
17Taa ne, bɨra ngejanyamosɨkadkari kɨ deg tube'n ĩn nat sia ad i deg kɨ unɨn ɗob lo Sadukig, jang tɔld sɔkɨr dɔ ngombangkɨlagt, ad ndig kɨ'n ɗan nya mad sed. 18Hɔn ngombangkɨlag, land dangait lo koosɨdeg kɨ pãbe. 19Na dan lot, malaika lo Bɨraɓe ɗe tee tabit dangai, ad ngombangkɨlag teent kamla eld an: 20Awɨn kam kuj ndub Luwaht i ɗan tit i lan mber ta kaj 'nten deg.
21Ngombangkɨlag telɨn rod go tat 'nten, kɨ sĩ ritit awɨn kam kuj ndub Luwaht ɗa ndoon deg.
Kaglot'n non bɨra ngejanyamosɨkadkari, kɨ ngégangta ku juipgt, kɨ kɨbog lo Juipg kawɨn na kɨ nat tube, lan kɨla kɨ dangait kad ɗen kɨ ngombangkɨlag rodt. 22Na lon ngéɗɔɔg awɨn ye, ngahnd al, tel ɔrrɨnd hoia, 23anan: Kɨ ngah tabit dangai ɗa kɨ kutɨn king king, ngéɗɔɔg ngéngom dangai ɗan tɨga tabit't, na lon kɨ tee tabit a ne, kɨ ngah de kamt al.
24Lon bɨra dɔ ngengom kuj ndub Luwah, kɨ kɨbog lo ngéjanyamosɨ kadkari oon dɔ ta 'nten ye, kamd dad ta paa dɔ ngombangkɨlagt, ad ndɨjen ta kudt, ke ɗi ɗa nya hã deg'n non goton ne kam dangait a? 25De mad ɗe eld an: Oon deg'n i land dangait ye, ɗan kam kuj ndub Luwaht ɗa ndoon deg.
26Ad bɨra dɔ ngéngom kuj ndub Luwah, kɨ ngéɗɔɔg aw ɗen kɨ ngombangkɨlag kɨkanj ɗa sed nya kɨgo lo ngetɔgt; kɨta ɓoolɨn deg na ɓeta tɨland kɨ mbal. 27Ngéɗɔɔg ɗen kɨ ngombangkɨlag nõ ngégangta ku juipgt. Bɨra ngejanyamosɨ kadkari ndɨjed ta. 28An: Kɨ ndasɨ mber kɨ tɔgj kad i ndoon deg kam tɔ det'n non al, nyandoo losɨ asɨ ɓebo kɨ Jerusalem nakɨ, na i ndan ta koi de'n non dɔjt.
29Pierr kɨ ndeg ngombangkɨlag turɨna anan: I soot kad kɨ tel roj go tat lo Luwah tɔi deg. 30Jeju'n i gana dɔ kagdosɨt na i tɔlɨna nõ, Luwah lo Bɔwjg ada ɓai lo koit. 31Luwah tɔia kɨ dõ, ndaa dɔ jikõnt, tela Ngart kɨ Ngekaj deg, kad tee ta ɗob ad Israelag kɨ tɔrrɨn ndid dɔ majalgt lod, na kad nyan go majalg lod kɔ. 32Jĩ ngémanaj dɔ nyagt'n ɗan nya tube; nat kɨ Ndil Kɨkunjɗang'n Luwah ad deg kɨ ngétel rod go tat loa.
33Lon ngégangtag ku juipgt oon dɔ ta 'nten ye so kamdt lam, ad ndig tɔlɨn ngombangkɨlag. 34Na de mad ku ngégangtat i Parisɨ, tɔa i Gamaliel, i ngendoo deg mberkɨnda, i de kɨ aw kɨ kɔsɨgon ngãi ro degt tube, de'n non ɓai ndɨje kad ngombangkɨlag teen tɨga ngonsĩ. 35Kamla el ngégangtag an: Ĩn deg kɨ Israelt oon go rosɨ maj dɔ nyat'n i ndig ɗan kɨ deg'n non. 36Asɨ ndɔ ngãi al, de mad tɔa i Tedas ɓai, oo ron det kɨbo ngãi, ad deg ɓu sɔɔ ndulon goa. Na tɔlɨna ad deg tube'n ndulon goa ye, tɨnda tĩnd kat ad goton. 37Goot gog Judas, i de kɨ Galilet, ɓai kaglo da kɔr degt lon Sejar unɨn ndin kad deg ndahn tɔd kam maktubt, ɔi koosɨdeg gont. Na Judas kaa ne nuj, na deg'n ndulon goa ye, tɨnda tĩnd kɨ log. 38Tajigla m'ndɨ m'elsɨ, i tɔrrɨn jisɨ girrdegt'n ɗan, i nyand ad awɨn kɨta ĩla takɔj lod kɨ nyaɗad ɓain kokɨro degt a ne, a awɨn kɨ kete al. 39Na ĩla kɔjtaɗa lod kɨ nyaɗad ɓain kokɨro Luwaht a ne, a asɨ kɔgɨn dɔ kad awɨn kɨ kete al. Oon go rosɨ maj, na ɓeta i ɗa i ɗɔɔn kɨ Luwah. Ngégangta ku juipgt ndigɨn takɔj loa.
40Ad la kunɨn ngombangkɨlag, na ndand kɨ ndeh riw riw ho, ndand mber kad elɨn ta lo Jeju gog al ta, kamla nyand dõ. 41Ngombangkɨlag teen lo gangtat lo Juipg kɨ ronel kɨta Luwah teld degt kɨ asɨn ngah kõ kɨta tɔ Krist. 42Kɨ ndɔg tube, kam kuj ndub Luwaht kɨ kam kujgt lod nyan ta ndoo deg al, na lan mber Hoita kɨmaj dɔ tat lo Jeju kɨ i Krist.
Nu markerat:
Kɨlag 5: MlL
Märk
Kopiera
Jämför
Dela
Vill du ha dina höjdpunkter sparade på alla dina enheter? Registrera dig eller logga in
Mbai Bible Revision © Bible Society of Chad, 2015.
