Kɨlag 3
3
Moot mad ngah lapia kam tɔ Jejut
1Ndɔ mad, Pierr kɨ Jã ndɨ awɨn kam kuj ndub Luwaht kɨ kàd kɨmita kɨ losɔle kɨta kelta kɨ Luwah. 2Nderbe kɨ tabit kuj ndub Luwaht'n a kunɨna Tabit kɨmaj dum, de mad i moot kɨ teen kam kont, ndɨt nõ kɨ ndɔg tube. A unɨn na awɨn sia ndana tabit kuj ndub Luwaht kad kɔ nya deg'n a ɗen kɨ n'andɨn kam kuj ndub Luwaht. 3Lon de kɨ moot oo Pierr kɨ Jã ndɨ ɗa kɨ n'andɨn kam kuj ndub Luwaht ye, ndɨjed nar. 4Pierr kɨ Jã ndan kumd kɨ dɔat, Pierr ela an: Ooj so.
5De'n non nda kumɨn dɔdt ndã. 6Pierr ela an: Mĩ kɨ nar, ke lɔr kad m'adi al, na nya'n mĩn kam jimt kad m'adi laten: Kam tɔ Jeju Krist kɨ Najaret't i ɓai dõ, i ɓaning.
7Pierr hɔ jia ko kõa, una kɨ dõ. Tajigt njaa kɨ popo njaa ngangɨn kongkong. De kɨ moot ɓai ɗat, ɗa dõ, yaɓood ndia. 8And nat kɨ Pierr kɨ Jã kam kuj ndub Luwaht, a ndia ho, a ud kɨdɨtalg ho, kamla ɔsɨ pa ndubɨn Luwah ye. 9Deg tube oon de kɨ moot'n non a ndia ho, a ndub Luwah ho. 10Deg gerɨn kad i de'n a ndɨ ber tabit't kɨmaj dum lo kuj ndub Luwah, kɨta kɔ nya. Ta yad biw kɨdumbit ad ɓoolɨn, kɨta nya'n ɗa nya nõ.
Pierr elta lo Krist deg kam kuj ndub Luwaht
11De'n non nyàgo Pierr kɨ Jã al, ta ya koosɨdeg biw, ad deg kawɨn na kɨ rodt kam bulot kɨ a kunɨna bulo lo Salomõ. 12Lon Pierr oo nya 'nten ye, elta deg an: Ĩn deg kɨ Israelt, kɨtɔɗi nya 'nten yasɨn a? Kɨtɔɗi tɔ hã i ɗa i ndan ne kumsɨ ndã kɨdɔjt tit i kɨ tɔg loj, ke i nya ɗaj kɨgo lo Luwaht hã kɨ ɗan de'n ɗan Jada ɓaning a? 13Luwah lo Abraham, kɨ Isaak kɨ Jakob, Luwah lo bɔwjg ad tɔko ɓer kɨla lon Jeju. Ĩn kɨɓe kɨ dɔsɨ i lana ji madngétagt i mbetɨna nõ Pilat't lon ɔrrɨn takɨgang kɔ dɔat. 14I mbetɨn Ngekunjɗang kɨ Ngeɗadenesew, na i ndɨjen Pilat kad nya de kɨ ngetɔl deg dõ adsɨ. 15Titbe, i tɔlɨn ngekad deg kumkajir, na Luwah ada ɓai ku ngékoit. Jĩ ngémanaj dɔ nyat 'nten. 16Tajigla i kɨtakul tɔg, kɨ kam tɔ Jejut la de'n ɗan yootɨn, ad i ɗa oona tube nõsɨt ne ye.
17Na ngankom, m'ger maj, i ɗan nya 'nten kɨgo dait kɨkanj ger girra nat kɨ mbaiɓeg losɨ, i tɔlɨn Jeju. 18Na Luwah tɔlkon nya'n eltaa kete kɨta ngékelta kɨ tant an: Kari na Krist a dai yon kɨ kõ ngãi. 19Kɨtɔ 'nten kɨ i tɔrrɨn ndisɨ, na kɨ i telɨn kɨ ro Bɨraɓet kad kɨ bɔrr majalg losɨ. 20Kɨtɔkad Bɨraɓe adsɨn kaglo taakò, ad a la kɨ Jeju Krist'n hã kɔta kad i Krist kete kɨtatɔsɨ. 21Na tajigla taa, Krist ndɨ ngoo dɔrãt mbã kaglo'n hã nyag tube a tel ndand kɨ kij gog. Maɗi nu la Luwah elta 'nten kɨta ngékelta kɨ tant. 22Moij el an: Bɨraɓe Luwah losɨ a ɓai kɨ ngékelta kɨ tant titɨm be, a i nelɨn mbisɨ kɨ roat, a oon dɔ nyag tube'n a elsɨ. 23Dekɨɗen a nel mbin oon dɔ ta lo ngekelta kɨ ta Luwaht'n non al ye, a i ku degt lom al, na a nuj kɔ. 24Ngékelta kɨ ta Luwaht'n elɨn ta, ɓai dɔ Samuelt nu kɨ ĩgɨn utɨn goa, elɨn ta kete dɔ nyagt'n ɗa nya kam ndɔgt 'nten. 25Ĩn taa, ĩn ngan ngékõndubag lo ngékelta kɨ ta Luwaht'n non ho, kɨ ngékõnduba kunkɔ'n Luwah un ad bɔwsɨg lon el Abraham an: Kam kohit la girrdeg kɨ dang dang tube kɨ dɔningt a ngahn majkurrt ye.
26I kɨtatɔsɨ la Luwah ɓain kɨ ngon ngekɨla ho na laa kɨ dɔsɨt kad njang dɔsɨ, kad ad dekɨɗen mbet majal kɨ ɗa lon kɔ.
Nu markerat:
Kɨlag 3: MlL
Märk
Kopiera
Jämför
Dela
Vill du ha dina höjdpunkter sparade på alla dina enheter? Registrera dig eller logga in
Mbai Bible Revision © Bible Society of Chad, 2015.
