Kɨlag 28
28
Pol i dɔ doort kɨ tɔa i Malt
1Lon kɨ tee ta koit, kamla kɨ ger kad jĩ dɔ doort kɨ tɔa i Malt. 2Deg kɨ Malt ɗan sej maj kɨ tɔi loa. Ɗan horr, ndajɨn tat tube, kɨta ndii ed ho kul õ ho. 3Lon Pol kaw kir kɨnat ũ horro ye, li tee kam kirt kɨta horr tɨnga, kui kɨ jiat. 4Lon deg kɨ Malt oon li'n non ɗa jiat jiring ye, elɨn na anan: Rota de'n ndɨn i ngetɔl deg; ke neni aj kam bahbot kaa ne, takɨgang kɨgoɗobat lo Luwah a nyàa kɨ dɔa dõ al.
5Na Pol yekɨ jĩn ad li'n non so kam horrt, nya mad kɨ to kɨ ɗaa goto.
6Deg madg oon a anan ɓet a ti wan, ke ɓet a kɨla so ɓap oi; na ngoon kɔkɨ, ndan kumd ndã kɨ dɔat, na oon nya mad kɨmajal ɗaa al, ad majɨn go ndid gog anan: De'n ɗan i ngeyo. 7Nderbe kɨ lot'n non, ndog lo mbaiɓe kɨ dɔ doort'n non i tit; tɔ mbaiɓe'n non i Publiyus, hɔj kɨ ront ndɔ mɨta adj lo kɨ tot, ɗaj mbah ɔrrj wom. 8Na Bɔw Publiyus to ber, dɔa gaa kamla ed kɨ mosɨ ho tɔ. Pol and goat, kɔ Luwah kɨ tɔa, na ndah jin dɔat yootan. 9Lon ɗa nya 'nten ye, ndeg ngerotog ĩgɨn ndɨn dɔ doort kɨ Malt ɗen ad yootd ho. 10Deg kɨ Malt ɔsɨn gonj ngãi, na lon kɨ ɓai kam toot ye, ɗan sej dɔ nyageegt loj tube.
Pol tee ɓebot kɨ Rom
11Go nahgt kɨmita ye, kɨ ɓai kam toot kɨbo mad kɨ Alegjandrit. Tɔ toon non i yo ndɨngã. Ndɨ doort kɨ Malt kaglot kɨ ɓara. 12J'aw kɨ tee ɓet kɨ Sirakusɨt, kɨ ndit nõbe ndɔ mɨta. 13Kɨ ɓai tit nõbe kɨ hɔ go kadlo j'aw kɨ tee ɓet kɨ tɔa i Rejio. Loti got nel ɓai ko loɓakàdt, la ad j'aw kɨ tee Pujolest go ndɔt kɨ kõ joo. 14Kam ɓet kɨ Pujoles kɨ ngah ngankõ ngétaata lo Krist tit, ndɨjejɨn kad kɨ ɗa sed ndɔ tanãimɨta. Goot gog taa ne kɨ j'aw kɨ tee ɓebot kɨ Rom. 15Lon ngétaata lo Krist oon hoi ɗej ye, tee lan taj mbã kɨ sukɨt kɨ Apiyus, kɨ lot kɨ tɔa i kuj sanya mbahg mɨta. Lon Pol ood ye, ɗa mersi Luwah, roa ngang kokɨro. 16Lon j'aw kɨ tee ɓebot kɨ Rom woi ye, nyan ta ɗob adɨn Pol kad ndɨ kɨ kɨɗanbe, na kɨ asɨgar kɨɗa la kɨ ngoma.
Pol la mber ta lo Luwah kam ɓet kɨ Rom
17Go ndɔt kɨkõmɨta, Pol la kun kɨbog lo Juipg kɨ nat. Lon kawɨn na kɨ nat ye, Pol eld an: ngankom, m'ɗa nya mad kɨ ndoor girrdeg loj, ke nyabelɓe lo bɔwjg al, be kaa ne, hɔmɨn dangait Jerusalem lamɨn ji Romagt. 18Ĩn tɔ nderɨn girr ta lom, na ndigɨn kɨ n'ɔrrɨmɨn kɔ dangait kɨta ngahn ta mad kɨ asɨ koi kad gangɨn dɔmt al. 19Na lon Juipg ndigɨn al ye, m'ndɨje kad Sejar la gangta lom, na i kɨta m'aw kɨ ta mad kad m'la dɔ girrdegt lom al. 20Kɨtɔ 'nten la m'kunsɨn kɨ i ɗen ad m'oosɨ ho, kɨ m'elsɨn ta tɔ ho ye. I kɨta kam kɨndah dɔ Krist'n Israelag ndan la dɔmɨn ne kɨ jinjir 'nten ye. 21Juipg turɨn anan: Jĩ kɨ ngah maktub kɨ ɔj dɔi ko Judet al, ku ngankõt tɔ, de mad kɨ ɗe la ɔrrj hoi, ke elj ta kɨmajal mad dɔit goto. 22Na kɨ ndig kad ĩ kɨɓe ɔrrj girr nyag'n oo nõ kɨ tai, kɨta kɨ ger deg ndɨ ndoorɨn ɓut deg ngéndulo go nyandoo kɨ kij ad elɨn ta majal dɔdt.
23Juipg kɨ Pol ɔrrɨn ndɔ mad kad'n ndɔdɨn na. Ndɔt'n non ye, deg ngãibe ɗen roat lo ndiat. Kɨsĩ mbã lokɨsɔle Pol ndɨ ɔrrd girr tag na lad mber kõɓe lo Luwah kɨ tɔg. Sah kɨ n'ad'd gerɨn ta lo Jeju kɨ kam mberkɨndat lo Moij kɨ maktubg'n ngékelta kɨ ta Luwaht ndangɨn. 24Deg madg taa'n ta'n Pol eld, na kɨmadg mbetɨn koo dɔ ta loa. 25Juipg'n non lon ndɨ tĩn na ye, kɔd so go nat al. Pol eld ta mad kɨɗa dɔt an: Ndil Kɨkunjɗang elta goɗobat nẽm, lon elɨn ta bɔwsɨg kɨ ta ngekelta kɨ ta Luwaht, Ejai an:
26Aw ro girrdegt n'ɗan, na el an:
A oon dɔ ta maj, na a gerɨn girra al.
A oon lo maj, na a oon lo jeje al.
27Kɨtɔ ngarkam girrdeg'n ɗan kongkong,
mbid ɔi dɨrɨr,
utɨn kumd mbukɨ tɔ.
Na ɓeta oon lo kɨ kumd maj
kad gerɨn girra kɨ ngarkamd;
na ɓeta a telɨn kɨ romt ad m'yootd.
28Pol elta tɔ an: Maj kad i gerɨn nya 'nten, Luwah la kɨ Hoita kɨmaj kɨ ro girrdegt kɨ dang dang kad ajɨn.
29Lon eltag woi ye, Juipg ɓai awɨn majɨn na tag kudt ngãibe. 30Pol ndɨ kam kujt lon bá mbã ɗa ɓal joo kɨtaagbe. Pol hɔ deg tube'n ɗe genɨnat kɨ ront. 31La mber kõɓe lo Luwah, ndoo deg ta dan dɔ Bɨraɓe Jeju Krist kɨ kam kɨmisɨmisɨ, na de mad kɨ ɔga dɔ goto.
Nu markerat:
Kɨlag 28: MlL
Märk
Kopiera
Jämför
Dela
Vill du ha dina höjdpunkter sparade på alla dina enheter? Registrera dig eller logga in
Mbai Bible Revision © Bible Society of Chad, 2015.
