Romag Takɨdɔt
Takɨdɔt
Lon Pol ndang maktub ad ngétaata lo Krist kɨ ɓebot kɨ Rom ye, tɔlta kaw mbah lon kɨkõmɨta. Ndig kaw mbã tee ɓebot kɨ Rom kɨta Pol tee kamɓet kɨ Romt al ɓaitɔ. Kamla ndah kamɨnt kɨ n'aw mbã n'tee dɔning Espãit kad n'la mber Hoita kɨmaj (Rom 15:22-24). Maktub'n Pol ndang i kɨtakad n'ɗan go ɗob kawɨn dandt ho, kɨ n'ɔjɨnd nyandoog'n ɓet n'a n'ndoo ngékawna kɨ Romt lon n'a 'nten kudt.
Maktub'n Pol ndang ad ngé kɨ Romt ye, i nyandoo kɨ kasɨnatap kɨta ngékawna. Kam taa tube laten: Luwah ɔrr ta dɔ degt ad'd telɨn deg kɨdenesew, lon adɨn ne kamd Jeju. I kɨtakul kadkam koon na kɨtakul nya mad al (Rom 1:17).
Pol elta dɔ nyagt mɨta kam maktubt lon:
Rom 1:1—8:39 Elta dɔ telrogo mberkɨndat lo Moij ho kadkam Luwah kɨtakul Krist Jeju ho. Ngékawnag kɨ Romt, Juipg kɨ deg'n ĩn Juipg al ĩn kamdt. Na Juipg bãin ngãi kamɓet kɨ Rom, ad kɨmadg telɨn ngétaata lo Krist. Na ĩgɨn non ndɨ telɨn rod girr nyabelɓet lo Juipg ɓaitɔ. Ye kad girrdeg'n ĩn Juipg al ye maj kad telɨn rod girr nyabelɓet lo Juipg ho oo? Ta 'nten ad kam ngékawnag kɨ kij tube sokɨber al. Pol ndood kam maktubt lon an: deg tube ĩn ngéɗamajal, Juipg kɨ deg'n ĩn Juipg al tube ĩn ngéɗamajal. Kɨtɔ mberkɨnda mad kɨ asɨ taa de nya dõ ta majal goto. Na deg tube asɨ ngahn kaj kɨtakul Ndil kɨ Kunjɗang kɨta Krist ndɨ ɔrrd kɨro Luwaht.
Rom 9:1—11:36 Elta ɔj dɔ Israel, girrdeg'n Luwah kɔtd, kɨ ngétaata lo Krist. Tit'n ngɨra kag ĩn girr dɔningt ye, kadkam Krist ngɨra i kam nyandoot lo Moij, ke neni girrdeg kɨ Israelt mbetɨn kadkamd Krist. Pol el an Luwah ndɨ tar girrdeg lon ho, ndɨ kuna kɨ ront. Ndɔ mad a ɗe nõ, nat kɨ girrdeg kɨ dang dang tube, Israel a ger kamkẽ lo Luwah'n ɔj'j kam Krist Jejut.
Rom 12:1—15:33 Elta dɔ ɗobt kɨ titbãi j'asɨ kad kɨ ndɨn kɨ dɔj dõ kam ngékawnat lo Krist. Pol ɔrr girr ɗob kɨ titbãi j'a kɨ ɗan kɨla ndub Luwah kɨ jeje ho, titbãi j'a kɨ ndɨn kɨ lapia kɨ deg. Pol ndamber kad ngétaata lo Krist, ĩn ngangɨn kam kadkam Krist't kɨ ɗan kɨ ĩgɨn hã ĩn tõ kam kadkamt lod. Luwah ndɨ ɔrr deg tube girr tɔg majalt kɨ koi. Tajigla ngétaata lo Krist asɨn ɗa namna kɨ na ho, ɗa namna kɨ Krist tɔ, kɨtakul Ndil kɨ Kunjɗang.
Maktub'n Pol ndang ad Romag tɔltan kɨ lapia'n Pol ɗa deg (Rom 16). Tɔ dekɨdɨngãg kɨ dekɨdẽg ngãibe i tit. Maktub lo Romag ɗa ad ngétaata lo Krist kɨ maɗi ĩn nderbe kɨ ngétaata lo Krist kɨ kaglot kɨ ɓone.
Nu markerat:
Romag Takɨdɔt: MlL
Märk
Kopiera
Jämför
Dela
Vill du ha dina höjdpunkter sparade på alla dina enheter? Registrera dig eller logga in
Mbai Bible Revision © Bible Society of Chad, 2015.