Kɨlag 27
27
Ngekõɓe la kɨ Pol ɓebot kɨ Rom
1Lon i kɨ kun ndi woi kad j'aw kɨ too kɨbo la dɔning Italit ye, lan Pol kɨ ndeg dangai madg ji bɨradɔ ngéɗɔɔgt kɨ tɔa i Julius, un dɔ ɓut ngéɗɔɔg kɨ kɔrd asɨ ɓu, a kunɨn ɓut'n non ngéɗɔɔg lo Sejar Ogust. 2J'and kam toot kɨbo mad kɨ ɓet kɨ Adramit. Too kɨbo'n non ndɨ aw kɨ go kad log kɨ dɔ kumkaagt kɨ dɔning Ajit. J'ɔrr kɨ bahbokat't. J'aw kɨ Aristark de kɨ dɔning Masedɔant, ɓe loa i Tesalonik i nat sej. 3Loti got kɨ ɓai nõbe j'aw kɨ Sidõt, Julius ɗa maj kɨ Pol, nya ta ɗob ad Pol aw ngah namɨng kad ɗan sia dɔ nyageet loa. 4Kamla kɨ ɓai nõbe j'aw kɨ hɔ go kadlo kɨ koorlot kɨ Sipɨr kɨta nél la kɨ dɔjt kɨ tɔgɨn. 5Goot kɨ gang bahbokat'n i kad dɔning Silisit kɨ dɔning Pampili, j'aw kɨ tee Mirat kam dɔning Lisit. 6Nõbe la bɨradɔ ngéɗɔɔg Julius ngah too kɨbo mad kɨ ɓai Alegjandrit ndɨ aw Italit, laj kamt ad j'aw.
7Kɨ ɗa ndɔg ngãibe kɨta j'aw jen jen. Lo gang lam, kamla kɨ tee ɓet kɨ Knide, kɨta nél ɔgj dɔ kaw kɨɗingg sew, kɨ tɔi kɨ kadlo kɨ koorlot kɨ Kret, lo kɨ ndan na ta ndaa kɨ lo kɨ tɔa i Salome. 8Lo gang lam kamla kɨ hɔ go kadlo nẽm mbã kɨ tee lot'n a kunɨna Takumkaag kɨmaj, nderbe kɨ ɓet kɨ Lase.
9Kɨ ndɨ kɔkɨ nõbe ad kaglo tɔi ngãibe, na kaw kɨ kete kam baht tel nya kɨkootɓool ngãi. Kɨtɔ ndɔ kɔgɨro nyasa kɨbo tɔi woi. 10Kɨtɔ 'nten Pol ug eld an: Ĩn deg tube, m'oo kad kaw mbah loj a i nya kɨkootɓool. Too loj kɨ nya kɨ kamt a nujɨn tɔ, mbã roj tɔ ho. 11Na bɨradɔ ngéɗɔɔg hɔ du ta lo ngehɔ gɔgir too tɔi tag'n Pol el. 12Kɨtɔ kumkaa'n non maj kad de ndɨt kaglo kult al, ad koosɨdeg ndigɨn ɓai nõbe, kad ĩla i root a ne, kɨ n'aw 'nten takumkaat kɨ Kret kɨ tɔa i Penisk, takumkaa'n non i mbɨna lot kɨ dɔɔ kɨ lo kɨ ɓodo. Kɨtɔ takumkaa'n non taa sumba lokud kàd sew. Deg ndigɨn kad 'ntent kɨ'n ndɨnt nu kad kaglo kul tɔi kamtã.
Nél barwãi ɓai dɔ bahbot
13Nél mad ɓai ko dɔɔ la pepe ad deg oon a anan ɓet n'a n'awɨn mbah maj, ad tuin handgɔl too kɨ dõ, na ɓai ndɨ awɨn kɨ takumkaat kɨ door lot kɨ Kret. 14Na go kaglot kɨ ngãi al, nélbarwãi mad kɨ a kunɨna nélndii ɓai ko loɓakàdt ndɨ la kɨ tɔgɨn ngãi. 15Nél'n non ɔrr too kɨbo, ad too asɨ taaɗɔ al, na ɔsɨj aw sej sãi kɨ doorlo. 16J'aw kɨ hɔ go kad doorlo mad kɨ du, kɨ a kunɨna Koda, lo gang lam, kamla j'asɨ tui ngon too kɨ dõ kam toot kɨbo ye. 17Na lon kɨ tui ngon toon non kɨ dõ woi ye, lan kɨlag girr toot kɨbo dɔn ne too ad ngang. Kamla ɔrrɨn kubg kɨ dɔ toot kɨ ber kɨta ɓoolɨn, na ɓeta nél ɔrrd aw lad dɔ ngart kɨ bɔg baht kad dɔning Libit. Titbe la nyan ne ad nel ɔsɨd ye. 18Loti got, nélbarwãi la kɨ tɔgɨn ad taj tɔ rum kɨ rotagt, ad deg mbã girr kɔi nyagatg kɨ kam toot tɨla kɨ kam bahbot. 19Ndɔ kɨkõmɨta ye, ngéɗakɨlag kam toot tɨlan nyaɗakɨlag lod kam mant. 20Kɨ ɗa ndɔg ngãibe, j'oo kàd ke kɨmẽg kɨ kumj al, kɨta nélbarwãi la kɨ tɔgɨn, ut dɔj mbukɨ, deg tube kɨ kam toot ɔrrɨn kamd kɔ dɔ kajt. 21Lon kɨ ɗa ndɔ ngãi kɨkanj sanya mad ye, Pol ɓai ɗa dan degt an: Ĩn deg, ni oon dɔ ta lom a ne, maj kad kɨ ɓai takumkaat kɨ Kret al, kamla koi a tee dɔsɨt al, nyamajg a tujɨn al tɔ. 22Tajigla m'ndɨ m'ɔjsɨ kad i iren kamsɨ, kɨta de mad kɨɗa kɨ a nuj kusɨt goto, na too kɨbo koon la a tuj ye. 23Kɨtɔ ndɔ ne, malaika lo Luwah, ĩn hã mĩ de loa ho, m'ndɨ m'ɗa kɨlaɓer m'ada ho ye, ɗe dɔmt ndɔla 'nten, 24an: Ot ɓool. Pol, maj kad a i ɗa nõ ngar Sejart kad gangɨn ta dɔit. Kɨtakuli, Luwah a nyan deg tube'n ĩn sei nat kam toot'n ɗan ad a ndɨn kɨ dɔd dõ kɨkanj kad nya mad ɗad. 25Kɨtɔ 'nten, ĩn deg tube iren kamsɨ i ɓankul kɨ Luwah, na nya'n Luwah elta dɔt, nya'n non a ɗa nya. 26Kari na a lajɨn dɔ doort mad.
27Lon ndɔ kɨ kõ kɨlah gidaisɔɔ asɨ ye, nél barwãi aw sej, laj kɨɗuyug dan bahbo Mediteranet. Lon danlo tet ye, ngéɗakɨlag oon anan jĩ nderbe kɨ dɔning mad. 28Lan kɨla mbɔjman bah, ngahn kɨwoa kɨ ber asɨ metɨr dɔmɨta gidaitanaimɨta, na lon tɔin kɨ kete ngonsĩ ɓaitɔ ye, a kɨ lan kɨla mbɔjman gog tɔ, ngahn kɨwoa kɨ ber asɨ metɨr dɔjoo gidaijijoo. 29Ɓoolɨn na ɓeta too kɨbo aw ɔsɨ ron kad mbangt. Kɨtɔ 'nten ɔin hand hɔ too lo kɨɗa sɔɔ ɓong toot ũn bah na ndɨ ngoon lokɨ ti keɗengẽ. 30Na ngéɗakɨla kam toot sahn ɗob kãi kam toot, ad tuin ngon too kɨ kam bahbot, na ɗa kɨ nunɨn hand hɔ too lo kɨɗa kɨ dɔ bai toot. 31Pol el ngéɗɔɔg kɨ bɨradɔd an: Ĩla ngéɗakɨla kam toot ndɨn kam toot al a ne, a asɨn tee kɨ kajt al bat.
32Kamla ngéɗɔɔg tɨjan kɨllag'n dɔn ne ngon too ye gangɨn, na adɨn man nu kɨ ngon too tɔi sia. 33Lo ndɨ sah ti ɓaitɔ, Pol ɔj deg tube kad san nya, eld an: Ɓone, i ndɔ kɨ kõ kɨlah gidaisɔɔ la i ndɨn dɔgt tasɨ til kɨkanj sanya mad ye, 34m'kɔsɨ kad i san nya tajigla, a i soot kad ɗa sesɨ, kɨta bisɨdɔ de mad kusɨt kɨɗa kaa a nuj al. 35Lon Pol eltag 'nten woi ye, un nyasa, ɗa mersi Luwah nõdt tube, na hɔ tet, mbagɨr sa. 36Kamla deg tube iren kamd na san nya. 37Jĩ tube'n kɨ ndɨ kam toot ye, kɔrj asɨ ɓujoo kɨ dɔtanãimɨta gidaikɨbojidet. 38Lon san nya ndenɨn woi ye, ɔrrɨn nyako kam toot kɔ kɨ bahbot, na adɨn too kɨbo ɓai dõ dol.
Too kɨbo tuj, na deg ajɨn
39Lon lo tɨja roi woi ye, ngéɗakɨlag kam toot oon dɔning al ɓaitɔ, na oon kumkaa mad'n bɔga i ngar, ɔjɨn na ta kad n'awɨn mbã 'ntent ĩla i root. 40Kɨtɔ 'nten gangɨn kɨla dɔɔ hand hɔtoo, ad hand hɔtoo nãi kɨ kam bahbot. Ɗan nõbe tutɨn kɨla dɔ gɔgirg, ɔrrɨn kub kɨ nõ toot kɨ dõ kad nél ɔsɨ too kɨ ketekete, kamla ndan dɔ too kɨ ngara. 41Na lon son lot mad'n ngar i ngãi tit ye, too ndɔt kɨ kete al. Nõ too ud kam ngart mitmit, ad too asɨ tee al, na ɓong too mbagɨr tɔɔ, kɨta hul man tɨnda kɨ tɔgɨn ngãi. 42Ngéɗɔɔg ndigɨn tɔl de dangaig, na ɓeta de mad kudt al man tee ãi. 43Na bɨradɔ ngéɗɔɔg ndig kad kɨ n'aj Pol, kɨta 'nten gangd dɔ kɔjtaɗat lod, ndamber deg'n gerɨn kal man, kɨ tuson kam mant kete kad teen door lot. 44Na ndegag'n gerɨn kal man al, dɔɔnd dɔ barkaggt, kɨmadg dɔ bargaj toot tɔ ho. Titbe la ĩn tube teen ne door lot kɨ lapia ye.
Nu markerat:
Kɨlag 27: MlL
Märk
Kopiera
Jämför
Dela
Vill du ha dina höjdpunkter sparade på alla dina enheter? Registrera dig eller logga in
Mbai Bible Revision © Bible Society of Chad, 2015.
