Populära bibelverser från Roma 6

Dela

Kay ya tandan sa salaꞌ, yan ya pagpa-emel-emel na Tyumanem na walaꞌ ya tyamanan. Manang ya pig-atag na Tyumanem na walaꞌ ya bayad, yan ya ginawa na walaꞌ ya katigkasan asuntu na nyakasambuk da kitadun kan Kristu Jisus na kanaten Matas na Pangulu.

Kay walaꞌ da kamu dumalayi na salaꞌ, asuntu na bekeꞌ da na Uldin ya miggagad kamayu, manang ya migdumala kamayu adun yan da ya kallat na Tyumanem.

Yanagaw dun ni pagba͡utismu kanaten, nyaka-agad da kitadun dun ni paglebeng kan Kristu pada maka-agad uman kitadun adti pagkataw nan magi sa katulus na Ama, aw mabagu uman ya kanaten anenganeng.

Aw diliꞌ mayu uman pagtumbay ya manga punganan na lawas mayu na mag-imoꞌ sa malatay, manang atagan mayu baling ya pagka-utawun mayu adti Tyumanem na un mag-imoꞌ sa madyaw. Kay nyatay da ya dadan na pagka-utawun mayu aw adun pigbagu la kamu. Yanagaw atagan ya manga punganan na lawas mayu adti pag-imoꞌ sa pagkaliman na Tyumanem.

Kya-ede-an tadun na ya dadan na pagka-utawun tadun nyaka-agad da dun ni pagkamatay ni Jisus adti krus pada matay ya dadan na pagka-utawun tadun aw ya salaꞌ diliꞌ da mag-allang kanaten.

Aw maynan uman, silinga la mayu na nyatay da ya pagkalim mayu mag-imoꞌ sa salaꞌ. Aw dun ni kamayu pag-eyaꞌ, daluga mayu ya pagkaliman na Tyumanem, kay nyakasambuk da kamu kan Kristu Jisus.

Na, pagaw awun utaw na baluk ya anenganeng na maglong, “Unu, magpadeleg kitadun magpakasalaꞌ pada magkadakulaꞌ pa ya kallat na Tyumanem kanaten?” Ya tubag ku kanan, “Diliꞌ saba! Kay kasiling kitadun na nyatay da dun ni pag-imoꞌ sa salaꞌ, aw walaꞌ da ya katulus na salaꞌ adti kanaten. Yanagaw, unun pa tadun ya pag-imoꞌ sa salaꞌ?”

Unu, walaꞌ mayu ka-ede-i na pig-allang kitadun na pangkay unu na pigka͡agadan tadun, aw yeiy ya nya-imoꞌ tadun amu? Kun mag-imoꞌ kitadun sa salaꞌ, yan ya mig-allang kanaten, aw ya sampetan yan pa-emel-emelen kitadun na Tyumanem na walaꞌ ya tyamanan. Manang kun dalugun tadun sakanan, ya sampetan yan, katutukan ya Tyumanem kanaten.

Idtu muna pig-allang kamu na pagkaliman mayu mag-imoꞌ sa salaꞌ, manang adun, migpasalamat aku sa Tyumanem, kay pigbetang da mayu adti kamayu anenganeng ya matinaw na palna-u na Tyumanem na pigpa-edeꞌ da kamayu. Aw adun, pigpaluwaꞌ da kamu lekat adti manga salaꞌ, aw nya-imoꞌ da kamu allang dun ni pagdalug sa pagkaliman na Tyumanem.