Populära bibelverser från मत्ती 18

Dela

किजोकि ज़ैड़ी दूई या ट्लाई मैन्हु, मेरे नव्वें सेइं परमेशरे करां मद्दत मगनेरे लेई अकोट्ठे भोतन, अवं तैड़ी तैन केरि मद्दत केरनेरे लेई तैन मां भोताईं।”

फिरी अवं तुसन सेइं सच़ ज़ोताईं, कि अगर तुसन मरां दूई ज़ने धेरती पुड़ अक मन भोइतां कोन्ची मसलेरे हल कढनेरे लेई बाजी परमेशरे करां ज़ै सुर्गे मां आए मद्दत मघन, त तै तैन केरि मद्दत ज़रूर केरेलो।

तैनी अक निकड़ो बच्‍चो एप्पू कां कुजव, ते मझ़ाटे खड़ो कियो। ते ज़ोने लगो, “अवं तुसन सेइं सच़ ज़ोताईं, कि तुस अपनो आप बेदलतां निकड़े बच्‍चेरो ज़ेरे न बनथ, त तुस सुर्गेरे राज़्ज़े मां कधी दाखल न भोल्हे।

ज़ै कोई अपनो आप इस बच्‍चेरो ज़ेरो निकड़ो बनालो, त तै सुर्गेरे राज़्ज़े मां बड्डो भोल्हो।

ते ज़ै कोई एरे ज़ेरे निकड़े बच्‍चे मेरे नंव्वे सेइं कबूल केरते, त तै मीं कबूल केरते।”

“अवं तुसन सेइं सच़ ज़ोताईं, ज़ैन किछ तुस ज़मीनी पुड़ बन्धेले त समझ़ा कि सुर्गे पुड़ बन्धोलू, ते ज़ैन किछ तुस ज़मीनी पुड़ खोल्‍लेले त तैन सुर्गे मां खुल्‍लेलू।

“एन्च़रे अगर तुसन मरां हर कोई, तैस मैन्हु ज़ै मीं पुड़ विश्वास केरते दिले सेइं माफ़ न केरे त मेरो सुर्गेरे बाजी यानी परमेशर भी तुसन सेइं एन्च़रे पेश एज्जेलो।”

“ज़ै कोई इन निकड़न मरां ज़ैना मीं पुड़ विश्वास केरतन एक्‍केरे लेई ठोकर बने, त तैसेरेलेइ एन्ने रोड़ू आए कि बडे ढ्लाटेरो ढ्लेइटोल तैसेरे गल्‍ले उन्ढो ढंढेइतां डुग्घे समुन्दरे मां डोबतां छ़डोरो लोड़ते।

तुश्शो खियाल कुने? कि केसकोई कां 100 भैड्डां भोन, ते तैस मरां अक हेरोए, त कुन तै नड़ेनुवें भैड्डां ज़ैड़ी खतरो न भोए तैड़ी छ़ेडतां, तैस हेरोरि न तोपेलो?