Kantiku i Kantikëve 3:6-11
Kantiku i Kantikëve 3:6-11 Bibla Shqip "Së bashku" 2020 (me DK) (AL1)
Ç'është ajo që shkretëtirës ngjitet porsi shtëllungat e tymit me mirrë e temjan erëzuar e me çdo pudër që shitet? Ja, bartorja e Solomonit! Gjashtëdhjetë trima e rrethojnë, ndër më të fortët e Izraelit. Të gjithë shpatën vringëllojnë e për luftë janë të ushtruar, shpatën ngjeshur e mbart secili kundër lemerisë së natës. Një vig bëri për vete Solomoni me drurë prej Libani. Këmbët prej argjendi i bëri, shpinëzën prej ari e ndenjësen të purpurt, me dashuri brenda qëndisur nga bijat e Jerusalemit. Dilni e shihni, o bijat e Sionit, mbretin Solomon, me kurorën që e ëma i vuri atë ditë kur u martua, atë ditë kur zemra iu gëzua.
Kantiku i Kantikëve 3:6-11 Bibla Shqip 1994 (ALBB)
Kush është ajo që vjen nga shkretëtira, si kolona tymi, e parfumuar me mirrë dhe temjan dhe me lloj-lloj pluhurash aromatikë të tregtarëve? Ja shtrati i Salomonit, rreth të cilit qëndrojnë gjashtëdhjetë njerëz guximtarë, trima të Izraelit. Të gjithë përdorin shpatën, janë të rrahur në çështjen e luftës; secili mban shpatën në ijë për tmerret e natës. Mbreti Salomon i ka bërë vetes një lektizë me dru Libani. I ka bërë kolonat e saj prej argjendi, shpinëzën e saj prej ari, ndenjësen prej purpuri; pjesa e brendshme e saj është qëndisur me dashuri nga bijat e Jeruzalemit. Dilni, bija të Sionit, soditni mbretin Salomon me kurorën me të cilën e ka kurorëzuar e ëma, ditën e dasmës së tij, ditën e gëzimit të zemrës së tij.