Matthieu 19
19
Vi Aʼpâgür̂ü I Ièsu Rö-I Ké Cöö Kaa Vi öyö
Mar 10.1-12
1Na êr̂ê vè cowa röi pâr̂â nô ré na Ièsu, na bör̂i wê vi xè Galilé mâ pwa rö néjêr̂ê Juda rö é ye né Ioridanô. 2Cér̂é bör̂i vi ua-è na pâr̂â kâmö pa pôr̂ô yéyé, na bör̂i pè mör̂u-r̂é röi na ce. 3Cér̂é bör̂i pwa na pâr̂â farésaiö mâ waa yeyèè yè-è mâ êr̂ê: «Nè wêr̂êi, nè târi na ké yè virai kui-e i dèxâ kâmö, na ki pûû-é na pâr̂â kââ bwir̂i?» 4Na bör̂i kurher̂e yè-r̂é na ce, mâ êr̂ê yè-r̂é, êr̂ê: «Na wêr̂êi, gëve da tâ pâwir̂i bar̂ee, ö ce ré rhavûû yaxai kâmö, wè, na yaxai wi mâ bwè na ce, 5xèi ökâré, nè kâyâi pevaa xi-e mâ pâni-e na wi, mâ vi rhùvia-r̂u cur̂u bwè xi-e, na bör̂i rhaaxâ na kar̂ö-r̂u? 6Ökâré cur̂u da kaar̂u tëë, aè cur̂u rhaaxâ kar̂ö. Tö ökâré ka rhùvia i Bâô, wè nè yè da cöö tëë na dèxâ kâmö.» 7Cér̂é bör̂i êr̂ê yè-è, êr̂ê: «Ké xi-yé na vi câwâ mâ na Mosé, êr̂ê, ki mâ nââ pèci né ké yè virai bwè mâ cöö kaa vi öyö?» 8Na bör̂i êr̂ê yè-r̂é na ce, êr̂ê: «Kèi ké mör̂ö i wêê nénââ xe-ve, na bör̂i kâyâi-ve na Mosé, cè ke-ve virai pâr̂â bwè xe-ve, aè é da waa ûr̂û-ré mâ' rö ka rhavûû. 9Wè, gö êr̂ê yè-ve na gènyâ, êr̂ê, ö kâmö ré virai bwè xi-e, na ki da cuu, mâ pè tëë dèxâ bwè, wè na pâr̂â.»
10Cér̂é bör̂i êr̂ê yè-è na pâr̂â pâi pa pâgür̂ü xi-e, êr̂ê: «Nè ûr̂û-ré na nô né dèxâ kâmö mâ kui-e, nè bör̂i da dö e na ké yè mâ vi öyö.» 11Na bör̂i êr̂ê yè-r̂é na ce, êr̂ê: «Cér̂é yè da cëi nô ré na pâr̂â kâmö wânii, aè na e yè pâr̂â kâmö ré é nââ yè-r̂é. 12Wè, na wii na eunuka ka ûr̂û-ré mâ' xè-i pwéé pâni-e na ër̂i-e, aè cér̂é eunuka na bör̂i, wè ka é waa i kâmö, aè bör̂i, wè cér̂é dè eunuka, ka é waa xé-r̂é wa mwâcir̂i xè nékö. Ö kâmö ré yè tâwai cëi nô ré, wè na e na ki cëi na ce.»
Na Aʼvui Pâr̂â O Yar̂i Na Ièsu
Mar 10.13-16; Luk 18.15-17
13Cér̂é bör̂i rhiè mi yè-è pâr̂â o yar̂i, cè ki nââ néxar̂a â-ê na ce rö bwêêwé-r̂é, mâ pwaér̂ö vè ké-r̂é. Cér̂é bör̂i aʼrhua-r̂é na pâr̂â pâi pa pâgür̂ü xi-e. 14Na bör̂i êr̂ê na Ièsu, êr̂ê: «Kâyâi pâr̂â o yar̂i cè ké-r̂é mi ua-nya, aè koa yè aʼrhua-r̂é, wè, nè yè ké-r̂é na mwâcir̂i xè nékö pâr̂â kâmö pa ûr̂û-ré.» 15Na bör̂i yùù néxar̂a â-ê na ce rö bwêêwé-r̂é mâ vi xè-i.
Wi Dowa Ka Kigör̂ödiwi
Mar 10.17-31; Luk 18.18-30
16Aè, tö rhûû, na bör̂i pwa na dèxâ kâmö mâ êr̂ê yè-è, êr̂ê: «Kâmö ka e mwêê, jië na kââ ka e ré gö yè waa cè ki wii na mör̂u xi-nya ka yè da tâwai yèri?» 17Na bör̂i êr̂ê yè-è na Ièsu, êr̂ê: «Gè wêr̂êi, gè êr̂ê yè-nya, êr̂ê, gö kâmö ka e? Na yèri kâmö ka e, aè rhaaxâ rö na Bâô, gè yè bar̂i vi ru rö mör̂u, pwêr̂êwaa pâr̂â mââyöö.» Na bör̂i aʼcëi, êr̂ê: «Ka wêr̂êi?» 18Na êr̂ê yè-è na Ièsu, êr̂ê: «Ökââ, koa yè vi yö vè mii; koa yè waa nô ka yaané, koa yè pâr̂â; koa yè vië i vee; 19pè kau pevaa xi-i mâ pâni-i; aè gèi méar̂i bar̂ee kâmö ré tö vè ubwa i ûr̂û ké méar̂i i xi-i.» 20Na êr̂ê yè-è na wi dowa, êr̂ê: «Gö wê cowa köiwaa röi pâr̂â nô ré, aè, ö jië bar̂ee kââ ré yèri rö pwar̂a-nya?» 21Na bör̂i êr̂ê yè-è na Ièsu, êr̂ê: «Gè yè bar̂i târi, vi na gèi na ka vi rhöwöi pâr̂â nékwêêr̂ê-i, mâ nââ yè pâr̂â kâmö pa rhauadè, wè nè yè mâ wii na pè urhii yè-i rö rua nékö. Aè ua-nya mi.» 22Na bör̂i wê pwêr̂ê nô ré na wi dowa, na bör̂i yéé na pwéé-é, wè na ö kâmö ka kigör̂ödiwi na ce.
23Na bör̂i êr̂ê yè pâr̂â pâi pa pâgür̂ü xi-e na Ièsu, êr̂ê: «Avâr̂i gö êr̂ê yè-ve na gènyâ, nè yè kau aau na nêr̂ê i kâmö ré kigör̂ödiwi e na ké yè vi ru rö mwâcir̂i xè nékö. 24Aè gö êr̂ê tëë yè-ve na tâvèr̂ii yè kaméla na ké yè vi ru rö mèö kaju, aè nè yè cee yè kâmö ré kigör̂ödiwi e na ké yè vi ru rö mwâcir̂i i Bâô.» 25Cér̂é wê pwêr̂ê na pâr̂â pâi pa pâgür̂ü, cér̂é bör̂i cêrhö vè kau, mâ êr̂ê, êr̂ê: «Wîr̂î ré yè tâwai ké yè vi na ka mör̂u?» 26Na bör̂i rhî tâwai-r̂é na Ièsu, mâ êr̂ê yè-r̂é, êr̂ê: «Na da tâwai na kâmö, aè na tâwai rhar̂i rö na Bâô pâr̂â kââ wânii.» 27Na bör̂i êr̂ê yè-è na Pètèru êr̂ê: «Tö rhûû, gèvé wê kâyâi pâr̂â kââ wânii, cè gèvé vi ua-i; aè nè yè wii na jië yè-vé?» 28Na bör̂i êr̂ê yè-r̂é na Ièsu, êr̂ê: «Avâr̂i gö êr̂ê yè-ve, êr̂ê, rèi ö nédaa né vi rhôôr̂u nô, wè nè yè cuè rö kaa per̂e xi-e ka rhîrhér̂é na o i kâmö, aè gëve pâr̂â kâmö pa ua-nya mi, wè, é yè pè cuè-ve rö bwêêwé pâr̂â kaa per̂e ka pârör̂ö na mâ kaar̂u, aè gëve yè rhôôr̂u pâr̂â névâ i pâi xè Israèl ka pârör̂ö na mâ kaar̂u. 29Aè ö kâmö ré kâyâi wêê mwâ, mâ pâvâdii-e, mâ pa béé ër̂i-e, mâ pevaa xi-e, mâ pâni-e, mâ bwè xi-e, mâ pâlè-è, mâ pâr̂â döwö, wè na pûû-é na néé-nya, wè nè yè mâ cëi vidù pè urhii kanii kâmö vi kwéjî mâ nè yè wii ki-e mör̂u ka da tâwai yèri. 30Aè, cér̂é pôr̂ô yéyé na pâr̂â pa baayê, wè cér̂é yè mâ vi rhaadè, aè pâr̂â pa vi rhaadè, wè cér̂é yè mâ baayê.»
Aktualisht i përzgjedhur:
Matthieu 19: ANT
Thekso
Ndaje
Kopjo
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Ajie New Testament of New Caledonia © Bible Society of the South Pacific, 2014.