Matayo 16
16
Bakusaba oYesu akabonero
(Mak 8:11-13; Luk 12:54-56)
1Awo aBafarisaayo nʼaBasadukaayo ni baiza egiri oYesu okumugezesya. Ni bamusaba abaweerye akabonero akakulanga nti obuyinza bwamwe bwazwire wa Kanca. 2Baitu oYesu nʼabairamu ati, “Obwire nibubba bukusweka, mukoba muti, ‘Bwabba busai, kubba eiguru litukulikire.’ 3Nibubba bukuca mukoba muti, ‘Ekyaleero wabbaayo enjura erimu ompungo, kubba eiguru awamwe litukulikire awandi ebicu bikwaite.’ Mumaite okusoboora emboneka ya iguru, baitu ni mutasobola kweteja bubonero bwemukubona omu bwire buni! 4Abantu aba mulembe guni ababbi, era abaazwire oku Kanca, bakusaba akabonero, baitu tibaliweebwa kabonero kandi, okwiyaku aka Yona.”#Mat 12:39-40
Awo nʼabazwaku nʼayaba.
Ekitumbisya kyʼaBafarisaayo nʼaBasadukaayo
(Mak 8:14-21)
5Abeegesebwa nibaikire enseeri wa nyanja, ni baizukira nti tibaaleetere migaati. 6OYesu nʼabakoba ati, “Mwerinde era mwegendereze ekitumbisya kyʼaBafarisaayo nʼaBasadukaayo.”
7Bo ni bakobangana bati, “Abazire ati kubba titwaleetere migaati.”
8OYesu niyeetejere kyebakukoba, nʼababuulya ati, “Nywe abalina okwikiriza okudooli, lwaki mukukobangana nti timulina migaati? 9Nʼati mucaali kweteja, era timukwizukira emigaati etaanu, egyaikutisirye abantu enkumi etaanu, nʼebiibbo bya butundutundu byebaakumbainye? 10Yete emigaati omusanju egyaikutisirye abantu enkumi einai? Ebiibbo bingai ebya butundutundu byemwakumbainye? 11Lwaki mutakweteja nti timbazire ku migaati? Baitu nkubakoba nti, mwerinde ekitumbisya kyʼaBafarisaayo nʼaBasadukaayo.”
12Obwo ni beeteja nti takobere kwerinda kitumbisya kya migaati, baitu kwerinda aBafarisaayo nʼaBasadukaayo byebeegesya.
OPeetero akwatula oYesu nali Kurisito
(Mak 8:27-30; Luk 9:18-21)
13Awo oYesu nʼaika omu kitundu ekyetebwa Kaisaaliya ekya Firipi, nʼabuulya abeegesebwa baamwe ati, “Abantu nibabba bakubaza oku Mwana wa Muntu, bamweta naani?”
14Ni bairamu bati, “Abamwei bamweta Yokaana oMubatiza, abandi bakoba nambu niye Eriya, era abandi nambu niye Yeremiya, oba omwei oku balangi.”
15Awo ye nʼababuulya ati, “Baitu nywe mmunyeta naani?”
16OPeetero nʼamwiramu ati, “Niiwe Kurisito, oMwana wa Kanca omwomi.”
17OYesu nʼamukoba ati, “Simooni omwana wa Yona, oli wa mukisa! Kubba omuntu ti niye yakumanyisirye ekyo, okwiyaku oIte wange ali omwiguru. 18Era ati nkukukoba nti, niiwe Peetero (ekimanyisya nti lwazi), era oku lwazi luni nikwo ndyombokera ekanisa yange; nʼamaani aga Geyeena tigaligisobola. 19Ndikuweerya ebisandabulisyo bya bukama obwa mwiguru; kyona kyona kyolibbwa oku nsi, kiribbwebwa omwiguru; kyona kyona kyolisandabula oku nsi, kirisandabulwa omwiguru.” 20OYesu nʼakunkuniza abeegesebwa obutakoberaku muntu nti Kurisito.
OYesu akubaza oku kufa kwamwe nʼokuyimbooka kwamwe
(Mak 8:31–9:1; Luk 9:22-27)
21Okuzwa olwo, oYesu nʼatandika okumanyisya abeegesebwa baamwe nti ateekwa okwaba e Yerusaalemu, nʼokubonaabonesebwa omuno abantu abakulu omwiyanga nʼabakabona abakulu, nʼabeegesya bʼamateeka, nʼokwitibwa era nʼokuyimbooka oku kiro ekyakasatu.
22Awo oPeetero nʼairya oYesu oku ntando nʼamunenya, nʼakoba ati, “Bbe, Mukama wange, ekyo tikirikubbaaku gonze akadooli!”
23OYesu nʼayinduka nʼarola emabega, nʼakoba oPeetero ati, “Nzwa omu maiso, Setaani we! Oli nkonge mu muwanda gwange, kubba ebirowooza byamu ti bya bwa Kanca, baitu bya bantubuntu!”
24Awo oYesu nʼakoba abeegesebwa baamwe ati, “Buli muntu akwendya okubba omusengeerya wange, ateekwa okwerekeeseerya ni yeetiika omusaalaba gwamwe, nʼansengeerya. 25Kubba buli ataatira obwomi bwamwe, alibufeerwa, baitu buli alibufeerwa oku lwange, alibulamya. 26Ale omuntu kimugasa ki okutunga obuguuda bwona oku nsi, baitu nʼafeerwa obwomi bwamwe? Kiki omuntu kyasobola okuyingisyamu obwomi bwamwe. 27OMwana wa Muntu akwaba kwizira omu kitiinisya kya Ite waamwe, nʼabamalaika baamwe, aweerye buli muntu empeera yaamwe, nakusigikira okwebyo byeyakolanga. 28Kambakobere amananu; abamwei oku bantu abali ani, tibalifa batakaboine oMwana wa Muntu nakwiza nkʼoMukama.”
Aktualisht i përzgjedhur:
Matayo 16: RUULI-NYALA
Thekso
Ndaje
Kopjo
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr