Luk 9
9
Zezu aluma betuma bedzi iku ne bole
1Zezu akukise betuma bedzi iku ne bole. Yedzi ekaba bangu singa ne ukani ve upanza mimbiti myesi ne usaka mibedzu. 2Wangu amana vavu, yedzi eluma bangu ne utse tandaka misisili mive mye Ukani ve Nzambi ne usaka mibedzu. 3Zezu atanda ne bangu ati: «Ye beyi bitse undzunga beyi nde bapa yila ti ne yotu. Beyi nde bapa unsumbi, nde bapa ŋwanza, nde bapa bila, nde paba bedolo, bapayi si ingoyi dzotu ne muutu. 4Yebi yamba beyi se ndaku mbotu, dzakayi wawu nzii ne beyi bivʉtse. 5Ye batu bilewe yamba beyi, temayi ngundu ye bangu. Fufulayi iwulu dze metambi me beyi. Beyi ti bapika vavu, beyi belaka nati Nzambi atse pama bangu.»
6Ndili ye Zezu emana wowe vavu, ye bebingi bedzi betse se membuka mesi. Ne utandaka misisili mive mye Nzambi, ne usaka mibedzu.
Bayi ye Elodi
7Elodi lipatima le Galile, ayuka mesi me mesuta. Wangu edze nde yiba nda wangu itsimene. Utsina ne batu booko bedze ne tanda ati: «Zezu ni Zambatisi wa nyuse tima ye liku.» 8Aba ati: «Eli iya laka nyulu.» Booko ati: «Toko Muutu we Nzambi motu we me yinga se liku.»
9Ni Elodi ati: «Me mene ni we luma ne utsita Zambatisi tsungu, ni wangu yu muutu ni nza? Wami iyuka mamvu me tuu.» Ye Elodi efumba yene Zezu.
Zezu abungule meku me batu meku metanyi (5000)
10Betuma be Zezu baye vutse, ye bangu betanda Zezu mesi me bangu bepika. Zezu abapa bangu ulayi ne batu, kwele ye ngundu ye kumvu Betsayida. 11Ndili ye batu beyuka vavu, ye bangu bebinga Zezu. Zezu ayamba bangu, yedzi ewowe ne bangu mamvu me Ukani ve Nzambi, Zezu asaka batu bedze ne mebedzu.
12Betuma be Zezu beyene ati, vusa va kitse yinda, ye bangu betsindene noŋgo nedzi ati: «Vutise batu betse se membuka, ne se mendaku medzi bakaka. Awawu bangu betuka kobisele buma ye bembula ne bila bye udza, awa bebe bedzi ni se buma ye ikanye.» 13Ni Zezu ne bangu ati: «Beyi mene kabayi bangu bila.» Betuma be Zezu nedzi ati: «Besu bedzi si ne pembe itanyi ne beswi bole, weni witi besu betse sumba bila bye batu ba besi?» 14Ni yedze ne meku me mebaka iku ne mebaka meku metanyi. Zezu ne betuma bedzi ati: «Sundisayi bangu mitsitsi, batu meku metanyi ne ye bangu buma.» 15Ye betuma bepika nda Zezu eluma bangu pika, basundise batu mitsitsi. 16Ye Zezu eboko pembe mene itanyi ne beswi mene bole, yedzi ewaya ikulu, avutise Nzambi live ne bila. Zezu akaba bila ne bebingi bedzi, ye bangu bekabaka batu besi. 17Batu besi badza, bayula. Metsika mebila mevuka, ma lundise membele iku ne mole.
Pyeli ati Zezu ni we Nzambi etobo
18Vusa votu, Zezu atse bondo se buma yotu wangu mene, ne bebingi bedzi bedze kone dzi. Zezu asuŋwule bangu ati: «Me batu bitanda se nyulu yami ni me nza?» 19Bebingi bakakʉle nedzi ati: «Aba ati, weni Zambatisi, boko ati, weni Eli, boko ati, weni Muutu we Nzambi motu wa waa, wa nyuse.» 20Zezu atanda ne bangu ati: «Ni beyi bati meni nza?» Pyeli akalule ati: «Weni we Nzambi etobo.»
21Zezu asumba bangu ati: «Beyi nde banda batanda ne muutu ti ne motu, me beyi beme tanda kule yami.» 22Ye Zezu evele tanda ne bangu ati: «Uve we yikwene Muutu ayene membaba meyitsi. Batu bekala ne bekuŋwu be bekabi be bisemi bye Nzambi ne belakisi be bitsila betse lewe wangu. Betse buuma wangu, vusa ve unsatu wangu atse nyuse.»
23Ye Zezu etanda ne batu besi ati: «Ti yedzi ne muutu witondo binga me, wangu nde tsimene nyulu yedzi mene. Uve wangu abapa koko ye beliningise wangu mene#9.23 Koko ye beliningise yedzi ni buma ye bekomidze Zezu betsete. masi mesi ne ubinga me. 24Yayu witse fumba lungise libɨku ledzi atse fiya langu, ni witse fiya libɨku ledzi itsina nami atse lunga. 25Muutu ti abomo Untamvu ŋwen ilongo, afiya lɨbiku ledzi, ayabaka laŋgu, yedzi ibomo ni yi? 26Muutu tadzi ne sonyi yami ne mamvu mami iwowe, nami we yikwene Muutu, metse yene sonyi nedzi, yami itse ya se ukani vami ne ukani ve Tata wami, ne ukani ve betuma be Nzambi bemipende. 27Me tanda beyi umbu amene, se batu bidzi wa, booko nde tse waa ti bangu besa nde yene Ukani ve Nzambi.»
Pyeli ne Zan ne Zaaki bayene Zezu se ukani ve Nzambi
28Masi ŋwambi mesuta, Zezu amana wowe vavu, yedzi eboko Pyeli ne Zan ne Zaaki, abita kule kudzi ne ubondo. 29Ye Zezu edze ne ubondo, panza yedzi ya yikwene, ne mikanda myedzi eswa mya fuma fuuu. 30Palɨkise, batu bole bedze ne wowe ne Zezu, yedze ni Moyizi ne Eli. 31Bayene bangu se ukani ve Nzambi. Moyizi bane Eli bedze ne uwowe ne Zezu ne liku ledzi Zeluzalemi. 32Pyeli ne booko bedze nedzi bawoto bembula. Ndili ye bangu benyuse, bangu bayene ukani ve Zezu ne batu bole bedze nedzi. 33Ndili ye Moyizi ne Eli betse, Pyeli ne Zezu ati: «Kuŋwu, ayi ni buma yive, bebe betuka dze wa, bebe betunga membanza mesatu, mbotu yowe, mbotu ye Moyizi ne mboko ye Eli.» Ni Pyeli eke yiba medzi edze ne utanda. 34Yedzi edze ne uwowe vavu, ye lingutsu levungile bangu. Bebingi be Zezu bayene bongo. 35Dzuyi dza yinga se lingutsu ati: «Ayu ni ŋwana wami me tobo, yukayi wangu.» 36Dzuyi dze mana wowe, ye Zezu evuka wangu mene. Ye bebingi be Zezu bebata dzangu, bangu beke tanda ne muutu ti ne motu me bangu beyene vusa vavu.
Zezu asaka ŋwana widzi ne umbiti
37Vʉsa ve se ŋwen, ye Zezu ne bebingi bedzi beyinga se kudzi ne usundaka, ye unkuka ŋwen batu ŋwen ya kwanye ne Zezu. 38Se unkuka ŋwen batu ŋwaŋwu, ye muutu motu ewula unsima ati: «Kuŋwu, kolokolo yowe, waya ŋwana wami yu, wangu ni ŋwana wami we itsika! 39Umbiti ŋwen kwata keke wangu palɨkise, yedzi iwula misima, ye umbiti wiyingise ŋwana ne singa, ye meteyi mipula ŋwana se undzumvu. Ye nyulu yi pika wangu ngadzi, ŋwangu ne upula udilu. 40Ma suŋwule bebingi bowe ne upanza umbiti, ni bangu nde tuka.» 41Zezu ati: «Beyi batu belolo, beyi nde ivukidze, beyi bedzi ne mamvu mebi. Metse dze ne beyi ni nzii ndili yowi?» Zezu ne muutu mene ati: «Yaka ne ŋwana wowe we ibaka wiya.» 42Ye ŋwana edze ne tsindene, umbiti ŋwa naŋwule ŋwana ŋwa nyingise wangu ne singa. Zezu abaŋwule umbiti, alungise ŋwana avutise ŋwana ne tata. 43Batu besi bakima. Bangu bati: «Nzambi adzi ne uneni amene.»
44«Dzuvʉlayi meluyi me beyi, uve beyi babata mami itandele, betse tsɨna we yikwene Muutu se meboko me batu.» 45Ni bebingi be Zezu nde yuka me Zezu ewowe ne bangu, mamvu mamu medze ni mesaka isolo, ni bangu beke yiba metsina me mamvu mamu, ne bangu bedze ne bongo ve usuŋwule Zezu metsina me mamvu mamu.
Witakwe boko ubutu ni nza?
46Bebingi be Zezu bedze ne uwowe tima ye bangu, ne ufumba yiba witakwe boko. 47Zezu ayiba me bangu bedze ne uwowe, yedzi eboko ŋwana unte ne udzika kone dzi. 48Ye Zezu etanda ne bangu ati: «Wiyamba ŋwana yu ne itondo dzedzi idzi ne dzangu nami, ame yamba ni me. We me yamba me, ayamba ne we meluma me, ni widzi nda ŋwana unte tima ye beyi, awayu ni witakwe boko besi.»
49Zan ne Zezu ati: «Kuŋwu, besu beme yene muutu motu we me panza mimbiti ne kumvu yowe, ye besu beme simba wangu nedzi nde se yimvu ye bebe.» 50Ni Zezu akalule nedzi ati: «Beyi nde simba wangu, we nde wunda bebe adzi ni we bebe.»
Zezu atse Zeluzalemi
51Ndili ya kalwe ye Zezu inangwe ilongo dzi. Zezu ati, uve matse Zeluzalemi. 52Zezu aluma betuma se mbuka ye Samali ne utse yebise wangu buma. 53Ni batu be mbuka balewe yamba wangu, nedzi edze ne utse Zeluzalemi. 54Zaaki bane Zan beyene vavu, bangu ne Zezu ati: «Kuŋwu ti wa tondo, besu beluma ŋwunyan wiyinga ikulu ŋwen buŋgise bangu besi.» 55Ni Zezu ayikwene, awaya bangu, ne bangu ati: «Beyi nde pika vavu.» 56Ye bangu betse se mbuka mboko.
Bitondo binga Zezu
57Ndili ye bangu bedze ne ulanda, muutu motu ne Zezu ati: «Metse binga we paki si buma yowe itse tse.» 58Zezu akalule nedzi ati: «Bembakwe bedzi ne mebila me bangu bisolime, ne benyodzi bedzi ne mendaku, ni we yikwene Muutu nde buma yedzi inaŋga bembula ne yedzi idzunda.» 59Zezu ne muutu moko ati: «Binga me.» Ye muutu ekalʉle nedzi ati: «Kuŋwu, dzika ma ketse sodze tata wami.» 60Zezu akakʉle nedzi ati: «Dzika bitsindzi bye sodze bitsinzi bye bangu. We, tseke ne utandaka misisili mye Ukani ve Nzambi.» 61Muutu moko ne Zezu ati: «Kuŋwu me binga we, ni dzika ma ketse lakene ne yali yami.» 62Zezu akakule nedzi ati: «Wiboko ipimbi ne ukuna, ti wangu awaya mbisa, awayu nde tuka dzanza se Ukani ve Nzambi.»
Aktualisht i përzgjedhur:
Luk 9: WUM
Thekso
Ndaje
Kopjo
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES