Yohanes 14
14
Si Yesuso en lalan e maangé a si Amang Kasuruan
1Icua i Yesus a sé murit-Na, “Tioo kamu masusa en até, percayano mangé si Amang Kasuruan wo percayano mai Aku. 2Am balé i Amang-Ku kelian paento'an. Wo Aku maangé am bitu en tumu'tul in tampa miow. Icua-Ku in taniitu ai camu ampa'paan en tampa itu wutu-wutul awéan. 3Sa Aku mangém am bitu wo en tampa miow tinu'tul-Kuo, Yaku maai oka sumawel wo makawali icamu maangé an tampa-Ku, wosama' am bisa Aku am bitu ka'i kamu. 4Wo en tampa angéan-Ku, kinailekano miow en lalan maangé am bitu.”
5Icua i Tomas a si Yesus, “Tuang, ra'ica kailekan ami am bisa em paangéan i Tuang, anaé tumambisa réén wo ro'na kailekan ami en lalan maangé am bitu?”
6Wo icua i Yesus, “Yakuo en lalan maangé a si Amang Kasuruan, Yaku ka'i si mengakua in sususuien wutul andumoro' i Amang Kasuruan, wo Yaku ka'i si mengawéé mai ing katouan akar ing kauré-uré. Ra'ica wana esake' tou e maai a si Amang sa ra'ica ipakawali-Ku. 7Sa kamu wutu-wutul makatuus Yaku, tantu ka'i kamu makatuus si Amang-Ku. Intarépé' kamu makatuuso Sia wo isuméréo Sia.”
8Icua i Filipus a si Yesus, “Tuang, ituru'o mai si Amang-Mu ai cami wo en até ami arui keli.”
9Icua i Yesus a si Filipus, “Uréo keli Aku mewali-wali wo icamu, taan ko é Filipus ra'ipé' réén katuusanmu Aku? Si séike' en isuméréo Yaku, sia isuméréo si Amang-Ku. Kéitu réén ko kumua, ‘Ituru'o mai si Amang-Mu ai cami!’ 10Ra'ica réén percayanmu, Yaku imeesao ang karapi i Amang, wo si Amang esa wo Yaku? Sapa sé aicua-Ku ai camu ra'ica nunuwu'-Ku in esa, taan si Amang meesao wo Yaku si méma' in tawo-tawoien-Na. 11Percayano mai si aicua-Ku, Yaku meesao ang karapi i Amang wo si Amang imeesao wo Yaku. Sa ra'ica percayan iow sé ipakua-Ku, percayano mai Aku ampa'paan sé tawo-tawoien niéma'-Ku. 12En ulitna icua-Ku mangé ai camu, si séike' si maéman a Yaku, émaanna oka ka'i en tuu-tuus kakaya'kaan si meputé wo sé niéma'-Ku. Wo ka'i ro'na kaémaan-Na sé tuu-tuus kakaya'kaan sé wangko' mai wo sé niéma'-Ku itu, ampa'paan Aku maangém a si Amang-Ku. 13Wo sapake' em pangileken iow a ngaran-Ku, émaan-Ku oka en itu wo si Amang-Ku ro'na iparayo-rayo wo pasiri-siriin ampa'paan Aku Toyaang-Na. 14Sa kamu mangilek sapake' mangé a Yaku a ngaran-Ku, en itu émaan-Ku oka.”
Si Yesus jumanji e méé mai i Roh Le'nas
15Icua ka'i i Yesus, “Sa kamu mengaupus Yaku, tantu em peré-perénta-Ku émaan oka miow. 16Pangileken-Ku oka a si Amang-Ku, iwéé-Na oka mai ai camu si Matawang walina si ro'na mewali-wali wo icamu akar ing kauré-uré. 17Si Matawang ituo si Roh Le'nas si mengawali icamu a si sususuien wutul andumoro' si Amang Kasuruan. Sé tou ang kayo'baan ra'ica tumerima Sia, ampa'paan séra ra'ica isuméré Sia wo ra'ica makatuus Sia. Taan kamu makatuus Sia ampa'paan Sia mewali-wali wo icamu intarépé', wo Sia mento' oka an untep in até miow i esa wo si esa.
18An tutuw iow itela'u-Ku sa, kamu anio' ra'ica tanuoka sé toyaang imaulao ang kayo'baan. Yaku maai oka sumawel ai camu. 19Ra'io uré ka'i, Yaku ra'io sérén é tou ang kayo'baan anio', taan sérén oka ka'i miow Aku ampa'paan Yaku tumou oka sumawel. Yaku tumou sumawel, anaé kamu ka'i tumou oka sumawel. 20An tutuw-Ku tumou sumawel, kakailekan oka miow sapaoka Yaku meesa wo si Amang, wo icamu meesa wo Yaku wo Yaku meesa ang karapi miow.
21Si séike' en tumerima im peré-perénta-Ku wo pengaémaanna, sia itu mengaupus Yaku. Si séike' si mengaupus Yaku, sia itu icaupus oka i Amang-Ku, wo sia ka'i icaupus-Ku oka. Wo ituru'-Ku oka ai sia si séi Aku.”
22Wo si Yudas si ra'ica si Yudas Iskariot mamuéi a si Yesus, “Tuang, kéitu réén wayake' icami en tinuru'an-Mu in andumoro' si séi si Tuang en ulitna, ra'ica a sé pakasa sé tou ang kayo'baan?”
23Isowat i Yesus ai sia, “Si tou mengaupus Yaku, tantu émaanna oka en taar-Ku, wo sia icaupus oka i Amang-Ku. Yaku wo si Amang-Ku maai oka ai sia wo mento' ang karapina. 24Taan si séike' sé ra'ica mengaupus Yaku, ra'ica kiitanna en taar-Ku. En taar sé lininga miow ra'ica an owak-Ku owo, taan asi Amang-Ku owo si mutusai Yaku.
25An tutuw-Ku mewali-walipé' wo icamu, pakasa en itu aicua-Kuo ai camu. 26Taan si Matawang si yutus oka mai i Amang-Ku ai camu en sumawel Yaku, Siao si Roh Le'nas. Sa Sia maai, isusui-Na oka em baya-waya ai camu wo ita'néi-Na ai camu im baya sé aicua-Kuo ai camu.
27Eng kaeluran itela'u-Ku ai camu. Wo eng kaeluran-Ku iwéé-Ku ai camu, wo sapa si aiwéé-Ku ra'ica meputé wo si aiwéé é tou ang kayo'baan. Ampa'paan in ituo tioo kamu ra'io makaaté in sama' wo kamu tioo maindé-indé'. 28Liningao miow sé aicua-Ku, Yaku maangé taan Aku maai oka sumawel ai camu. Sa kamu uli-ulit mengaupus Yaku, kamu arui oka sa Aku mangé a si Amang-Ku, ampa'paan si Amang-Ku en lébé wangko' mai wo Yaku. 29En itu ra'ipé' mamuali taan intarépé' aicua-Kuo em baya-waya ai camu, wosama' percayan iow oka mai an tutuw en itu mamuali. 30Intarépé' Aku ra'io kumeli roma' ai icamu, ampa'paan si kikiiten é sétang si kumawasa ing kayo'baan anio' ang karoro'ano i maai. Taan sia ra'ica wana kawasa sapake' mangé a Yaku. 31Taan émaan-Ku oka sapa si aiperénta i Amang a Yaku, wosama' sé tou ang kayo'baan anio' makailek, Yaku mengaupus si Amang.
Tumulungo, mayo kita kumesot asi tampa anio'.”
Aktualisht i përzgjedhur:
Yohanes 14: TNT
Thekso
Ndaje
Kopjo
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
En Taar Weru a nunuwu' é Tontemboan @ LAI 2018