JENESIS 3
3
1Go m̃aata e mari manumatua liu sara nalo mila ni namalasi waina Yehovah Sup̃e e mari ra. Go e noa ki nagoroi, e naga, Sup̃e e po noa naga, Koroga ta gani sara nakau ni roara kite? 2Go nagoroi e noa ki m̃aata, e naga, Nawa ni nakau maga ni roara aroga kani a. 3Ma nawa ni nakau waina e doko m̃aleoputo ni roara, Sup̃e e po noa, Koroga ta gani a mau, go koroga ta kisidogo e mau, koro pe mate. 4Go m̃aata e noa ki nagoroi, e naga, Koroga wo da mate lomau mau: 5Nalakena Sup̃e e atae naga naaleatia waina koro pe kani a, namatamu ero pe wo pei tea wolagatiana, go koro pe wo dakiusi Sup̃e, koro pe wo atae nawiaana go nasaana. 6Go ragi waina nagoroi e punusi naga nakau wanogoe e p̃ia ki navinaga, go naga e pei tea lom̃atakiana, go naga e pei nakau masauana raki namanumatuaana, e dape nawana seara, po ganikani; go e dua anawota waina e sikoti a, go nae e ganikani. 7Go namata ni nara dua ero pei tea wolagatiana, go ero atae naga ero m̃alam̃ala; go ero duri saisai ki naulu ni napuliva, po dum̃ada madeada mari nam̃asere maga. 8Go ero dogo nadaleo ni Yehovah Sup̃e e surata roara nasau ni naaleatia: go naatam̃oli go anagoroi ero dokoloku padua ki narae ni Yehovah Sup̃e m̃aleoputo ni nakau maga ni roara. 9Go Yehovah Sup̃e e pioso paki naatam̃oli, po noa ki nia, e naga, Nigo wai? 10Go e naga, A dogo nadaleom̃a roara, go a mataku, nalakena a m̃alam̃ala; go a dokoloku. 11Go e naga, Sei e noakisai ko naga ku m̃alam̃ala? Nigo ku po gani nakau waina a dip̃agoro ko asa, naga p̃a ta gani a mau kite? 12Go naatam̃oli e noa, Nagoroi waina ku pitua ki nia naga ega sikoti au doko, nae e dua au nakau wanogoe, go a ganikani. 13Go Yehovah Sup̃e e noa ki nagoroi, e naga, Nasava waia ku po mari a? Go nagoroi e noa, M̃aata e surue au, go a ganikani. 14Go Yehovah Sup̃e e noa ki m̃aata, e naga, Nalakena ku po mari tea waia, ku pei tea vasasakiana warua liu sara katel, go sara nalo mila ni namalasi; p̃a wo soka ki nap̃elem̃a, go p̃a wo gani nam̃otam̃ota sara naaleatia ni namauriana anigo: 15Go aga wo lawo ki navivilosiana namawota kakamu ma nagoroi, go namawota ni naworam̃a go ni naworana: nae ega wo papua nap̃aum̃a go nigo p̃a wo kati nam̃ago ni natuana. 16E noa ki nagoroi, e naga, Aga wo mari narogokitesaana anigo go natienaana anigo eroga wo laapa; p̃a wo dape piakiki maga pilake narogokitesaana; go namasauana anigo ega wo paki am̃awota, go nae ega wo maramara dap̃au ko. 17Go e noa ki Adam, e naga, Nalakena ku po dogo parati ki nadaleo ni am̃agoroi, po gani nakau waina a dip̃agoro ko asa, po noa, P̃a ta gani a mau: natano e pei tea vasasakiana nalakena nigo; p̃a wo p̃osiwosi asa raki nakaniana sara naaleatia ni namauriana anigo; 18Go ega wo manigo dape tea vivitip̃a maga go tea makalikali maga; go p̃a wo gani nataputea ni namalasi; 19P̃a wo gani navinaga pilake natorotoroana ni naraem̃a, pa pa p̃a wo liliu paki natano; waina ku pei tea tapeana m̃elu asa umai: nalakena ku pei nam̃otam̃ota, go p̃a wo liliu paki nam̃otam̃ota. 20Go naatam̃oli e soso nagisa ni anagoroi ki Havah; nalakena e pei p̃ila ni tea mauri mamau puti. 21Go Yehovah Sup̃e e magi Adam go anagoroi mari sugoro maga ni nawili, po sugoro ra asa.
22Go Yehovah Sup̃e e noa, P̃a leo, naatam̃oli e po dakiusi gida sikai, e atae nawiaana go nasaana; go ragi waia, e pe sai ki nam̃elearuna po moro dape nakau ni namauriana, po ganikani, po mauri pa pa e pe tu du po du mau du: 23Go Yehovah Sup̃e e dip̃aki lua e m̃elu dua ki roara ni Eden, naga ega kili natano waina e pei tea tapeana m̃elu asa umai. 24Go e kopasi naatam̃oli paki etaku; go e mari Kerub maga eu doko taleva ni elo sake ni roara ni Eden, go lova sikai ni mena ni nakapu, waina e do dum̃ana doa e naga ega vavaigoro napua ni nakau ni namauriana.
Aktualisht i përzgjedhur:
JENESIS 3: NTB
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Bible Society of the South Pacific