Marko 3
3
Nyumu nɛ nine kake gbo ɔ
(Mateo 12.9-14; Luka 6.6-11)
1Nɛ Yesu ba kpe he ɔ ekohu. Nyumu ko ngɛ lejɛ ɔ nɛ e nine kake gbo. 2Ni komɛ ngɛ lejɛ ɔ nɛ ngɛ lɛ hwɔe kaa e ma tsa lɛ ngɛ Hejɔɔmi Ligbi ɔ nɔ lo, konɛ a ya po e nya.
3Yesu de nɔ nɛ nine gbo ɔ ke: “Tee si nɛ o ba da kpɛti!” 4Nɛ e bi ni ɔmɛ ke: “Anɛ e da kaa a peɔ kpakpa loo a peɔ yayami ngɛ Hejɔɔmi Ligbi ɔ nɔ, kaa a heɔ nɔmlɔ yi wami, aloo a gbee lɛ?” Se mɛɛ lɛɛ a pɛ̃ a nya mi. 5Yesu kɛ abofu hyɛ a hɛ mi kɛ kpe; se lɛ be ɔ mi nɔuu ɔ, e dɔ lɛ kaa a tsui wa kikɛ; kɛkɛ nɛ e de nyumu ɔ ke: “Kpa o nine ɔ mi!” E kpa mi nɛ a tsa e nine ɔ. 6Lɔ ɔ he ɔ Farisifo ɔmɛ je kpo, nɛ amlɔ ɔ a kɛ Herodebi ɔmɛ ya so e yi nɔ bɔ nɛ a maa pee ha nɛ a kpata e hɛ mi.
Asafo jiji ɔ ngɛ wo ɔ nya
(Mateo 12.15-16; Luka 6.17, 19)
7Yesu kɛ e kaseli ɔmɛ sa a he si kɛ ho Galilea Wo ɔ nya ya, nɛ nimli asafo babauu nɛ je Galilea kɛ Yudea 8kɛ Yerusalem kɛ Idumea zugba a nɔ kɛ Yordan se kɛ Tiro kɛ Zidon ni ɔmɛ a mi tsuo nyɛɛ e se. Nimli kpekpemi nɛ ɔ ba Yesu ngɔ ejakaa a nu nihi nɛ e ngɛ pee ɔmɛ a he. 9Nimli ɔmɛ a hiemi he ɔ, Yesu de e kaseli ɔmɛ nɛ a dla lɛ ko ha lɛ, kone asafo ɔ ko fifia lɛ. 10E tsa nihi fuu he je ɔ nihi nɛ hiɔhi hɛɛ mɛ tsuo bu kɛ ba e ngɔ kone a ba ta e he. 11Nɛ be tsuaa be nɛ mumi yayami ɔmɛ maa na lɛ ɔ, a tsɔɔ nɔɔ si ngɛ e hɛ mi nɛ a kpaa ngmlaa ke: “Mo ji Mawu Bi ɔ nɛ!” 12Nɛ Yesu bɔɔ mɛ kɔkɔ ke a ko je lɛ si.
Yesu hla kaseli nyɔngma kɛ enyɔ
(Mateo 10.1-4; Luka 6.12-16)
13Nɛ Yesu ya yoku ɔ nɔ nɛ e tsɛ nihi nɛ lɛ nitsɛ e ngɛ hlae ɔ, nɛ a ba e ngɔ. 14Nɛ e hla a kpɛti ni nyɔngma kɛ enyɔ kone a kɛ lɛ ba hi si nɛ e tsɔ mɛ fiɛmi 15nɛ a na he wami nɛ a kɛ hia mumi yayamihi. 16Ni nyɔngma kɛ enyɔ nɛ e hla a ji nɛ ɔmɛ nɛ: Simon, nɔ nɛ e wo lɛ Petro ɔ; 17Yakobo kɛ Yohane, Zebedeo bimɛ nyumu ɔmɛ nɛ e wo mɛ Boanerges (e sisi ji oslaba bimɛ) ɔ; 18Andrea kɛ Filipo kɛ Bartolomeo kɛ Mateo kɛ Toma kɛ Yakobo, Alfeo bi ɔ, kɛ Tadeo kɛ Simon, ma he dɔlɔ ɔ, 19kɛ Yuda Iskariot, nɔ nɛ tsɔɔ e se blɔ ɔ.
Yesu kɛ Beelzebul
(Mateo 12.22-32; Luka 11.14-23; 12.10)
20Jeha nɛ ɔ Yesu ba we mi. Nihi fuu ba bua a he nya ekohu bɔ nɛ lɛ kɛ e kaseli ɔmɛ na we a dɛ ha ni yemi po. 21Benɛ e wekuli nu he ɔ, a ho konɛ a ya nu lɛ, ejakaa hihi ngɛ dee ke: “E yi mi ngɛ puɛe!”
22Mlaa tsɔɔli komɛ nɛ je Yerusalem ba a ngɛ dee ke: “Beelzebul (mumi yayami) ngɛ e mi.” Ni kpa komɛ hu ke: “Mumi yayamihi a tsɛ ɔ he wami nya e kɛ hiaa mɛ ɔ nɛ.” 23Lɔ ɔ he ɔ Yesu tsɛ ni ɔmɛ kɛ ba e ngɔ nɛ e de mɛ ngɛ abɛhi a mi ke: “Kɛ Satan maa pee kɛ hia Satan kɛɛ? 24Ke ma ko gba wo lɛ nitsɛ e he ɔ, jamɛ a ma a be nyɛe si dami. 25Ke we ko gba wo lɛ nitsɛ e he ɔ, jamɛ a we ɔ be nyɛe si dami. 26Nɛ ke Satan te si wo lɛ nitsɛ e he nɛ e gba e mi ɔ, e be nyɛe si dami, se mohu e nyagbe ji kɔlɔ ɔ nɛ. 27Nɔ ko be nyɛe he walɔ ko we mi maa sɛ nɛ e ya ha e nihi, kaa ja e fi lɛ kekle, lɔ ɔ loko e ma nyɛ e we mi nihi maa ha. 28Nyɛ kadi enɛ ɔ faii kaa: A kɛ nimli a he yayamihi tsuo maa pa mɛ, kɛ musu bɔmi munyuhi kulaa nɛ a maa tu. 29Se nɔ nɛ tuɔ musu bɔmi munyu kɛ siɔ Mumi Klɔuklɔu ɔ, a kɛ be lɛ pae gblegbleegblee kɛ maa ya neneene, ejakaa e pee yayami nɛ a kɛ pɛ́.” 30(Yesu de enɛ ɔ ejakaa ni komɛ ke: “Mumi yayami ngɛ e mi.”)
Yesu nyɛ kɛ e nyɛmimɛ ɔmɛ
(Mateo 12.46-50; Luka 8.19-21)
31Kɛkɛ nɛ Yesu nyɛ kɛ e nyɛmimɛ ɔmɛ nɛ ba a ba da we ɔ se, nɛ a tsɔ kɛ ba e ngɔ nɛ a ba tsɛ lɛ. 32Asafo ɔ hii si ngɛ e he, nɛ a de lɛ ke: “Oʼɛ, o nyɛ kɛ o nyɛmimɛ ɔmɛ daa si ngɛ we ɔ se ngɛ mo hlae.”
33Yesu he nɔ nɛ e de mɛ ke: “Mɛnɔ ji ye nyɛ, nɛ mɛnɔmɛ ji ye nyɛmimɛ ɔmɛ?” 34E hyɛ ninɛmɛ nɛ hii si ngɛ e he ɔmɛ a hɛ mi kɛ kpe, nɛ e ke: “Ne ye nyɛ kɛ ye nyɛmimɛ ɔmɛ! 35Ejakaa nɔ tsuaa nɔ nɛ peɔ Mawu suɔmi nya ni ɔ, lɛ nɔuu ji ye nyɛmi nyumu kɛ ye nyɛmi yo kɛ ye nyɛ.”
Aktualisht i përzgjedhur:
Marko 3: DAN77
Thekso
Kopjo
Krahaso
Ndaje
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Dangme New Testament © United Bible Societies, 1977.