TATPATMEI 9
9
Khouringh Theihmei
1 Ringhpouc rui Mousi khou sa the, “Guangh khou tei tatna Ringhpouc, Ibrimei Racguangc rui sa e twna kumna sa ti tho, ‘Ata kalum khang amei nunc ta titat tho. 2Kaniw ta titat mak bam dat re thei, 3nangniw tuang khouringc ruc khou takuanh, kuanniam, guaikuan, guaih, lauziu, khatni ziuh guay ruc khou si sihmei ravpyan tiguang puni. 4Ai rui Isaraelmei tuang khouringc lev Izipmei tuang khouringc khaklangc pat puni; kumna Isaraelmei tuang khouringc thu akhat na sini theic lak ge. 5Mi hei Ringhpouc ai rui nthuanh taanh khang dinglou kan the.’ ”
6 Ringhpouc kamei rui sa kanmei kumcna, nthuanh thauna Izipmei tuang khouringc kaguayna theic the; tiki Isaraelmei tuang khouringc thu akhat na sini theih mak ge. 7Tabui lwnlung pat bam the cho twna guangh rui thanv pwkhou, Isaraelmei tuang khouringc thu akhat na sini theic mak ge twna sa the. Kum e tiki kamei kalung tancna, meic nunc ta tei titat mak ge.
Suhtakna
8 Ringhpouc rui Mousi lev Aron khou sa the, “Kandih khou rui mbut baankiu padikna ruai thau o. Mousi rui hei tei guangh hu khou kauh thangc nrou ku nina e. 9Mbut katunghmei kumcna, Izip kandic kabamv kathuic khou zinlik pat puni; kumna kabamv kathuic khou, hei tei rui suhtakna tipatna, maansei khou ni, khouringh khou ni, asuh tipat puni.” 10Kumna kaney tei mbut sinna guangh hu khou ding the. Mousi rui hei tei kauh thangc nrou ku tina, hei tei rui suhtakna patna meic nunc khou ni, khouringh khou ni asuh pat the.#Nda 16.2 11Duaih swmei nunc tei, Mousi hu khou guang ding ngam mak khe; kalam thu kaniw tei ni asuh rui nnau ngam the. 12Ringhpouc rui sa kanmei kumcna, Ringhpouc rui guangh lung titanclou the; kumna guangh tei Mousi lev Aron lat chulou mak khe.
Nrihthai
13Khoutei Ringhpouc rui Mousi khou sa the, “Nthuanh lauthwan thwanzingh guangh ta ariwna, Ringhpouc, Ibrimei Racguangc rui sa e twna heikumna sa o, ‘Ata kalum khang amei nunc ta titat tho. 14Kandih nam ruc khou ai kumhmei baihmei maek ge twmei nang thay khang, ntaw thu nang tuang meicdaihmei nunc, khatni nang mei nunc na ta hamhna, nang ta ni ai rui dandi tii puni the. 15Ai rui nang ta, khatni nang mei nunc ta, ravpyan rui sw kasic khang abaanc zay thau khwan e thei, nangniw ta swmutsutlou kan ni tuang di the. 16Tiki angamv lyan khang, ai rui nangniw ta tiringclou bam tuang e. Mi hei azanc gaymei kandih kabamv kathuic khou zin lik pat khang e.#Rom 9.17 17Tiki nangdai swna, amei nunc ta titat makna bam e. 18Izip khou lungc thau rap khou rui pat zat makmei tanhmei nrihthai zauclo nthuanh, mi kumhmei ganv khou tiguang puni. 19Nang tuang khouringc khounac, khatni baih baihmei kapaengc khou naimei guay, kai nungc khou laa gutlou khang latdanv tii la tho. Kapaengc khou bammei maansei, khatni khouringh kapwmna ruc khou, nrihthai key puni; kumna kaniw kapwmna theic puni.’ ” 20Ringhpouc rui samei tei, guangh tuang meicdaihmei asaekc thu ping the; kumna kaniw bangc nunc, khatni khouringh nunc, kai lungc khou rylou the. 21Gaanvsaekc thu, Ringhpouc lat tei chulou makna, kaniw bangc nunc, khatni khouringh nunc, kapaengc khou ganclou the.
22Khoutei Ringhpouc rui Mousi khou sa the, “Nang baanc tingpuk biak thangc zay thau o; kum e thei Izip kandic kapwm, meic nunc, khouringh nunc, khatni ramvpuk thingbang guay khou, nrihthai key puni.” 23Kumna Mousi rui katuang builwang tingpuk biak thangc zay thau the; Ringhpouc rui nrihthai tikey the; khatni kandih khou ganh key the. 24Ringhpouc rui ranvmei nrihthai, tingpalik ganh keymei kazauhna, tiguang the. Hei tei lungc pat rap khou rui Izip kandic khou guangloumei ranvliangmei ting pwanzingh e.#Nda 8.7; 16.21 25Izip kandic kapwm khou naimei maansei khatni khouringh kapwmna, nrihthai tei rui siauc kasic ngam the. Phunling phunlu khatni thingbang guay siauc kasic ngam the. 26Nrihthai keylou makmei kiu, Isaraelmei nunc bammei, Gosen ramv khou na khwan e.
27Pharao rui Mousi lev Aron ta kaw guangna kumna sa the, “Ntaw thu, ai paapc taanc the; Ringhpouc nchumh the; ai khatni amei nunc hei nkhuai the. 28Ringhpouc khou huayneylou tho! Nangniw ta titat ni the twna ai latdyng sw the; nangniw mi khou hei bam key dat ni tu hamh the.”
29Mousi rui kakhou sa the, “Ai mi kaidai khou rui tat patpui lev abaanc zay thauna, Ringhpouc khou huayneylou puni. Kandih hei Ringhpouc tuang e twmei nang thay khang, ganh nthaekc kan puni the; nrihthai key dat ni tu hamh the. 30Tiki nang khatni nang tuang meicdaihmei nunc hei, Ringhpouc Ravguangc ta ping mak he twmei ai thay e.”
31Siupian lev sipian daihmei guay kasic ngam the; hei tei sipian minhmei ganv e, khatni siupian daihmei ngguammei ganv e. 32Gehu thu minc nkhamh tina kasic mak ge.
33Mousi guangh khou rui tat patna, kaidai paengc patna, kabaanc zay thauna Ringhpouc khou huayneylou the. Ganh, nrihthai, khatni ting nthaekc kan the. 34Mi guay tei nthaekc kan pwkhou, kamei paapc taanc dat di he. Kamei khatni katuang meicdaihmei nunc, kahu nungc kumcna, kaniw lung tanc bam de. 35Mousi khou Ringhpouc rui salou reymei kumcna, guangh tei rui Isaraelmei nunc ta titat mak ge.
Aktualisht i përzgjedhur:
TATPATMEI 9: RONGBSI
Thekso
Ndaje
Kopjo
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.