मत्ती 16
16
अचम्मौ चिन्ह ङेछ
(मर्कूस ८:११-१३; लूका १२:५४-५६)
1कुडीक जना फरिसी र सदुकीको खाटार येशूकी कुराङ फसडीकी डेम होसको लेठाङ राहार डेया, “इडीक नाको परमेश्वर लकीङ न राछ हो डेनाङ काट चिन्ह टान्हाक्नी।” 2तर होसकै डेया, “जब नाखान किम्खी पाले, तब सर्घा ग्याच छान्ने र नाखुरीक डेले, ‘अब पीउह्राक च नाखान खान्ल्हे’ 3फेरि गोराक न नाखान ग्याच र छुम्छ छाना डेनाङ ‘छीनी च नामास राल्हे’ डेले। इटजाट्न सर्घाकी ङोसार दिन कुङ्च छान्ने डेम वार्खी ह्योक्ले, तर इसे समयाङ छान्च घटनौ चिन्ह चहिँ नाखुरीक माह्वार्ले। 4दुष्ट र व्यभिचारी पुस्तै अचम्मौ चिन्हको ङोस्की पाले तर नाखुरीककी योनाकी याछ चिन्ह बाहेक अरु कुसेर चिन्ह माह्याले।” होटै येशू होखुरीककी डासार ह्वा।
फरिसी र सदुकीकुङ शिक्षौ बारेयाङ
(मर्कूस ८:१४-२१)
5जब येशू र होसकुङ चेलाको तालपारी नुङा, चेलाकै रोटो आल्खी म्ह्याका। 6येशूये होखुरीककी डेया, “होशियार छान्नी, फरिसी र सदुकीकुङ खमिर लकीङ जोगडीसार ङुनी।” 7अनि चेलाकै मेखुरीक-मेखुरीक डेकी ठाला, “कानै रोटो माराक्च बाटै होसकै काल्हाकी इट डेच औला।” 8येशूये इसे कुरा थाहा डीन्हार डेया, “खोइ नाखुरीकुङ विश्वास? नाखुरीकै रोटो माराका डेयार हीजै नाखुरीक कुरा जाट्न ङुच? 9अझै र नाखुरीकै माबुझडीस्ने? बाङा हजार भर्मीकोलाक बाङा रोटोये कास्नाङ नाखुरीकै कुडीक डालो सोट्नन्या? ही होसे म्ह्याका? 10अनि सात वटा रोटोये बुली हजार भर्मीकोलाक कास्नाङ कुडीक डालो सोटा? होसे र म्ह्याका? 11ही अझै र माबुझडीस्नने, ङै नाखुरीककी रोटोओ बारेयाङ डेच होइन? ङै च नाखुरीककी फरिसी र सदुकीकुङ खमिर लकीङ टी होशियार छान्की डेच हो ट!” 12अनि बल्ल चेलाकै बुझडीसा, होसकै च रोटो सोकाक्च खमिर लकीङ होशियार छान्की डेच होइन लेसा तर होसकै च फरिसी र सदुकीकै याछ शिक्षा लकीङ टी होशियार छान्की डेमनेसा ट।
येशू सु हो?
(मर्कूस ८:२७-३०; लूका ९:१८-२१)
13जब येशू कैसरिया फिलिप्पी डेच इलाकाङ टाहा। होला होसकै लहो चेलाकोलाक गीना, “भर्मीकै भर्मीयो मीजाकी सु हो डेले?” 14चेलाकै जवाफ याहा, “कुडीक जनै बप्तिस्मा याछ यूहन्ना, कुडीक जनै एलिया, अनि कुडीक जनै चहिँ यर्मिया वा अरु अगमवक्ताको मध्याङ सुर काट जना हो डेले।”
15येशूये होखुरीककी गीना, “अनि नाखुरीक चहिँ ङाकी सु हो डेले ट?” 16सिमोन पत्रुसै डेया, “नाको जिउँदो परमेश्वरौ मीजा मुक्ति याछ ख्रीष्ट हो।” 17येशूये होसकी डेया, “ए योनौ मीजा सिमोन, नाको कुडीक आशिषित ले! इसे कुरा नाकै भर्मीकै डेच सेयार डेच होइन, इसे च स्वर्गाङ लेच ङौ परमेश्वर बोये न नाकोकी टान्हाक्च हो। 18अब ङा नाकोकी डेले, नाको पत्रुस हो (इच्यौ अर्थ ‘पत्थर’ हो।) इसे पत्थर मीटाक ङा ङौ मण्डली#१६:१८ मण्डली: मण्डली डेच चहिँ येशूकी विश्वास जाट्च भर्मीको हो। खडा जाट्ले, अनि नरकुङ गालामको होसे मीटाक विजय छान्की माह्योक्ले। 19ङा नाकोकी स्वर्गौ राज्यौ साँचाको याल्हे, नाकै पृथ्वीयाङ ही छ्याक्ले, होसे स्वर्गाङ र छ्याक्ले, अनि नाकै पृथ्वीयाङ ही पीसाक्ले, होसे स्वर्गाङ र पीसाक्ले।” 20तब लाहा मुक्ति याछ ख्रीष्ट हो, डेच कुरा सुकीर माडेकी डेम चेलाकोलाक कडा आज्ञा याहा।
येशूये लाहा सीकी पर्च कुरा डेच
(मर्कूस ८:३१-३३; लूका ९:२२)
21होसको कुटजाट्न यरूशलेमाङ नुङ्की पर्ले अगुवाको, मुख्य पूजाहारीको र धर्मगुरुकुङ मीहुटीङ वास्टै कष्ट भोग्डीकी पर्ले, होसकोकी साट्ले तर सोमयाकाङ जीवाम सोले डेच कुरा होसनीक लकीङ येशूये लहो चेलाकोलाक डेकी ठाला।
22याङ्च कुरा सेयार पत्रुसै येशूकी काटपट्टी आल्हार च्याक्चै डेया, “ए प्रभु! परमेश्वरै होट माजाट्ख्यो, नाको मीटाक याङ्च सेन र माछान्ने।” 23तर येशू ल्हेसार पत्रुसकी डेया, “ए शैतान, ङौ म्याहासीङ नुङ्की क्योटो! नाङ ङौ लागि बाधा हो। हीजैडेनाङ नाकुङ मीमनाङ परमेश्वरौ कुरा होइन, तर भर्मी लकीङ राछ कुराको ले।”
चेलाकै जाट्की पर्च त्याग
(मर्कूस ८:३४–९:१; लूका ९:२३-२७)
24होटै न्हुइङ येशूये लहो चेलाकोलाक डेया, “इडीक सुर ङाकी डुट्च मीमन जाट्ले डेनाङ, होचे लाहाकी इन्कार जाट्ख्यो र लहो क्रूस सोटार#१६:२४ क्रूस सोटार: क्रूस बुकीओ अर्थ चहिँ येशूओ कारणै दु:ख भोग्डीकी तयार छान्की अथवा सीकी र तयार छान्की हो। ङाकी डुट्ख्यो। 25हीजैडेनाङ सुये लहो जीवन जीवाटाक्च मीमन जाट्ले होचे सेन र मासीच जीवन गुमडीले। तर सुये ङौ लागि लहो जीवन गुमडीले, होचे सेन र मासीच जीवन डुप्ले। 26सारा संसार मीहुटाङ पार्नाङ र लहो सेन र मासीच जीवन चहिँ गुमडीया डेनाङ, होसे भर्मीकी ही फाइदा छान्ने र? अथवा भर्मीये लहो सेन र मासीच जीवनौ सट्टाङ ही याखी ह्योक्ले? 27हीजैडेनाङ भर्मीयो मीजा लहो बोयो महिमाङ लहो स्वर्गदूतकोखाटा राल्हे, अनि होडीक बेला होसकै काट-काट भर्मीकी होचे जाट्च काम अनुसार न्याय जाट्ले। 28साँच्ची न, ङा नाखुरीककी डेले, इला टोङ्छको मध्याङ कुडीक जनै भर्मीयो मीजाकी लहो राज्याङ राम्हन लेच माडाङ्ठर मासीले।”
Markert nå:
मत्ती 16: EMGP
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2025 by Mother Tongue Translators Society and Wycliffe Bible Translators, Inc.
