मत्ती 17
17
येशूओ रुप फेरीस्च
(मर्कूस ९:२-१३; लूका ९:२८-३६)
1छ याक न्हुइङ येशूये पत्रुस, याकूब र होच्यो भाइ यूहन्नाकी लाहाखाटा लार मेखुरीक मट्टै घाङ्च डाँडाङ नुङा। 2होला टाह्ररखीङ चेलाकुङ म्याहासाङ येशूओ रुप फेरीसा। होसकुङ मीटाहा नाखान लेखा न चम्कडीसा र होसकुङ बढीन फोक्सा बोच छाना। 3अनि होडीक न बेला होला होखुरीकै येशूखाटा मोशा र एलिया ङाक्ङ ङुच डाङा। 4याङ्च डाङार पत्रुसै येशूकी डेया, “ए प्रभु, काल्हा इला लेच च सेम्ह छाना। नाको मीमन जाट्ले डेनाङ ङा इला सोम बास ङुच ठाउँ खास्ले, काट नाकुङ लागि, काट मोशौ लागि र काट एलियौ लागि।”
5पत्रुसै ङाक्नाङ-ङाक्नाङ न बोच चम्कडीस्च डेबु राहार होच्यो छायै होखुरीककी हुपा। डेबु भित्री लकीङ काट स्वर राहा, “इसे ङौ जाक्च मीजा हो, इसेखाटा ङा साह्रै माह्राङ्ने, इच्यौ कुरा सेनी।” 6जब चेलाकै इसे सेया, तब होखुरीक साप्फी बीह्रीयार झाङ खुखुप छाना। 7तर येशू राहार होखुरीककी मीहुटै छुवार डेया, “सोनी, नाखुरीक माबीह्रीनी।” 8जब होखुरीकै ढेम्लाक ङोसा, होखुरीकै होला येशू बाहेक अरु सुकीर माडाङा।
9होखुरीक डाँडा लकीङ म्हाका झाल्चै जाट्नाङ येशूये होखुरीककी आज्ञा जाटा, “भर्मीयो मीजा जबसम्म सीच लकीङ जीवाम मासोले, तबसम्म नाखुरीकै इसे डाङ्च कुरा सुकीर माडेकी।”
10चेलाकै येशूकी इट डेयार गीना, “होटडेनाङ हीजै धर्मगुरुकै मुक्ति याछ ख्रीष्ट डेनाङ पहिला एलिया राखी पर्ले डेले ट?” 11येशूये होखुरीककी जवाफ याहा, “हो, एलिया साँच्ची न राल्हे र होचे पट्ट न कुरा तयार खास्ले। 12तर ङा नाखुरीककी डेले, एलिया अघि न राम्हभ्यामने। तर होसकी भर्मीकै माचीन्डीया, र होखुरीककी होसकी ही जाट्की मीमन सेया होटन जाटा। होटजाट्न न भर्मीयो मीजै र होखुरीकुङ मीहुटीङ कष्ट भोग्डीकी पर्ले।” 13तब येशूये बप्तिस्मा याछ यूहन्नौ बारेयाङ डेच हो डेयार चेलाकै वाह्रा।
भूत लग्डीस्च लेन्जा जजा गेप्च
(मर्कूस ९:१४-२९; लूका ९:३७-४३)
14जब येशू मेखोल्हौ सोम जना चेलाकोखाटा भर्मीकुङ भीड लेच ठावाङ टाह्रा, तब काट जना भर्मीये होसकुङ म्याहासाङ राहार घुँडा टुसा 15र डेया, “ए प्रभु, ङौ लेन्जा मीजाकी दया जाट्नी, हीजैडेनाङ होसकी छारे रोग लग्डीस्ने, र होचे बाड्को कष्ट भोग्डीमन ले। होसे घरी म्हेयाङ पर्ले, घरी डीयाङ पर्ले। 16ङै होसकी नाकुङ चेलाको लेठाङ राका, तर होखुरीकै च गेपाक्की माह्योका।” 17येशूये डेया, “ए विश्वास मालेचको र बीगारीस्च पुस्ता, सेनसम्म ङा नाखुरीकखाटा ङुले? ङै नाखुरीककी सेनसम्म सहडीकी? होसकी इला ङा लेठाङ राक्नी।” 18येशूये भूतकी हक्कारीया र भूत होसे लकीङ ख्योहार ह्वा। होटै तुरुन्तै होसे लेन्जा जजा गेप्की क्योटा।
19तब चेलाकै येशूखाटा सुर मालेच बेलाङ राहार गीना, “कानै चहिँ होसे भूतकी हीजै डोन्की माह्योक्च?” 20अनि होसकै डेया, “नाखुरीकखाटा चेक्जा र विश्वास मालेचबाटै हो। साँच्ची न ङा नाखुरीककी डेले, नाखुरीकखाटा काट राइगानौ दाना टडीक मट्टै विश्वास छाना डेनाङ र इसे डाँडाकी ‘इटै हटडीसो’ डेया डेनाङ होसे हटडीसार नुङ्ले। र नाखुरीकुङ लागि छान्की माह्योक्च कुरा हीर माछान्ने। 21[तर होसे खालुङ भूत चहिँ प्रार्थना जाटार र उपवास ङुवार मट्टै डोन्की ह्योक्ले।”]#१७:२१ इसे बाड्को कोष्ठ भित्री लेच शब्दको चहिँ कोइ कोइ संस्करनौ बाइबलाङ माले।
लाहा सीकी पर्च बारेयाङ येशूओ दोस्रो भविष्यवाणी
(मर्कूस ९:३०-३२; लूका ९:४३-४५)
22चेलाकोखाटा गालीलाङ भेला छान्नाङ येशूये होखुरीककी डेया, “अब भर्मीयो मीजाकी भर्मीकुङ मीहुटाङ जिम्मा याल्हे। 23अनि होखुरीकै होसकोकी साट्ले, तर सोम याकाङ होसको जीवाम सोले।” इसे कुरा सेयार चेलाको साह्रै दु:खित छाना।
येशूये मन्दिरौ कर याछ
24येशू र होसकुङ चेलाको कफर्नहुमाङ राहा, अनि मन्दिरौ कर सोट्चको पत्रुस लेठाङ राहार डेया, “ही नाखुरीकुङ गुरुये परमेश्वरौ मन्दिरौ कर मातेरीले?”#१७:२४ यहूदीकुङ पट्ट न लेन्जा भर्मीकै बर्षै पिच्छे यरूशलेमुङ परमेश्वरौ मन्दिर मर्मत जाट्कीयो लागि कर तेरीकी पर्च लेया। 25होचे डेया, “हजुर तेरीले।”
अनि पत्रुस इम भित्री पर्च न्हुइङ येशूये न होसकी डेया, “ए सिमोन, नाकुङ विचार ही ले? पृथ्वीयुङ राजाकै कर सु लकीङ सोट्ले? होखुरीकुङ राज्याङ लहो परिवार लकीङ की अरुको लकीङ?” 26पत्रुसै जवाफ याहा, “अरुको लकीङ न सोट्ले” येशूये होसकी डेया, “होटडेनाङ परिवारै च तेरीकी मापर्च लेसा। 27तर काल्हा लकीङ होखुरीकुङ चित्त माबीक्ख्यो डेम, नाको तालाङ नुङार बल्छी ङाप्नी। र पहिला पर्च डीस्यौ मेङ्गेर खोल्न्हाङ नाकै काट चाँदीयो सिक्का डुप्ले, होसे आल्हार नाकुङ र ङौ लागि कर तेरीनी।”
Markert nå:
मत्ती 17: EMGP
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2025 by Mother Tongue Translators Society and Wycliffe Bible Translators, Inc.
