मत्ती 15
15
रीतिथिति मन्डीच बारेयाङ शिक्षा
(मर्कूस ७:१-१३)
1यरूशलेम लकीङ राछ कुडीक जना फरिसीको र धर्मगुरुको येशू लेठाङ राहार गीना, 2“नाकुङ चेलाकै बोइ बाज्युको लकीङ क्योस्न राछ रीतिथितिको हीजै मामन्डीले? हीजै नाकुङ चेलाकै ज्याकी डेनाङ अगाडि मीहुट हुर्च रीतिकी#१५:२ ज्याकी डेनाङ अगाडि मीहुट हुर्च रीतिकी: यहूदी चलन अनुसार ज्याकी डेनाङ अगाडि मीहुट हुर्च रीति डेच चहिँ वास्टै डीये मीहुट हुर्च होइन तर चेक्जा डीये मीहुट चोखडीच मट्टै हो। तोडीले?” 3येशूये होखुरीककी जवाफ याहा, “नाखुरीकै चहिँ हीजै लहो रीतिथितियो खातिर परमेश्वरौ आज्ञा भङ्ग जाट्ले? 4हीजैडेनाङ परमेश्वरै डेमने, ‘लहो बोइ मोयो आदर जाट्की’#प्रस्थान २०:१२; व्यवस्था ५:१६; प्रस्थान २१:१७; लेवी २०:९ #१५:४ लहो बोइ मोयो आदर जाट्की: बोइ मोयो बिरुद्धाङ सुये मासेछ कुरा ङाक्ले, होसकी चहिँ साट्की न पर्ले। र ‘बोइ मोयो विरुद्धाङ सुये मासेछ कुरा ङाक्ले, होसकी चहिँ साट्की न पर्ले।’ 5तर नाखुरीक चहिँ डेले, सुयेर लहो बोइ-मोइकी डेले, ‘नाखुरीकै ङा लकीङ ही कुरा डुप्की पर्च लेया, होसे ङै परमेश्वरकी चढडीम भ्या’ 6होचे लहो बोइ-मोइकी सेवा जाट्की मापर्ले। इटजाट्न नाखुरीकै लहो रीतिथितियो खातिर परमेश्वरौ वचनकी काम मालग्डीस्च खास्ले। 7ए कपटीको! यशैया अगमवक्तै नाखुरीकुङ बारेयाङ ठिक अगमवाणी ङाका,
8 ‘इसे भर्मीकै ङाकी मीबुर्लीङै मट्टै आदर जाट्ले,
तर होखुरीकुङ मीमन चहिँ ङा लकीङ लोस ले।
9 होखुरीकै व्यर्थाङ ङौ आराधना जाट्ले,
हीजैडेनाङ होखुरीकुङ शिक्षा चहिँ भर्मीकै पाहाक्च नियम मट्टै हो।’ #
यशैया २९:१३
”
भर्मीकी अशुद्ध खास्च कुराको
(मर्कूस ७:१४-२३)
10येशूये होसे भीडकी लाहा पट्टी आर्घार डेया, “सेनी र बुझडीस्नी। 11मेङ्गेरीङ भित्री ही पर्ले, होचे भर्मीकी अशुद्ध माखास्ले। तर मेङ्गेरीङ बाहिर ख्योछ मासेछ कुरै चहिँ भर्मीकी अशुद्ध खास्ले।”
12होटै न्हुइङ चेलाको राहार येशूकी डेया, “नाकै थाहा डीन्हा? फरिसीको नाकुङ कुरा सेयार मीरीस ख्योम्हने।” 13होसकै डेया, “स्वर्गाङ लेच ङौ बोये मारोप्डीच काट-काट म्यार्टुङ जराखाटा न हुट्ले। 14होखुरीककी डास्न यान्ही, होखुरीक मीमीक माडाङ्च अगुवाको ल्याक्च न हो। मीमीक माडाङ्चये मीमीक माडाङ्चकी न डोरीया डेनाङ, होखुरीक नीस न खाडलाङ पर्ले।”
15पत्रुसै येशूकी डेया, “कानकी इसे उदाहरणौ अर्थ बुझडीम यान्ही।” 16होसकै डेया, “ही नाखुरीकै अझै माबुझडीस्नने? 17नाखुरीककी थाहा माले? ही मेङ्गेर लकीङ भित्री पर्ले होसे मीटुक भित्री नुङ्की क्योट्ले होटै न्हुइङ बाहिर ख्योल्हे। 18तर मेङ्गेरीङ कुसे कुराको बाहिर ख्योल्हे, होसे मीमनीङ ख्योल्हे, अनि होचे न भर्मीकी अशुद्ध खास्ले। 19हीजैडेनाङ मीमन लकीङ न मास्च विचार, भर्मी साट्की, व्यभिचार जाट्की, वेश्याको लेठाङ नुङ्की, खुसकी, झूटो गवाही याखी, निन्दा जाट्की ल्याक्च कुराको ख्योल्हे। 20भर्मीकोलाक इसे न कुराकै चहिँ अशुद्ध खास्ले। तर मीहुट माहुर्न न ज्यानाङ भर्मीकी अशुद्ध माखास्ले।”
कनानी मास्टोओ विश्वास
(मर्कूस ७:२४-३०)
21येशू होसे ठाउँ डासार टुरोस र सीदोन इलाका पट्टी नुङा। 22होसे इलाका लकीङ काट कनानी मास्टो राहार च्याक्चै डेकी ठाला, “ए प्रभु, दाऊदौ मीजा, ङा मीटाक दया जाट्नी! ङौ मास्टो मीजाकी भूत लग्डीसार साह्रो दु:ख याम्हने।” 23तर येशूये होसे मास्टोकी हीर जवाफ माह्या। अनि होसकुङ चेलाकै राहार होसकोकी बिन्ती जाटा, “इसे मास्टोकी बिदा यान्ही, हीजैडेनाङ होसे च्याक्चै कानुङ न्हुङ-न्हुङ राम्हन ले।” 24येशूये डेया, “ङा च म्हाट्च भेडा लेखा छान्च इस्राएली जातिकुङ लागि मट्टै बीर्न्हकाच हो।” 25तर होसे मास्टो राहार होसकुङ अघि खुखुप छानार डेया, “ए प्रभु, ङाकी सहायता जाट्नी।” 26येशूये डेया, “बालककुङ ज्याच ठोक लार चीउकोलाक लोम्ह याखी सेम्ह माछान्ने।” 27अनि होसे मास्टोये डेया, “हो प्रभु, तर चीउकै र च लहो मालिकौ टेबल लकीङ झाल्च जुठाको ज्याले।” 28तब येशूये होसे मास्टोकी डेया, “नाकुङ विश्वास बाड्को लेसा। नाकै जाट्च इच्छा पूरा छान्ख्यो।” होडीक न बेला होच्यो मास्टो मीजा गेप्की क्योटा।
येशूये बुली हजार भर्मीकोलाक कास्च
(मर्कूस ८:१-१०)
29येशू होसे ठाउँ डासार गालील तालौ किनारै-किनार नुङार डाँडाङ ख्योहा। र होला ङुवा। 30भर्मीकुङ बाड्को भीड होसको लेठाङ राहा। होखुरीकै राक्च लङ्गडा, मीमीक माडाङ्च, लुला, ङाक्की माह्योक्च र अरु वास्टै छाचकोलाक होसकुङ मीकुवाङ डाम याहा, अनि होसकै होखुरीककी गेपाका। 31याङ्चसम्म छाना की, ङाक्की माह्योक्चको ङाका, लुलाको गेपा, लङ्गडाको ह्वा, मीमीक माडाङ्चको डाङ्च छाना। याङ्च अचम्मौ काम डाङार होसे भर्मीकै इस्राएलुङ परमेश्वरौ प्रशंसा जाटा।
32येशूये लहो चेलाकोलाक आर्घार डेया, “इसे भर्मीकोलाक डाङार ङाकी रोम सेया। हीजैडेनाङ इखुरीक ङाखाटा ङुच छीनी सोम याक छाना, इखुरीकखाटा ज्याच ठोक हीर माले। ङाकी इखुरीककी मुलीन्न बीर्न्हकाच मीमन माले, नभा च इखुरीक लामाङ न मुर्छा आपरै।”
33चेलाकै डेया, “इडीक वास्टै भर्मीकोलाक कास्की इसे हीर मालेच ठावाङ कानै कुटै ज्याच ठोक राक्की?” 34येशूये होखुरीककी गीना, “नाखुरीकखाटा रोटो कुडीक ले?” होखुरीकै डेया, “सात वटा रोटो र चेक्जा मा-मार्जा डीस्या मट्टै ले।”
35येशूये भर्मीकोलाक झाङ ङुकी लैडीया। 36होसकै होसे सात वटा रोटो र डीस्या लार परमेश्वरकी धन्यवाद याहा र ग्याकार चेलाकोलाक पुङ्ङ याखी लैडीया। होटै होखुरीकै भर्मीकोलाक पुङ्ङ याहा। 37पट्टकै ह्रास्ठर ज्याम र ओबारीस्च टुक्राको चेलाकै सात डालो न्हेप-न्हेप सोटा। 38इला ज्याच भर्मीको मास्टोको र जजाको बाहेक लेन्जा भर्मीको बुली हजार लेया। 39होस न्हुइङ येशूये होसे भर्मीकोलाक बिदा याहा र डुङ्गाङ काल्हार मगादान डेच इलाका पट्टी नुङा।
Markert nå:
मत्ती 15: EMGP
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2025 by Mother Tongue Translators Society and Wycliffe Bible Translators, Inc.
