Populære bibelvers fra Isaías 43

Del

'Yayi jawa, babeda chotidakwa̧ jawa kwomukwataduwo. Ida̧ökö ja̧ 'yayi jawa jamatö chotidajabe chömöledö, edö kwomukwataduwökiji̧? Ötjöma jojodö deobe kököobe ö'wejenö mana chotidocha, ja̧danö ojwebiya jobe kököajemi lamatobö wetocha.

Jau, wene kwöbaledaduwenama, pjatatakwo̧sa, baikwö wanedö yöta̧la: Ojwiyo da̧kwemi kwöbaledaduwena, ökwödökwö chö̧jakwo̧sa, ja̧danö ojwe da̧kwödö pekibaduwijayonö o̧kibaduwökakwedöja, ötjöda tjöbeba̧lö pjatatobetjö̧. Ja̧danö ökwöla nöinö ubola ö'wejenö kwöbaledaduwijayonö, kwubaduwökakwedöja, ökwöla neawanima suli̧ öwaedökakwawö̧ja.

Jobekwö damötjö otidinasa chömöledö, jo̧kwaijayonö sule ja̧ damötjö baledina jawada kwomukwataduwoko chömöledö.

Sulabenö ja̧diökwe, ökwödö Jacob itji̧mu tupadanö jojodönö otidina, israelsaso badibanö otidina Isabenö Jo̧ Diosma ökwödönö lȩebinobe. Jo̧kwaijayonö, ökwödönö lȩbebajo̧, baikwö yöawobe: Ökwödö Israel jojodöma, yekabiduwoko, ötjöma kwö̧ji̧baduwinö pjatatinobetjö̧. Isabenö ötjöda chömöledöja, ja̧danö ötjöda chömöledököbaduwobetjö̧, otiwanö jweinö kwimiduwi yöba̧lö ökwödönö jwötajabe, jo̧kwajabetjö̧ yekabiduwoko.

Jau chömöledö israel jojodö, ökwödönö otiwanö omukwatö, jwiinö ile nitebawö̧ja, —Chömöledö Israel jojodöma nöinö mikwawadö, —jö̧ba̧lö. Jo̧kwajabetjö̧ ökwödöda kwö̧jibaduwakobetjö̧, balekwedönö iyö lobo̧sa, jelesokwena jojodö balekwedö batjibanö iyö lobo̧sa ökwödöda kwö̧jibaduwakobetjö̧.

Jau chömöledö, ötjöma kwuluwo̧duwi Isabenö Jo̧ Diossa, ötjöma ökwödö Israel jojodö kwösödaduwökwe Suli̧ Jwibo̧ kwö̧jibaduwinö pjabato̧ Diossa, jo̧kwajabetjö̧ isabenö jobekwö pjatatakwo̧sa ökwödönö. Isabenö chösödaduwakwö ökwödö israel jojodönö, baikwö yöta̧la: Ökwödö kwö̧jibaduwoböma, Egipto jojodönö iyö lotajabe, ja̧danö Cus jojodönöbi, Seba jojodönöbi iyö lotajabe, ökwödöda kwö̧jibaduwakobetjö̧.

Yekabiduwoko, isabenö ökwödökwö chö̧jobetjö̧. Ja̧danö, ökwödötjö kwitji̧mu tupadanö jojodöma, bö̧jȩ ba̧kwemeachibanö tjipjelekwachibanö tjö̧jijayonö, jawo̧ laebobekwötjöbi, meajobekwötjöbi jobadönö ko̧ko̧dibö tjetatakwo̧sa kwiteboduwi Israel nijibe.

Ötjöma Isabenö Jo̧ Dioschobetjö, kwusuladuwi̧ söbebö lobo̧sa chömöledö, ötjödachobetjö̧ sulabenö ja̧köbaduwi̧ omukwatökönö, ökwödönö lȩlöjinö edo̧sa chömöledö

Jo̧kwaijayonö ökwödö israel jojodöma, Isabenö Jo̧ i̧sȩbina edö waisadösa. Baikwö yöa̧lobe Isabenö Jo̧ma: Ökwödö israel jojodöma isabenö chi̧sȩbina edö waisadöja, isabenö Diosbo̧ chö̧ji̧ma. Jau, chömöayedö bakibaduwanö omudawö chujuninawö̧ja, ötjönö kwöwaisaduwobö, ja̧danö ötjönö kwösödaduwobö, ja̧danö okwa jawa otiwanö kwöwaisachibaduwobö, —Okobe deinö tjösödawö̧tjöma, Isabenö Jo̧ Diosda isabenö Diosbo̧, —jö̧ba̧lö. Jau, ötjö chö̧jakwa̧ abönö tjotidinökwema deobe la'akatjöda, ja̧danö chö̧jaja̧ ikena ö̧jakwo̧ diosbo̧bi deakobe la'akatjöda, ötjödasa Diosbo̧ma.

Jau, ötjödasa Isabenö Jo̧ Diosma, ötjödasa isabenö tjö̧jibinö pjabato̧ma, jelo̧ma deobe.

Jau, ötjödasa ba̧kwelöjatebö ji̧na Diosma, ja̧danö ba̧kwelöjatebö 'dö̧jibajökönö ö̧jakwo̧ Diosma ötjödasa. Ötjö chotidobö jö̧ta̧lenama, bakwo̧bi tjöbeba̧lo̧ma deobe, ja̧danö ötjö chotidaja̧ma, bakwo̧bi chotidajokobedanö balewö loobö jwiobe, ötjödasa Diosbo̧chobetjö̧, jö̧ba̧lö yöa̧lobe Diosma.

Jobekwö ojwe lamatobö wetiawö̧, tebonö ju̧kwadö chacales ötjabawö̧bi, nöbo̧ patubi ötjönö tjösödakwedö, —Otiwanö dowobö kwiyajabe, —jö̧ba̧lö. Ja̧ chotidi̧ma, baikwö labebö lobö yötawaduwakwö: Ökwödö israel jojodönö chösödobetjö̧, jobekwö jojodö deobe kököajelö ojwe lamatobö webo̧sa, ökwödö ötjöda chömöledö bakibaduwanö omudawö chujuninawö̧ o̧ti̧ tjöbadöma, jödötjö otiwanö kwowaduwakobetjö̧. Ökwödö ötjöda chömöledö bakibaduwanö chotidinawö̧nö pjabatö, jobekwö chotidakwo̧sa chömöledö, ja̧ baledi̧ edö, —Diosma isabenö iteda ömöledönö otiwanö pjabato̧, —jö̧ba̧lö ötjönö ösödö yöka̧laduwakobetjö̧, jö̧ba̧lö yöa̧lobe Diosma, ökwödö Israel jojodönö.

U'dakwö ju̧kwadönöbi, a̧li̧kwö ju̧kwadönöbi ja̧danö. U'da wetocha, –Chömöledö israel jojodönö iyitjö, –jö̧ba̧lö, ja̧danö a̧li̧ wetocha, –Chömöledö tjȩwa̧japji jö̧ba̧lö tjöbeba̧lökönui, –jö̧ba̧lö. Jobekwö bö̧jȩ bakwachö̧jetjöbi chitji̧mu ömadönöbi, ya̧dönöbi tjebatajö ödötjö chichejebakwo̧sa. Jau, okobe deinö ötjö chiminö ötjabawö̧, —Bidöma Isabenö Jo̧ ömöledö israel jojodö, —jö̧ba̧lö ötjabawö̧nö chichejebakwo̧sa. Ötjöda jobadönö dadö chotidijatö, ötjöda tjitebosaso batjibanö chotidijatö, ötjö Diosnö tjösödakobetjö̧. Jo̧kwajabetjö̧ jobekwö tjebatajö chichejebakwo̧sa, chömöledö pjelekwachibö ja̧dönö, jö̧ba̧lö yöawobe Diosma, israel jojodönö.

Ötjö Isabenö Jo̧ma baikwö yöta̧laduwakwö: Ötjöma jwaibalawanö ö'wejenö, labinö buluwawa ö'wejenö mana lamatinö webinasa. Ötjödasa kwöpöjojodöduwi ölakwabikwawadö, kolukiyanö ölakwabikwawadöbi, kabayudönö wanö ölakwabikwawadöbi, ju'wedö ölakwabikwawadöbi ja̧ mananö kwetjachobö öbibinasa̧, ja̧danö jobekwö ötibajawö̧, jobeda la'akatjöda tja̧laibökenanö metjobö webinasa. Wanedö yötawa, dȩju̧wa'yu ubopja titjebi̧danö, jobeda jobadönö tibebö lobinama ötjödasa.

Ötjöma kwösödaduwökwe Isabenö Jo̧ Suli̧ Jwibo̧ Diossa. Ötjödasa bakwaso Israelsaso bakibaduwanö webinama, ötjödasa inesö la'aka kwuluwo̧duwima.