ᒫᑎᐅᓯᐅᑉ ᐊᒡᓚᖏᑦ 21
21
ᔩᓱᓯ ᓂᕐᑐᕐᑕᐅᒻᒪᕆᒡᓗᓂ ᔨᕉᓴᓕᒻᒧᑦ ᐃᑎᕐᓂᖓ
ᒫᑯᓯ 11:1-11; ᓘᑲᓯ 19:28-40; ᔪᐊᓇᓯ 12:12-19
1ᔩᓱᓯ ᐃᓕᓐᓂᐊᕐᑎᖏᓪᓗ ᔨᕉᓴᓕᒻᒧᑦ ᑎᑭᓴᕐᑐᕐᐸᓪᓕᐊᓕᕐᓗᑎᒃ, ᐱᑦᐰᒋᒧᑦ ᑎᑭᑉᐳᑦ, ᖃᖅᑲᒧᑦ ᐅᕐᓱᒃᓴᐅᔪᓐᓇᕐᑐᓂᒃ ᐸᐅᓐᖓᖃᓲᓂᒃ ᓇᐹᕐᑐᓕᖕᒧᑦ, ᑕᕝᕙᓐᖓᑦ ᐃᓕᓐᓂᐊᕐᑎᒥᓂᒃ ᒪᕐᕉᖕᓂᒃ ᑎᓕᓯᕗᖅ ᓯᕗᓂᕐᒥᓄᑦ ᐂᖁᓪᓗᒋᒃ. 2ᐃᒫᒃ ᐅᖃᐅᑎᓪᓗᒋᒃ: “ᓄᓇᓕᖕᓄᐊᕆᑦᑎᒃ ᓯᕗᓂᑦᓯᓐᓃᑦᑐᓄᑦ, ᑕᕝᕗᓐᖓᕈᑦᓯᒃ ᑕᑯᓂᐊᕐᐳᓯᒃ ᓯᐅᑎᖅᑯᕐᑐᔪᒥᒃ ᐃᐱᕐᓯᒪᔪᒥᒃ ᓄᕐᕋᖓᓗ ᓴᓂᐊᓃᓐᓂᐊᕐᐳᖅ; ᑖᒃᑯᐊᒃ ᐃᐲᑦᔮᕐᓗᒋᒃ ᕾᑦᔪᑎᓂᐊᕐᐸᓯᒃ. 3ᐅᖃᐅᑦᔭᐅᒍᑦᓯᒡᓕ ᖃᓄᑐᐃᓐᓇᖅ, ᐅᖃᐅᑎᓂᐊᕐᐸᓯᒃ, ‘ᐊᑕᓂᐅᑉ ᐊᑐᕈᒪᖕᒪᒋᒃ’; ᑕᕝᕔᓐᓇᖅ ᐃᓕᑦᓯᖕᓄᑦ ᐱᔭᐅᖁᓕᕐᓂᐊᕐᐹᒃ.”
4ᑕᒪᓐᓇ ᐱᓂᐊᕐᓂᐅᓚᐅᕐᐳᖅ ᓇᓚᐅᑦᑍᔪᑉ ᐅᖃᐅᓯᕆᔭᕕᓂᖏᑦ ᓇᓚᐅᑦᓯᖁᓪᓗᒋᑦ ᐃᒤᓕᔪᑦ:
5 #
ᓴᑲᕅᐊ 9:9. “ᓮᐅᓂᐅᑉ ᐃᒡᓗᒐᓴᖏᑦ ᐅᖃᐅᑎᓯᐅᒃ,
ᑕᑯᒋᑦ, ᐊᖓᔪᖅᑳᕐᔪᐊᓯ ᕾᓕᕐᐳᖅ!
ᐃᒻᒥᓂᒃ ᒥᑭᓕᑎᕐᓗᓂ ᓯᐅᑎᖅᑯᕐᑐᔫᑉ ᖄᖓᓂ ᐃᑭᒪᓪᓗᓂ,
ᓯᐅᑎᖅᑯᕐᑐᔫᑉ ᓄᕐᕋᖓᓂ.”
6ᑕᕝᕙ ᐃᓕᓐᓂᐊᕐᑎᖏᒃ ᑕᕝᕗᓐᖓᕐᐴᒃ ᐱᓇᓱᐊᕐᓗᑎᒡ ᑍᒫᒃ ᐱᓇᓱᐊᖁᔭᐅᒐᒥᒃ: 7ᓯᐅᑎᖅᑯᕐᑐᔪᒥᒃ ᑕᕝᕗᓐᖓᐅᑦᔨᕘᒃ ᓄᕐᕋᖓᓂᒡᓗ, ᐊᓐᓄᕌᒥᖕᓂᒃ ᐃᑭᒻᒪᕕᓕᕐᓗᒍ, ᔩᓱᓯ ᖄᖓᓄᑦ ᐃᑭᕗᖅ. 8ᐃᓄᒐᓴᒡᔪᐊᑦ ᐃᓚᖏᑦ ᐅᓕᒡᔪᐊᒥᖕᓂᒃ ᐊᖅᑯᑎᒧᑦ ᐃᓯᕕᑎᕆᕗᑦ, ᐃᓚᖏᓪᓕ ᓇᐹᕐᑑᑉ ᐊᕙᓚᖓᔪᖏᓐᓂᒃ ᓇᑲᑎᕆᓪᓗᑎᒃ ᐊᖅᑯᑎᒧᑦ ᐃᓯᕕᑎᕆᕗᑦ. 9#ᐃᓐᖏᕈᑦ 118:25,26.ᐃᓄᒐᓴᒡᔪᐊᑦ ᔩᓱᓯᐅᑉ ᓯᕗᓂᖓᓂ ᐱᓱᒃᑐᑦ, ᑭᖑᓂᖓᓃᑦᑐᓪᓗ ᕾᒐᓛᓕᕐᐳᑦ, “ᕼᐆᓵᓇ ᑍᕕᑎᐅᑉ ᐃᕐᓂᖓ ᓂᕐᑐᕐᑕᐅᓕ, ᒎᑎᐅᑉ ᓮᒻᒪᕐᓕᐅᒃ ᐊᑕᓂᐅᑉ ᐊᑎᖓᓂ ᑎᑭᑦᑐᖅ! ᕼᐆᓵᓇ ᓂᕐᑐᕐᑕᐅᓕ ᖁᑦᓯᖕᓂᕐᐹᖅ!”
10ᔩᓱᓯ ᔨᕉᓴᓕᒻᒧᐊᕐᒪᑦ, ᓄᓇᓕᓕᒫᑦ ᑕᕝᕙᓃᑦᑐᑦ ᖁᐊᕐᓵᖓᓕᕐᐳᑦ, ᐃᓄᐃᓪᓗ ᐅᖃᕐᐳᑦ, “ᑭᓇᐅᓇ?”
11ᐃᓄᒐᓴᒡᔪᐊᑦ ᐅᖃᕐᐳᑦ, “ᐅᓇ ᓇᓚᐅᑦᑍᔨ ᔩᓱᓯ ᓈᓴᕇᑎᒥᑦ ᒐᓕᓕᐊᒦᑦᑐᒥᑦ ᐱᔪᖅ.”
ᔩᓱᓯᐅᑉ ᑐᒃᓯᐊᕐᕕᒡᔪᐊᕐᒧᐊᕐᓂᖓ
ᒫᑯᓯ 11:15-19; ᓘᑲᓯ 19:45-48; ᔪᐊᓇᓯ 2:13-22
12ᔩᓱᓯ ᑐᒃᓯᐊᕐᕕᒡᔪᐊᕐᒧᐊᕋᒥ ᑕᕝᕙᓃᑦᑐᓕᒫᑦ ᐊᓂᑎᑉᐰᑦ ᓂᐅᕕᕋᓱᒃᑐᑦ ᓂᐅᕐᕈᑎᖃᕐᑐᓪᓗ, ᑮᓇᐅᔭᓂᒡᓗ ᑕᐅᕐᓰᔩᑦ ᓵᖏᑦ ᐅᕐᕈᑎᑉᐰᑦ ᐊᕿᒡᒋᐅᔮᕐᑐᓂᒡᓗ ᓂᐅᕐᕈᑎᓖᑦ ᐃᒃᓯᕙᐅᑕᖏᑦ ᐅᕐᕈᑎᒃᑭᕔᑦ, 13#ᐂᓮᐊᓯ 56:7; ᔨᕆᒤᐊ 7:11.ᐅᖃᐅᑎᓪᓗᒋᑦ, “ᒎᑎᐅᑉ ᐅᖃᐅᓯᖏᓐᓂ ᐅᖃᕐᓯᒪᕗᖅ; ‘ᐃᒡᓗᒐ ᑍᔭᐅᔭᕆᐊᕐᐳᖅ ᑐᒃᓯᐊᕐᕕᖕᒥᒃ’; ᐃᓕᑦᓯᓕ ᑎᒡᓕᒃᑎᓄᑦ ᐃᔨᕐᓯᒪᕕᐅᑎᑉᐸᓯ!”
14ᑕᐅᑐᖏᑦᑐᑦ ᑐᓯᐊᑦᑐᓪᓗ ᔩᓱᓯᒧᐊᕐᐳᑦ ᑐᒃᓯᐊᕐᕕᒡᔪᐊᕐᒥ, ᑖᒃᑯᐊ ᐋᖅᑭᒃᐰᑦ. 15ᑐᓂᕐᕈᓯᕐᑎᑦᓯᔩᓪᓕ ᐊᖓᔪᖅᑳᖏᑦ ᐱᖁᔭᓂᒡᓗ ᐃᓕᓮᔩᑦ ᓂᓐᖓᐅᒪᓕᕐᐳᑦ, ᑕᑯᒐᒥᒃ ᔩᓱᓯᐅᑉ ᐱᓂᐊᕐᓂᖏᓐᓂᒃ ᑲᒪᓇᕐᑐᓂᒃ, ᓱᕈᓰᓪᓗ ᑕᕝᕙᓂ ᑐᒃᓯᐊᕐᕕᒡᔪᐊᕐᒥ ᕾᒐᓛᕐᓂᖏᓐᓄᑦ, “ᕼᐆᓵᓇ ᑍᕕᑎᐅᑉ ᐃᕐᓂᖓ!”
16 #
ᐃᓐᖏᕈᑦ 8:2. ᑕᕝᕙ ᑖᒃᑯᐊ ᔩᓱᓯ ᐅᖃᐅᑎᕚᑦ, “ᑐᓵᕖᑦ, ᓱᕈᓰᑦ ᖃᓄᐃᓕᖕᒪᖔᑕ?”
ᔩᓱᓯᐅᑉ ᑭᐅᕔᑦ, “ᑐᓵᑦᓯᐊᕐᐸᒃᑲ, ᒎᑎᐅᑉ ᐅᖃᐅᓯᖏᓐᓂᒃ ᐅᖃᓕᒫᓚᐅᕐᓯᒪᓐᖏᓚᓰ ᐃᒤᓕᔪᓂᒃ, ‘ᓱᕈᓯᑯᓗᖕᓂᑦ ᓄᑕᕋᓛᓂᓪᓗ ᐊᒪᒪᒃᑐᓂᑦ ᐊᑐᐃᓐᓇᕈᐃᓚᐅᕐᐳᑎᑦ ᖃᓂᖏᑎᒍᑦ ᓂᕐᑐᕐᑕᐅᔪᒪᓪᓗᑎᑦ.’”
17ᑕᕝᕙ ᕿᒪᒃᓗᒋᑦ, ᑕᕝᕙᓐᖓᑦ ᐃᒡᓗᒐᓴᖕᓂᑦ ᐊᐅᓪᓚᕐᐳᖅ ᐱᑕᓂᒧᐊᕐᓗᓂ, ᑕᕝᕙᓂ ᐅᓐᓄᐊᒥ ᓯᓂᒃᑕᕐᐳᖅ.
ᔩᓱᓯᐅᑉ ᓇᐹᕐᑐᒥᒃ ᐸᐅᕐᖓᓕᖕᒥᒃ ᐅᖃᕐᓂᕐᓘᑦᔨᓂᖓ
ᒫᑯᓯ 11:12-14,20-24
18ᐅᓪᓛᒃᑯᑦ ᔩᓱᓯ ᔨᕉᓴᓕᒻᒧᑦ ᐅᑎᕐᐸᓪᓕᐊᓕᕐᓗᓂ, ᑳᓕᕐᐳᖅ. 19ᓇᐹᕐᑐᒥᒡᓗ ᐸᐅᕐᖓᓕᒃᓴᒥᒃ ᐊᖅᑯᑎᐅᑉ ᓴᓂᐊᓃᑦᑐᒥᒃ ᑕᑯᒐᒥ ᐅᐸᒃᐹ, ᓇᓂᓯᓐᖏᓚᕐᓗ ᐱᕈᕐᑐᖏᓐᓂᒃ ᐅᖃᐅᔭᖃᑐᐃᓐᓇᕐᒪᑦ. ᓇᐹᕐᑐᖅ ᐅᖃᐅᑎᕚ, “ᐱᕈᕐᕕᐅᒃᑲᓐᓂᓚᐅᕐᓯᒪᑦᔮᔪᓐᓃᕐᐳᑎᑦ!” ᑕᕝᕔᓐᓇᖅ ᓇᐹᕐᑐᖅ ᐸᐅᕐᖓᓕᒃᓴᖅ ᑐᖁᓕᕗᖅ.
20ᐃᓕᓐᓂᐊᕐᑎᖏᓪᓕ ᑕᒪᑐᒥᖓ ᑕᑯᓐᓈᕋᒥᒃ ᑲᒪᓂᐊᕐᐳᑦ ᐅᖃᕐᓗᑎᒃ, “ᖃᓄᐊᓗᖑᓇ ᓇᐹᕐᑐᖅ ᐸᐅᕐᖓᓕᒃᓴᖅ ᕿᓚᒥᑯᓗᒃ ᑐᖁᓕᑲᐅᕐᑐᕐᐹ?”
21 #
ᒫᑎᐅᓯ 17:20; 1 ᑯᕆᓐᑎ 13:2. ᔩᓱᓯᐅᑉ ᑭᐅᕔᑦ, “ᓱᓕᔪᒥᒃ ᐅᖃᐅᑎᕙᑦᓯ, ᐅᒃᐱᕈᑦᓯ ᖁᓚᖏᑦᓯᐊᕐᓗᓯ, ᑍᒫᒃᑕᐅᖅ ᐱᔪᓐᓇᕐᐳᓯ ᐱᓂᐊᕐᓂᕆᕋᑖᕐᑕᑦᑐᑦ ᓇᐹᕐᑐᒧᑦ, ᑍᒤᑦᑐᑐᐃᓐᓇᕐᒨᓐᖏᑦᑐᕐᓕ, ᐊᒡᓛᑦ ᖃᖅᑲᒧᑦ ᐆᒧᖓ ᐅᖃᕈᑦᓯ, ‘ᑕᕝᕙᓐᖓᑦ ᖃᖓᑦᑕᕐᓗᑎᑦ ᐃᒫᓄᑦ ᑲᑕᓕᕆᑦ,’ ᑕᕝᕙ ᑍᒤᓐᓂᐊᕐᐳᖅ. 22ᓱᓇᑐᐃᓐᓇᑦᓯᐊᒥᒡᓗ ᑐᒃᓯᐊᕈᑦᓯ, ᑕᕝᕙ ᑐᓂᓯᕕᐅᓂᐊᕐᐳᓯ, ᐅᒃᐱᕈᑦᓯ.”
ᔩᓱᓯᐅᑉ ᐊᐱᕆᔭᐅᓂᖓ ᓇᑭᑦ ᐱᔪᓐᓇᕐᓂᖃᕐᑎᑕᐅᓂᖓᓂᒃ
ᒫᑯᓯ 11:27-33; ᓘᑲᓯ 20:1-8
23ᔩᓱᓯ ᑐᒃᓯᐊᕐᕕᒡᔪᐊᕐᒧᑦ ᐃᑎᕐᒪᑦ, ᐊᔪᕆᕐᑐᐃᓕᕐᑎᓪᓗᒍ ᑕᕝᕙᓂ, ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑦ ᔫᑎᓪᓗ ᐊᖓᔪᖅᑳᖏᑦ ᔩᓱᓯᒧᐊᕐᐳᑦ ᐅᖃᕐᓗᑎᒃ, “ᓇᑭᑦ ᐱᔪᓐᓇᕐᓂᖃᕐᑎᑕᐅᓪᓗᑎᑦ ᑕᒪᒃᑯᓂᖓ ᐱᓇᓱᐊᖃᑦᑕᕐᐲᑦ, ᑭᓇᒧᑦ ᐱᓇᓱᐊᕈᓐᓇᕐᑎᑕᐅᒐᕕᑦ?”
24ᔩᓱᓯᐅᑉ ᑭᐅᕔᑦ, “ᐊᐱᕆᓂᐊᕐᐸᑦᓯᑦᑕᐅᖅ ᐊᐱᖅᑯᓯᕐᒧᑦ ᐊᑕᐅᓯᕐᒧᑦ; ᑭᐅᔪᓐᓇᕈᑦᓯᓐᖓ, ᑕᕝᕙ ᐅᖃᐅᑎᓂᐊᕐᐸᑦᓯ ᓇᑭᑦ ᐱᔪᓐᓇᕐᓂᖃᕐᑎᑕᐅᖕᒪᖔᕐᒪ ᐱᓇᓱᐊᕈᓐᓇᖁᓪᓗᖓ ᑕᒪᒃᑯᓂᖓ. 25ᔪᐊᓇᓯᐅᑉ ᐹᑉᑎᑦᓯᖃᑦᑕᕐᓂᖓ ᓇᑭᑦ ᐱᔪᓐᓇᕐᓂᖃᕐᑎᑕᐅᕚ, ᒎᑎᒦᑦ, ᐅᕝᕙᓗ ᐃᓄᖕᓂᑦ?”
ᑕᕝᕙ ᐃᒻᒥᖕᓄᑦ ᐅᖃᖃᑦᑕᐅᑎᓕᕐᐳᑦ, “ᐅᖃᕈᑦᑕ, ‘ᒎᑎᒥᑦ ᐱᕗᖅ,’ ᐅᖃᐅᑎᓂᐊᕐᐹᑎᒍᑦ, ‘ᓱᖕᒪᓪᓕ ᐅᒃᐱᕆᓚᐅᖏᑉᐱᓯᐅᒃ?’ 26ᐅᖃᕐᒥᒍᑦᑕᓕ, ‘ᐃᓄᖕᓂᑦ ᐱᕗᖅ,’ ᐃᓄᒐᓴᒡᔪᐊᓂᒃ ᑲᑉᐱᐊᓱᒃᐳᒍᑦ; ᐃᓄᐃᑦ ᖁᓚᖏᑦᓯᐊᕐᒪᑕ ᔪᐊᓇᓯ ᓇᓚᐅᑦᑍᔫᓂᖓᓂᒃ” 27ᑕᕝᕙ ᔩᓱᓯ ᑭᐅᕚᑦ, “ᖃᐅᔨᒪᓐᖏᓚᕗᑦ.”
ᔩᓱᓯᐅᑉ ᐅᖃᐅᑎᕔᑦ, “ᐅᕙᖓᑦᑕᐅᖅ ᐅᖃᐅᑎᓂᐊᓐᖏᓚᑦᓯ ᓇᑭᑦ ᐱᔪᓐᓇᕐᓂᖃᕐᑎᑕᐅᓪᓗᖔ ᐱᓇᓱᐊᑲᑦᑕᕐᒪᖔᕐᒪ.”
ᓄᑲᕇᒃ ᒪᕐᕉᒃ ᐊᑦᔨᐅᑎᑕᐅᓂᖓᒃ
28“ᖃᓄᕐᓕ ᐃᓱᒪᕕᓰ? ᐊᖑᑎᑕᖃᓚᐅᕐᐳᖅ ᒪᕐᕉᖕᓂᒃ ᐃᕐᓂᓕᖕᒥᒃ; ᐃᕐᓂᓂᓗ ᐊᖓᔪᒃᓕᖅ ᐅᐸᒃᓗᒍ ᐅᖃᐅᑎᕚ, ‘ᐃᕐᓃᒃ, ᐅᓪᓗᒥ ᐸᐅᕐᒐᓂᒃ ᐅᐂᓂᒃᓴᐅᓂᐊᕐᑐᓂᒃ ᐱᕈᕐᓰᕕᖁᑎᓂ ᐱᓇᓱᐊᕆᐊᕐᑐᓚᐅᕆᑦ.’ 29ᑖᑦᓱᒪ ᑭᐅᕚ, ‘ᑕᐅᕗᓐᖓᕈᒪᖏᓐᓇᒪ,’ ᑭᖑᓂᖓᒍᓪᓕ ᖃᕿᐊᓕᕋᒥ ᐱᕈᕐᓰᕕᓕᐊᕐᐳᖅ. 30ᑕᕝᕙ ᐊᑖᑕᖓ ᓄᑲᕐᖠᕐᒧᑦ ᐅᐸᒍᑎᒋᕗᖅ ᑍᒫᑦᓮᓐᓇᖅ ᐅᖃᐅᑎᓪᓗᓂᐅᒃ; ᑖᑦᓱᒪ ᑭᐅᕚ, ‘ᐄ, ᑕᐅᕗᓐᖓᕐᓂᐊᕐᐳᖓ,’ ᐱᓇᓱᐊᕆᐊᕐᑐᓚᐅᕋᓂᓗ. 31ᓇᓪᓕᐊᒃ ᑍᒪ ᐊᑖᑕᒥ ᐱᓇᓱᐊᕐᑕᐅᖁᔭᖓᓂᒃ ᐱᓇᓱᐊᓚᐅᕐᐹ?”
ᑖᒃᑯᐊ ᑭᐅᕚ, “ᑖᓐᓇ ᐊᖓᔪᒃᖠᖅ.”
ᑕᕝᕙ ᔩᓱᓯᐅᑉ ᐅᖃᐅᑎᕔᑦ, “ᓱᓕᔪᒥᒃ ᐅᖃᐅᑎᕙᑦᓯ, ᕉᒪᒥᐅᑦ ᑮᓇᐅᔧᕐᑎᑦᓯᔨᖁᑎᖏᑦ ᐊᖑᓐᓂᐊᕐᑏᓪᓗ ᐊᑐᒐᐅᓪᓗᑎᒃ ᓯᕗᓪᓕᐅᓗᑎᒃ ᐃᓕᑦᓯᓐᓂᑦ ᒎᑎᐅᑉ ᐊᑕᓂᐅᕕᖓᓄᐊᖅᑳᕈᒫᕐᐳᑦ. 32#ᓘᑲᓯ 3:12; 7:29,30.ᔪᐊᓇᓯ ᐹᑉᑎᑎᕆᔨ ᐃᓕᑦᓯᓐᓄᐊᓚᐅᕐᐳᖅ ᑕᑯᑎᑦᓯᓪᓗᓂ ᐊᖅᑯᒻᒥᒃ ᓇᓛᒎᕐᑐᒥᒃ ᐊᑐᕐᑕᐅᔪᓐᓇᕐᑐᒥᒃ, ᐅᒃᐱᓚᐅᓐᖏᓚᓯᓕ; ᕉᒪᒥᐅᑦ ᑮᓇᐅᔧᕐᑎᑦᓯᔨᖁᑎᖏᑦ ᐊᖑᓐᓂᐊᕐᑏᓪᓗ ᑖᑦᓱᒥᖓ ᐅᒃᐱᕈᓱᓚᐅᕐᐳᑦ; ᑕᒪᑐᒥᖓ ᑕᑯᓕᕋᓗᐊᕋᑦᓯ ᑭᖑᓂᖓᒍᑦ ᖃᕿᐊᓕᓚᐅᓐᖏᓚᓯ ᔪᐊᓇᓯᓗ ᐅᒃᐱᕆᓚᐅᕐᓇᓯᐅᒃ.”
ᐅᐂᓂᓕᒃᓴᒥᒃ ᑲᒪᔩᑦ ᐊᑦᔨᐅᑎᑕᐅᓂᖏᑦ
ᒫᑯᓯ 12:1-12; ᓘᑲᓯ 20:9-19
33 #
ᐂᓮᐊᓯ 5:1,2. ᔩᓱᓯ ᐅᖃᕐᐳᖅ, “ᑐᓴᒃᑲᓐᓂᓚᐅᕆᑦᓯ ᐊᑦᔨᐅᔫᑉ ᐊᓯᐊᓂᒃ; ᑍᑦᓱᒪᓂ ᓄᓇᖁᑎᓕᒃ ᐸᐅᕐᒐᓂᒃ ᐅᐂᓂᒃᓴᐅᓂᐊᕐᑐᓂᒃ ᐱᕈᕐᓰᕕᖁᑎᒥᓂ ᑲᓐᖓᕐᓱᐃᓚᐅᕐᐳᖅ, ᑖᓐᓇ ᐱᕈᕐᓰᕕᖁᑎᓂ ᐊᕙᓗᓕᐅᕐᐹ, ᐃᑎᕐᓴᓕᐅᕐᓗᒋᓪᓗ ᐅᐂᓂᖃᐅᑎᒃᓴᓂᒃ ᐋᖅᑭᒃᓱᐃᓚᐅᕐᐳᖅ, ᐳᕐᑐᔪᒥᒃ ᖃᐅᔨᓴᕐᕕᒃᓴᒥ ᓴᓇᓪᓗᓂ, ᐱᕈᕐᓰᕕᒃ ᐊᑐᕐᑕᐅᑎᑉᐹ ᐱᕈᕐᓰᕕᖕᒥᒃ ᑲᒪᔨᓄᑦ, ᓄᓇᐅᓪᓗ ᐊᓯᐊᓄᑦ ᐊᐅᓪᓚᕐᖢᓂ. 34ᐸᐅᕐᖓᓂᒡᓕ ᑲᑎᕐᓯᕕᒃ ᓇᓪᓕᐅᑎᓕᕐᒪᑦ, ᐱᔨᓂ ᑎᓕᕔᑦ ᐱᕈᕐᓰᕕᖕᒥᒃ ᑲᒪᔨᓄᑦ ᑲᑎᕐᓱᕐᑕᖏᓐᓂᒃ ᐸᐅᕐᖓᓂ ᐱᖃᑕᐅᔪᒪᓪᓗᓂ; 35ᐱᕈᕐᓰᕕᖕᒥᒡᓕ ᑲᒪᔩᑦ ᐱᖁᑎᓕᐅᑉ ᐱᔨᖏᑦ ᑎᒍᕔᑦ, ᐃᓚᖓᑦ ᐋᓐᓂᕐᓯᕐᐹᑦ, ᐃᓚᖓᑦ ᑐᖁᓪᖢᒍ, ᐃᓚᖓᓪᓗ ᐅᔭᖅᑲᓄᑦ ᒥᓪᓗᕐᐹᑦ. 36ᑭᖑᓂᖓᒍᑦ ᓱᓕ ᑎᓕᓯᒃᑲᓐᓂᕐᐳᖅ ᐱᔨᒥᓂᒃ, ᓯᕗᓪᓕᕐᒥᑦ ᐅᓄᕐᓂᕐᓴᓂᒃ; ᑖᒃᑯᐊᓕ ᐱᕈᕐᓰᕕᖕᒥᒃ ᑲᒪᔩᑦ ᑍᒫᑦᓮᓐᓇᖅ ᐱᓂᐊᕐᕕᒋᒋᕔᑦ. 37ᑭᖑᓪᓕᕐᐹᒥᒡᓕ ᐃᕐᓂᓂ ᑎᓕᓕᕆᕚ ᑖᒃᑯᓄᖓ, ᐅᖃᕐᓗᓂ, ‘ᖁᓚᕐᓇᓐᖏᓚᖅ ᐃᕐᓂᕋ ᐃᓕᕋᒋᓂᐊᕐᐹᑦ.’#21:37 ᑕᑯᓗᒍ ᓘᑲᓯ 20:18 38ᐱᕈᕐᓰᕕᖕᒥᒡᓕ ᑲᒪᔩᑦ, ᐱᖁᑎᓕᐅᑉ ᐃᕐᓂᖓ ᑕᑯᒐᒥᑦᔪᒃ, ᐃᒻᒥᖕᓄᑦ ᐅᖃᕐᐳᑦ, ‘ᐅᓇ ᐱᖁᑎᓕᐅᑉ ᐃᕐᓂᖓ; ᐊᑏ ᑐᖁᓚᐅᕐᓚᕗᑦ ᑭᖑᕐᖑᑎᔭᒃᓴᖏᑦ ᐱᑖᕆᓂᐊᕋᑦᑎᒍ!’ 39ᑕᕝᕙ ᑎᒍᕚᑦ, ᑕᕝᕙᓐᖓᓪᓗ ᐱᕈᕐᓰᕕᖕᒥᑦ ᐊᓂᑎᑉᐹᑦ, ᑐᖁᓪᖢᒍ.
40“ᑭᖑᓂᖓᒍᑦ ᐱᕈᕐᓰᕕᖕᒥᒃ ᐱᖁᑎᓕᒃ ᑎᑭᒃᑯᓂ, ᑖᒃᑯᐊ ᖃᓄᐃᓕᐅᓕᕋᔭᕐᐰᑦ ᑲᒪᔨᐅᔪᑦ ᐱᕈᕐᓰᕕᖕᒥ?”
41ᑖᒃᑯᐊ ᐅᖃᕐᐳᑦ, “ᓂᑲᒋᖏᑦᓯᐊᕐᓗᒋᑦ ᐱᐅᖏᑦᑐᓕᔪᑦ ᑐᖁᒃᑲᔭᕐᐰᑦ, ᐱᕈᕐᓰᕕᒃ ᑲᒪᔨᓄᑦ ᐊᓯᖏᓐᓄᑦ ᑲᒪᒋᔭᐅᑎᓕᕋᔭᕐᐹ ᐱᕈᕐᑐᖏᓐᓂᒃ ᐱᖃᑕᐅᑎᑦᓯᖃᑦᑕᕋᔭᕐᑐᓄᑦ ᑲᑎᕐᓱᐃᕕᒃ ᓇᓪᓕᐅᑎᔭᕌᖓᑦ.”
42 #
ᐃᓐᖏᕈᑦ 118:22,23. ᔩᓱᓯᐅᑉ ᐅᖃᐅᑎᕔᑦ, “ᒎᑎᐅᑉ ᐅᖃᐅᓯᖏᓐᓂᒃ ᐅᖃᓕᒫᓚᐅᕐᓯᒪᓐᖏᓚᓰ ᐃᒤᓕᔪᓂᒃ?
‘ᐅᔭᕋᒃ ᑐᓐᖓᕕᒃᓴᖅ ᐃᒡᓗᓕᐅᕐᑎᓂᑦ ᓇᕐᕈᒋᔭᐅᔪᖅ
ᑖᓐᓇ ᐱᓪᓚᕆᐊᓗᓐᖑᕐᐳᖅ ᑎᕆᖅᑰᓕᕐᓗᓂ;
ᑕᒪᓐᓇ ᐊᑕᓂᐅᑉ ᓇᖕᒥᓂᖅ ᐱᓇᓱᐊᓚᐅᕐᐹ; ᐅᕙᑦᑎᓐᓄᓪᓗ ᑲᒪᓇᕐᑐᐊᓘᕗᖅ!’
43“ᑍᒤᒻᒪᑦ ᐅᖃᐅᑎᕙᑦᓯ, ᒎᑎᐅᑉ ᐊᑕᓂᐅᕕᖓᓂᒃ ᐊᕐᓵᕐᑕᐅᔪᒫᕐᐳᓯ ᑐᓂᔭᐅᖔᕐᓗᓂ ᐃᓄᖕᓄᑦ ᐱᕈᕐᑐᖃᕐᑎᑦᓯᔪᓐᓇᕐᑐᓄᑦ. [ 44ᓇᓪᓕᐊᑦ ᑕᕝᕗᖓ ᐅᔭᕋᖕᒧᑦ ᑲᑕᒃᑐᖅ ᓯᖁᒥᓐᓂᐊᕐᐳᖅ; ᐅᔭᕋᒃ ᓇᓪᓕᐊᓐᓄᑦ ᑲᑕᒃᑯᓂ, ᑲᑕᒡᕕᒋᔭᒥᓂᒃ ᓯᖃᓪᓕᓯᓂᐊᕐᐳᖅ.#21:44 ᐃᓚᕿᓂᐊᕐᐹ]#21:44 ᐃᑦᔪᔪᑐᖃᐃᑦ ᐃᓚᖏᓐᓂ ᐱᑕᖃᖏᓪᓗᓂ ᐃᓚᖏᓐᓂ ᐃᓕᔭᐅᓯᒪᓪᓗᓂ”
45ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑦ ᐹᕆᓯᓪᓗ, ᔩᓱᓯᐅᑉ ᐊᑦᔨᐅᔪᕆᔭᖓᓂᒃ ᑐᓵᒐᒥᒃ, ᖃᐅᔨᕗᑦ ᐅᖃᐅᓯᕆᔭᐅᓂᕐᒥᖕᓂᒃ. 46ᑍᒤᒻᒪᑦ ᑎᒍᓇᓱᐊᕋᓗᐊᕐᐹᑦ, ᐃᓄᒐᓴᒡᔪᐊᓂᒡᓕ ᓯᕘᕋᕗᑦ, ᑖᒃᑯᐊ ᐃᓱᒪᖃᕐᒪᑕ ᓇᓚᐅᑦᑍᔫᓇᓱᒋᓪᓗᒍ.
Одоогоор Сонгогдсон:
ᒫᑎᐅᓯᐅᑉ ᐊᒡᓚᖏᑦ 21: EAIB
Тодруулга
Хуваалцах
Харьцуулах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Eastern Arctic Inuktitut Bible © Canadian Bible Society, 2012, 2021-2023.