ᒫᑎᐅᓯᐅᑉ ᐊᒡᓚᖏᑦ 19
19
ᐊᔪᕆᕐᑐᐃᓂᖅ ᑲᑎᑎᑕᐅᓯᒪᓗᑎᒃ ᐊᕕᑦᓯᔪᒪᔪᓂᒃ
ᒫᑯᓯ 10:1-12
1ᔩᓱᓯ ᑕᒪᒃᑯᓂᖓ ᐅᖃᐅᓯᖃᕇᕋᒥ, ᒐᓕᓕᐊᒥᑦ ᐊᐅᓪᓚᕐᐳᖅ ᔫᑎᐊᑉ ᓄᓇᖓᓄᐊᕐᓗᓂ ᑰᑉ ᔪᐊᕐᑕᓂᐅᑉ ᐊᑭᐊᓄᑦ. 2ᐃᓄᒐᓴᒡᔪᐊᓂᓪᓗ ᒪᓕᒃᑕᐅᕗᖅ, ᑕᕝᕙᓂ ᖃᓂᒻᒪᓯᓖᑦ ᐋᖅᑭᒃᐰᑦ.
3ᐹᕆᓯᓪᓕ ᐃᓚᖏᑦ ᔩᓱᓯᒧᐊᕐᐳᑦ ᐆᒃᑐᕐᓗᒍ ᐊᐱᕆᕚᑦ, “ᐱᖁᔭᕗᑦ ᐊᖑᒻᒥᒃ ᐊᕕᑦᓯᓪᓚᕆᒍᓐᓇᕐᑎᑦᓯᕚᑦ ᓄᓕᐊᒥᖕᓂᒃ, ᓱᓇᑐᐃᓐᓇᕐᒥᒃ ᐱᔪᑎᒃᓴᖃᕋᓗᐊᕈᑏᒃ?”
4 #
ᒨᓯᓯ ᓯᕗᓪᓖᑦ 1:27; 5:2. ᔩᓱᓯᐅᑉ ᑭᐅᕔᑦ, “ᒎᑎᐅᑉ ᐅᖃᐅᓯᖏᓐᓂᒃ ᐊᑐᐊᕐᓯᓚᐅᓐᖏᓚᓰ? ᐅᖃᕐᑐᖃᕐᒪᑦ, ‘ᐱᒋᐊᕐᓂᕐᒥ ᐱᓐᖑᕐᑎᑦᓯᔪᖅ ᐱᓐᖑᕐᑎᑦᓯᓚᐅᕐᒪᑦ ᐊᖑᒻᒥᒃ ᐊᕐᓇᒥᒡᓗ.’
5 #
ᒨᓯᓯ ᓯᕗᓪᓖᑦ 2:24. “ᒎᑎ ᐅᖃᕐᓯᒪᕗᖅ, ‘ᑍᒤᒻᒪᑦ ᐊᖑᑎᐅᑉ ᐊᑖᑕᓂ ᐊᓈᓇᓂᓗ ᕿᒪᖕᓂᐊᕐᐹᒃ ᓄᓕᐊᓂ ᑲᑎᒫᖓᕈᒪᓗᒍ, ᑖᒃᑯᐊᒃᓗ ᒪᕐᕉᒃ ᑎᒥᒃᑯᑦ ᐊᑕᐅᓯᐅᓕᕐᓂᐊᕐᐳᒃ.’ 6ᑍᒤᒻᒪᑦ ᑖᒃᑯᐊᒃ ᒪᕐᕉᔪᓐᓃᕐᐴᒃ ᑎᒥᒃᑯᓪᓕ ᐊᑕᐅᓯᐅᓕᕐᐳᒃ. ᑍᒤᒻᒪᑦ ᒎᑎᐅᑉ ᑲᑎᑎᑕᖏᒃ, ᐃᓅᑉ ᐊᕕᑎᑕᒃᓴᕆᓐᖏᓛᒃ.”
7 #
ᒨᓯᓯ ᑕᓪᓕᒪᖏᑦ 24:1-4; ᒫᑎᐅᓯ 5:31. ᑕᕝᕙ ᐹᕆᓯᑦ ᐅᖃᐅᑎᕚᑦ, “ᓱᖕᒪᓪᓕ ᑍᒪ ᒨᓯᓯ ᐱᖁᔭᒥᒃ ᐋᖅᑭᒃᓯᓚᐅᕐᐸ ᐊᖑᑦ ᐊᕕᑦᓯᓪᓚᕆᒃᑯᓂ ᑎᑎᖅᑲᓂᒃ ᐊᕕᑦᓯᑦᔪᑎᒥᓂᒃ ᓇᓗᓁᕐᓯᔪᓂᒃ ᓄᓕᐊᓂ ᑐᓂᓯᕕᒋᔭᒃᓴᕆᕚ, ᐊᐅᓪᓚᕐᑎᓪᓗᒍᓘ?”
8ᔩᓱᓯᐅᑉ ᑭᐅᕔᑦ, “ᒨᓯᓯᐅᑉ ᐱᖁᔭᒥᒃ ᑍᒤᑦᑐᒥᒃ ᐋᖅᑭᒃᓯᕕᒋᓚᐅᕐᐹᓯ ᐊᕕᑦᓯᓪᓚᕆᒍᓐᓇᕐᓯᑎᑦᓯᓂᕐᒥᒃ ᓄᓕᐊᑦᓯᓐᓂᒃ, ᐊᔪᕆᕐᑐᕐᑕᐅᔭᕆᐊᒃᓴᖅ ᓯᑎᔪᐊᓘᓂᓯ ᐱᓪᓗᒍ, ᑭᓯᐊᓂ ᑕᒪᓐᓇ ᑍᒤᓕᖓᓚᐅᓐᖏᓚᖅ ᐱᓐᖑᕐᑎᑕᐅᓕᕐᑎᓪᓗᒋᑦ. 9#ᒫᑎᐅᓯ 5:32; 1 ᑯᕆᓐᑎ 7:10,11.ᑍᒤᒻᒪᑦ ᐅᖃᐅᑎᕙᑦᓯ; ᓇᓪᓕᐊᑦ ᓄᓕᐊᒥᓂᒃ ᐊᕕᑦᓯᓪᓚᕆᒃᐸᑦ, ᐊᓯᓐᓂᐊᕐᓂᕐᒥᒃ ᐱᑦᔪᑎᖃᖏᓪᓗᓂ, ᐊᓯᐊᓂᒡᓗ ᓄᓕᐊᓂᒡᓗᓂ ᑖᓐᓇ ᓄᓕᐊᕆᓚᐅᕐᑕᒥᓂᒃ ᐊᓯᓐᓂᐊᕐᐳᖅ.”
10ᑕᕝᕙ ᐃᓕᓐᓂᐊᕐᑎᖏᑕ ᐅᖃᐅᑎᕚᑦ, “ᑕᕝᕙᓕ ᑍᒤᓕᖓᓕᕐᐸᑦ ᐊᖑᑎᑦ ᐊᕐᓁᓪᓗ ᓄᓕᐊᓂᖃᑦᑕᖏᓪᓗᑎᒃ ᐱᐅᓂᕐᓴᐅᕗᖅ!”
11ᔩᓱᓯᐅᑉ ᑭᐅᕔᑦ, “ᑕᒪᓐᓇ ᐅᖃᐅᓯᕆᔭᕋ ᑕᒤᓐᓄᑦ ᐃᓕᖓᓐᖏᓚᖅ, ᑐᓂᓯᕕᐅᓯᒪᔪᓄᓪᓕ ᑭᓯᐊᓂ ᑐᕌᖓᕗᖅ. 12ᐊᑦᔨᒌᖏᑦᑐᓂᒃ ᐱᑦᔪᑎᒃᓴᓕᖕᓂᒃ ᐊᖑᑎᓂᒃ ᓄᓕᐊᓂᔪᐃᑦᑐᕐᑕᖃᕐᒪᑦ: ᐃᓚᖏᑦ ᐃᕐᓂᐊᖑᓂᕐᒥᖕᓂᑦ ᑍᒤᑦᑑᔪᑦ: ᐃᓚᖏᓪᓕ ᐃᓅᖃᑎᒥᖕᓂᑦ ᓄᓕᐊᓂᒍᓐᓁᓪᓕᑎᑕᐅᓯᒪᔪᑦ; ᐃᓚᖏᓪᓕ ᓄᓕᐊᖃᓐᖏᓚᑦ ᐃᒻᒥᖕᓂᒃ ᑍᒤᑎᑦᑐᓂᒃ ᒎᑎᐅᑉ ᐊᑕᓂᐅᕕᖓ ᐱᓪᓗᒍ. ᑕᒪᑐᒥᖓ ᐅᖃᐅᓯᕆᔭᓐᓂᒃ ᐃᓚᓕᐅᕐᓯᔪᓐᓇᕐᑐᖅ, ᐃᓚᓕᐅᕐᓯᓕᕐᓕ.”
ᔩᓱᓯᐅᑉ ᓱᕈᓯᑯᓗᖕᓂᒃ ᓮᒻᒪᕐᑎᑦᓯᓂᖓ
ᒫᑯᓯ 10:13-16; ᓘᑲᓯ 18:15-17
13ᐃᓚᖏᓪᓕ ᓱᕈᓯᑯᓗᖕᓂᒃ ᔩᓱᓯᒧᐊᕈᑦᔨᕗᑦ ᐸᑎᒻᒥᓂᐊᕐᒪᒋᑦ ᑐᒃᓯᐅᑎᓗᓂᒋᓪᓗ. ᐃᓕᓐᓂᐊᕐᑎᖏᑕᓕ ᑕᕝᕗᓐᖓᐅᑦᔨᔪᑦ ᐃᓂᕐᑎᕐᐰᑦ. 14ᔩᓱᓯ ᐅᖃᕐᐳᖅ, “ᓱᕈᓯᑯᓗᐃᑦ ᐅᕙᓐᓄᑦ ᕾᑎᑕᐅᓕᑦ, ᐊᒡᕕᐊᖏᓪᓗᓯᐅᒃ; ᑍᒤᑦᑐᓄᑦ ᒎᑎᐅᑉ ᐊᑕᓂᐅᕕᖓ ᐱᒋᔭᐅᖕᒪᑦ.”
15ᔩᓱᓯᐅ ᐸᑎᒻᒥᕔᑦ, ᑭᖑᓂᖓᒍᓪᓗ ᑕᕝᕙᓐᖓᑦ ᐊᐅᓪᓚᕐᐳᖅ.
ᐃᓅᓱᒃᑐᖅ ᐊᖑᑦ ᐊᔪᕐᓴᖏᑦᑐᖅ
ᒫᑯᓯ 10:17-31; ᓘᑲᓯ 18:18-30
16ᑍᑦᓱᒪᓂ ᐊᖑᒻᒥᒃ ᔩᓱᓯᒧᐊᕐᑐᖃᕐᐳᖅ ᐅᖃᕐᓗᓂ, “ᐊᔪᕆᕐᑐᐃᔩ, ᖃᓄᖅ ᐱᐅᔪᒥᒃ ᐱᓂᐊᕐᑐᒃᓴᐅᕗᖔ, ᐃᓅᓯᕐᒥᒃ ᓄᖑᓱᐃᑦᑐᒥᒃ ᐱᔪᓐᓇᖁᓪᓗᖔ?”
17ᔩᓱᓯᐅᑉ ᑭᐅᕚ, “ᓱᖕᒪᑦ ᐊᐱᕆᕕᖓ ᓱᓇ ᐱᐅᖕᒪᖔᑦ? ᐊᑕᐅᓯᖅ ᑭᓯᒥ ᐱᐅᔪᑑᕗᖅ. ᐃᓅᓯᕐᒧᑦ ᓄᖑᓱᐃᑦᑐᒧᑦ ᐃᑎᕈᒪᒍᕕᑦ ᐱᖁᔭᓂᒃ ᒪᓕᑦᓯᐊᓕᕆᑦ.”
18 #
ᒨᓯᓯ ᐂᑉᐸᖏᑦ 20:13; ᒨᓯᓯ ᑕᓪᓕᒪᖏᑦ 5:17;
ᒨᓯᓯ ᐂᑉᐸᖏᑦ 20:14; ᒨᓯᓯ ᑕᓪᓕᒪᖏᑦ 5:18;
ᒨᓯᓯ ᐂᑉᐸᖏᑦ 20:15; ᒨᓯᓯ ᑕᓪᓕᒪᖏᑦ 5:19;
ᒨᓯᓯ ᐂᑉᐸᖏᑦ 20:16; ᒨᓯᓯ ᑕᓪᓕᒪᖏᑦ 5:20. ᑖᑦᓱᒪ ᐅᖃᐅᑎᕚ, “ᓇᓪᓕᐊᓐᓂᒃ?” ᔩᓱᓯᐅᑉ ᐅᖃᐅᑎᕚ, “ᐃᓄᐊᕐᑐᒃᓴᐅᓐᖏᓚᑎᑦ; ᐊᓯᓐᓂᐊᕐᑐᒃᓴᐅᓐᖏᓚᑎᑦ; ᑎᒡᓕᒃᑐᒃᓴᐅᓐᖏᓚᑎᑦ; ᐃᓅᖃᑎᖕᓂᒃ ᓱᓕᖏᑦᑐᒥᒃ ᐅᖃᐅᓯᖃᕐᑐᒃᓴᐅᓐᖏᓚᑎᑦ; 19#ᒨᓯᓯ ᐂᑉᐸᖏᑦ 20:12; ᒨᓯᓯ ᑕᓪᓕᒪᖏᑦ 5:16; ᒨᓯᓯ ᐱᖓᔪᖏᑦ 19:18.ᐊᑖᑕᖕᓂᒃ ᐊᓈᓇᖕᓂᒡᓗ ᐅᐱᖑᓱᑦᓯᐊᕐᑐᒃᓴᐅᕗᑎᑦ; ᐃᓅᖃᑎᓯᓗ ᓇᒡᓕᒋᔭᒃᓴᕆᕙᑦ ᓇᖕᒥᓂᖅ ᓇᒡᓕᒋᓂᕐᑐᑦ.”
20ᐃᓅᓱᒃᑑᑉ ᐅᖃᐅᑎᕚ, “ᑕᒪᒃᑯᐊ ᐱᖁᔭᓕᒫᑦ ᒪᓕᓚᐅᕐᐸᒃᑲ, ᓱᓇᒥᒃ ᓱᓕ ᐱᓇᓱᐊᕆᐊᖃᕐᐳᖔ?”
21ᔩᓱᓯᐅᑉ ᐅᖃᐅᑎᕚ, “ᓈᒻᒪᑦᓯᐊᕈᒪᒍᕕᑦ, ᐱᖁᑎᓕᒫᑎᑦ ᓂᐅᕐᕈᑎᒋᔭᕐᑐᒃᑭᑦ, ᑮᓇᐅᔭᕐᑖᑎᓪᓗ ᐊᔪᕐᓴᕐᑐᓄᑦ ᑐᓂᕐᕈᑎᒋᓗᒋᑦ, ᑕᕝᕙ ᐱᖁᑎᖃᑦᓯᐊᕐᓂᐊᕐᐳᑎᑦ ᕿᓚᖕᒥ; ᐊᑏ ᕾᓕᕆᑦ, ᒪᓕᒡᓗᖓ.”
22ᐃᓅᓱᒃᑑᑉ ᑕᒪᓐᓇ ᑐᓴᕋᒥᐅᒃ ᑕᕝᕙᓐᖓᑦ ᕿᒪᕉᑎᓕᕐᐳᖅ ᕿᒃᓵᓕᕐᓗᓂ, ᐊᔪᕐᓴᖏᑦᑐᐊᓘᒐᒥ.
23ᔩᓱᓯ ᐃᓕᓐᓂᐊᕐᑎᒥᓄᑦ ᐅᖃᕐᐳᖅ, “ᓱᓕᔪᒥᒃ ᐅᖃᐅᑎᕙᑦᓯ: ᐃᓄᖕᓄᑦ ᐊᔪᕐᓴᖏᑦᑐᓄᑦ ᒎᑎᐅᑉ ᐊᑕᓂᐅᕕᖓᓄᑦ ᐃᑎᕆᐊᒃᓴᖅ ᐊᔪᕐᓇᑲᓴᖕᓂᐊᕐᐳᖅ. 24ᓱᓕ ᐅᖃᐅᑎᒃᑲᓐᓂᕐᐸᑦᓯ; ᐊᒡᓛᑦ ᐊᔪᕐᓇᖏᓐᓂᕐᓴᐅᕗᖅ ᑳᒥᓕ ᒥᖅᑯᑎᐅᑉ ᐃᔨᖓᒎᕆᐊᖓ, ᐊᔪᕐᓴᖏᑦᑑᑉ ᐃᓯᕋᔭᕐᓂᖓᓂᑦ ᒎᑎᐅᑉ ᐊᑕᓂᐅᕕᖓᓄᑦ.”
25ᐃᓕᓐᓂᐊᕐᑎᑦ ᑕᒪᑐᒥᖓ ᑐᓴᕋᒥᒃ ᐊᖏᔪᒥᒃ ᑲᒪᓕᕐᐳᑦ, ᐅᖃᕐᓗᑎᒃ, “ᑭᓇᓕ ᑍᒪ ᐱᐅᓕᔭᐅᔪᓐᓇᕐᓂᐊᕐᐸ?”
26ᔩᓱᓯᐅᑉ ᑕᑯᓴᕐᓗᒋᑦ ᐅᖃᐅᑎᕔᑦ, “ᑕᒪᓐᓇ ᐃᓄᖕᓄᑦ ᐊᔪᕐᓇᕐᐳᖅ; ᒎᑎᒧᓪᓕ ᓱᓇᓕᒫᓂᒃ ᐊᔪᕐᓇᕐᑐᖃᓐᖏᓚᑦ.”
27ᐲᑦᑐᕉᓯ ᓂᓪᓕᕐᐳᖅ ᐅᖃᕐᓗᓂ, “ᑕᑯᒋᑦ, ᓱᓇᓕᒫᑦᑎᓐᓂᒃ ᕿᒤᓚᐅᕐᐳᒍᑦ ᐃᓕᖕᓂᒃ ᒪᓕᒃᓗᑕ. ᓱᓇᒥᒃ ᐱᖃᕈᒫᓕᕐᐱᑕ?”
28 #
ᒫᑎᐅᓯ 25:31;
ᓘᑲᓯ 22:30. ᔩᓱᓯᐅᑉ ᐅᖃᐅᑎᕔᑦ, “ᓱᓕᔪᒥᒃ ᐅᖃᐅᑎᕙᑦᓯ: ᐃᓅᑉ ᐃᕐᓂᖓ ᐃᒃᓯᕙᐅᑕᕐᔪᐊᕐᒥᓄᑦ ᐱᕕᐊᕐᓇᕐᑐᒧᑦ ᐃᖏᓪᓗᓂ ᓄᑖᒥᒃ ᐱᒋᐊᒃᑲᓐᓂᓕᕐᐸᑦ, ᑕᕝᕙ ᐃᓕᑦᓯ ᒪᓕᒃᑎᐅᔪᓯ ᐅᕙᓐᓄᑦ, ᐃᒃᓯᕙᖃᑕᐅᔪᒫᕐᐳᓯ ᐃᒃᓯᕙᐅᑕᕐᔪᐊᓂ 12ᓂ, ᐃᓴᕆᐊᓕᒥᐅᑦ ᑭᖑᕚᕇᑦ 12 ᐊᖓᔪᖅᑲᐅᕕᒋᓗᒋᑦ. 29ᑭᒃᑯᓕᒫᑦ ᐃᒡᓗᒥᖕᓂᒃ ᕿᒤᓯᒪᔪᑦ ᖃᑕᓐᖑᑎᒥᖕᓂᒡᓘᓐᓃᑦ ᓇᔭᒥᖕᓂᒡᓘᓐᓃᑦ ᐊᑖᑕᒥᖕᓂᒡᓘᓐᓃᑦ ᐊᓈᓇᒥᖕᓂᒡᓘᓐᓃᑦ ᕿᑐᕐᖓᒥᖕᓂᒡᓘᓐᓃᑦ ᓄᓇᒥᖕᓂᒡᓘᓐᓃᑦ, ᐅᕙᖓ ᐱᑦᔪᑎᒋᓗᖓ, ᑖᒃᑯᐊ ᐱᑎᑕᐅᒃᑲᓐᓂᕈᒫᕐᐳᑦ 100ᐃᕐᑐᓪᓗᐊᕐᑐᓂᒃ, ᑐᓂᓯᕕᐅᓗᑎᒡᓗ ᐃᓅᓯᕐᒥᒃ ᓄᖑᓱᐃᑦᑐᒥᒃ. 30#ᒫᑎᐅᓯ 20:16; ᓘᑲᓯ 13:30.ᐊᒥᓱᑦ ᓯᕗᓪᓕᐅᔪᑦ ᑭᖑᓪᓕᐅᔪᒫᕐᐳᑦ, ᐅᓄᕐᑐᓪᓗ ᑭᖑᓪᓕᐅᔪᑦ ᓯᕗᓪᓕᐅᔪᒫᕐᐳᑦ.”
Одоогоор Сонгогдсон:
ᒫᑎᐅᓯᐅᑉ ᐊᒡᓚᖏᑦ 19: EAIB
Тодруулга
Хуваалцах
Харьцуулах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Eastern Arctic Inuktitut Bible © Canadian Bible Society, 2012, 2021-2023.