ᒫᑎᐅᓯᐅᑉ ᐊᒡᓚᖏᑦ 10
10
ᐋᐴᓯᑕᓖᑦ 12 ᕾᖁᔭᐅᓂᖏᑦ
ᒫᑯᓯ 3:13-19; ᓘᑲᓯ 6:12-16
1ᔩᓱᓯᐅᑉ ᐃᓕᓐᓂᐊᕐᑎᓂ 12 ᕾᖁᕔᑦ, ᐱᔪᓐᓇᕐᓂᕐᑖᕐᑎᓪᓗᒋᑦ ᐊᓂᕐᓂᕐᓗᖕᓂᒃ ᐊᓂᑎᑦᓯᔪᓐᓇᖁᓪᓗᒋᑦ, ᖃᓄᐃᑦᑐᑐᐃᓐᓇᕐᓂᒡᓗ ᐋᓐᓂᐊᓇᕐᑐᓂᒃ ᖃᓂᒻᒪᓯᕐᓂᒡᓗ ᐋᖅᑮᔪᓐᓇᕐᓯᑎᓪᓗᒋᑦ. 2ᐋᐴᓯᑕᓖᑦ 12 ᐊᑎᖏᑦ ᐅᑯᐊᖑᕗᑦ: ᓯᕗᓪᓕᕐᐹᖅ, ᓮᒨᓂ, ᑍᔭᐅᔪᖅ ᐲᑦᑐᕉᓯᒥᒃ ᖃᑕᓐᖑᑖᓗ ᐋᓐᑐᕉ; ᔧᒥᓯᒃᑯᒡᓗ ᔪᐊᓇᓯᑯᒃ ᓄᑲᕇᒃ, ᓯᐱᑎᐅᑉ ᐃᕐᓂᖏᒃ. 3ᐱᓕᑉᐴᓯ, ᐸᑎᐅᓗᒥᐅᓗ; ᑑᒪᓯ, ᒫᑎᐅᓯᓗ, ᕉᒪᒥᐅᑦ ᑮᓇᐅᔧᕐᑎᑦᓯᔨᖁᑎᖓᑦ; ᔧᒥᓯᓗ ᐊᐅᓪᐱᐊᓯᐅᑉ ᐃᕐᓂᖓ, ᑖᑎᐊᓯᓗ; 4ᓮᒨᓂᓗ ᑬᓇᓂᒥᐅᒥᒃ ᑍᔭᐅᔪᖅ#10:4 ᕉᒪᒥᐅᓂᒃ ᐊᑭᕋᕐᑐᕐᑎᐅᔪᖅ ᑍᔭᐅᕙᖕᒥᔪᖅ ᐱᑦᑐᕆᐊᑦ ᔫᑕᓯᓗ ᐃᔅᑲᕆᐊᑦ, ᑖᑦᓱᒪ ᔩᓱᓯ ᐱᔭᐅᑎᓚᐅᕐᐹ.
ᑖᒃᑯᐊ 12 ᐱᓕᕆᐊᒃᓴᖏᓐᓂᒃ ᐅᖃᐅᑦᔭᐅᓂᖏᑦ
ᒫᑯᓯ 6:7-13; ᓘᑲᓯ 9:1-6
5ᑖᒃᑯᐊ 12 ᔩᓱᓯᐅᑉ ᑎᓕᕔᑦ ᐃᒫᒃ ᒪᓕᒐᒃᓴᓕᐅᕐᓗᒋᑦ, “ᔫᑎᐅᖏᑦᑐᑦ ᓄᓇᖏᓐᓄᑦ ᐂᓂᐊᕋᓯ, ᓴᒥᐊᕆᐊᕐᒥᐅᑦ ᓄᓇᖏᓐᓄᐊᕐᑍᓕᓗᓯ. 6ᒪᑯᓄᖓᓕ ᓰᐱᓄᑦ ᐊᓯᐅᓯᒪᔪᓄᑦ ᐂᓕᕆᑦᓯ, ᐃᓴᕆᐊᓕᒥᐅᑦ ᐃᓄᖏᓐᓄᑦ. 7ᐃᒫᒃ ᐊᔪᕆᕐᑐᐃᓗᓯ, ‘ᕿᓚᐅᑉ ᐊᑕᓂᐅᕕᐊ ᖃᒡᓕᓕᕐᐳᖅ!’ 8ᖃᓂᒪᔪᑦ ᐋᖅᑭᒃᓯᒋᒃ, ᑐᖁᖓᔪᓪᓗ ᐆᒻᒪᕐᑎᓪᓗᒋᑦ, ᓯᕘᕋᒋᔭᐅᔪᓂᒡᓗ ᐸᕐᑎᕐᑐᑦ ᐸᕐᑎᕈᓐᓃᕐᑎᓯᒋᒃ, ᐊᓂᕐᓂᕐᓗᐃᓪᓗ ᐃᓄᖕᓂᑦ ᐊᓂᑎᓪᓗᒋᑦ. ᐊᑭᖃᖏᑦᑐᒥᒃ ᑐᓂᓯᕕᐅᒐᑦᓯ ᐊᑭᖃᖏᑦᑐᒥᒃᑕᐅᖅ ᑐᓂᓯᐅᒃ. 9ᒎᓗᓂᒃ, ᓯᐅᓪᕕᕆᒥᒡᓘᓐᓃᑦ ᓇᒃᓴᕐᓂᐊᕋᓯ, ᑲᓐᓄᔭᓂᒡᓘᓐᓃᑦ ᑮᓇᐅᔭᓂᒃ ᐃᒃᐱᐊᕐᔪᖕᒥᐅᑕᖃᕐᓂᐊᕋᓯ; 10#1 ᑯᕆᓐᑎ 9:14; 1 ᑎᒧᑎ 5:18.ᐊᐅᓪᓚᓕᕈᑦᓯ ᕿᓄᕋᑏᑦ ᐴᒃᓴᔭᖓᓂᒃ ᓇᒃᓴᕐᓂᐊᕋᓯ, ᐅᕕᓂᕈᒃᑲᓐᓂᕐᓂᒡᓗ, ᐃᑎᒐᒍᑎᒃᑲᓐᓂᕐᓂᒡᓘᓐᓃᑦ, ᐊᔭᐅᑉᐱᐊᒥᒡᓘᓐᓃᑦ ᓇᒃᓴᕐᓂᐊᕋᓯ; ᐱᓇᓱᐊᕐᑎ ᑐᓂᓯᕕᐅᔭᕆᐊᖃᕐᒪᑦ ᐱᔭᕆᐊᖃᕐᑕᖓᓂᒃ.
11“ᐃᒡᓗᒐᓴᖕᓄᑦ ᑎᑭᑯᑦᓯ ᓄᓇᓕᖕᓄᓪᓘᓐᓃᑦ, ᖃᐅᔨᓇᓱᐊᕆᑦᓯ ᕿᓂᕐᓗᓯ ᓇᓪᓕᐊᓐᓂᑐᐃᓐᓇᖅ ᐃᓕᑦᓯᓐᓂᒃ ᑐᓐᖓᓱᒃᑎᑦᓯᒐᔭᕐᑐᒥᒃ, ᑐᓐᖓᓱᒃᑎᑦᓯᔪᖅ ᑖᓐᓇ ᓇᔪᓕᕐᓯᐅᒃ, ᑕᕝᕙᓐᖓᑦ ᓄᓇᒥᑦ ᐊᐅᓪᓚᓚᐅᖅᑳᕋᓯ. 12ᐃᒡᓗᒧᑦ ᐃᑎᕈᑦᓯ, ᐅᖃᕆᑦᓯ ‘ᓮᒪᓂᐅᑉ ᐃᓚᒋᓕᓯ.’ 13ᐃᓄᖏᓐᓂᑦ ᑐᓐᖓᓱᒃᑎᑕᐅᒍᑦᓯ, ᓮᒪᓂᐅᑉ ᓇᔪᕐᓂᐊᕐᐹᓯ; ᑐᓐᖓᓱᒃᑎᑕᐅᖏᒃᑯᑦᓯᓕ ᓮᒻᒪᕐᑎᑦᓯᓂᓯ ᐊᑐᕐᓂᐊᓐᖏᓚᖅ. 14#ᐋᐴᓯᑕᓖᑦ 13:51.ᓄᓇᓕᖕᓂᑦ ᑐᓐᖓᓱᒃᑎᑕᐅᖏᒃᑯᑦᓯ ᐅᖃᐅᓯᕆᔭᓯ ᓈᓚᒃᑕᐅᔪᒪᖏᑉᐸᑕ, ᑕᕝᕙᓐᖓᑦ ᐊᐅᓪᓚᕆᑦᓯ ᐃᑎᒐᑦᓯ ᓴᓂᖏᑦ ᑲᑕᒐᕐᑎᓪᓗᒋᑦ. 15#ᒫᑎᐅᓯ 11:24; ᒨᓯᓯ ᓯᕗᓪᓖᑦ 19:24-28.#ᓘᑲᓯ 10:4-12.ᖁᓚᕐᓇᖏᑦᑐᒥᒃ ᐅᖃᐅᑎᕙᑦᓯ, ᐃᖅᑲᕐᑐᐃᕕᒃ ᓇᓪᓕᐅᑎᒃᐸᑦ ᒎᑎᐅᑉ ᓂᑲᒋᓂᕐᓴᕆᓛᕐᐰᑦ ᓱᑑᒪᒥᐅᑦ ᒍᒨᕋᒥᐅᓪᓗ ᐃᓄᖏᑦ ᑖᒃᑯᓇᖓᑦ ᓄᓇᓕᖕᓂᑦ ᑐᓐᖓᓱᒃᑎᑦᓯᖏᑦᑐᓂᑦ.”
ᐊᑭᕋᕐᑐᕐᑕᐅᓂᐅᑉ ᑎᑭᐅᑎᓂᖓ
ᒫᑯᓯ 13:9-13; ᓘᑲᓯ 21:12-17
16 #
ᓘᑲᓯ 10:3. “ᑕᑯᒋᑦ ᓰᐱᑎᑐᑦ ᑎᓕᕙᑦᓯ ᐊᒪᕈᐃᑦ ᐊᑯᕐᖓᓐᓄᑦ; ᑍᒤᒻᒪᑦ ᖁᒡᓗᒋᐊᑎᑐᑦ ᐅᑦᔨᕐᓱᑎᐊᕆᑦᓯ, ᑑᕕᑎᑐᓪᓗ ᐱᖁᓐᓂᕐᑎᒋᓗᓯ. 17#ᒫᑯᓯ 13:9-11; ᓘᑲᓯ 12:11,12; 21:12-15.ᖃᐅᔨᓴᑦᓯᐊᕆᑦᓯ, ᐊᖑᑏᑦ ᐃᓚᖏᓐᓄᑦ ᑎᒍᔭᐅᔪᒫᕐᐳᓯ ᐃᖅᑲᕐᑐᕐᑕᐅᕕᖕᒧᓪᓗ ᐋᑕᐅᓗᓯ, ᐃᓯᖁᔭᐅᔪᓐᓃᕈᒫᕐᐳᓯᓗ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᓐᓄᑦ. 18ᐅᕙᖓᓗ ᐱᑦᔪᑎᒋᓗᖓ ᐃᖅᑲᕐᑐᕐᑕᐅᔪᒫᕐᐳᓯ ᐊᐅᓚᑦᓯᔨᐅᔪᓄᑦ ᐊᖓᔪᖅᑳᕐᔪᐊᓄᓪᓗ, ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐅᖃᐅᓯᖃᕈᓐᓇᖁᓪᓗᓯ ᑖᒃᑯᓄᖓ, ᔫᑎᐅᖏᑦᑐᓄᓪᓗ. 19ᐃᖅᑲᕐᑐᕐᑕᐅᕕᖕᒧᑦ ᐋᑕᐅᒍᑦᓯ ᐃᓱᒪᔮᕐᓂᐊᕋᓯ ᖃᓄᖅ ᐅᖃᕆᐊᖃᕐᓂᐊᕐᒪᖔᑦᓯ, ᐅᕝᕙᓗ ᖃᓄᐃᓕᓗᓯ ᐅᖃᐅᓯᖃᕐᓂᐊᒪᖔᑦᓯ; ᑕᒪᓐᓇ ᓇᓪᓕᐅᑎᒃᐸᑦ, ᐅᖃᐅᓯᒃᓴᑦᓯᓐᓂᒃ ᑐᓂᓯᕕᐅᔪᒫᕋᑦᓯ. 20ᐅᖃᐅᓯᕆᔭᓯ ᐃᓕᑦᓯᓐᓂᑦ ᐱᓂᐊᖏᒻᒪᑕ; ᐊᑖᑕᑦᓯᓕ ᐊᓂᕐᓂᖓᓂᑦ ᐱᔪᒫᕐᐳᑦ, ᐅᖃᓪᓚᒍᒫᕐᒪᑦ ᐃᓕᑦᓯᑎᒍᑦ.
21 #
ᒫᑯᓯ 13:12; ᓘᑲᓯ 21:16. “ᐊᖑᑦ ᐱᔭᐅᒃᑬᔪᒫᕐᐳᖅ ᖃᑕᓐᖑᑎᒥᓂᒃ ᑐᖁᑎᑕᐅᖁᓪᓗᒍ, ᐊᑖᑕᐅᔪᕐᓗ ᑍᒫᑦᓮᓐᓇᖅ ᐱᔪᒫᕆᕗᖅ ᕿᑐᕐᖓᒥᓄᑦ; ᕿᑐᕐᖓᕐᓗ ᐊᖓᔪᖅᑳᒥᖕᓂᒃ ᐊᑭᕋᕐᑐᓕᕈᒫᕐᐳᑦ ᑐᖁᑕᐅᑎᑦᓯᓗᑎᒃ. 22#ᒫᑎᐅᓯ 24:9; ᒫᑯᓯ 13:13; ᓘᑲᓯ 21:17; ᒫᑎᐅᓯ 24:13; ᒫᑯᓯ 13:13.ᐃᓄᓕᒫᓄᑦ ᐆᒥᒋᔭᐅᓕᕈᒫᕐᐳᓯ ᐅᕙᖓ ᐱᓪᓗᖓ. ᐅᒃᐱᕐᓂᕐᒥᓂᒡᓕ ᑎᒍᒥᐊᖏᓐᓇᕐᓗᓂ ᐃᓱᐊᓄᑦ, ᑖᓐᓇ ᐱᐅᓕᔭᐅᔪᒫᕐᐳᖅ. 23ᓄᓇᓕᖕᓂᑦ ᐊᑭᕋᕐᑐᕐᑕᐅᒍᑦᓯ, ᑕᕝᕙᓐᖓᑦ ᕿᒫᒋᑦᓯ ᓄᓇᐅᑉ ᐊᓯᐊᓄᑦ, ᖁᓚᕐᓇᖏᑦᑐᒥᒃ ᐅᖃᐅᑎᕙᑦᓯ ᐃᓴᕆᐊᓕᐅᑉ ᐃᒡᓗᒐᓴᒡᔪᐊᖏᑦ ᐃᖏᕐᕋᔭᕇᕐᕕᒋᓂᐊᖏᓐᓇᑦᓯᐅᒃ, ᐃᓅᑉ ᐃᕐᓂᖓ ᑎᑭᓚᐅᖄᕐᑎᓐᓇᒍ.
24 #
ᓘᑲᓯ 6:40;
ᔪᐊᓇᓯ 13:16; 15:20. “ᐃᓕᓐᓂᐊᕐᑎ ᐊᖏᓂᕐᓴᐅᓐᖏᓚᖅ ᐃᓕᓮᔨᒥᓂᑦ; ᐱᔨᓗ ᐊᖏᓂᕐᓴᐅᓐᖏᓚᖅ ᐊᖓᔪᖅᑳᒥᓂᑦ. 25#ᒫᑎᐅᓯ 9:34; 12:24; ᒫᑯᓯ 3:22; ᓘᑲᓯ 11:15.ᑍᒤᒻᒪᑦ, ᐃᓕᓐᓂᐊᕐᑎ ᐃᓕᓐᓂᐊᕐᑎᑦᓯᔨᒥᑐᑦ ᑍᒤᓕᕈᓂ ᑕᕝᕙ ᓈᒻᒪᒃᓯᕗᖅ, ᐱᔨᓗ ᐊᖓᔪᖅᑳᖃᕐᑐᖅ ᑍᒫᑦᓮᓐᓇᖅ ᐊᖓᔪᖅᑳᒥᑑᓕᕈᓂ ᑕᕝᕙ ᓈᒻᒪᒃᓯᕗᖅ. ᐃᓚᒌᒃᑐᑦ ᐊᖓᔪᖅᑳᖓᑦ ᐱᐅᓪᓯᐹᐱᒥᒃ ᑍᔭᐅᖃᑦᑕᕐᓯᒪᒃᐸᑦ, ᑕᕝᕙ ᓇᖕᒥᓂᖏᑦ ᐊᑎᖃᕐᑎᑕᐅᓂᐊᕐᐳᑦ, ᐱᐅᖏᓐᓂᕐᓴᐅᒃᑲᓐᓂᕐᑐᒥᒃ!”
ᑭᓈ ᓯᕘᕋᒋᔭᐅᔪᒃᓴᐅᕙ?
ᓘᑲᓯ 12:2-7
26 #
ᒫᑯᓯ 4:22; ᓘᑲᓯ 8:17. “ᑍᒤᒻᒪᑦ ᐃᓄᖕᓂᒃ ᓯᕘᕋᓂᐊᕋᓯ; ᐃᔨᕐᑕᐅᓯᒪᔪᑦ ᓴᖅᑭᑎᑕᐅᔪᒫᕐᐳᑦ, ᐃᔨᕋᕐᑐᐊᖑᔪᓪᓗ ᖃᐅᔨᔭᐅᔪᒫᕐᐳᑦ. 27ᑖᕐᑐᒥ ᐅᖃᐅᑎᒍᑦᓯ, ᖃᐅᒪᑦᓯᐊᕐᑐᒥ ᐅᖃᐅᓯᕆᔭᒃᓴᕆᕙᓯ; ᓯᐅᑎᒃᑯᑦ ᐃᓯᑦᔪᒃᕕᐅᒍᑦᓯ ᐅᖃᐅᓯᕆᔭᕆᐊᖃᕐᐸᓯ ᐃᒡᓘᑉ ᖄᖏᓐᓂ. 28ᓯᕘᕋᒋᓂᐊᕋᓯᒋᒃ ᑎᒥᒥᒃ ᑐᖁᑦᓯᔪᑦ ᑕᕐᓂᕐᒥᒡᓕ ᑐᖁᑦᓯᔪᓐᓇᖏᑦᑐᑦ; ᓯᕘᕋᒋᓯᐅᒃᓕ, ᑕᒤᓐᓂᒃ ᐊᓯᕈᐃᔪᓐᓇᕐᑐᖅ ᑎᒥᒥᒃ ᑕᕐᓂᕐᒥᒡᓗ ᐃᑯᒪᕐᔪᐊᕐᒥ. 29ᑮᓇᐅᔭᕐᒧᑦ ᓴᕕᕋᔭᑯᓗᖕᒧᑦ ᐊᑕᐅᓯᕐᒧᑦ ᖁᐸᓄᐊᖕᓂᒃ ᒪᕐᕉᖕᓂᒃ ᓂᐅᕕᕈᓐᓇᕐᐳᑎᑦ, ᑍᒤᒃᑲᓗᐊᕐᑎᓪᓗᒍ ᖁᐸᓄᐊᖅ ᐊᑕᐅᓯᕐᓘᓐᓃᑦ ᑲᑕᒡᓂᐊᓐᖏᓚᖅ ᓄᓇᒧᑦ ᐊᑖᑕᑦᓯ ᑍᒤᖁᖏᑉᐸᒍ. 30ᓄᔭᓯ ᐊᒡᓛᑦ ᓂᐊᖁᑦᓯᓐᓃᑦᑐᑦ ᖃᑦᓯᐅᖕᒪᖔᑕ ᖃᐅᔨᒪᔭᐅᕗᑦ. 31ᑍᒤᒻᒪᑦ ᓯᕘᕋᓂᐊᕋᓯ; ᖁᐸᓄᐊᓂᑦ ᐅᓄᕐᑐᓂᑦ ᐱᓪᓚᕆᐅᓂᕐᓴᒻᒪᕆᐊᓘᒐᑦᓯ!”
᙭ᔅᑑᓯᒥᒃ ᐅᖃᐅᓯᖃᕐᓂᖅ, ᓇᕐᕈᓂᕐᓗ
ᓘᑲᓯ 12:8-9
32“ᑭᓇᑐᐃᓐᓇᖅ ᐃᓄᖕᓄᑦ ᐅᖃᐅᓯᖃᕐᐸᑦ ᐅᕙᓐᓂᒃ, ᐅᕙᖓᑦᑕᐅᖅ ᑍᒫᑦᓮᓐᓇᖅ ᐅᖃᐅᓯᕆᓛᕐᐸᕋ ᐊᑖᑕᓐᓄᑦ ᕿᓚᖕᒦᑦᑐᒧᑦ. 33#2 ᑎᒧᑎ 2:12.ᑭᓇᑐᐃᓐᓇᕐᓕ ᐃᓄᖕᓄᑦ ᐅᖃᐅᓯᖃᖏᑉᐸᑦ ᐅᕙᓐᓂᒃ, ᐅᕙᖓᑦᑕᐅᖅ ᐅᖃᐅᓯᕆᓛᓐᖏᓐᓂᕙᕋ ᐊᑖᑕᓐᓄᑦ ᕿᓚᖕᒦᑦᑐᒧᑦ.”
ᐃᓅᖃᑎᒌᑦᓯᐊᕐᓂᕐᒥᐅᖏᑦᑐᖅ ᐊᑭᕋᕐᑐᕐᑎᒌᖕᓂᕐᒥᒡᓕ
ᓘᑲᓯ 12:51-53; 14:26-27
34“ᐃᓱᒪᓂᐊᕋᓯ ᐃᓅᖃᑎᒌᑦᓯᐊᓕᕐᑎᑦᓯᔭᕐᑐᕋᓱᒋᓗᖓ ᓄᓇᕐᔪᐊᕐᒧᑦ; ᐃᓅᖃᑎᒌᑦᓯᐊᓕᕐᑎᑦᓯᔭᕐᑐᓐᖏᓚᖓ, ᓴᕕᒡᔪᐊᕐᒥᒡᓕ#10:34 ᐊᑭᕋᕐᑐᕐᑎᒌᖕᓂᕐᒥᒡᓕ ᐱᑎᑦᓯᕗᖓ. 35#ᒤᑲ 7:6.ᑎᑭᓚᐅᕐᐳᖓ ᐃᕐᓂᖅ ᐊᑖᑕᒥᖕᓄᑦ ᐊᑭᕋᕐᑐᓕᖁᓪᓗᒍ, ᐸᓂᒡᓗ ᐊᓈᓇᒥᓄᑦ ᐊᑭᕋᕐᑐᓕᖁᓪᓗᒍ; ᐅᑯᐊᕐᓗ ᓴᑭᒥᓄᑦ ᐊᕐᓇᒧᑦ ᐊᑭᕋᕐᑐᓕᖁᓪᓗᒍ; 36ᐃᓅᑉ ᐊᑲᐅᖏᓐᓂᕐᐹᒥᒃ ᐊᑭᕋᕐᑐᕐᑎᒋᓂᐊᕐᐰᑦ ᓇᖕᒥᓂᓂ ᐃᒡᓗᒥᐅᖃᑎᓂ.
37“ᓇᓪᓕᐊᑦ ᐊᑖᑕᒥᓂᒃ ᐊᓈᓇᒥᓂᒡᓘᓐᓃᑦ ᐅᕙᓐᓂᑦ ᐅᖓᒋᔭᖃᕐᓂᕐᓴᐅᒃᐸᑦ, ᑖᓐᓇ ᐅᕙᓐᓄᑦ ᐃᓚᒋᔭᐅᔪᓐᓇᓐᖏᓚᖅ; ᓇᓪᓕᐊᓪᓗ ᐃᕐᓂᕐᒥᓂᒃ ᐸᓂᖕᒥᓂᒡᓘᓐᓃᑦ ᐅᕙᓐᓂᑦ ᐅᖓᒋᔭᖃᕐᓂᕐᓴᐅᒃᐸᑦ, ᑖᓐᓇ ᐅᕙᓐᓄᑦ ᐃᓚᒋᔭᐅᔪᓐᓇᖏᓚᖅ. 38#ᒫᑎᐅᓯ 16:24; ᒫᑯᓯ 8:34; ᓘᑲᓯ 9:23.ᓇᓪᓕᐊᑦ ᓴᓐᓂᖓᔪᓕᒃᓴᒥᓂᒃ ᓇᒃᓴᖏᑦᑐᖅ ᒪᓕᒡᓗᓂ ᐅᕙᓐᓂᒃ, ᑖᓐᓇ ᐅᕙᓐᓄᑦ ᐃᓚᒋᔭᐅᔪᓐᓇᓐᖏᓚᖅ. 39#ᒫᑎᐅᓯ 16:25; ᒫᑯᓯ 8:35; ᓘᑲᓯ 9:24; 17:33; ᔪᐊᓇᓯ 12:25.ᐃᓅᓯᕐᒥᓂᒃ ᐊᓐᓂᕈᓱᒃᑐᖅ, ᐃᓅᓯᕐᒥᓂᒃ ᐊᓯᐅᔨᔪᒫᕐᐳᖅ; ᐃᓅᓯᕐᒥᓂᒡᓕ ᐊᓐᓂᕈᓱᖏᑦᑐᖅ ᐅᕙᖓ ᐱᓪᓗᖓ, ᑖᓐᓇ ᐃᓅᓯᕐᒥᓂᒃ ᓇᒡᕚᕈᒫᕐᐳᖅ.”
ᐊᑭᓕᕐᑕᐅᓂᒃᓮᑦ
ᒫᑯᓯ 9:41
40 #
ᓘᑲᓯ 10:16; ᔪᐊᓇᓯ 13:20;
ᒫᑯᓯ 9:37; ᓘᑲᓯ 9:48. “ᐃᓕᑦᓯᓐᓂᒃ ᐃᓚᓕᐅᕐᓯᔪᖅ ᐅᕙᓐᓂᒃ ᐃᓚᓕᐅᕐᓯᕗᖅ; ᐅᕙᓐᓂᒡᓗ ᐃᓚᓕᐅᕐᓯᔪᖅ ᑎᓕᔨᓐᓂᒃ ᐃᓚᓕᐅᕐᓯᕗᖅ. 41ᓇᓚᐅᑦᑍᔪᒥᒃ ᐃᓚᓕᐅᕐᓯᔪᖅ, ᓇᓚᐅᑦᑍᔪᑐᑦ ᐊᑭᓕᕐᑕᐅᔪᒫᕐᐳᖅ; ᓇᓪᓕᐊᓪᓗ ᐃᓚᓕᐅᕐᓯᔪᖅ ᒎᑎᒥᒃ ᐃᓚᖃᑦᓯᐊᕐᑐᒥᒃ, ᒎᑎᒥᒃ ᐃᓚᖃᑦᓯᐊᕐᑐᑎᑐᑦ ᐊᑭᓕᕐᑕᐅᔪᒫᕐᐳᖅ. 42ᓇᓪᓕᐊᑦ ᐃᒥᕐᒥᒃ ᓂᒡᓕᓇᕐᑐᒥᒃ ᐃᒥᕐᑎᑦᓯᔪᖅ ᒪᓕᒡᑎᓐᓂᑦ ᒥᑭᓐᓂᕐᐸᐅᔪᒥᒃ, ᐃᒥᕐᑎᑕᐅᔫᑉ ᐅᕙᓐᓄᑦ ᒪᓕᒡᑎᐅᓂᖓ ᐱᑦᔪᑎᒋᓗᒍ, ᑖᓐᓇ ᓱᓕᒻᒪᕆᒡᓗᖓ ᐅᖃᐅᑎᕙᑦᓯ ᐊᑭᓕᕐᑕᐅᑦᓯᐊᕈᒫᕐᐳᖅ.”
Одоогоор Сонгогдсон:
ᒫᑎᐅᓯᐅᑉ ᐊᒡᓚᖏᑦ 10: EAIB
Тодруулга
Хуваалцах
Харьцуулах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Eastern Arctic Inuktitut Bible © Canadian Bible Society, 2012, 2021-2023.