Daniyɛl 5
5
Dĩm a Baltazar maanda a kibsa
1Dĩm a Baltazar, maana kibsa ne a kombɛɛmba, bãmb tusri. La bãmb taoore a yũu rãam. 2Rãama yũub yĩnga a Baltazar kɩtame tɩ b wa ne sãnem la wanzurf lagdã a ba a Nabikodonozor sẽn da zu Zerizalɛɛm wẽnd doogẽ. Yaa bãmb pʋs la b ning rãama tɩ dĩma, ne a kombɛɛmba, la a pagba la yɩɩn-yɩɩndba yũ. 3B waa ne sãnema la wanzurf lagda sẽn yiis Zerizalɛɛm wẽnd dooga pʋga tɩ dĩma, a kombɛɛmba, a pagba la a yɩɩn-yɩɩndba yũ b rãam. 4B yũume la b pẽga wẽnd dãmba sẽn dõog ne sãnem, ne wanzurf, ne zũudu, ne kutu, sẽn pees ne raoogo, ne kugri. 5Vugr bala b waa n yãee nus-bi, ninsaal nus-bi sẽn gʋlsd dooga lalga zugu, fitila poore. Dĩma yãee nuga sẽn gʋlsdã. 6Dĩma neng teemame, a yama bondgame, a gĩina maagame t'a rũma saood kalwaare. 7A tãsame n bool na-tʋm-tɩ-pɛleng-yɩk rãmba, Kalde rãmba la bagbã. Ad a sẽn yeel Babilon mitbã: «Ned ninga sẽn tõoga n karem sẽn gʋlsã la a wilg-ma a võore, m na kɩt tɩ b yeelg-a naam fuugu, b na pid a yubl sãnem yãndo, la yẽ n na n yɩ a tãab soaba kug-zĩidba sʋka.» 8Dĩma soolma mitba fãa zoe n waame, la b pa tõog n karem gʋlsma, b pa tõog n wilg a võor n kõ dĩma ye. 9Dẽ basa dĩma Baltazar ne pɛlen-yɩka, a nenga teemame t'a kombɛɛmba zĩ ne yɩɩre. 10Dĩm-poaka me wʋma dĩma ne kombɛɛmba koɛɛga n wa dɩɩba roogẽ. A yeelame: «Dĩm sõngo, Wẽnd na wogl f yõore! Bɩ f nenga ra bendg woto la f yama da bondg ye. 11Ned n be f soolma pʋga sẽn pid ne wẽnd-sõma wã vẽnegre, n paam yam, n paam yam yẽesem sẽn ya wẽnd dãmba rẽnna, y ba a Nabikodonozor kõ-a-la kãsengo. Yẽ n be na-tʋm-tɩ-pɛleng-yɩk rãmba taoore, n be bagba, ãds bagba, la mitba fãa taoore. 12Dẽnd yĩnga, bool-y daoa, a Daniyɛl, t'a wa wilg gʋlsma võore; yaa yẽ la y ba sẽn da pʋd tɩ Baltazar, ned sẽn ka tar a to, n pid ne bãngre, n tar yam n tõe n wilg zãmsd võore, n tõe n lɩk yelbũn sɩlemsa gõaaga, n tõe n yodg sẽn yode.» 13B kɩtame t'a Daniyɛl wa sak la dĩma yeel-a lame: «Yaa foo la a Daniyɛl bɩ? Foom la m ba a Nabikodonozor sẽn tall Zɩɩda tẽng n wa ka wã bi? 14M wʋmame tɩ wẽn-sõma wã pʋdga foom yam yẽesenga, yam zulum sẽn zʋʋg neb a taab rẽnna. 15M kɩtame tɩ b wa ne na-tʋm-tɩ-pɛleng-yɩk rãmba, n wa ne mitba n yeel-b tɩ b karem sẽn gʋls lalgã la b wilg-ma a võore, la b pa tõog ye. 16M wʋmame tɩ f tõeeme n wilg sẽn solg võore, tɩ f tõeeme n yodg sẽn yode. Dẽ yĩnga, fo sã n tõog n karem sẽn gʋlsã la f wilg-ma a võore, f na yeelg naam fuugu, f na pid sãnem yãndo f yubla, la foo n na n yɩ a tãab soaba tẽnga kug-zĩidba sʋka.»
17A Daniyɛl yeela dĩma taoore: «Y tõe n kell n talla y kũuna, y tõe n dɩk-b lame n kõ neb a taab y sã n data. M yaool n na n karma sẽn gʋlsã la m na n wilga dĩma a võore. 18M dĩm sõngo, yĩngr Soaala kõ-la y ba, a Nabikodonozor, pãnga, tõogo la ziiri. 19Wẽnd sẽn kõ-a pãng yĩnga, tẽns toor-toor, buud toor-toore la zelemd toor-toor neba da rigda a taoore. A ra kʋʋda a sẽn dat a soaba, n basd vɩɩga a sẽn dat a soaba, n kõt naam a sẽn dat a soaba, n sikd a sẽn data a soaba 20la a yam sẽn zẽke, t'a sũur kidbi, t'a maand tɩtaam, b sik-a-la a zaoorẽ, b fãsga a ziiri. 21B yiis-a-la ninsaalb sʋka, n kõ-a rũng yam t'a na n vɩɩnd ne burgma. A wãba yamd wa naafo, yĩngr meenem madga a yĩnga, al tɩ ta wakat ning a sẽn bãnge tɩ yĩngr Soaala n so ninsaala la a kõt naam a sẽn dat a soaba. 22La yãmba, Baltazar, a bi-sõngo, yãmb wʋma rẽ fãa la y me ka maan yam sulgr ye. 23Yãmb me yik n pursda beed ne yĩngr Soaalã, yãmb kɩtame tɩ b yiis wẽnd dooga lagdo, tɩ yãmb ne y kombɛɛmba, y pagba la y yɩɩn-yɩɩndba yũ rãam b pʋsẽ, n yik n kilsd wẽnd dãmb sẽn dõog ne sãnem, ne wanzurf, ne zũudu, ne kutu, sẽn pees ne raad bɩ kuga, n ka ne ye, n ka wʋmd ye, n ka tar yam ye. Y sẽn yaool n ka pẽge, yaa Wẽnd ning sẽn zãad y vɩɩma b nugẽ tɩ y soya fãa dig bãmb taoore. 24Bãmb n tʋm nugã t'a wa a toore n bẽes gʋlsma. 25Sẽn gʋlsa la woto: MENE, MENE, TEKEL, PARSIN. 26Võora me la woto: MENE: Wẽnd maga y soolma la b sõda a MENESG raare. 27TEKEL: b maga y naama zĩslem, la yaa faasem TƐKA 28PARSIN: y soolma weelame n pʋɩ Mɛd la PƐRS rãmba.»
29 # Bs 41,42. A Baltazar kõo noore tɩ b bao naam fuugu n yeelg a Daniyɛl; n bao sãnem yãndo n pid a yubla, la b wilg tɩ yẽ la a tãab soaba a tẽnga soaalba sʋka.
30Baraar yʋngo, b kʋʋ Kalde rãmb dĩm a Baltazar.
Одоогоор Сонгогдсон:
Daniyɛl 5: SSDC98
Тодруулга
Хувилах
Харьцуулах
Хуваалцах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
SEBR SÕNGO © Alliance Biblique du Burkina Faso, 1998.