Daniyɛl 11
11
1Sã n ya maam, ad-y Mɛd rao a Dariyus naam pipi yʋʋmde, m waa n sõng-a lame.
2Marsã ad sɩd koɛɛg ning m sẽn waa n na n taas-fo.
Nug goabg la nug rɩt rãmb zaba
Ade, dĩm dãmb a tãabo n na n led taab Pɛrs rãmb tẽnga. La bãmb poore, a naas soaba n na n wa la a na n waa ne arzɛka. Yẽ arzɛka na n yɩɩga a taaba rẽnna. La a arzɛka sã n wa paas a pãnga, a na n taka zabre ne Yavã nanamse. 3Tãb-biig a ye n na n dɩ naam Yavã tẽn-peelmẽ. A soolma na n yɩɩ kãsenga, la a na n maana a sẽn date. 4La a sẽn wat n tẽed t'a naama vigla zãnga, la b na n wa reeg-a. Woto a rĩunga na n wãame. A rĩunga na n sẽega kɩrens a naasã, la ka a biiga bɩ a yagenga n na n led-a a zaoorẽ ye. Naama na n pʋɩɩ ne neb a taaba la bãmb pãnga kõn kolg a rẽnda ye.
5Ned ninga sẽn na n dɩ naama nug rɩtgã na n talla pãnga la yẽ soaba tãnsoaba n na n wa tusa n lebs kɛɛnga, a soolma na n yɩɩga yẽ rẽnda. 6Yʋʋm sã wa maan a wãna, b na yõga zood ne taaba. Nug rɩtg dĩma bi-pugl na n yii kãadem nug goabg dĩma soolmẽ, sẽn na n yɩ-la tɩ zooda le yalse. Paga pãng ka na n yɩ wʋsg ye, a kamba yõor ka na n yɩ wok ye. Yẽnda, la sẽn wa-b ne-yẽ wã, ne a biigã, la a sɩdã, b na n kʋ-b lame. 7Nug rɩtg dĩma buuda ned a ye n na n wa reeg a ba zĩiga la a na n wa taka zabre ne nug goabg dĩma la a na n kẽ-la a tãnsoben-dotẽ, n tõog-a. 8A na n wʋka wala a tõogr yõodo, b wẽn-naandsa menga, b sãnem la b wanzurf lagdo n kẽng Ezipt. B na n zãaga ne taab yʋʋm a wãna. 9Dẽ poor la nug goabg dĩma na n kẽe nug-rɩtg dĩma soolmẽ n yaool n leb a tẽngẽ.
10Nug goabg dĩma kamba na n yikame n tigs zãma ka tɛka. Bãmb nin-yend na n taka zabre, yẽ ne a tãb-biisa na n zoee wa kʋɩl-bɛɛga, n wa kẽ toaagã. A sã n wa lebd a tẽngẽ, la a na n wẽ a bɛɛba tãnsoben-doog a ye. 11Nug rɩtg dĩma sũur na n puugame, t'a bob zabr ne nug goabg dĩma; yẽ me na n tigsa tãb-biis ka tɛka, la a na baas n konga pãnga, n lʋɩ nug rɩtg dĩma nugẽ. 12Nug rɩtg dĩma na n tũu rẽ n maan wilg-m-menga. Neb wʋsg na n paa zabrẽ wã yaa sɩda la ka yẽ n na n tõog ye. 13Nug goabg dĩma na n tigsa zab-zabdba sẽn yɩɩd pipi rãmbã. La yʋʋm a wãn sã n looge, a na n leb n waa ne zab teed wʋsgo. 14Wakat kãnga neb wʋsg na n yik n teedga ne nug rɩtg dĩma. Ad wakat kãnga, fo buuda neb menga, Daniyɛl, neb sẽn nong zɩɩm daagre, na n zãens n yi-la a soolmẽ, tɩ Wẽnd sẽn lik n wilg bũmb ninga tõog n pidsi. Bãmb me na n konga pãnga. 15Dẽ marsã la nug goabg dĩma na n wẽ gũbri n pag tãnsoben-tẽng a ye, n sam tãnd a lal-gũbra sɛɛga la a na n tõog-a lame. Nug rɩtg dĩma ne a tãb-biisa sẽn da ya gãndaadã ka na n tõog n yals nug goabg dĩma taoor ye. 16Tẽn-wãada na n maana wala a sẽn date. Bũmb ka na n tõog n gɩdg-a ye. A na n kẽe tẽng ninga sẽn ya neer n yɩɩd a taabã la rẽ t'a reng n wãa fãa a sora zugu. 17A rĩunga sẽn tar pãngã, a yeelame tã na lʋɩɩs a toog bũmb fãa pʋgẽ la a maan wa a tʋmda ne pʋ-peelem. A na n dɩka a bi-pugl a ye n kõ nug ritg dĩma n dat tɩ dĩm kãng soolma tũ rẽ n wã. La sɩlem kãng me ka na n zĩnd yõod ye. 18Nug goabg rĩma na n wẽnemda a neng n tees tẽns sẽn yegd mogrã; a na n tõoga bãmba. La tẽn-zẽnd ned a ye n na n wa kɩt t'a boog a tɩtaama la a rɩ pɛta. 19A na n wẽnemdame n tees a meng tãnsoben-tẽnsẽ la bãmb ka na n tõog n maan bũmb n sõng-a ye. A na n wa tol n loogame tɩ b ka bãng a sẽn tɩ kẽe ye. 20Sẽn na n deeg-a yẽnd zĩiga na n tʋmame tɩ b wa kẽ n zɛ tẽnga ro-neerã la ka na n kaoos rẽ poore tɩ yẽ me loog ye. Ned kõn bãng sẽn ya bũmb ning n loog ne-a, tɩ ka na n yɩ zabrẽ la a na pa ye.
21Nin-yaalga n na n ledga a naamẽ; b ka na n waoog-a wa dĩm ye. La a na n yika ne sɩlem n deeg naama naana-naana tɩ ka tũ ne tãb-kaoor zẽkr ye. 22Dĩm ba a ye kõn bob tãpo n tõog-a ye. Yaa yẽ n na n maan raoodo wakat fãa. A na n tol n kʋʋ buud sõnga naab a ye. 23A na n yɩɩ sudum soaba; a na n yẽsa ne zãmbo, la woto la a na n paas a pãnga, ba sẽn be-b a poorẽ wã sõor sã n paooda wʋsgo. 24A na n kẽe tẽn-bɛda tɩ ka tũ ne zabr ye. A na n tʋma a ba rãmba la a yaab rãmb sẽn pa tʋme, n wʋkd tẽnga laogo la sẽn be yõod buud fãa n pʋɩ a zo-rãmba, wala ned sẽn zab n tõog a bɛɛb sẽn maande. A gãnega a bẽta ne yam, n tʋlg meng n na n tak zabre ne tãnsoben-tẽnse. La a pãnga na n wa ta-la a tɛka.
25A na n neka a pãnga la a raoodo n wa maan zabre ne nug rɩtg dĩma. Dĩm kãng sɩd na n yika ne tãb-biis ka tɛka, la a ka na n maan raood ye. B na zĩnda tẽngre n maan sudum. Ade a meng neba n na n zãmb-a; b na n tõoga a tãb-biisã; bãmb ka tɛk na n paa zabrẽ. 26Yaa sẽn da rɩt-a ne yẽnda n na n kʋ-a. A tãb-biisa na n konga pãnga, la kũum na n looga ne neb ka tɛka. 27Dĩm dãmba a yiibã na n wa sega taab zĩig a ye, n dɩ ne taaba la b wẽnema na n zenga taaba; b na n yaga taab zirẽ. Yõod pa na n zĩndi tɩ yɛla baasga daare da nan pa ta ye. 28Nug goabg dĩma na n leba a tẽngẽ ne laog ka tɛka. Sor zugu a na n tees n zaba ne buud sõnga neba.
29Wakata sã n wa pidi, nug goabg dĩmaa na n lɛɛg n wa nug rɩtgo dĩma nengẽ, la yɛla kõn wẽneg pĩnd ye. 30Kitim na n yiisa a koom-kogendo n zab ne-a, t'a yam na n yi ne a menga. A na n lɛɛg n waame n zab ne Wẽnd zo-rãmba, la a pẽneg neb niyns sẽn ka rat Wẽnd zoodã. 31#Dn 9,27; 12,11; Mt 24,15; Mk 13,14. A na n yiisa neb tɩ b wa tãnsoben-tẽngã n dẽgem do-sõnga sẽn me be wã. B na n gɩdga beoog-beoog maoongã la b na n bao zĩig n zaolg yel-yoog mengã sẽn wat ne sãoongã. 32Dĩma meng na n yika ne a bels-yoodã n paam neb sẽn na n zãgs Naaba-Wẽnd zoodã. Sẽn ka lak-ba n bas Wẽndã yaool n ka na n teem b manesem ye. 33Sɛb-mitba sẽn be bãmb sʋkã na zãms sẽn ka mi-bã. Yʋʋm a wãn pʋgẽ, kẽer na n le rɩka yam sõngo. Kẽer me na n yõg n losa bugmẽ, tɩ kẽer lob bi-bees roogẽ. B na n deng n deega bãmb rãmba arzɛk zãnga. 34B sẽn wat n tar toogã, ka neb wʋsgo n na n wa kũm-b ye, wʋsg meng na n naaga bãmb ne zoe-nif la sudum. 35B na n kʋʋ mitba kẽere la b kũuma na n waa ne buuda pekre, n wa ne a yɩlgre n segl-a tɩ daara yaool n ta. Sɩda daar n wate la nan keta.
36 # 2Te 2,3-4; Yp 13,5-6. Dĩma na n maana wala a sẽn date, n pirsd a menga, n pʋs n tẽed meng t'a yɩɩda wẽnd dãmba. Pãng soaba Wẽnd poorẽ a na n yiisa goam sẽn pa sakd kelgr ye. Neb wʋsg na n yik n pʋga a poore n tãag wakat ninga Naaba Wẽnd sẽn na n bas tɩ b sũura fudgi, tɩ b pids b sẽn yalse. 37Dĩma ka na n waoog wẽnd niyns a ba rãmb sẽn waoog ye; a ka na n waoog wẽnd ning sẽn paamd pagba pẽgre n yɩɩd a taaba ye; a na n gesa a meng wa ned sẽn yɩɩd wẽnd dãmba fãa la a kõn waoog bãmb ba a ye ye. 38A sẽn na n tẽeg wẽnd ning yelle, yaa wẽnd ning sẽn be-a tãnsoben-dotẽ wã. Yaa wẽn-sãanga, a ba rãmb sẽn ka bãng ye, la yẽnda la a na n kõ sãnem, wanzurfu la kug sẽn pɩnd-b toore la teed a taab sẽn tar yõodo. 39A na n teega wẽn-kãng pãnga n yik zabre ne tẽns wʋsgo. A na n pẽga neb niyns sẽn na n sak n tũ wẽnd kãnga la a na n kõ-b-la naam, b na n sooga zãma, a na n dol-b-la ne pʋto.
Daara raare
40Yaoolem daarã, nug rɩtg dĩma na n yiime tɩ b le sɩng zabre la nug goabg dĩma na n wudg n kẽ-a-la ne bilim-bilm, ne wiidi, ne koom-kogendo ka tɛka. A tãb-biisa na n kẽe tẽns wʋsgo, a na n fão-la b toosã n loog wa kʋɩl-bɛɛga. 41A na n kẽe tẽng ning sẽn tar neerem n yɩɩd a taaba la neb wʋsg na n kii be. Sã n ya Edom, Moab la Amon kamba, bãmb na n põsame. 42A na n sooga tẽns a taaba, Ezipt meng kõn põs ye. 43A na n wʋka Ezipt laogã: sãnem, wanzurfu la bũmb ning fãa sẽn be yõodo. Kus la Libi rãmba na n sak-a lame. 44La koɛɛg n yaool n na n yi yaanga la goabga, n wa kẽes-a rabeem t'a yik ne sũ-puuri n tak zabre, n kʋ neb ka tɛka. 45A na n wẽ-la a sika Mogra ne tãn-sõnga sʋka, tãng ninga sẽn ya tẽng sẽn ya neer n yɩɩd a taaba tãnga. A paa be tɩ kũuma, bũmb sẽn ka tɩɩm soaba, wa loog ne-a.»
Одоогоор Сонгогдсон:
Daniyɛl 11: SSDC98
Тодруулга
Хувилах
Харьцуулах
Хуваалцах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
SEBR SÕNGO © Alliance Biblique du Burkina Faso, 1998.