Sáni Lúkasï 15
15
Karichi erankuti enka karichini kuátapka
(Mt 18.10-14)
1Iámentu ima enkaksï Roma axakua tumina tánempka, ka máteru enkaksï nósesi úrini mítekatepka antarherasïremptiksï Jesusini kurhach'ani. 2Inteni ampe jimpoksï fariseoecha ka juramukua jurhentpiricha arhinhchasïrempti, arhiparini:
–I k'amanharhintstichani sési eroasïnti ka imecha jinkuni t'iresïnti.
3Jimak'ani Jesusi íni uantantskua terukutarantskua uantaspti: 4“¿Ne cha ma ísï enka iúmu ekuatse (100) karichichani káak'a ka enka ma kuátak'a, no máteru t'ámu ekuatse témpeni iúmu t'ámu (99) juátarhu jurarkuasïnki, ka nirani jirinhantani karichini enka kuátaka, ka no níntasïnti eka no xéntani jarhak'a? 5Ka enka exent'ak'ia, tsípeparini ichantisïnti 6ka enka chénjempo niántak'a, p'íchpiri jémpechani ka irenkutichani tánantaasïnti ka arhiasïnti: ‘Ju je jínteni jinkuni tsípeni, jimpokani xéntaskia karichini enkani kuátapka.’ 7Aiankuxakaksïni eska mák'ueni tsípekua jarhasïnka auantarhu enka k'amanharhintsti ma Diósïni antarhentak'a, eska t'ámu ekuatse témpeni iúmu t'ámu (99) enkaksï no uétarhenchak'a Diósïni antarhentani.”
Uarhiti enka tuminani tsîtapka
8“O máteria: ¿Náki uarhiti enka témpeni tumina kámani jauaka ka ma tsîtani no erak'utarakua ma étskusïnki ka iámu k'umanchekuarhu iatsitakuarhu k'arhatani? ¿Ka no jurak'unt'ani jirinhantani enka no xéntani jauaka? 9Ka enka na xéntak'a, tánantaasïnti imeri p'íchpirichani ka irenkutichani ka arhiani: ‘Tsípe je jínteni jinkuni, jimpokani xéntaskiia tumina enkani tsîtapka.’ 10Arhixakaksïni eskaksï méntkueni tsípesïnka Diósïri ánjelicha enka k'amanharhintsti ma Diósïni antarhentak'a.”
Acheti enka uáp'ani tsîtapka
11Jesusi uantant'a'sptit'u: “Acheti ma tsimani sapichani kásïrempti, 12ka ima enka sánteru sapichuepka tátjempani arhispti: ‘Táte, íntskurini enka xáni juchetika, imani ampe enkarini jínteni pakatacheaka.’ 13Namoni jurhia tátsekua, uáp'a sapichu atarant'aspti enka xáni imeripka, ka imani tumina jimpo iauani máteru k'éri iretarhu niraspti, ka jima nántiterkueni irekaparini tumina iámu ampentarhespti. 14Ka enka na k'amak'utapkia, ka imani k'éri iretarhu kánekua nómpe t'irekua jarhani ima uénaspti k'arhimaparini jámani. 15Niraspti jima anapu achetini ma ánchekorheta kurhakuni, ka ima uéramani axaspti kúchi erankutaraani. 16Uarhisïrempti k'arhimani ka kúchicheri t'irekua jamperi uéksïremptia arhani, ka nónema intsïmpesïrempti. 17Enka jamperi sési eratsentapka: ‘¡Uáni ánchekorherichaksï jucheti táteo t'irekua jukari jamperi jatsikorhesti, ka ji ixu uarhixaka k'arhimani! 18K'uanhatsentaaka jucheti táteo ka arhiaka: Jucheti Táte, Diósïni ka t'únkenikini k'amanharhichent'aska; 19nóteruni nitatarheska chéti uáp'eni; chéti ánchekorheri ménirini káma.’ 20Ísï jimpo xanhari jatant'a'spti ka tátjemperi k'umanchekuarhu k'uanhatsentaspti.”
“Enka útasï iauaniteru jápka, tátjempa exespti ka p'amok'uspti. Uiriaspti kúntani ka kamakamataspti ka putinharhikuni erontatini. 21Ima arhispti: ‘Jucheti Táte, Diósïni ka t'únkenikini k'amanharhichent'aska; ka nóteruni nitatarheska chéti uáp'eni.’ 22Ka tátjempa jántspiri jémpechani juramukuaspti: ‘Kókuani, takusï sánteru ampakiti peta je, ka xukutantsï je; jukak'urhakua tiripitiri ma inchak'urhata je, ka kuarhachit'u jatsikuntani je. 23Jua je úakasï sapichuni enka sánteru p'ukuka ka ata je. ¡K'uínchekuachi úaka ka k'éri máchi t'ireaka! 24Jimpoka i jucheti sapi uarhirixapka ka tsíntasti; tsînchespti ka xéntaskachia.’ Ka k'uínchekuaksï uénaspti.”
25“Enka ísï úkorheni jápka, uáp'a urheti juátarhu jámaxapti. Enka niántani jápka, kústakua kurhaspti ka eska uarhanhaxapka. 26Jimak'ani jántspirini ma ióarhispti ka kurhamarhespti ampe úkorhexapi. 27‘Chéti erachi junkuasti ka chéti táte úakasï sapichu sánteru p'ukurakatani atarkorhesti, jimpoka sési janonkuaska nómpema úkorhenchatini.’ 28Ka uáp'a urheti xáni ikiaspti enka jamperi no uékempka inchant'ani, ísï jimpo, tátjempa nitsïkorhespti kómarhini eska ichant'apirinka. 29Ka ima tátjempani arhispti: ‘Míteskari namoni uéxurhinikini marhuacheskia, ka nómenirini íntskuska náuek'i karichi sapichu ma eskani jucheti p'íchpirichani jinkuni t'irekua ma úntapirinka. 30Ka iásï k'ória enka i chéti sapi janonkuaka enka chéti tumina uarhiti ísku jántichani jinkuni ampentarheka, ka t'u inteni úakasï sánteru p'ukurakatani atakuni.’ 31Tátjempa arhispti: ‘Jucheti uátsï, t'úri méntku jínteni jinkuni jarhaska, ka iámu ampe eskani xáni jatsika chétisti. 32K'óru uétarhexapti k'uíchekua úni k'éri t'irekua ma jinkuni ka tsípeni, jimpoka chéti erachi enka uarhirini jápka, tsíntasti; tsînchespti ka xéntaskachia.’ ”
Селектирано:
Sáni Lúkasï 15: DKPJ
Нагласи
Копирај
Спореди
Сподели
Дали сакаш да ги зачуваш Нагласувањата на сите твои уреди? Пријави се или најави се
Biblia en P´urhépecha, Michoacán, México © Sociedad Bíblica de México, A.C.