Sáni Lúkasï 14
14
Jesusi k'úrhekorhetini ma ampakerantaspti
1Sábadu jurhiatekua Jesusi fariseouecheri juramutio ma niraspti t'ireni, ka máteru fariseouechaksï erankuxapti. 2Ístu jima jarhaspti acheti ma enka k'úrhekorhepka. 3Jesusi juramukua jurhentpirichani ka fariseoechani kurhamarheaspti:
–¿Anti sábadu jurhiaatekuechani jiáretperanhasïnki p'amenchatini ma ampakerantani?
4Ka imaksï pínasku pakarasti. Jimak'ani ima p'amenchatini ampakerantaspti ka arhispti eska níntapirinka. 5Ka fariseoechani arhiaspti:
–¿Ne cha ma isï, enka chári sapi uekanheaka nani o enka úakasï ma uekanhaska; ka náuek'i enka sábadueuaka no p'ínhantapaa?
6Ka nóksï ampe ma úspti mókukuni.
Nani enkaksï atsïpiticha uaxakaaka
7Enka Jesusi exepka néna enkaksï pámpetpiricha erakukorheni jápka k'érikuarhu uaxakani, arini arhistakuaspti:
8–Ekari ampe tempuchakuarhu uantap'anhantaska, nóri jámaaka k'érikuarhu uaxakani, jimpoka tátsekua jámaaka nema niárani enka t'u jinkuni sánteru k'éri ampeuaka; 9nántika ima enkakini uantap'antaka antarheraaka ka arhinkini: Kéntiku, jurak'u i uaxakani. Jimak'aniri k'uratseparini mótsentaaka, tárhukutini niárani. 10Jimini ménterueni jama, enkari uantap'anhantaska, tárhukutini niárakorhe, eska ima enkakini uantap'antaka juuaka arhini: P'íchpiri, sánteru sáni k'érikuarhu niára. Ísï jámanksïni sánteru k'éri ampe exeati ima enkaksï jarhop'ekuarhu t'u jinkuni uaxakatini jaka. 11Jimpoka ima enka jantiok'u k'éri arhikorhek'a, ísku nemeni exenhaati; ka ima enka ísku nema exekorhek'a, k'éri ampe únhaati.
12Imani achetini arhispti enka uantap'antapka:
–Enkari méni jámka t'irekua intsïmpeni, ásï jáma chéti p'íchpirichani uantap'antaani, nít'u chéti erachichani uantap'antaani nít'u chéti márkuechani uantap'antani, nít'u chéti irenkuti jatsikorherichani uantap'antaa; jimpokaksïni imat'u úaka intsïmpentani t'irekua, ka ísï jámaniri maiamukorhent'aaka. 13Jimini ménterueni jáma, na enkari jatini intsïmpeska ampakiti ma t'irekua, imechani intsïmpea enkaksï no jatsikorheka, ka imani enkaksï no úk'a jánkorheni, ka pátenharhichani; 14ka sésiri p'ikuarheraaka. Jimpokaksïni ima no úaka maiamuntani, ka jiák'aniri antakua p'iuaka enkaksï kaxumpiticha tsíntaaka.
K'éri t'irekueri uantantskua
(Mt 22.1-10)
15Inteni kurharini, ima ma isï enkaksï t'ireni uaxakatini jápka Jesusini arhispti:
–¡Tsípe ima enka Diósïri irechekua ampakiti t'irekuarhu jauaka!
16Jesusi arhispti:
–Acheti k'éri t'irekua ma intsïmpespti, ka uánekua uantap'entaspti. 17Enka t'irenhani janhapkia, imeri jántspirini axaspti eska arhip'epirinka: Juia je jimpoka t'irekua jaiaraskia. 18K'óruksï iámentuecha uénaspti uantakorheni. Ma, uénani jámani uantaspti: Iáiasï echeri ma piáska ka eraatani niuaka. Sánirini tekaachentsï. 19Máteru uantaspti: Témpeni uákasïchani piáska, ka ts'ék'uani niuaka exeani eskaksï jurhenaka tarheni, sánirini tekaachentsï. 20Ka máteru uantaspti: No úaka nirani jimpokani iásï no ióni tempuchatixaka. 21Jántspiri k'uanhatsespti ka irecha jémpani aiankuspti eskaksï na arhipka. Jimak'ani irecha ikiatintku jántspirini arhispti: Kókuani xanharu jata, ka ireta k'ériri ampukutecharhu ni kókuani, ka no jatsikorherichani júaa, ka imani enkaksï no úk'a jánkorheni, pátenharhichani ka renhet'echani júaa. 22Tátsekua jántspiri uantasptiteru: Tata, juáp'eskia eskarini na arhika, ka útasï ampantesti. 23Irecha jántspirini arhispti: Xanhari jimpo ka uéramani isï ni ka máteruechani uinhapetarhu incharaa, eska jucheni uininhaaka. 24Jimpokaksïni arhixaka eskaksï nóma ima ts'émuaka k'éri t'irekuani enkaksï uénani jámani uantap'anhantapka.
No néuek'i úsïnti Diósïri úch'akurakatani chúxapani
(Mt 10.37-38)
25Uánekuaksï Jesusini chúxapaxapti; ka ima eraparhasti ka uantani: 26“Enkarini nema antarherani jaka jínteni ka nórini sánteru uékani eska tátjempani ka eska nánte jémpani ka eska uarhiti jémpani ka eska uáp'echani ka eska erachi jémpeni ka eska pirempechani, ka sánteru jamperi eska jantiok'u xénhchakorheni, no úati jucheti jurhenkorherini. 27Ka ne enka no mínkorhent'aska krúsini ka chúxapunirini, no úati jucheti jurhenkorherini. 28Enka cha ma ísï k'umanchekua iótati ma uékaaka úni, ¿Anti no urheta uaxantentasïnki miuni náxani tumina uétarhea, ka exeni jatsiski tumina enka k'amarataraaka? 29Ka jimini ménterueni, enka uénaaka pítsekua tsïntsïni ka tátsekua no k'amarani, iámentuechaksï teresmarhuati, 30arhiparini: I acheti k'umanchekua uénasti, ka no ústi k'amarania, 31O enka irecha ma ísï uétarhenchaaka máteru irechani jinkuni uarhiperani, ¿No urheta uaxantentasïni miuantaani ua témpeni míli (10 míli) p'urhek'utichani jinkuni kúmaani imani enka ma ekuatse míli (20 míli) jinkuni jurhani jaka? 32Ka enka eratseaka no úni jakuni, enka ima máteru irecha útasï iauani jauaka, axakuauati uantakua párichani eskaksï niuaka arhini eskaksï no uarhiperaakia. 33Ístuchka cha ne uék'i enka no jurak'uska eska xáni ampe jatsikorheka, no úati jucheti jurhenkorherini.”
Parhakpeni anapu etukua
(Mt 5.13; Mk 9.50)
34“Etukua ampakesti; k'óru enka nóteru etumeska, ¿Nénateru marhuaua áspetarani? 35Echerirhu no marhuauati, ka terentapuntu no marhuakuati, ísterku tsîtakuestia. Ima enkaksï úk'a kurhani, kurhankueksï.”
Селектирано:
Sáni Lúkasï 14: DKPJ
Нагласи
Копирај
Спореди
Сподели
Дали сакаш да ги зачуваш Нагласувањата на сите твои уреди? Пријави се или најави се
Biblia en P´urhépecha, Michoacán, México © Sociedad Bíblica de México, A.C.