Sáni Lúkasï 16
16
K'éri jántspiriri uantantskua
1Jesusi jurhenkorheri jémpechani aiankuasptit'u: “Jarhaspti ma acheti jatsikorheri enka imeri jántspiricheri juramutini ma kámempka; ka nirasptiksï aiankuni eska ima jántspiri jatsikorhekuani nósesi úrakuxapka. 2Jatsikorheri ióarhispti jántspiricheri juramutini ka arhini: ‘¿Ampeski ima ampe enkani chéti ampe aiankunhantani jaka? Aiankuntsïrini nénari ánchekorhexaki, jimpokakini kéntitaakia; nóteruri jucheti jántspiricheri juramutiuakia.’ 3Jántspiricheri juramuti eratsentani uénaspti: ‘¿Néna jámaia enkarini jucheti ánchetpiri ánchekorheta euantaakia? Nóteruni jurhenaska echeri ánchetani, ka k'uratsesïnka intsïmpetkorheni jámani jarhani. 4Míteskia néna enkani jámaaka eskani jatsiaka nérini jiókaa chénjempo jiák'ani enkani ísku pakaraaka nóteru ánchekorheni.’ 5Mántani arhispti ióarhiani imechani enkaksï imeri ánchetpirini kánkuni jápka. Imani enka urheta niárapka kurhamarhespti ‘¿Anti náxaniri kánkuxaki juchari ánchetpirini?’ 6Ka ima arhispti: ‘Iúmu ekuatse k'uísï olibueri tamakua kánkuxaka.’ Jántspiricheri juramuti arhispti: ‘Inte kókuani chéti sïranta; uaxaka ka máteru úntani enka tsimani ekuatse témpeniterkueriuakia.’ 7Tátsekua máteruni kurhamarhespti: ‘Ka t'u, ¿Na xániri kánkuxaki?’ Ima arhispti: ‘Iúmu ekuatse xúnti tríju.’ Imani arhispti: ‘Inte chéti sïranta; máteru úntsï, t'ámu ekuatserik'u.’”
8“Imeri ánchetpiri sési xéspti enka jántspiricheri juramuti sïpak'urha na eratsepka jimpoka sési eratsekuntaspka néna uérakuni. Jimpokaksï parhakpeni anapuecha sánteru xékuntasïnka néna páp'erani máteruechani jinkuni eskaksï ima enkaksï t'íntskuani mítetika.”
9“Ka arhistachexakaksïni eskats'ï parhakpeni anapu jatsikorhekua nósesi antakatani, p'íchpirichani antakorhetarauaka, eska jiák'ani enka jatsikorhekua ampe k'amakurhiaaka, méntku ísï anapu irekuarhuts'ï sési eronhaaka.”
10“Ne enka mintsinharhikueka sáni ampe patsani, ístu mintsinharhikuesti uánekua ampe patsani; ka ima enka no úk'a sántku ampe patsani, uánekua ampe sánteru no úsïnti patsani. 11Ka ekats'ï ixu parhakpeni anapu jatsikorhekua no mintsinharhikueka patsaranhani, ¿Néksïni jiák'utaa ampakiti jatsikorhekuani patsarani? 12Ka ekats'ï no mintsinharhikueka máteruecheri ampe patsani, ¿Néksïni íntskuntaa imani enka chárika?”
13“Nóma jántspiri úsïnti tsimani ánchetpirichani marhuakuaani; jimpoka ma echakuani ikiakuaka ka máteruni sési kámani, o ma echakuani sési pakarakuati ka máteruni no jaiapanhentaati. No úkorhesti Diósïni ka jatsikorhekuani márku marhuakuani.”
14Fariseouecha enkaksï tumina kánhchempka, kurhasptiksï iámu inteni ampe ka Jesusinksï teresmarhuspti. 15Ka Jesusi arhiaspti: “Cháts'ïsï k'uiripuni jinkuni kaxumpiti eratakorhek'a, k'óru Diósï mítesti chári mintsitani; jimpoka Diósï imani no xénhchasïnka enka sánteru k'éri eratanhak'a.”
Juramukua ka Diósïri irechekua
16“Juramukua karakata ka Diósïri uantaricha jíani jamperi marhuasti enka jamperi Juánueka. Jiák'ani uératinitki jimpanhe ampakiti aiankperakua Diósïri irechekueri ampe uantanhantaxati, ka iámentuecha inchantimenhantaxati jima inchakuekanhani.”
17“Sánteru no úkua jukasti eska auanta ka parhakpeni k'amakurhiaka, eska ampema no ísï úkorheni eska juramukuarhu námentu karakata jaka.”
Jesusi jurap'erakueri ampe arhistatspesti
(Mt 19.1-12; Mk 10.1-12)
18“Eka ma acheti jurak'uska témpani ka máteruni tempuntani, ísku jántixati; ka ne enka uarhiti jurak'ukatani tempuntaska imat'u ísku jántixati.”
Jatsikorheri ka Lásaru
19“Acheti jatsikorheri ma jarhaspti, enka ampakiti takusï xukuparhempka ka enka pauanipauani ampakiti t'irekua intsïmpempka. 20Jarhasptit'u no jatsikorheri ma enka Lásaru arhinhempka, enka iámu xúta jukarhekorhepkia ka enka méntkisï jatsikorherio uaxamukuempka. 21Ima ántasïrempti ampe enka jatsikorheri uék'uempka; ka uíchuecha jamperiksï antarherasïrempti iuani kuenamakuni. 22Enka ima no jatsikorheri uarhipkia, ánjelichaksï Abrani jinkuni páspti uaxastani. Jatsikorherit'u uarhispti ka jatsinhantasptia.”
23“Ka enka jatsikorheri nósesi nitamakorheni jápka jima enkaksï uarhiricha niárak'a, eranchespti ka iauani uératini Abranini exeni, ka Lásaruni ma akantani uaxatani jarhani. 24Jimak'ani uinhachakuspti: ‘¡Táte Abrani p'amok'urini! Arhi Lásaruni eska munchuk'urhakua kuakarhutaaka ka eskarini juuaka kuakachatant'a'ni, jimpokani íni chpírirhu kánekua nósesi p'ikuarheraxaka.’ 25K'óru Abrani arhispti: ‘Jucheti uátsï, míantsï eskari t'u intsïnhaskia ampakiti ampe enkari nótki uarhimpka, ka Lásaru enka parhakpeni nósesi jásï ampe p'ika. Iásï ixu inte karhoanhantaxati, ka t'úri jimini nósesi p'ikuarheraxaka. 26Támtu axu urhepani kánekuamentu jauanhesti; ka nónema úsïnti parhikuni jiniani nirani ka nót'u úsïnti jiniani uératini ixueni junhani.’”
27“Ka jatsikorheri arhispti: ‘Táte Abrani kómarhixakakini ménteru eskari sáni Lásaruni jucheti táteo axaaka, 28jima enkaksï iúmu jucheti erachiecha jaka, eska xukauaka ka nóksï imat'u ixu nósesi p'ikuarherakuarhu janoni.’ 29Abrani uantaspti: ‘Imaksï karakatechani jatsikorheastia enkaksï Moisesi ka Diósïri uantaricha karaka: ¡Kurhach'aueksï!’ 30Jimak'ani jatsikorheri arhispti: ‘Nóchka ampe Táte Abrani, xántku ísïksï no úati; k'óru enka nema xarhakuapirinka tsíntatini, imaksï Diósïni antarhentapirinti.’ 31Ka Abrani arhispti: ‘Enkaksï Moisesini ka Diósïri uantarichani no kurhach'ak'a, nóksï kurhankuati náuek'i nema tsíntani.’ ”
Селектирано:
Sáni Lúkasï 16: DKPJ
Нагласи
Копирај
Спореди
Сподели
Дали сакаш да ги зачуваш Нагласувањата на сите твои уреди? Пријави се или најави се
Biblia en P´urhépecha, Michoacán, México © Sociedad Bíblica de México, A.C.