Sáni Lúkasï 13
13
Diósïni jinkuni k'uanhatsentani
1Ístuksï imani jurhiatekuechani niraspti máru Jesusini uantaxekuni, ka aiankusptiksï eska Pilatu Galilea anapuechani uántikuaspka, ka eskaksï imecheri iurhiri, karichi kéts'ïtakatecheri iurhiri jinkuni jeuetaspka.
2Jesusi arhiaspti: “¿Anti cha eratsentasïnki eskaksï Galilea anapuecha xáni k'amanharhintskua jimposï ísï úkorhencha; jimpokaksï jini anapuecha jinkuni ima sánteru k'amanharhintstiska? 3Aiankuxakaksïni eska no ísïska; ka ekats'ï chát'u Diósïni no antarhentaska, chát'uts'ï uarhiaka. 4¿O cha jakak'uxaki eskaksï Jerusaleni ima témpeni iúmu tanimu sánteru k'amanharhint'aspka enka ísï Siloeri k'umanchekua iótati jatach'akuapka? 5Aiankuxakaksïni eska no ísïska ka ekats'ï chát'u Diósïni no antarhentaska, chát'uts'ï uarhiaka.”
Jígusï enka no úempka jukani
6Jesusi íni uantantskua terukutarantskuani aiankuaspti: “Acheti ma uba jukanchaspti ka jígusï ma jima anhaakuspti, ka niraspti erarhutani, ka nóma jukarhukurhaspti. 7Ísï jimpo arhispti imani achetini enka ubecheri kuáripka: ‘Exe, tanimu uéxurhini jurhaskia inteni jígusïni erarhutani, ka nómeni jukarhukurhastia. Ch'apaia; ¿Ampe úni ísku echeri úrani jaua?’ 8Ka kuári arhispti: ‘Tata, íni uéxurhinterku jurak'ia; jurak'uni ji ampantukuni ka terentapu jatsintukuni. 9Nántika ampe ísï jámani úakia jukani; ka eka nómpe, ch'apaakaria.’ ”
Jesusi sábadu jurhiatekua uarhitini ma ampakerantaspti
10Sábadu ma jimpo, Jesusi k'umanchekua tánkorhentskuarhu ma jurhentpeni uénaspti; 11ka jima jarhaspti uarhiti ma enka témpeni iúmu tanimu uéxurhini p'amenchani jápkia. Nósesi jásï espiritu ma juruparhataspti, ka nónena jásï jimpo úsïrempti jurhimpeparhantani. 12Enka Jesusi exepka, ióarhispti ka arhini:
–Nana, chéti p'amenchakuakini jurak'ustia.
13Ka p'áts'ïkuspti, ka uarhiti jimak'u jurhimpeparhantaspti, ka Diósïni uénaspti k'éri ampe arhini. 14Ka k'umanchekua tánkorhentskuerhu juramuti ikiaspti, jimpoka Jesusi sábadu jurhiatekua ampakerantaspka, ka arhip'espti:
–Kuímu jurhia ánchekorhekuesti; imani jurhiatekuechani ju je eskats'ï ampakeranhantaaka, ásï sábadu jurhiatekua ju je.
15Ka Acha arhispti:
–¡Ísku ísï uantari! ¿Anti no cha iámentuecha sábadut'u chári ch'anchakini o úakasïni pásïni itsïmatani? 16Ka ísï jimpo, íni uarhitini enka Abraniri sïrukueka ka enka nóampakiti íni p'amenchakua jimpo témpeni iúmu tanimu uéxurhini jótatini jápka, ¿Anti no uetarhexapi náuek'i sábadueni eska kueratanhapirinka?
17Enka Jesusi ísï uantapka, ima enkaksï ikiakuempka k'uratsenksï pakaraspti; ka máteruecha tsípenhasïrempti exeparini enka Jesusi xáni k'éri ampe úempka.
Mostasa ikarakueri uantantskua
(Mt 13.31-32; Mk 4.30-32)
18Ka ístu Jesusi uantaspti: “¿Ampeni jáxeski Diósïri irechekua ka ampe jinkunichi úpirini terukutant'a'ni? 19Mostaseni jáxesti enka nema ikarakorhek'a, ka enka p'ukutapueni k'ék'a, xáni k'éni enkaksï jamperi kuínicha úk'a jima xerekua úkorheni.”
Xarhiperakueri uantantskua
(Mt 13.33)
20Ka ístu Jesusi uantaspti: “Irechekua Diósïrini ¿Ampe jinkuni terukutasïnki? 21Xarhipitini jáxesti enka uarhiti ma úk'a tanimu ts'éretakua jarina jimpok'u iámu tsïrerini xarhiperani.”
Nani enka no kómukurhaka
(Mt 7.13-14,21-23)
22Xanhari jimpo Jerusaleni nirani jámani, Jesusi iámentu iretecharhu enka nitamempka jurhentpemaspti.
23Ka nema kurhamarhespti:
–Acha, ¿Namoniksï p'ímutanhantaa?
Ka ima arhispti:
24–Jánkorhentsi je jimesï inchani enka no kómukurhaka, jimpokaksïni arhixaka eskaksï uánekua inchakuekaaka, ka nóksï úati. 25Tátsekua enka jima anapu jauaraaka ka míkani, cha enkats'ï uérakua jaka, uámutaakats'ï ka uantaakats'ï: Tata, mítachets'ïni. Ka imaksïni arhiati: No míteska cha nani anapueski. 26Jimak'anits'ï uénaaka cha arhini: T'únkeni jinkunichi t'ireska ka itsïmani ka t'úri juchari iretecharhu jurhentpeska. 27Ka imaksïni arhiati: No míteska cha nani anapueski. ¡Nósesi ampe úricha, kéntikuchets'ïni! 28Jimak'antsï uenhech'aaka ka no sésits'ï p'ikuarheraaka exeparini enka Abrani ka Isaaki ka Jacobu ka iámentu Diósïri uantakua páricha Diósïri irechekuarhu jarhaska, ka eskats'ï cha uérakua pakatanhaska. 29Jimpoka karhamani ka kétsemani ísï uératini junhaaka, tata jurhiata antarakuarhu ka tata jurhiata inchats'ïkukuarhu uératini isï junhaati, ka Diósïri irechekuarhu uaxakanhaati t'irenhani. 30Jiánksï urheteuati máru enkaksï iásï k'amarhunika, ka ima enkaksï iásï urhetika, imaksï k'amarhuni jámaniuaati.
Jesusi Jerusaleni jimpo uerasti
(Mt 23.37-39)
31Jimak'anksï máru fariseouechat'u niáraspti, ka Jesusinksï arhispti:
–Uéakuntsï iretarhu jimpokakini Erodesi uántikukuekaxaka.
32Ka ima arhiaspti:
–Ni je arhini imani tantoch'pirini: Exe, iásï ka pauani nóampakitichani petarhep'eantauaka ka p'amenchatichani ampakerantauaka, ka ísï pauani k'amaraaka. 33K'óru uétarhesïnti eskani xanharaakateruni, pauani ka ísï pauantu, jimpoka nósesiska eska Diósïri uantakua pári ma no Jerusaleni uarhiaka.
34“¡Ákeru t'u Jerusaleni, enkari Diósïri uantakua párichani uántikuak'a, ka enkari Diósïri ánchperata úrichani tsakapkueraak'a! ¡Namoni xanhari uékaski chéti sapichani ísï kúntant'a'ani eska tsíkata pipichu sapirhatichani na óch'akurantaak'a, ka nóri uékaska! 35Exechka je ia, chári ireta jurarkunhaati ka arhixakaksïni eskats'ïni nóteru xéntaaka jiák'ani jamperi enka niáraaka jurhiata enka cha uantaaka: ‘¡K'éri ampe arhikuesti ima enka Acheri jakankurhikua jimpo jurhani jaka!’ ”
Селектирано:
Sáni Lúkasï 13: DKPJ
Нагласи
Копирај
Спореди
Сподели
Дали сакаш да ги зачуваш Нагласувањата на сите твои уреди? Пријави се или најави се
Biblia en P´urhépecha, Michoacán, México © Sociedad Bíblica de México, A.C.