Sáni Lúkasï 12
12
Arhits'ïkperakuecha
(Mt 10.26-27)
1Enka jamperi ísï úkorheni jápka, uánekua tánkorhenhaspti, xáni uáni enka jamperi jatach'akperannhani jápkia. Jesusi uénaspti uantani ka imeri jurhenkorherichani urheta arhiaspti: “Jinkuntku je fariseouecheri xarhiperakua jinkuni, enkaksï ísku ísï arhip'ek'a. 2Jimpoka nómpema no mítekorheaka enka sïpatekuarhku patsanhani jaka, ka imat'u mítekorheati enka jískakata jaka. 3Ísï jimpo, iámentu ampe enkats'ï páp'akantu uantaka, jurhiakua t'íkjantu kurhakorheati; ka imani ampe enkats'ï sïpatekuarhku ka mínhakorhetini uantaka, taiats'ïtakatarhu uératini uinhaparini uantanhantaati.”
Nésï chérhekue
(Mt 10.28-31)
4“Jucheti p'íchpiricha, chánksïnisï arhini jaka eskats'ï no chérheauaka imani enkaksï anhanhatakuani atak'a uántikuni, ka enkaksï tátsekua nóteru ampe ma úk'a úni. 5Jíksïni arhiaka néntsïsï chérhea: Imantsïsï chérheaka enka juramukua jatsika tsípekua euap'entani ka útasï infiernurhu uekap'ap'eni. Imani k'óru chérhe je.”
6“¿Anti nóksï iúmu kuinicha tsimani tumina jimpok'u ataranhantasïnki? Ka Diósï nóma imani jurak'uasïnti. 7Diósïksïni jauiri jamperi sési mántani miucheatixati. Cháts'ï kuínicha jinkuni sánteru jukaparhaska, ísï jimpo ásï che je.”
Jesusiri ampe uantani
(Mt 10.32-33; 12.32; 10.19-20)
8“Arhixakaksïni enka nema uantakorhek'a eska jínteni jinkuniska jima enka janhaaka, acheti Uáp'at'u uantaati eska imani jinkuniska Diósïri ánjelichani japarini; 9ka ne enkarini no míteni uantaska jima enka janhaaka, no jiókorhenhaati Diósïri ánjelichani japarini.”
10“Diósï imani jamperi púakuntaati enka acheti Uáp'ani arhinhchaaka; k'óru imani no púakuntaati enka imeri uantakua jimpo Espiritu Sántuni arhinhchaaka.”
11“Enkaksïni k'ératichani jinkuni ka juramutichani jinkuni k'umanchekua tánkorhentskuarhu p'itak'orheaka, ásï uantanhea je nénats'ï kuáp'ekorhea, ka ampe enkats'ï uantaaka, 12jimpoka enkats'ï uantaranhaakia, Espiritu Sántuksïni arhistacheati ampe enkats'ï uantaaka.”
Jatsikorhekua nósesi páp'esïnti
13Nema teruakuni uératini Jesusini arhispti:
–Jurhentpiri, arhi jucheti erachini eskarini íntskuaaka eska xáni juchetika enkani jucha pakatamenhaka.
14Ka Jesusi arhispti:
–P'íchpiri ¿Nérini jínteni arhik'utpirini o arhunkustpirini péraxaki?
15Kát'u uantaspti:
–Iámentu jásï jatsinchakorhekua jinkuni, jinkunku jáma je; jimpoka tsípekua no jatsikorhekua jimpoeska.
16Ka jimak'u arini uantantskua terukutarantskua aiankuaspti: “Jarhaspti ma acheti enka jatsikorheripka, ka imeri echerichaksï kánekua sési uéraspti. 17Ima jatsikorheri uénaspti eratsentani ‘¿Néna jámaa? No jatsiska nani patsani enkani p'ikuntaaka.’ 18Ka jantiok'u arhikorhespti: ‘Míteskia néna enkani jámaaka. Xerentauaka p'ikuntskata jatakuechani ka sánteru k'érati úantauaka, ka jima patsaaka iámu enkani xáni p'ikuntaaka ka eskani xáni ampe jatsikorheka. 19Ka jantiok'uni arhikorheni jauakia: P'íchpiri, uánekua amperisï jatsikia patsarini enkakini ióni marhuacheaka; mintsikorheia, t'ire, kaui, íni irekuani tsípekorhe.’ 20Ka Diósï arhispti: ‘Inchantime, iásï chúrekuari uarhiaka, ka imani ampe enkari patsani jaka, ¿Nériua?’ 21Ísï úkorhenchasïnti ima enka jatsikorhekua ampe kánerakorhek'a, ka Diósïni japarini nóma ampe jatsikorheni.”
Diósï imeri uáp'echani kuách'akuasïnti
(Mt 6.25-34)
22Tátsekua Jesusi jurhenkorheri jémpechani arhiaspti: “Arhixakaksïni: Ásï uantanhea je akua ampe jimpo enkats'ï nitamakorheraaka, xukuparhakua jimpot'u ásï uantanhea je. 23Tsípekua sánteru jukaparhasti eska t'ireni, ka anhanhatakua takusï jiguni sánteru jukaparhakuesti. 24Exea je k'uákichani: Nóksï tsíri jatsisïnti nóksï p'ikuntasïnti ka p'ikuntskata jatakuaksï no jatsisti, ka náuek'i ísï, Diósï t'ireraasïnti. ¡Cháts'ï k'uákicha jinkuni sánteru jukaparhakueska! 25K'óru nónema úati juchari tsípekuani ióstarani náuek'i sónti, 26ka ekats'ï no úk'a xáni sapichu ampe úni, ¿Antits'ïsï máteru ampe uantanheak'i?”
27“Exe je tsïtsïkichani néna enkaksï tsikik'a, nóksï ánchekorhesïnti, ka nót'uksï sïrikusïnti. Ka náuek'i ísï, arhixakaksïni eska irecha Salomoni jamperi enka xáni sési xukuparhempka no xáni ísï kasïpesïrempka. 28Ka enka Diósï ísï kasïperak'a uitsakuani enka juátarhu jukarini jaka, ka enka sóntku kurhinhantak'a, ¡Náxanksïni chánksïni no sánteru sési xukutaa, enkats'ï arisku jakak'utika! 29Ísï jimpo, ásï mískorheparini jámani ja je t'irekua ka itsïmakua jirinhani. 30Jimpoka íni parhakpeni inte ampe uantanheanhasïnka, ka cháts'ï Táteni ma jatsikorheska enka mítetini jakaia eskats'ï inteni ampe uétarhenchasïnka. 31Cha Diósïri juramukuani enkats'ï míani jauaka, ka inteni ampets'ï intsïnhaaka. 32Jucheti karichicha, ásï che je, cháts'ï namonkueska, ka Táte eratsetixatiia eskaksïni imeri irechekuani íntskuaka. 33Atarantsï je enkats'ï xáni jatsikorheka, ka no jatsikorherichani intsïkorhea je; ampakiti sutupu kánhchaa je enka no jiánkorheaka, jatsikorhekua enka auantarhu nómeni k'amakurhiaka, jima enka sïpak'urha no úk'a inchani o seperi arhani. 34Jimpoka jima, enka chári jatsikorhekua jauaka, chári mintsitat'u jima jauati.”
Jinkuntku jakuesti
35“Cha, jinkuntku ja je ka erak'utarakuechani étskutini, 36ísï eskaksï ima jántspiricha enkaksï jinkuntku jarhak'a imeri juramutini eront'ani enka tempuchakuarhu ma nika sési t'irekorheni, jinkuntkuksï jarhasïnti enka janonkuak'a ka uámutani, ka mítakusïntiksï. 37Tsípeksï ima jántspiricha enka juramuti jémpa no k'uítku exenunkuauaka. Sési jimpoksïni arhixaka eska juramuti uaxastakorheauaka t'ireraani. 38Tsípeksï imecha, enka ima tsínharhitini exenunkuauaka náuek'i teruk'ani chúrekua o erantepakua janonkuani. 39Ka kurhanku je: Eska enka nema mítepirinka ampe jántu inchaakua sïpak'urha, kuáni japirinti ka no jiáretpeni eska inchamenhapirinka. 40Chát'u jinkunku ja je; jimpoka acheti Uáp'a jiák'ani juuaka enka cha sánteru no erokani jauaka.”
Jántspiri mintsinharhikua
(Mt 24.45-51)
41Jimak'ani Pédru kurhamarhespti:
–Acha, ¿Inteni uantantskua terukutarantskuari juchantsïnkusï arhini jaki óri iámentuechanisï arhiani jaki?
42Acha uantaspti: “¿Náki jántspiricheri urhets'ïkuri mintsinharhikueski? Ima enka imeri k'umanchekuarhu anapuechani ánchetpirini jurak'ukuak'a eska t'irerauaka na enka jántu uétarheaka. 43Tsípe ima jántspiri enka ánchetpiri ánchekorheparini exenunkuaska. 44Sési jimpoksïni arhixaka eska ánchetpiri imani jinkuni jéntaaka iámentu ampe enka xáni jatsikorheka. 45Ka eka ima jántspiri, eranhaskaparini eska ánchetpiri ióntaaka junkuani, uénaska nósesi káani máteru uarhiti ka acheti jántspirichani, ka uénani jukari t'ireni ka itsïmani ka kauini, 46ánchetpiri ima jurhiatekua junkuaati enka sánteru no eront'ani jauaka, ka ima jántu enka jántspiri no míteka ka maiampetaraati ka no mintsinharhikueni útamenhantaati.”
47“Ima jántspiri enka míteka ánchetpiri nénasï uék'i, ka no jinkuntku jarhani, ka nót'u kurhantirakuni, kánekua nósesi kánhaati. 48Ka ima jántspiri enka no míteparini támisï ampe úk'a, no xáni nósesi kánhaati. Ne enka kánekua ampe intsïnhak'a ístu kánekua ampe kurhamenhaati; ne enka uánekua ampe patsaranhak'a, sánteru uánekua ampe uinhamarhemenhaati.”
Jesusini jimpo arhukurhinhasïnti
(Mt 10.34-36)
49“Ji parhakpeni úrhutani jurhaska ka ¡Náxani uékapirini eska úrhupirinkia! 50No sési jásï ma uantanheata nitamaaka, ka ¡Násïni p'ikuarherani jaki enka jamperi ísï úkorheaka! 51¿Cha uantasïnki eskani ji íni parhakpeni sési jakuasïni juka juáni? Arhixakaksïni eska no ísïska, ikiatsperakuasïni juáka. 52Jimpoka iásï uénatini, iúmuchani ikiatsperanhaati, tanimuksï arhirperaati máteru tsimani jinkuni, ka tsimanksï máteru tanimu jinkuni arhirperaati. 53Táte, uáp'a tatakani ikiaakuati ka uáp'a tataka, tátjempani ikiakuaati; nánte, uáp'a nanaka jinkuni ikiatsperaati ka uáp'a nanaka, nánte jémpani jinkuni ikiatsperaati; tarhampiri, tarhampa jinkuni ikiatsperaati ka tarhampa, tarhampiri jinkuni ikiatsperaati.”
Ampe enka Diósï xarhataaka
(Mt 16.1-4; Mk 8.11-13)
54Jesusi arhip'esptit'u: “Enkats'ï exek'a eska janikua jurhiata antarakuarhu ísï tánkorhent'ani jarhasïnka, uantasïnkats'ï eska janiaka, ka janisïnti. 55Ka enka kétsemani ísï uératini tarhiani jarhak'a, uantasïnkats'ï eska aparhekorheaka, ka aparhekorhesïnti. 56¡Jukari uantaricha! Enkats'ï sési mítekuka arhini ampe enka auantarhu ka parhakpeni úkorheaka, ¿Néna jimpots'ï no úsïni uantani íni jurhiatekuechani ampe úkorhea?”
Ikiatspirichani jinkuni teruatperantani
(Mt 5.25-26)
57“¿Antits'ïsï no erakukorhent'ak'i ampe enka sésika? 58Enkakini nema p'itak'orhek'a juramukuarhu ka juramuti jinkuni nirani jámantsï márku nirani jarhani, enkari antak'orhek'a, jánkorhentsï je teruatperantani, ásïkini antak'orhe juramuti jinkuni pérani; jimpokakini juramuti p'urhek'utichani intsïnharhitaaka ka imaksïni k'ataperakuarhu incharaati. 59Aiankuxakakini eskari jima pakanheaka, nóri petanhaaka, urhetari iámu ampe maiampentaaka.”
Селектирано:
Sáni Lúkasï 12: DKPJ
Нагласи
Копирај
Спореди
Сподели
Дали сакаш да ги зачуваш Нагласувањата на сите твои уреди? Пријави се или најави се
Biblia en P´urhépecha, Michoacán, México © Sociedad Bíblica de México, A.C.