Yawhaas 15
15
Yexus Yog Tsos Tseed Txib Hmaas
1“Kud yog tsos tseed txib hmaas, has kud Vaid yog tuz kwg tu. 2Niz muas txhua ceg hmaas kwg tsi txi txib txab tiad qhai kud muz laidtaa. Txhua ceg hmaas kwg txi txib niz muas taab kuas hajyaad txi txib ncw. 3Tej luz kwg kud qha mej, ted yog kud ntxuab kuas mej hub ntag. 4Mej ca ni txuad tu qhais kud has kud yiad txuad tu qhais mej. Tuz ceg hmaas kwg tsi txuad tu qhais txuj hmaas yeej txi tsi tawz txib. Is yaad ni qhai, yog mej tsi txuad tu qhais kud, mej yeej txi tsi tawz txib.
5“Kud yog tsos hmaas, mej yog cob ceg. Tuz kwg txuad tu qhais kud has kud txuad tu qhais niz, tuz qhai yiad txi txib ncw; yog mej tsi txuad tu qhais kud, mej yeej ua tsi taw is yaad daastsi ni. 6Tuz kwg tsi txuad tu qhais kud, tuz qhai zoo is yaad ni tuz ceg hmaas kwg lag muas txab laidtaa; thaws qhuab liad, lag yiad muas sua muz laid hliab kuas kus hnyas taaz hubtsig. 7Yog mej txuad tu qhais kud has mej pus kud tej luz ca tu nruas sas liad, mej xaab yuab yaad twg, mej ca ni thob has mej yiad taw yaad qhai. 8Yog mej txi txib ncw, kud Vaid yiad taw ntsejmuag, has yog mej ua ni qhai, mej yiad taw ua kud cob thwjtid. 9Kud hlus mej is yaad ni kud Vaid hlus kud; mej yiadtsud muaj lus sas hlus is yaad ni kud. 10Yog mej ua rias ni kud tej lug, mej yiad muaj lus sas hlus is yaad ni kud ua rias ni kud Vaid tej luz has kud muaj lus sas hlus is yaad ni niz.
11“Kud has tej na tu mej kuas mej zoo sas is yaad ni kud zoo sas, mej yiad zoo sas kiag nkaws ni. 12Kud lu luz saadfwd yog ni na: mej is tug yiadtsud hlus is tug, is yaad ni kud hlus mej. 13Tuz kwg muaj keb hlus luj tshaaj pliaz, yog tuz kwg zoo muas niz txujsa tuag theej niz cob phoojywz. 14Yog mej ua rias ni kud kuas mej ua, mej ha yog kud cob phoojywz. 15Nizna kud tsi hu mej ua tusqhe liad, tu qhob tuz tusqhe tsi paws xyob niz tuz tswb ua daastsi. Tadsis kud hu mej ua phoojywz, tu qhob kud ted qha txhua yaad kwg kud Vaid qha tu kud tu mej liad. 16Tsi yog mej xaib kud, tadsis yog kud xaib mej has tsaa mej kuas muz txi cob txib kwg nyos muz is txhis. Yog mej tuab kud lus npe thob yaad twg, leej Vaid yiad pus yaad qhai tu mej. 17Tej luz kwg kud saadfwd tu mej yog ni na: mej is tug yiadtsud hlus is tug.
Neeg Ntajtes Yiad Heed Mej
18“Yog neeg ntajtes heed mej, mej yiadtsud ncu ntsoob has tas, cud ted xus heed kud ua ntej liad. 19Yog mej yog neeg ntajtes tuz, ces neeg ntajtes yeej yuab hlus mej kwg yog niz tuz. Tadsis vid mej tsi yog neeg ntajtes tuz, tu qhob kud ted xaib mej tiad hub neeg ntajtes luz, yog ni qhai neeg ntajtes yuab heed mej. 20Mej yiadtsud ncu ntsoob tej luz kwg kud qha tu mej has tas, ‘Tuz tusqhe yeej tsi muaj fwjchid luj kua niz tuz tswb.’ Yog cud tsidtxod kud, cud yiad tsidtxod mej has; yog cud ua rias ni kud tej luz qha, cud yiad ua rias ni mej tej luz qha has. 21Tadsis vid kud lus npe, Cud yiad ua tej na tu mej, tu qhob cud tsi paws tuz kwg txis kud luz. 22Yog kud tsi taw luz qha cud, cud yeej yiad tsi muaj txid; tadsis nizna cud has tsi taw has tas cud tsi muaj txid. 23Tuz kwg heed kud, tuz qhai yeej heed kud Vaid has. 24Yog kud tsi taw luz ua tej hujlwd kwg tsi taw muaj neeg ua kua tu cud pud, ces cud yeej tsi muaj txid; tadsis cud ted pud tej kwg kud ua liad, cud has heed kud has kud Vaid. 25Yeej yiad muaj ni na has rias ni tej luz kwg saw tseg tu hub cud txuj kebcai has tas, ‘Kud ted tsi taw ua txhud los cud ca ni heed kud.’
26“Tuz Paas yog Vaaj Ntsujplig, niz luz qha Vaajtswb zaaj kwg yog qhob tsees has yog leej Vaid txis luz. Kud yiad kuas leej Vaid txis niz luz, has niz yiad qha kud zaaj tu mej. 27Has mej yiad qha kud zaaj, tu qhob mej yeej nrug kud nyos thaws chibthiaj luz liad.
Селектирано:
Yawhaas 15: CQD2024
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2024 Bible Society Vietnam. All rights reserved.