Yawhaas 14
14
Yexus Yog Txuj keb Muz Cuag Leej Vaid
1Yexus has tu niz cob thwjtid has tas, “Mej tsi xod txhiaj has tsi xod nyuaj sas, mej ca ni ntseeg#14.1 Mej ca ni ntseeg; lossis Mej ca ni ntseeg. Vaajtswb has ntseeg kud. 2Hub kud Vaid lus tseb muaj ntaw chaab, has kud taastod yiad muz tu chia tu mej. Yog tsi muaj ni qhai, kud yeej yiad tsi qha ni na tu mej.#14.2 Hub kud Vaid … tsi qha ni na tu mej; lossis hub kud Vaid lus tseb muaj ntaw chaab; yog tsi muaj ni qhai, kud yeej yiad tsi qha tu mej has tas kud muz tu chia tu mej? 3Thaws kwg kud tu taw chia tu mej liad, kud yiad rob qaas luz has toz mej muz nrug kud nyos, kud nyos qhob twg mej yeej yiad nrug kud nyos qhob qhai. 4Qhob chia kwg kud yiad muz, mej ted paws keb muz liad.”
5Thaumas has tu Yexus has tas, “Tuz Tswb, pes tsi paws xyob koj yiad muz qhob twg; yog ni qhai, pes yiad ua nyaab paws keb muz?”
6Yexus tes Thaumas has tas, “Kud yog txuj keb, yog qhob tsees, has yog txujsa; tsi muaj tuz twg muz cuag taw leej Vaid, tsuas yog muz qhai kud muz nyaz ha taw.” 7Yexus has tu cud has tas, “Nizna mej ted paws kud liad, mej yeej yiad paws#14.7 Nizna mej ted paws kud liad, mej yeej yiad paws; tej phaw qus has tas Yog mej ted paws kud … mej yeej paws. kud Vaid has, txij na muz mej ted paws niz has pud niz liad.”
8Filis has tu Yexus has tas, “Tuz Tswb, thob koj qha leej Vaid tu pes pud, kuas pes txaws sas.”
9Yexus tes has tas, “Filis, kud ted nrug mej nyos nteb luz liad, ua nyaab koj tseed tsi taw paws kud has? Tuz kwg pud kud, tuz qhai ted pud leej Vaid liad. Ua nyaab koj tseed yiad has tas, ‘Thob koj qha leej Vaid tu pes pud has’? 10Filis, koj tsi ntseeg has tas, kud nyos hub Leej Vaid has Leej Vaid nyos hub kud los?” Yexus has tu niz cob thwjtid has tas, tej luz kwg kud qha tu mej na, “Tsi yog kud tej luz, tadsis yog Leej Vaid tuz kwg nyos hub kud ua niz tez hujlwd nyaz. 11Mej ca ni ntseeg tej luz kwg kud has tas, kud nyos hub Leej Vaid has leej Vaid nyos hub kud. Txiad yog mej tsi ntseeg ni kud has los mej yiadtsud ntseeg luz qhai tej hujlwd kwg kud ua. 12Kud qha tsees tu mej has tas, tuz kwg ntseeg kud yiad ua tej hujlwd kwg kud ua, tsi yog ni qhai nyaz, niz tseed yiad ua taw ntaw kua tej kwg kud ua, tu qhob kud muz cuag leej Vaid liad. 13Has yog mej tuab kud lus npe thob is yaad daastsi kud yiad muas yaad qhai tu mej, tej kwg leej Tus ua qhai yiad ua tu leej Vaid taw ntsejmuag. 14Yog mej tuab kud#14.14 Tej phaw qus tsi muaj lu luz kud. lus npe thob kuas kud ua is yaad daastsi, kud yiad ua yaad qhai tu mej.
Txis Vaaj Ntsujplig tuz Diashub Luz
15“Yog mej hlus kud, mej yeej yiad ua rias ni kud tej luz saadfwd. 16Kud yiad thob leej Vaid, has niz yiad txis kua is tug paas luz, tuz qhai yiad nrug mej nyos muz is txhis. 17Niz yog Vaaj Ntsujplig, niz yiad qha Vaajtswb zaaj kwg yog qhob tsees tu mej. Neeg ntajtes tsi txais yuab niz, tu qhob cud tsi pud niz lossis tsi paws niz. Tadsis mej paws niz, tu qhob niz nrug mej nyos has niz yiad nyos#14.17 niz yiad nyos; tej phaw qus has tas yiad nyos. hub mej lus sas.
18“Kud yiad tsi tso mej ua ntsuag is zag ni; kud yiad rob qaas luz cuag mej. 19Tshuab tsi nteb neeg ntajtes yiad tsi pud kud liad, tadsis mej yiad pud kud; mej yiad muaj txujsa nyos, tu qhob kud muaj txujsa nyos. 20Thaws txug hnoos qhai, mej yiad paws has tas kud nyos hub Leej Vaid has mej nyos hub kud, is yaad ni kud nyos hub mej.
21“Tuz kwg leez yuab kud tej luz qha has ua rias ni tej luz qhai, tuz qhai yog tuz kwg hlus kud. Tuz kwg hlus kud, kud Vaid yiad hlus tuz qhai; kud yiad hlus tuz qhai has qha kud tu niz paws.”
22Yudas (kwg tsi yog Yudas Ixakali-us) has tas, “Tuz Tswb, ua nyaab koj yiad qha koj tu pes paws nyaz, koj rob tsi qha koj tu neeg ntajtes paws?”
23Yexus tes Yudas has tas, “Tuz kwg hlus kud yeej ua rias ni kud tej luz qha. Kud Vaid yiad hlus tuz qhai, kud Vaid has kud yiad luz cuag niz has nrug niz nyos. 24Tuz kwg tsi hlus kud yeej tsi ua rias ni kud tej luz qha. Has tej luz kwg mej hnob kud qha qhai tsi yog kud tej luz, tadsis yog leej Vaid tuz kwg txis kud luz tej luz.
25“Nizna kud tseed nrug mej nyos, kud ha qha tej na tu mej. 26Tuz paas kwg yog Vaaj Ntsujplig tuz Diashub kwg leej Vaid yiad txis luz qhais kud lus npe luz, niz yiad qha txhua yaad tu mej has paas kuas mej ncu txhua yaad kwg kud taw qha tu mej liad.
27“Kud muas kud txuj keb kaajsas tu mej; txuj keb kaajsas kwg kud muas pus tu mej, kud tsi muas tu mej ni neeg ntajtes muas. Mej tsi xod txhiaj, tsi xod nyuaj sas has tsi xod ntshai. 28Mej ted hnob kud has tu mej has tas, ‘Kud yiad muz, tadsis kud yiad rob qaas luz cuag mej.’ Yog mej hlus kud, mej yeej yiad zoo sas tu qhob kwg kud muz cuag leej Vaid; tu qhob niz muaj fwjchid luj kua kud. 29Nizna kud qha tej na tu mej ua ntej kwg tej na tshwdsid, thaws muaj liad, mej ha yiad ntseeg kud. 30Kud yiad tsi taw nrug mej thaad nteb liad, tu qhob tuz kwg kaab lus ntajtes taastod luz liad. Niz tsi muaj fwjchid kaab kud, 31tadsis kud ua is puas tsaab yaad rias ni leej Vaid kuas kud ua, neeg ntajtes ha paws has tas kud hlus leej Vaid.
“Ca ni siab pes muz.
Селектирано:
Yawhaas 14: CQD2024
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2024 Bible Society Vietnam. All rights reserved.