Yawhaas 16
16
1“Kud qha tej na tu mej, kuas mej ha tsi tso keb ntseeg tseg. 2Cud yiad liab mej tiad hub tej tseb saaslaaj muz, has ted yiad txug lus sijhiad kwg cud coj mej muz tua laidtaa, qhob kwg cud ua ni qhai, cud xaab has tas yog cud ua Vaajtswb tez hujlwd. 3Cud yiad ua ni na tu mej, tu qhob cud tsi paws leej Vaid has tsi paws kud. 4Kud xus has ni na qha tu mej, kuas thaws txug lus sijhiad kwg cud tsidtxod mej, mej ha ni yiad ncu txug tej luz kwg kud ted qha tu mej liad.
Vaaj Ntsujplig tuz Diashub Tez Hujlwd
“Thaws chibthiaj kud tsi taw qha tej na tu mej, tu qhob kud tseed nrug mej nyos. 5Tadsis nizna, kud yiad muz cuag tuz kwg txis kud luz, txiad ni qhai los mej ted tsi muaj is tug noog has tas kud yiad muz qhob twg. 6Nizna kud qha tej na tu mej, mej has nyuaj sas heeb ni. 7Tadsis kud qha tsees tu mej has tas, qhob kwg kud ncaid mej muz yiad zoo kua. Yog kud tsi muz, Tuz Paas yiad tsi luz cuag mej. Tadsis yog kud muz liad, kud yiad txis niz luz nrug mej nyos. 8Thaws niz luz liad, niz yiad tshoob tu neeg ntajtes kuas paws txug keb txhud, keb ncaajnceeg, has Vaajtswb txuj keb txabtxid: 9qhob kwg cud muaj keb txhud, vid cud tsi ntseeg kud; 10qhob kwg muaj keb ncaajnceeg, vid kud yiad muz cuag leej Vaid, has mej yiad tsi pud kud liad; 11qhob kwg muaj keb txabtxid, vid tuz kwg kaab lus ntajtes ted rawg txabtxid liad.
12“Tseed tshuab ntaw zaaj kwg kud xaab qha tu mej, tadsis ntshai mej yiad ris tsi tawz. 13Thaws Vaaj Ntsujplig tuz kwg qha qhob tsees luz liad, niz yiad qha qhob tsees tu mej; niz yiad tsi has rias ni niz xaab, tadsis niz tsuas has tej kwg niz taw hnob, has niz yiad qha tej kwg yiad muaj luz yaab todntej tu mej. 14Niz yiad ua tu kud taw ntsejmuag, tu qhob niz yiad muas kud tej luz coj luz qha tu mej. 15Tej kwg leej Vaid muaj puabtsig yog kud tuz has. Ted yog vid ni na, Vaaj Ntsujplig ha coj tej kwg kud qha tu niz liad luz qha tu mej.
Keb Nyuaj Sas Yiad Hlub Ua Keb Zoo Sas
16“Tsi nteb na, mej yiad tsi pud kud liad, has tod qaas qhai tsi nteb, mej yiad rob pud kud.”
17Ces Yexus cob thwjtid qeetuz sis thaad has tas, “Niz has tu pes tas, ‘Tsi nteb na, mej yiad tsi pud kud liad, has tod qaas qhai tsi nteb, mej yiad rob pud kud,’ niz has ni qhai, yog niz has nyaab? Has niz has tas, ‘Tu qhob kud yiad muz cuag leej Vaid.’ 18Qhob kwg niz has tas, ‘Tsi nteb na, yog has nyaab?’ Pes tsi paws xyob yog niz has daastsi.”
19Yexus paws tej kwg cud xaab noog niz, yog ni qhai, Yexus txiad has tu cud tas, “Puas yog mej sis noog txug qhob kwg kud has tas, ‘Tsi nteb na, mej yiad tsi pud kud liad, has tod qaas qhai tsi nteb, mej yiad rob pud Kud’? 20Kud qha tsees tu mej has tas, mej yiad quaj has ntxhub sas, tadsis neeg ntajtes yiad zoo sas heeb ni; mej yiad rawg keb nyuaj sas, tadsis mej tej keb nyuaj sas qhai yiad hlub ua keb zoo sas. 21Tuz puj kwg muaj minyuas hub plaas, thaws yiad txug caij yug niz txhiaj heeb ni. Tadsis thaws niz yug taw tuz minyuas, niz tsi ncu qaas qhob kwg niz mos plaas liad, niz zoo sas heeb, tu qhob niz yug taw is tug minyuas luz tu hub ntajtes na. 22Nizna mej muaj keb nyuaj sas is yaad ni qhai; tadsis kud yiad rob luz cuag mej kua, mas mej yiad zoo sas heeb ni. Txuj keb zoo sas qhai tsi muaj tuz twg txees taw qhai mej muz ni.
23“Thaws txug hnoos qhai, mej yiad tsi noog kud is lu ni liad. Kud qha tsees tu mej has tas, yog mej tuab kud lus npe thob is yaad daastsi qhai leej Vaid,#16.23 mej tuab kud lus npe thob is yaad daastsi qhai leej Vaid; tej phaw qus has tas Yog mej thob daastsi qhais kud Vaid ces kud Vaid yeej yiad muas tu mej qhais kud lus npe. niz yeej yiad pus yaad qhai tu mej. 24Mej istxwd tsi tuab kud lus npe thob is yaad daastsi luz txug nizna. Mej ca ni thob mej has yiad taw, thaws mej taw liad, mej yiad zoo sas heeb ni.
Yeej Lus Ntajtes Liad
25“Tej kwg kud has tu mej na, kud ua luz pibtxwb has nyaz. Tadsis thaws txug lus sijhiad qhai, kud yiad tsi ua luz pibtxwb has tu mej liad, kud yiad qha txug leej Vaid tsees tsees tu mej. 26Thaws txug hnoos qhai, mej yiad tuab kud lus npe thob leej Vaid; kud tsi taw has tas kud yiad thob leej Vaid tu mej, 27Vid leej Vaid yeej hlus mej, tu qhob mej hlus kud has ntseeg has tas kud yog tuz kwg Vaajtswb txis luz. 28Yeej yog leej Vaid txis kud luz hub ntajtes na, nizna kud taastod yiad tiad hub lus ntajtes na rob muz cuag leej Vaid.”
29Ces Yexus cob thwjtid has tu Yexus has tas, “Zag na koj qha tsees tu pes tag, koj tsi ua luz pibtxwb qha tu pes liad. 30Nizna pes paws has tas koj paws is puas tsaab yaad hubtsig, tsi taaz is tug twg yiad noog koj liad; tej na ua tu pes ntseeg has tas, koj yog tuz kwg Vaajtswb txis luz tag.”
31Yexus tes cud has tas, “Nizna mej ntseeg liad tag los? 32Ted yiad txug lus sijhiad, nizna ted txug lus sijhiad qhai liad, mej nyaz yiad tsib nyaz muz tseb, has mej yiad tso kud tseg. Txiad ni qhai los tsi yog kud tuas tuz nyos nyaz, tadsis leej Vaid nrug kud nyos has. 33Kud qha tej na tu mej, kuas mej cob kwg txuad tu qhais kud muaj keb kaajsas lug. Neeg ntajtes yiad tsidtxod mej. Tadsis mej yiadtsud ua sas tiab; tu qhob kud ted kobyeej lus ntajtes na liad.”
Селектирано:
Yawhaas 16: CQD2024
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2024 Bible Society Vietnam. All rights reserved.