Yawhaas 13
13
Yexus Ntxuab Niz Cob Thwjtid Kuatia
1Thaws yiad txug hnoos ua Kebcai Hlaa Dhaw, Yexus paws has tas tes txug lus sijhiad kwg niz yiad tiad hub lus ntajtes na rob muz cuag leej Vaid liad. Yexus yeej istxwd hlus niz cob neeg kwg nyos hub ntajtes na, has niz yiad hlus cud muz txug hnoos kiag ni.
2Thaws Yexus has niz cob thwjtid taastod noj hmo, Daag Ntxwgnyoog tes xus tshoob Ximoos Ixakali-us leej tus Yudas lus sas liad, kuas niz ntxeeb sas tu Yexus.#13.2 Daag Ntxwgnyoog … Ximoos Ixakali-us; lossis Daag Ntxwgnyoog ted paws has tas Ximoos Ixakali-us leej tus Yudas ha yiad ntxeeb sas taw tu Yexus nyaz. 3Yexus paws has tas leej Vaid ted muas is puas tsaab yaad tso tu niz kaab hubtsig liad; niz paws has tas Vaajtswb txis niz luz has niz yiad rob muz cuag Vaajtswb. 4Yog ni qhai, Yexus txiad siab qhai rooj mo muz hle niz lus tsho nteb, has muas is daid dluas luz sa qhai dluab. 5Ces niz muas dej laws tu hub lus pheed has coj luz ntxuab cob thwjtid kuatia has muas daid dluas kwg niz sa qhai dluab so cud kuatia. 6Thaws Yexus ntxuab luz txug qhais Ximoos Petus, Ximoos Petus txiad has tu Yexus has tas, “Tuz Tswb, koj yiad ntxuab kud kuatia has los?”
7Yexus tes has tas, “Taadsij na koj tseed tsi taw totaws qhob kwg kud ua na, tadsis lwd hnoos koj yiad totaws.”
8Petus has tas, “Kud yeej tsi pus koj ntxuab kud kuatia is zag ni!”
Yexus tes has tas, “Yog kud tsi ntxuab koj kuatia, koj yiad tsi taw ua kud tuz thwjtid liad.”
9Ximoos Petus tes has tas, “Tuz Tswb, yog ni qhai thob tsi xod ntxuab kud kuatia nyaz, tadsis ntxuab kud tez has tawshaw hubtsig.”
10Yexus has tas, “Tuz kwg dlaa dej, niz lus ceb yeej hub liad, tsi taaz yiad rob ntxuab kua, tsuas ntxuab niz kuatia liad nyaz.#13.10 Tej phaw qus tsi muaj qhob kwg has tas, tsuas yog ntxuab niz kuatia liad nyaz. Mej puabtsig hub liad, tadsis tsi yog tuadtxhij hubtsig.” 11(Yexus paws has tas tuz twg yog tuz kwg yiad ntxeeb sas tu niz; yog ni qhai niz txiad has tas, “Mej tuadtxhij puabtsig hub liad, tsuas yog tshuab is tug nyaz ha tsi hub.”)
12Tod qaas kwg Yexus ntxuab cud kuatia taaz liad, niz rob muas niz lus tsho nteb luz hnaab, has rob luz nyos niz lus chia qhai rooj mo. Yexus noog cob thwjtid has tas, “Qhob kwg kud ua tu mej na, mej puas totaws? 13Mej hu kud ua Xisfws has tuz Tswb, mej hu ni qhai yog liad, tu qhob kud yeej yog tag. 14Kud yog mej tuz Tswb has yog mej tuz Xisfws, kud ted ntxuab mej kuatia liad, yog ni qhai, mej is tug yiadtsud ntxuab is tug kuatia. 15Kud ua qawb ni na qha tu mej, kuas mej xyud ua rias ni kud ua tu mej liad. 16Kud qha tsees tu mej has tas, tuz qheb yeej tsi muaj fwjchid luj kua niz tuz tswb, has tuz tusqhe yeej tsi muaj fwjchid luj kua tuz kwg txis niz muz. 17Thaws mej paws tej na liad, yog mej ua rias ni qhai, mej yiad taw keb kaajsas!
18“Kud tsi yog has txug mej tuadtxhij; kud yeej paws cob kwg kud xaib ca liad. Tadsis yiadtsud muaj rias ni Vaajtswb txujlug kwg has tas, ‘Tuz kwg kood nrug kud noj is taiz mo yiad ntxeeb sas tu kud.’ 19Kud xus qha tu mej ua ntej kwg muaj tej na, kuas thaws muaj tej na tshwd tuaj, mej has ntseeg has tas, ‘Kud Yog Tuz Kwg kud Yog.’ 20Kud qha tsees tu mej has tas, tuz kwg leez yuab tuz kwg kud txis muz, tuz qhai leez yuab kud; has tuz kwg leez yuab kud, tuz qhai yeej leez yuab tuz kwg txis kud luz.”
Yudas Ntxeeb Sas tu Yexus
21Tod qaas kwg Yexus has ni qhai taaz, niz nyuaj sas heeb has niz has tas, “Kud qha tsees tu mej has tas, mej cob ko muaj is tug yiad ntxeeb sas tu kud.”
22Cob thwjtid is tug txiad nuad is tug, cud tsi paws has tas tuz kwg Yexus has qhai yog tuz twg. 23Yexus cob thwjtid tuz kwg Yexus hlus heeb, niz nyos npuas Yexus. 24Ximoos Petus txiad ua laaj muas tu tuz thwjtid qhai has has tas, “Koj noog Yexus nuad, tuz kwg niz has qhai yog tuz twg?”
25Ces tuz thwjtid qhai tig muz noog Yexus has tas, “Tuz Tswb, tuz qhai yog tuz twg?”
26Yexus tes has tas, “Kud muas ncuab ntsw ceb tu tuz twg noj; ces yog tuz qhai ntag.” Yog ni qhai, Yexus txiad muas ncuab ntsw ceb tu Ximoos Ixakali-us leej tus Yudas noj. 27Thaws Yudas txais nkaws qhob ncuab qhai, Xataas txiad nkaas tu hub Yudas. Yexus has tu Yudas has tas, “Koj yiad ua daastsi, koj ca ni ua kizkag!” 28Cob thwjtid kwg nyos qhais rooj mo, tsi muaj is tug totaws has tas, vid nyaab Yexus has ni qhai tu Yudas. 29Yudas yog tuz ceeb lus hnaas nyaj, cob thwjtid qeetuz txiad xaab has tas Yexus txis Yudas muz yuab tej yaad luz tu cud sib ua kebcai lossis Yexus kuas Yudas muas isntsis nyaj muz pus tu cob neeg pluag.
30Yudas txais nkaws qhob ncuab qhai noj, taadsij qhai Yudas txiad tiad pliaz muz liad. Thaws qhai ted tsaws ntuj liad.
Txuj Kebcai Tshas
31Tod qaas kwg Yudas tiad muz liad, Yexus has tas, “Nizna ted txug lus sijhiad kwg Neeg Leej Tus taw koos meej liad; nizna niz yiad ua tu Vaajtswb taw koos meej. 32Yog Neeg Leej Tus ua tu Vaajtswb taw koos meej liad, Vaajtswb yiad ua tu Neeg Leej Tus taw koos meej is yaad nkaws has, Vaajtswb yiad ua ni qhai taadsij na ntag. 33Kud cob minyuas, kud yiad nrug mej nyos tsi nteb liad. Mej yiad nrhab kud; tadsis nizna kud qha tu mej is yaad ni kud ted qha tu cob Yudais tej nudtswb liad has tas, ‘Qhob chia kwg kud yiad muz qhai, mej muz tsi taw.’ 34Nizna kud muas is txuj kebcai tshas tu mej: mej is tug yiadtsud hlus is tug. Mej is tug yiadtsud hlus is tug is yaad ni kud hlus mej. 35Yog mej is tug hlus is tug, tuadtxhij has paws has tas mej yog kud cob thwjtid.”
Yexus Qha Has Tas Petus Yiad tsi Leez Paws Yexus
36Ximoos Petus noog Yexus has tas, “Tuz Tswb, koj yiad muz qhob twg?”
Yexus tes has tas, “Qhob chia kwg kud yiad muz qhai, nizna koj nrug kud muz tsi taw, tadsis lwd hnoos koj maad ni rias kud qaas luz.”
37Petus noog has tas, “Tuz Tswb, ua nyaab kud nrug koj muz tsi taw? Kud yeej txaws sas tuag theej koj!”
38Yexus tes has tas, “Koj yeej txaws muas koj txujsa tuag theej kud tag los? Kud qha tsees tu koj has tas, thaws qas tsi taw qua koj yiad has pes zag has tas koj tsi paws kud.”
Селектирано:
Yawhaas 13: CQD2024
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2024 Bible Society Vietnam. All rights reserved.