Yawhaas 12
12
Malis Muas Roj Tsw Qaas Laws tu Yexus Kuatia
1Tshuab raws hnoos maad txug lus caij ua Kebcai Hlaa Dhaw, Yexus txiad muz tu hub lus zoz Npethanis, Laxalus tuz kwg Yexus tsaa siab hub qhob tuag rob qaas luz nyos hub lus zoz qhai. 2Cud ua is pluag mo tu Yexus noj, Mathas ua tuz zuz zaws mo, Laxalus yog is tug qhai cob neeg kwg nrug Yexus nyos ua ke qhai rooj mo has. 3Ces Malis txiad muas taw is fwj roj tsw qaas kig heeb kwg yog muas tseed roj naludas ua luz laws tu Yexus os txhais kuatia, has muas niz cob plawshaw so. Cob roj qhai tsw thoos pliaz hub tseb. 4Tadsis Yexus is tug thwjtid hu ua Yudas Ixakali-us, tuz kwg yiad ntxeeb sas tu Yexus txiad has tas, 5“Ua nyaab tsi muas fwj roj tsw qaas na coj muz muas pes puas lus nyaj,#12.5 Lus nyaj: Nuad 6.7. has muas cob nyaj qhai coj muz pus tu cob neeg pluag?” 6Yudas has ni qhai, tsi yog vid niz hlus cob neeg pluag, tadsis vid niz yog tusnyas. Niz yog tuz ceeb lus hnaas nyaj has niz pheej qee coj muz sib.
7Tadsis Yexus has tas, “Ca niz ua niz! Niz npaaj tej na tseg tu hnoos kwg loz kud. 8Yiad muaj cob neeg pluag nrug mej nyos muz ni, tadsis kud yiad tsi nrug mej nyos muz ni.”
Cob Yudais Tuabhub Yiad Tua Laxalus Laitaad
9Cob Yudais muaj ntaw tuz hnob has tas Yexus tuaj nyos hub lus zoz Npethanis, yog ni qhai cud txiad tuaj tu hub has, tsi yog cud xaab pud Yexus nyaz, tadsis cud xaab pud Laxalus tuz kwg Yexus tsaa siab hub qhob tuag rob qaas luz. 10Vid ni qhai, cob thiaj qhai cob pobthiaj txiad tuabhub yiad muas Laxalus tua laidtaa has, 11vid has tas qhob kwg Yexus tsaa Laxalus siab qhai, ua tu cob Yudais coos tuz ntseeg Yexus has tso cob pobthiaj tseg liad.
Yexus Muz tu hub Lus Nroog Yeluxalees
12Hnoos tod qaas cob neeg coos coos kwg tuaj ua Kebcai Hlaa Dhaw hnob has tas Yexus taastod tuaj tu hub lus nroog Yeluxalees. 13Yog ni qhai, cud txiad muz txab tej nplooj tooblaaj coj muz toz Yexus, has cud has nrob nrob has tas, “Ca ni qhuas Vaajtswb! Thob Vaajtswb food kooshmoob tu tuz kwg Vaajtswb txis luz! Thob Vaajtswb food kooshmoob tu cob Yixalayees tuz Vaajntxwb!”
14Yexus pud is tug neez luab has niz caij tuz neez luab qhai tuaj, rias ni Vaajtswb txujlug taw saw tseg liad has tas,
15“Lus nroog Xi-oos, koj tsi xod ntshai.
Koj nuad, koj tuz Vaajntxwb taastod
caij is tug minyuas neez luab luz cuag koj.”
16Thaws qhai Yexus cob thwjtid tsi totaws ni; tadsis thaws Vaajtswb tsaa Yexus siab hub qhob tuag rob qaas luz taw koos meej liad, cob thwjtid ncu dheeb txug Vaajtswb txujlug kwg has txug Yexus has tej kwg neeg taw ua tu niz liad.
17Cob neeg kwg nrug Yexus ua ke thaws Yexus tsaa Laxalus siab hub qhob tuag has hu Laxalus tiad hub qhob ntxaa luz, cud ted muz ua tidkhiab txug tej qhai tu tuadtxhij noog liad. 18Yog ni qhai, txiad muaj neeg coos coos tuaj toz Yexus, tu qhob cud hnob has tas Yexus ua taw tej txujci tseedcees. 19Ces cob Falixais txiad sis thaad zus ziaz has tas, “Mej nuad, pes ua tsi taw daastsi ni liad! Mej nuad, taaz tes taaz chia puabtsig rias niz liad.”
Cob Neeg Kilis Qeetuz Xaab Ntsis Yexus
20Thaws lus sijhiad qhai, cob neeg kwg tuaj pehiad ncaaj tu lus caij kwg ua kebcai hub lus nroog Yeluxalees, muaj qeetuz yog cob neeg Kilis. 21Cud muz cuag Filis tuz kwg nyos hub lus zoz Npexaidas pes lus xeeb Kalilais tuaj has has tas, “Tuz tswb, pes xaab ntsis Yexus.”
22Filis muz has tu Aadales, ces ostug txiad muz has tu Yexus. 23Yexus tes has tas: “Nizna ted txug lus sijhiad kwg Neeg Leej Tus yiad taw txais koos meej liad. 24Kud qha tsees tu mej has tas: Yog tsi muas lus noos nplej faws tu hub aab kuas lwj, ces lus noos qhai, niz yiad nyos niz tuaslus nyaz. Yog lus noos nplej qhai lwj ha yiad tuaj kawz has txi taw ntaw lus. 25Tuz kwg hlus niz txujsa, tuz qhai yiad tsi taw txujsa; tuz kwg ntxus niz txujsa thaws niz tseed ua neej nyos hub lus ntajtes na, tuz qhai yiad taw txujsa is txhis. 26Tuz kwg xaab ua kud tuz tusqhe, tuz qhai yiadtsud nrug kud muz, has kud nyos qhob twg, kud tuz tusqhe yiad nrug kud nyos qhob qhai. Kud Vaid yiad qhuas tuz kwg ua kud tuz tusqhe.
Yexus Has Txug Niz Txuj keb Tuag
27“Nizna kud nyuaj sas heeb ni, kud yiad has nyaab ha zoo? Kud yiad has tas, ‘Vaid, thob tsi xod ca lus sijhiad na luz rawg kud.’ Tadsis tsi xod ua ni qhai, qhob kwg kud luz ted yog luz kuas rawg txuj keb txodnyed kwg yiad luz qhai ntag. 28Vaid, thob kuas koj lus npe taw koos meej!”
Ces muaj is lus suas has saw ntuj tuaj has tas, “Kud ted ua tu kud lus npe taw koos meej liad, has kud yiad rob ua kua.”
29Cob neeg coos coos kwg siab qhai hnob lus suas qhai, muaj qeetuz has tas yog xus nroo, muaj qeetuz has tas, “Yog tidtswb nrug niz thaad!”
30Tadsis Yexus has tas, “Lus suas qhai tsi yog has tu kud, tadsis yog has tu mej. 31Nizna ted txug lus sijhiad kwg txabtxid tu neeg ntajtes liad; nizna lag tes yiad muas tuz kwg kaab lus ntajtes na liab tiad muz. 32Thaws lag muas kud kai dhaw qhais aab, kud yiad coj txhua yaad neeg luz cuag kud.” 33(Yexus has ni qhai, tes yog niz qha has tas, niz yiad tuag txodnyed nyaab.)
34Cob neeg coos coos qhai tes has tas, “Pes txuj Kebcai qha tu pes has tas, tuz Mexiyas yiad nrug pes nyos muz is txhis ni. Ua nyaab koj rob has tas, lag yiad muas Neeg Leej Tus dlai? Neeg Leej Ted yog tuz twg?”
35Yexus tes has tas, “Qhob kaaj tseed yiad nrug mej nyos is nyuas ntus ntxib. Thaws kwg tseed pud keb, mej ca ni raws sas nrhiab ua mej lus neej, nyos tsaad tsaws mej ntuj; tu qhob tuz kwg xuas hmo ntuj, niz yeej tsi paws has tas niz taastod muz qhob twg. 36Yog ni qhai, thaws tseed muaj qhob kaaj, mej ca ni ntseeg qhob kaaj, kuas mej ha taw ua cob neeg kwg nyos qhob kaaj.”
Cob Yudais tsi Ntseeg Yexus
Tod qaas kwg Yexus has ni qhai taaz, Yexus txiad tsib muz nkawd kuas cud tsi pud niz. 37Txiad yog Yexus ua ntaw yaad txujci tseedcees tu cud pud los cud tsi ntseeg niz tis, 38tej na txiad muaj tab rias ni Yaxayas kwg yog tuz ceb Vaajtswb luz taw has tseg liad has tas:
“Tuz Tswb, tuz twg ha yiad ntseeg tej luz kwg pes qha?
Tuz Tswb ua niz lus fwjchid tu tuz twg pud?”
39Ted yog vid ni qhai, cud ha tsi ntseeg, tu qhob Yaxayas has ntxib tas,
40“Vaajtswb ua tu cud xyuadtxwb
has ua tu cud lus sas tiab,
kuas cud qhobmuag tsi pud keb
has cud lus sas tsi totaws;
Vaajtswb has tas, ua ni qhai kuas cud tsi xod luz cuag kud
kuas kud khu cud.”
41Yaxayas has ni qhai, tu qhob niz ted pud Yexus tuz tshwjchid has niz has txug Yexus zaaj ntag.
42Txiad yog ni qhai los cob Yudais tej nudtswb kuj muaj ntaw tuz ntseeg Yexus; tadsis vid cud ntshai cob Falixais, cud ha tsi qha tu tuadtxhij paws, kuas cud tsi rawg liab tiad hub lus tseb saaslaaj muz. 43Cud nyad kuas neeg qhuas cud heeb kua ni nyad kuas Vaajtswb qhua cud.
Yexus Cob Luz Yog Txuj keb Txabtxid
44Yexus has nrob nrob tu tuadtxhij tas, “Tuz kwg ntseeg kud, tsi yog niz ntseeg kud tuas tuz nyaz, tadsis yog niz ntseeg tuz kwg txis kud luz has. 45Tuz kwg pud kud, tuz qhai pud tuz kwg txis kud luz has. 46Kud luz ua qhob kaaj tu neeg ntajtes pud keb, tuadtxhij kwg ntseeg kud yiad tsi nyos hub qhob tsaws ntuj liad. 47Tuz kwg hnob kud tej luz has tsi ua rias ni kud tej luz, kud yiad tsi txabtxid tu tuz qhai. Kud tsi yog luz txabtxid tu neeg ntajtes, tadsis yog kud luz ciad neeg ntajtes kuas cud kig cud lus txid. 48Muaj is tug yiad txabtxid tu tuz kwg tsi leez paws kud has tsi noog kud tej luz qha. Thaws txug hnoos kiag, tej luz kwg kud qha liad yiad ua tuz txabtxid tu tuz qhai. 49Tu qhob tej luz kwg kud has qhai tsi yog kud has rias ni kud lus sas, tadsis yog leej Vaid kwg txis kud luz kuas kud has has kud qha. 50Kud paws has tas niz tej luz saadfwd yog txujsa muz is txhis. Tej luz kwg kud has, puabtsig yog leej Vaid qha tu kud has.”
Селектирано:
Yawhaas 12: CQD2024
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2024 Bible Society Vietnam. All rights reserved.