Yawhaas 11
11
Laxalus Tuag
1Muaj is tug yiag hu ua Laxalus nyos hub lus zoz Npethanis, niz mos heeb. Npethanis yog lus zoz kwg Malis has niz tuz nad lawz Mathas nyos. 2(Tuz Malis na yog tuz kwg muas tshuaj tsw qaas laws tu tuz Tswb os txhais kuatia has niz muas niz cob plawshaw so; tuz Laxalus kwg mos heeb qhai yog Malis tuz nug.) 3Laxalus os tug muag txis neeg muz has tu Yexus has tas, “Tuz Tswb, koj tuz phoojywz kwg koj hlus mos heeb.”
4Thaws Yexus hnob ni qhai, niz has tas, “Laxalus tuz mos na yiad tsi ua tu Laxalus tuag; tadsis Laxalus tuz mos yiad ua tu Vaajtswb taw koos meej, has yiad ua tu Vaajtswb leej Tus taw koos meej.”
5Yexus hlus Mathas has Mathas tuz nad hluas has Laxalus heeb. 6Thaws kwg Yexus hnob has tas Laxalus mos heeb qhai, niz tseed nyos qhais qhob chia qhai taw os hnoos ntxib. 7Ces Yexus has tu niz cob thwjtid has tas, “Pes ca ni rob qaas muz tu nraaz lus xeeb Yudais.”
8Cob thwjtid tes has tas, “Xisfws, qhos ni tsi nteb na cob neeg Yudais kwg nyos nraaz ted yiad muas poszes ntaws koj; koj tseed yiad rob qaas muz nraaz kua has los?”
9Yexus has tas, “Is hnoos muaj kawd os teeb tsoos puas yog? Yog ni qhai, tuz kwg tawgkeb nruas hnoos yiad tsi diad, tu qhob niz pud qhob kaaj kwg ci tu lus ntajtes. 10Tadsis yog niz tawgkeb hmo ntuj, niz yiad diad, tu qhob niz tsi muaj qhob kaaj.” 11Tod qaas kwg Yexus has ni na taaz liad, niz rob has tas, “Pes tuz phoojywz Laxalus ted tsawg zawg liad, tadsis kud yiad muz tsaa niz siab.”
12Cob thwjtid tes has tas, “Tuz Tswb, yog niz tsawg tawz zaws liad, niz tuz mos yeej yiad zoo.”
13Yexus has ni qhai, yog has tas Laxalus ted tuag liad, tadsis cob thwjtid xaab has tas Yexus has txug qhob kwg Laxalus tsawg zaws nyaz. 14Yog ni qhai, Yexus txiad qha tsees tu cud has tas, “Laxalus ted tuag liad, 15tadsis kud zoo sas kwg muaj mej, kud ha tsi nrug niz nyos qhais, kud ua ni na kuas mej ntseeg kud. Pes ca ni muz nuad niz.”
16Thaumas (kwg hu ua Ntxais) txiad has tu cob phoojywz thwjtid has tas, “Pes ca ni nrug Xisfws muz, pes ha yiad taw nrug niz tuag ua ke.”
Yexus Yog Txuj keb Siab hub Qhob Tuag Rob Luz has Yog Txujsa
17Thaws Yexus muz txug hub Npethanis, Yexus hnob has tas cud ted muas Laxalus loz tu qhob ntxaa taw plaws hnoos liad. 18Lus zoz Npethanis nyos nrug kes qhai lus nroog Yeluxalees muz kwblaad ni pes kilumev keb. 19Cob Yudais muaj coos tuz tuaj nplig Mathas has Malis ostug sas, tu qhob ostug tuz nud tuag liad.
20Thaws Mathas hnob has tas Yexus taastod tawgkeb tuaj, Mathas txiad muz toz Yexus, tadsis Malis nyos hub tseb. 21Mathas has tu Yexus has tas, “Tuz Tswb, yog koj nrug pes nyos qhais na, kud tuz nug yeej yiad tsi tuag! 22Tadsis kud paws has tas txiad yog nizna koj thob Vaajtswb is yaad daastsi, Vaajtswb yeej yiad muas yaad qhai tu koj.”
23Yexus has tu Mathas has tas, “Koj tuz nud yeej yiad siab rob qaas luz.”
24Mathas tes has tas, “Kud paws has tas thaws txug hnoos kiag niz yeej yiad siab rob qaas luz tag.”
25Yexus has tu Mathas has tas, “Kud yog txuj keb siab hub qhob tuag rob qaas luz has yog txujsa. Tuz kwg ntseeg kud, txiad yog niz tuag liad los niz yeej yiad muaj txujsa; 26tuz kwg muaj sa nyos has ntseeg kud, tuz qhai yiad tsi tuag is zag ni. Koj puas ntseeg kud tej luz na?”
27Mathas tes has tas, “Yog tag, tuz Tswb! Kud ntseeg has tas koj yog tuz Mexiyas kwg yog Vaajtswb leej Tus kwg luz tu hub ntajtes na.”
Yexus Quaj
28Tod qaas kwg Mathas has ni na taaz, Mathas txiad rob luz has has tuasyws tu niz tuz nad hluas Malis has tas, “Xisfws tuaj liad, niz noog noog koj.” 29Thaws Malis hnob dheeb ni qhai, Malis txiad siab tseez has tiad ceeb nrooz muz cuag Yexus. 30(Yexus tsi taw tuaj txug hub zoz, niz tseed nyos qhais qhob chia kwg Mathas muz toz niz.) 31Cob Yudais kwg tuaj nplig Malis hub Malis tseb pud Malis siab tseez tiad ceeb nrooz muz liad, cud txiad rias niz qaas muz. Cud xaab has tas niz yiad muz quaj tod lus ntxaa.
32Thaws Malis muz txug qhais qhob chia kwg Yexus nyos, niz pud dheeb Yexus, niz txiad txhud cawg hlo tu qhais Yexus kuatia. Niz has tas, “Tuz Tswb, yog koj nrug pes nyos qhais na, kud tuz nud yiad tsi tuag.”
33Thaws Yexus pud Malis, has cob Yudais kwg nrug Malis tuaj qhai quaj quaj; ua tu niz ntxhub sas has mos sas heeb ni. 34Yexus txiad noog cud has tas, “Mej coj Laxalus muz loz tu qhob twg liad?”
Cud tes has tas, “Tuz Tswb, koj ca ni muz nuad.”
35Yexus txiad quaj. 36Yog ni qhai, cob Yudais has tas, “Mej nuad, Yexus hlus Laxalus heeb ni.”
37Tadsis cud cob qhai muaj qeetuz has tas, “Niz ted khu taw tuz yiag kwg xyuadtxwb kuas pud keb, niz ua tsi taw kuas Laxalus tsi xod tuag los?”
Yexus Tsaa Laxalus Siab Rob Muaj Sa
38Yexus rob nyuaj sas heeb ni. Yexus muz tu tod lus qhob ntxaa kwg lag txawg tu qhais is phaas poszes has muaj is daid txaz zes npug lus rooj ntxaas. 39Yexus has tas, “Mej ca ni muas daid txaz zes tshed tiad.”
Mathas kwg yog tuz tuag qhai tuz muag tes has tas, “Tuz Tswb, pes ted muas niz loz taw plaws hnoos liad, ntshai niz ted tsw tsw lwj liad.”
40Yexus has tu Mathas has tas, “Kud puas taw has tu koj tas, yog koj ntseeg koj yeej yiad pud Vaajtswb lus fwjchid nyaz na?” 41Yog ni qhai, cud txiad muas daid txaz zes tshed tiad. Yexus txiad tsaa qhobmuag nuad saw ntuj has has tas, “Vaid, kud ua koj tsawg kwg koj noog kud tej luz thob. 42Kud paws has tas koj yeej istxwd noog kud tej luz thob, kud has ni na, kuas cob neeg kwg nyos qhais na, ntseeg has tas koj yog tuz kwg txis kud luz.” 43Thaws Yexus has ni qhai taaz, niz txiad hu nrob nrob has tas, “Laxalus, koj ca ni tiad luz!” 44Laxalus txiad tiad luz, tej ntaws tseed qhwb niz tez tia, has muaj is daid ntaws npug niz lus ntsejmuag. Yexus has tu cud tas, “Mej ca ni dias tej ntaws kwg qhwb niz qhai has ca niz muz.”
Cob Yudais Tuabhub Muas Yexus Tua Laitaad
45Thaws cob Yudais kwg tuaj nuad Malis pud tej kwg Yexus ua qhai, muaj ntaw tuz ntseeg Yexus. 46Tadsis muaj qeetuz rob muz cuag cob Falixais has qha tej kwg Yexus ua qhai tu cud. 47Cob Falixais has cob thiaj qhai cob pobthiaj muz saaslaaj tu cob nudtswb has tas, “Pes yiad ua nyaab tu tuz yiag kwg ua ntaw yaad txujci tseedcees na? 48Yog pes ca niz ua ni na, nyos tsaad cob pejxeed yiad ntseeg niz taaz, has cob nudtswb Loos yiad tuaj muas lus Tuadtseb lawj laidtaa has muas pes yaad neeg ua kuas puadtsuaj taaz.”
49Cud cob qhai muaj is tug hu ua Kaiyafas, xyoos qhai niz ua tuz Pobthiaj Hlus, niz has tas, “Ua nyaab mej yiad tsi paws daastsi ni! 50Mej tsi paws has tas ca is tug tuag theej tuadtxhij, zoo kua ni kwg ca taaznrhiab pes yaad neeg rawg keb puadtsuaj hubtsig na los?” 51Qhob tsees, tej luz kwg niz has qhai tsi yog niz laad has; niz has ni qhai, tu qhob xyoos qhai niz ua tuz Pobthiaj Hlus, yog niz qha ua ntej has tas Yexus yiad tuag theej cob Yudais lus txhoj, 52has tsi yog tu cud nyaz, tadsis niz yiad coj taaznrhiab Vaajtswb cob minyuas kwg tsib muz nyos txhua qhob liad, rob luz nyos ua ke kua.
53Txij hnoos qhai luz cob Yudais tej nudtswb txiad tuabhub yiad muas Yexus tua laidtaa. 54Yog ni qhai, Yexus ha tsi taasmeeg muz muz luz luz hub lus xeeb Yudais liad, tadsis niz muz tu tod is lus nroog hu ua Efalayees kwg nyos ze taj suaspuad, niz nrug niz cob thwjtid nyos qhais.
55Thaws qhai ted yiad txug lus caij kwg cob Yudais ua Kebcai Hlaa Dhaw, muaj neeg coos coos tuaj pes tej yaajsaas tuaj tu hub lus nroog Yeluxalees, cud yiad xus tuaj ua kebcai ntxuab ua ntej taws maad ni ua Kebcai Hlaa Dhaw. 56Thaws cud tuaj ua ke tu hub lus Tuadtseb, cud xaad nuad puas pud Yexus, cud sis noog has tas, “Mej xaab nyaab? Niz puas tuaj ua kebcai qhai na los tsi tuaj?” 57Cob thiaj qhai cob pobthiaj has cob Falixais has tu tuadtxhij tas, yog tuz twg paws has tas Yexus nyos qhob twg, ca ni muz qha tu cud, cud yiad muz ntez Yexus.
Селектирано:
Yawhaas 11: CQD2024
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2024 Bible Society Vietnam. All rights reserved.