Yawhaas 10
10
Zaaj Luz Pibtxwb Has Txug Tuz Tswb Yug Yaaj
1Yexus has tas, “Kud qha tsees tu mej has tas tuz kwg muz hub lus nkuaj yaaj, yog niz tsi muz qhai lus rooj nkuab muz, niz ca ni nce lwd qhob muz nyaz, tuz qhai yog tusnyas. 2Tuz kwg muz qhai rooj nkuab muz, tuz qhai ha yog tuz tswb yug yaaj tsees. 3Tuz kwg zub qhob rooj yiad qhes rooj nkuab tu niz, has paas yaaj paws niz lus suas. Niz cuas niz paas yaaj tej npe has coj paas yaaj tiad muz. 4Thaws niz coj niz paas yaaj tiad muz liad, niz muz ua paas yaaj ntej, has paas yaaj rias niz qaas, tu qhob paas yaaj paws niz lus suad. 5Paas yaaj yiad tsi rias lwd tuz qaas, tadsis paas yaaj yiad tsib qhai tuz qhai muz, tu qhob paas yaaj tsi paws tuz qhai lus suad.”
6Yexus has zaaj luz pibtxwb na tu cud, tadsis cud tsi totaws xyob yog Yexus has daastsi.
Yexus Yog tuz Tswb Yug Yaaj Kwg Zoo
7Yexus rob has tu cud tas, “Kud qha tsees tu mej has tas, kud yog lus rooj nkuab yaaj. 8Txhua tuz kwg luz ua kud ntej puabtsig yog tusnyas nyaz, tadsis paas yaaj tsi noog cud tej luz. 9Kud yog lus rooj nkuag. Tuz kwg muz qhai kud muz, tuz qhai yiad kig; niz yiad muz muz luz luz has nrhab taw zaws noj. 10Thaws tusnyas tuaj, tsuas yog tuaj nyaz, tuaj tua has ua kuas puadtsuaj nyaz. Tadsis kud luz, yog luz ua kuas mej taw txujsa has taw lus neej nplua mag.
11“Kud yog tuz tswb yug yaaj kwg zoo. Tuz tswb yug yaaj kwg zoo txaws sas tuag theej paas yaaj. 12Tuz kwg lag txheeb zub paas yaaj tsi yog tuz tswb has paas yaaj tsi yog niz tug. Thaws niz pud hmaa tuaj, niz yiad tsib tso paas yaaj tseg; hmaa yiad tud paas yaaj has paas yaaj yiad tsib taaz. 13Tuz qhai tsib, tu qhob lag txheeb niz zub paas yaaj nyaz, niz ha tsi mos sas paas yaaj. 14-15Kud yog tuz tswb yug yaaj kwg zoo. Kud paws kud paas yaaj has kud paas yaaj paws kud, is yaad ni leej Vaid paws kud has kud paws leej Vaid. Kud txaws sas tuag theej kud paas yaaj. 16Kud muaj kua is paas yaaj kwg tsi nyos hub lus nkuaj na. Kud yiadtsud muz coj cud luz tu hub lus nkuaj na; cud yiad noog kud lus suad, has cud yiad luz#10.16 cud yiad luz; tej phaw qus has tas cud yiad ua. ua is paas kood is tug tswb nyaz.
17“Leej Vaid hlus kud tu qhob kud txaws sas tso kud txujsa tseg, kud ua ni qhai kud ha taw kud txujsa qhai rob qaas luz. 18Tsi muaj tuz twg yiad txees taw kud txujsa. Kud txaws sas tso kud txujsa tseg. Kud muaj cai tso kud txujsa tseg has kud muaj cai muas kud txujsa rob qaas luz. Kud Vaid kuas kud luz ua ni na.”
19Vid tej luz kwg Yexus has na, ha ua tu cob Yudais rob tsi sishud kua. 20Muaj ntaw tuz has tas, “Niz rawg daas! Niz vwd liad! Ua nyaab mej tseed yiad noog niz tej luz ua daastsi?”
21Tadsis muaj qeetuz has tas, “Tus neeg kwg rawg daas yeej tsi txiaj has ni tuz na has! Daas yeej khu tsi taw tuz neeg kwg xyuadtxwb kuas pud keb ni.”
Cob Yudais tsi Ntseeg Yexus
22Thaws lus caij ntuj na kwg ua kebcai ncu txug hnoos kwg fij lus Tuadtseb hub lus nroog Yeluxalees. 23Yexus ncig muz ncig luz hub Xalumoos lus qaaskhaab qhai lus Tuadtseb, 24ces cob neeg Yudais txiad sissaw tuaj cuag Yexus has noog niz has tas, “Koj tseed yiad ca pes toz txug thaws twg has? Yog has tas koj yog tuz Mexiyas, koj ca ni qha qhob tsees tu pes.”
25Yexus tes has tas, “Kud ted qha tu mej liad, tadsis mej tsi ntseeg kud tej luz. Tej hujlwd kwg kud Vaid kuas kud ua, ted qha tu mej paws liad; 26tadsis mej tsi ntseeg, tu qhob mej tsi yog kud paas yaaj. 27Kud paas yaaj paws kud lus suad; kud paws kud paas yaaj has paas yaaj rias kud qaas. 28Kud muas txujsa nteb dhaw muz is txhis tu cud, cud yiad tsi tuag is zag ni, has tsi muaj tuz twg yiad txees taw cud hub kud txhais tez muz ni. 29Tej kwg kud Vaid muas pus tu kud, tseedcees kua txhua yaad hubtsig,#10.29 Tej kwg kud Vaid muas pus tu kud, tseedcees kua txhua yaad hubtsig; tej phaw qus has tas kud Vaid tuz kwg muas cud pus tu kud, yog tuz kwg muaj fwjchid luj dua ntais hubtsig. has tsi muaj tuz twg tuaj txees taw tej kwg leej Vaid tsodkwd. 30Leej Vaid has kud yog tuas tuz.”
31Ces cob Yudais txiad khiad poszes yiad rob ntaws Yexus kua. 32Yexus has tu cud tas, “Kud Vaid kuas kud ua ntaw yaad hujlwd zoo tu mej pud; tej qhai yaad twg ua tu mej tsib sas, mej ha yiad muas poszes ntaws kud?”
33Cob neeg Yudais tes has tas, “Qhob kwg pes yiad muas poszes ntaws koj, tsi yog vid tej hujlwd zoo kwg koj ua, tadsis vid qhob kwg koj has luz nuad tsi tawz Vaajtswb. Koj tsuas yog neeg nyaz, tadsis koj khaab has tas koj yog Vaajtswb.”
34Yexus tes has tas, “Ted muaj luz saw tseg tu hub mej txuj Kebcai liad, Vaajtswb has tas, ‘Mej yog tej vaajtswb.’ 35Yog Vaajtswb txujlug tes has tas cud yog tej vaajtswb; yog ni qhai, yeej tsi muaj tuz twg yiad rhuab taw Vaajtswb txujlug ni. 36Kud tes yog tuz kwg leej Vaid xaib has txis kud luz tu hub ntajtes na. Ua nyaab mej has tas kud has luz nuad tsi tawz Vaajtswb, tu qhob kud has tas kud yog Vaajtswb leej Tus? 37Yog kud tsi ua tej hujlwd kwg kud Vaid kuas kud ua, ces mej tsi xod ntseeg kud tej luz. 38Tadsis kud ted ua tej hujlwd qhai liad, txiad yog mej tsi ntseeg kud los mej yiadtsud ntseeg tej hujlwd kwg kud ua qhai, mej yiad paws has tas leej Vaid has kud kood is txujsa.”
39Ces cud yiad rob ntez Yexus kua, tadsis Yexus tsib liad.
40Ces Yexus txiad hlaa tuz dej Yawladees muz tu qhais qhob chia kwg Yawhaas muas neeg ua kebcai raws dej has Yexus muz nyos tid. 41Muaj neeg coos coos tuaj cuag Yexus, cud has tas, “Yawhaas tes tsi taw ua is yaad txujci tseedcees ni, tadsis txhua yaad kwg Yawhaas has txug tuz yiag na puabtsig muaj tsees.” 42Cob neeg kwg tuaj qhai muaj ntaw tuz ntseeg Yexus.
Селектирано:
Yawhaas 10: CQD2024
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2024 Bible Society Vietnam. All rights reserved.