Yawhaas 9
9
Yexus Khu tuz Yiag Kwg Xyuadtxwb
1Thaws Yexus taastod tawgkeb muz, Yexus pud is tug yiag kwg xyuadtxwb thaws nruas thas luz liad. 2Yexus cob thwjtid noog Yexus has tas, “Xisfws, tuz twg ua txhud ha ua tu tuz yiag na xyuadtxwb thaws nruas thas luz liad? Yog niz ua txhud lossis niz nad niz vaid ua txhud?”
3Yexus tes has tas, “Qhob kwg niz xyuadtxwb ni na tsi yog vid niz tej keb txhud lossis vid niz nad niz vaid tej keb txhud. Niz xyuadtxwb kuas tuadtxhij pud Vaajtswb lus fwjchid hub niz. 4Thaws kwg tseed yog nruas hnoos, pes yiadtsud ua tuz kwg txis kud luz tej hujlwd; thaws tsaws ntuj liad yiad tsi muaj neeg pud keb ua hujlwd. 5Thaws kud tseed nyos hub ntajtes na, kud yog qhob kaaj tu neeg ntajtes pud keb.”
6Thaws Yexus has ni na taaz, Yexus txiad ntus qusncawg tu hub aab, niz muas dlu xyia hmoob aab; Yexus muas cob aab nkig qhai pleeb tuz yiag qhai os lus qhobmuag, 7has Yexus has tu tuz yiag qhai tas, “Koj ca ni muz ntxuab muas qhai lus paaz dej Xilaw-aas.” (Lus npe na txhais has tas, “Txis muz.”) Tuz yiag xyuadtxwb qhai txiad muz ntxuab muas has rob qaas luz, ces niz txiad pud keb liad.
8Tej neeg zej zoz has cob neeg kwg pheej pud tuz yiag qhai thob khiab txiad sis noog has tas, “Tuz yiag na tsi yog tuz kwg naj hnoos nyos tuasyws thob khiab los?”
9Muaj qeetuz has tas, “Niz yog tuz qhai ntag,” tadsis muaj qeetuz has tas, “Niz zoo ni tuz qhai, tadsis niz tsi yog tuz qhai.”
Tuz xyuadtxwb qhai, has tas, “Kud yog tuz qhai ntag.”
10Cud noog niz has tas, “Ua nyaab koj rob pud keb liad?”
11Niz tes has tas, “Tuz yiag kwg npe hu ua Yexus ua is co aab nkig luz pleeb kud os lus qhobmuag, has has kuas kud muz ntxuab muag qhai lus paaz dej Xilaw-aas. Yog ni qhai kud ha muz, has thaws kud ntxuab muag taaz, ces kud qhobmuag txiad pud keb liad.”
12Cud noog has tas, “Niz nyos qhob twg?”
Tuz yiag qhai tes has tas, “Kud tsi paws.”
Cob Falixais Xaab Paws Nuad Ua Caaz tuz Xyuadtxwb Rob Pud Keb
13Cud coj tuz yiag xyuadtxwb kwg ted pud keb liad muz cuag cob Falixais. 14Hnoos kwg Yexus ua aab nkig pleeb tuz xyuadtxwb qhai os lus qhobmuag yog hnoos Xanpataws. 15Cob Falixais rob noog tuz yiag qhai has tas, “Ua nyaab koj pud keb liad?” Niz qha tu cud has tas, “Tuz qhai muas isntsis aab nkig pleeb kud os lus qhobmuag, kud muz ntxuab muag taaz, ces kud txiad pud keb liad.”
16Cob Falixais muaj qeetuz has tas, “Tuz yiag kwg ua ni na yeej tsi yog tuz kwg Vaajtswb txis luz, tu qhob niz tsi fwd hnoos Xanpataws.”
Tadsis muaj qeetuz has tas, “Tuz neeg txhud yiad ua nyaab ua taw tej txujci tseedcees na? Ces cud txiad tsi sishud liad.”
17Yog ni qhai, cob Falixais rob noog tuz yiag qhai kua has tas, “Koj has tas yog tuz qhai khu koj os lus qhobmuag pud keb, koj sid pab nuad niz yog tuz twg?”
Tuz yiag qhai tes has tas, “Niz yog is tug ceb Vaajtswb luz.”
18Cob Yudais tej nudtswb tsi ntseeg has tas tuz yiag qhai yog tuz xyuadtxwb kwg ted pud keb liad muz txug thaws kwg cud muz hu niz nad niz vaid tuaj, 19has cud noog ostug has tas, “Tuz na puas yog mej tuz tu kwg mej has tas niz istxwd xyuadtxwb thaws nruas thas luz? Ua nyaab nizna niz rob pud keb liad?”
20Niz nad niz vaid tes has tas, “Pes paws has tas niz yog pes leej tus has paws has tas niz istxwd xyuadtxwb thaws nruas thas luz tag. 21Tadsis pes tsi paws xyob ua nyaab nizna niz rob pud keb liad, has pes tsi paws has tas xyob tuz twg khu niz os lus qhobmuag. Niz ted tab hluas liad, mej ca ni noog niz nyaz; niz maad ni qha tu mej.” 22Niz nad niz vaid has ni na vid ostug ntshai cob Yudais tej nudtswb, tu qhob cob Yudais tej nudtswb taw saaslaaj has tas, yog tuz twg leez has tas Yexus yog tuz Mexiyas, cud yiad muas tuz qhai liab tiad hub lus tseb saaslaaj muz. 23Ted yog vid ni na niz nad niz vaid ha has tas, “Niz ted tab hluas liad; mej ca ni noog niz nyaz!”
24Cud txiad rob hu tuz yiag kwg istxwd xyuadtxwb thaws nruas thas qhai luz cuag cud kua zag os, cud has tu niz tas, “Koj ca ni cogluz taasmeeg Vaajtswb has tas koj yiad qha qhob tsees tu pes. Pes paws has tas tuz yiag qhai yog is tug neeg txhud.”
25Tuz yiag qhai tes has tas, “Kud tsi paws has tas tuz qhai yog is tug neeg txhud lossis tsi yog. Kud tsuas paws has tas kud istxwd xyuadtxwb, tadsis nizna kud pud keb liad nyaz.”
26Cud noog has tas, “Niz ua nyaab tu koj? Niz khu koj os lus qhobmuag nyaab, koj ha pud keb?”
27Tuz yiag qhai tes has tas, “Kud ted qha taaz tu mej liad, tadsis mej tsi noog kud tej luz ni. Ua nyaab mej tseed xaab rob qaas hnob kua has? Puas yog mej xaab ua niz thwjtid has?”
28Cud txiad nthe niz has tas, “Koj ha yog tuz qhai tuz thwjtid; tadsis pes yog Mawxes cob thwjtid. 29Pes paws has tas Vaajtswb nrug Mawxes thaad nyaz; tuz neeg qhai xyob niz tuaj qhob twg tuaj pes tsi paws.”
30Tuz yiag qhai tes cud has tas, “Kud xaab tsi thoos ni! Xyob ua nyaab mej tsi paws has tas niz tuaj qhob twg tuaj, tadsis niz rob khu taw kud os lus qhobmuag pud keb liad! 31Pes paws has tas Vaajtswb yeej tsi noog cob neeg txhud tej luz; niz tsuas noog cob neeg kwg fwd niz has ua rias ni niz tej luz nyaz. 32Txij thaws chibkees kwg muaj lus ntajtes na luz, tsi taw muaj tuz twg hnob has tas muaj is tug neeg twg khu taw tuz neeg kwg xyuadtxwb thaws nruas thas luz kuas pud keb ni. 33Yog tuz qhai tsi yog tuz kwg Vaajtswb txis luz, niz yeej ua tsi taw ni na ni.”
34Cud tes has tas, “Koj yog neeg txhud thaws nruas thas luz liad, koj tseed yiad ntuaz pes has los?” Ces cud txiad muas niz liab tiad hub tseb saaslaaj muz liad.
Xyuadtxwb Saas Ntsujplig
35Thaws Yexus hnob has tas cud muas tuz yiag qhai liab tiad hub tseb saaslaaj muz liad, Yexus txiad muz noog niz has tas, “Koj puas ntseeg Neeg Leej Tus?”
36Tuz yiag qhai tes has tas, “Tuz Tswb, thob koj qha kud nuad Neeg Leej Ted yog tuz twg? Kud ha paws ntseeg niz.”
37Yexus has tu niz tas, “Koj ted pud Neeg Leej Tus liad, niz yog tuz kwg taastod nrug koj thaad na ntag.”
38Tuz yiag qhai has tas, “Tuz Tswb, kud ntseeg liad!” Has niz txiad txhud cawg hlo pehiad Yexus.
39Yexus has tas, “Kud luz hub lus ntajtes na yog luz txabtxid, kuas tuz xyuadtxwb pud keb, has kuas cob neeg kwg pud keb xyuadtxwb.”
40Cob Falixais kwg nyos qhais, muaj qeetuz hnob Yexus has ni qhai, cud txiad noog Yexus has tas, “Tsi yog koj has tas pes puabtsig xyuadtxwb hubtsig na los?”
41Yexus tes has tas, “Yog mej xyuadtxwb, ces mej tsi yog neeg txhud ni; tadsis mej khaab has tas mej pud keb, yog ni qhai, mej tseed yog neeg txhud.”
Селектирано:
Yawhaas 9: CQD2024
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2024 Bible Society Vietnam. All rights reserved.