Chibkees 8
8
Dej Nqaig
1Vaajtswb yeej ncu ntsoob Naw-es has txhua yaad tsaj kwg nrug niz nyos hub lus nkoj, niz ha ua kuas cua ntsiaj, has dej pib nqaig zuj zug muz. 2Tej qhobdej txhiab hub ntajtes txiad txhias has rooj ntug txiad kia. Naag ca ni tu, 3has dej pib nqaiz zuj zug taw is puas tsis cawg hnoos. 4Ces hnoos kawd xyaa lus xyaa hli ntuj lus nkoj ha luz khuas tu saw lus hawb roos Alalaj. 5Dej pheej nqaig zuj zug liad, has hnoos xas is lus kawd hli ntuj ha pud tej hawb roos tshwd tuaj.
6Tod qaas plaws cawg hnoos, Naw-es ha qhes qhob xaadyeez nkoj 7tso is tug uas laag yaa tiad muz, tuz uas laag qhai yaa yuz muz yuz luz txug thaws dej qhuab taaz. 8Tod qaas qhai, Naw-es rob tso kua is tug nquas yaa tiad muz nuad dej nqaig taaz liad los tsi taw, 9tuz nquas nrhab tsi taw chia tsias ni, tu qhobdej tseed nyaas pub nkaws hub ntajtes na. Tuz nquas ha yaa rob luz tsias qhais lus nkoj, has Naw-es ceb tez muz muas tuz nquas luz tu hub lus nkoj. 10Niz toz taw xyaa hnoos ntxib has rob tso kua is tug nquas yaa tiad muz nuad. 11Thaws yiad tsaws ntuj tuz nquas ha kwb taw is reb nplooj txibntoo roj qhais niz tuz kawz ncawj yaa rob qaas luz cuag Naw-es. Thaws Naw-es pud ni qhai, niz ha paws has tas dej nqaig ti aab liad. 12Ces niz rob toz taw xyaa hnoos has tso kua is tug nquas yaa muz nuad kua is zag ntxib, tadsis zag na tuz nquas tsi yaa rob luz liad.
13Naw-es hnoosnyood muaj raw pua is xyoos, tu lus is hlis ntuj hnoos xas is, hnoos qhai dej qhuab taaznrhiab hubtsig liad. Naw-es yiad tej vuaz kwg vub lus nkoj, tsaa qhobmuag nuad isncig qhai, has pud aab ted pib qhuab liad. 14Ces hnoos neez nkawd xyaa lus os hlis ntuj lus ntajtes na qhuab taaznrhiab.
15Vaajtswb has tu Naw-es has tas, 16“Koj has koj tuz puj, koj cob tus, has koj cob nyaas ca ni tiad hub lus nkoj na muz. 17Mej coj taaznrhiab tej tsaj tsi has tsaj nyeg, tsaj qud, naas, qaab, has noog hubtsig nrug koj muz, kuas tej tsaj qhai fuadvaad muz pub ntajtes.” 18Yog ni qhai, Naw-es ha coj niz tuz puj, niz cob tus, has cob nyaas tiad hub lus nkoj muz. 19Taaznrhiab tej tsaj luj tsaj yaw kwg nyos saw npoo aab, tej noog kwg yaa saw nruas ntug, nyaz ua nyaz is paas tiad hub lus nkoj luz ua tsheej paas tsheej piag rias ni nyaz yaad tsaj tusaas nraw.
Naw-es Fij Khood tu Vaajtswb
20Naw-es tees taw is lus thaaj tu tuz Tswb, niz muas tej tsaj hub has tej noog is yaad is tug coj luz tua has muas hliab taaznrhiab fij tu Vaajtswb saw lus thaaj qhai. 21Tej paa khood fij qhai tsw qaas ntxag ua tu tuz Tswb txaws sas heeb, has tuz Tswb xaab has tas, “Kud yiad tsi food phed tu lus ntajtes is zag ntxib, vid tej kwg neeg ua qhai ni liad, kud paws neeg yeej istxwd xaab phed thaws yaw luz. Kud yiad tsi ua tu txhua yaad kwg muaj sa kuas rawg puadtsuaj ni kwg kud taw ua taaz luz na liad. 22Yog lus ntajtes na tseed muaj nyos, yiad muaj caij cog qoosloo has muaj caij saw qoosloo, muaj caij ntuj kug ntuj no, muaj caij ntuj qhua has caij ntuj naag, muaj nruas hnoos has hmo ntuj muz istxhis tsi kiag.”
Селектирано:
Chibkees 8: CQD2024
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2024 Bible Society Vietnam. All rights reserved.